Un Bishita na e Isla di Saba

E ISLA di Saba cu ta forma parti di e Reino Hulandes, un tempo a fungi como bastion di piratanan cu tawata nabega e awanan di Lama Caribe en busca di botin. Awe, e isla chikitico aki, situa 240 kilometer oost di Puerto Rico, ta cas di 1.600 habitante, di cua 5 ta Testigo di Yehova. Sinembargo, e predicadonan intrepido aki ta en busca di algo hopi mas balioso cu botin. Diligentemente nan ta buscando hende cu tin “e disposicion corecto pa bida eterno.”—Echonan 13:48, NW.

E bon nobo di e Reino di Dios a yega e isla pa prome biaha dia 22 di juni 1952, ora cu Sibia, un boto di bela di 59 pia (18 meter) di Testigonan di Yehova, a hancra dilanti di costa di Saba. (Mateo 24:14) E misioneronan Gust Maki y Stanley Carter a subi The Ladder, un trapi di mas cu 500 step cu ta hiba na The Bottom, capital di Saba. * Pa siglonan, e caminda smal aki tawata e unico forma pa yega na e habitantenan di e isla.

E prome informe cu a sali publica tocante e trabou di predica na Saba tawata den e Anuario 1966 di Testigonan di Yehova. Segun e informe ei, tawatin un solo Testigo activo riba e isla. Despues, un famia di Canada a predica e bon nobo einan pa varios aña. Resientemente, Russel cu Kathy, un pareha Mericano cu a baha cu pension, a bai Saba y a participa den e trabou di predica einan. Ban lesa nan relato.

 Bishita na Saba

Ami cu mi esposa a yega cu avion como huespetnan di Ronald, kende tawata e unico Testigo di Yehova riba e isla durante gran parti di decada di 1990. Nos anfitrion ta wardando riba nos na aeropuerto. E ta keda encanta cu e caha chikito di berdura cu nos a trece como regalo, ya cu riba e isla nan no ta cultiva berdura pa bende. Nos ta subi un truck chikito, y pocopoco nos ta subi e caminda cu ta zigzag te ora nos yega na top di Mount Scenery, un volcan morto.

Nos ta para na e pueblito di Hell’s Gate pa Ronald check riba e borchi di informacion publico si ainda e invitacion pa e discurso di diadomingo t’ei. Nos ta keda contento cu ainda e t’ei. Ronald ta subi bek den truck, y nos ta sigui cu nos subida rumbo pa e pueblito mas grandi di e isla, Windwardside (Banda di Biento). Manera e nomber ta indica, e pueblito pintoresco aki ta situa na e isla su banda di biento, y ta keda un 400 meter riba nivel di lama. Ora nos core drenta den cura di Ronald su cas, nos ta mira un borchi colorido riba e balcon dilanti cu ta identific’e como un Salon di Reino di Testigonan di Yehova.

Durante e cuminda di merdia mi ta haci e pregunta cu a pone cu nos a bin bishit’e: “Ta con bo a bira un proclamado di Reino na Saba?”

Ron a conta: “Tempo cu construccion di e sucursal di Testigonan di Yehova na Puerto Rico a termina na 1993, ami cu mi casa tawata interesa pa keda den un asignacion den exterior. Anteriormente, nos a bishita Saba cu un otro pareha pionero y nos a tende cu tawatin 1.400 habitante pero ningun Testigo. Pesei nos a papia cu e Comite di Sucursal di Puerto Rico pa nos muda bin aki.

Un cos a hiba na otro, y finalmente nos a ricibi aprobacion pa muda. Lamentablemente, dos aña despues mi casa a bira gravemente malo, y nos a regresa California. Despues di su morto, mi a bin Saba bek. E cos ta cu ami no gusta cuminsa un cos sin cab’e.”

Predicacion di Cas pa Cas na Saba

E sala di Ron su cas di 100 aña bieu ta fungi tambe como Salon di Reino. * Segun cu nos ta come desayuno y prepara pa sali bai predica, awasero di un nubia cu ta pasa ta muha e cushina cu ta na aire liber. Despues di desayuno, nos ta sali cu shelo nubla pa participa den predicacion di cas pa cas den The Bottom. Na cada cas, Ron ta cuminda e doño di cas na nomber. Nos combersacion ta enfoca riba un noticia local resiente. Mayoria hende conoce Ron y su sirbishi, y hopi di nan gustosamente ta acepta literatura biblico.

Si bo no conoce e habitantenan lo por ta dificil pa mantene un registro di esnan interesa den e mensahe di Reino. Dicon? Pasobra “lei ta exigi pa tur cas ta geferf e mesun color”, segun Ron. Y berdad, ora mi wak rond mi ta mira cu tur e casnan na Saba ta blanco cu dak cora.

Na final di nos combersacion biblico, nos ta invita e doño di cas pa asisti na e discurso biblico pa publico cu nos lo tin diadomingo na e Salon di Reino. Ora Ron ta riba e isla, e ta duna un discurso publico tur siman. Actualmente, 17 estudio di Bijbel ta ser conduci na Saba. Binti persona a asisti na Conmemoracion di Cristo su morto na 2004. Y aunke e cantidad ei por parce hopi tiki, e ta representa 1 porshento di henter e poblacion di Saba.

De echo, Testigonan di Yehova no a spar ningun esfuerso pa alcansa mas tanto hende posibel cu Dios su mensahe di salbacion. Sea ta riba un isla chikitico manera Saba of riba henter un continente, Testigonan di Yehova fielmente ta cumpli cu e tarea di “haci tur e nacionnan disipel.”—Mateo 28:19.

Lamentablemente, nos bishita a yega na su fin. Segun cu nos ta subi nos avion, nos ta zuai yama ayo. Semper nos lo corda nos bishita na Saba y e tempo cu nos a pasa pa subi bai The Bottom!

[Nota]

[Mapanan na pagina 10]

PUERTO RICO

[Reconocemento pa Potret na pagina 10]

Background: www.sabatourism.com