Con pa Resolve Desacuerdonan

ED TAWATA muriendo, y Bill tawatin rabia riba dje. Dos decada prome, Ed a tuma un decision cu a pone Bill perde su trabou, y esaki a kibra e amistad pega cu un tempo nan tawatin. Awor Ed a purba disculpa su mes pa e por a muri na pas. Sinembargo, Bill a nenga di scuch’e.

Casi 30 aña despues ora cu Bill tawata serca di muri, el a splica dicon e no a pordona Ed. “Ed no tawatin nodi haci loke el a haci cu su miho amigo. Gewoon mi no kier a haci bon cu ne despues di binti aña ... Podise mi tawata robes, pero ta asina mi a sinti.” *

Normalmente desacuerdonan personal no tin resultadonan tragico asina, pero cu frecuencia nan ta laga hende gehurt of amarga. Tuma por ehempel un hende cu kisas ta sinti manera Ed. Realisando cu su decision a causa daño, e persona ei lo por ta biba cu un consenshi cu ta molesti’e y cu un sintimento di a perde un gran amistad. Sinembargo, e ta sintie gehurt ora e pensa con su compañero ofendi a rechasa nan amistad como si fuera e ta simplemente basura.

Di otro banda, un persona cu tin e mesun punto di bista cu Bill, ta considera su mes un victima inocente y por bira un persona profundamente amarga y yen di rencor. Na su opinion, su examigo tawata sa miho y ta pa malo el a perhudic’e. Hopi bes ora tin un conflicto  entre dos persona, cada un ta combenci cu ta e tin rason y cu e otro tin tur falta. Pues, asina dos hende cu prome tawata amigo ta haya nan mes como si fuera den un guera cu otro.

Nan ta bringa nan guera cu armanan silencio—esun ta bira aya banda ora e otro ta pasa aki banda, y nan ta ignora otro ora nan topa den un grupo. Djaleu, nan ta tira bista scondi riba otro of ta keda wak otro stret den cara den un manera friu, yen di odio. Ora nan papia cu otro, nan ta hacie cu un tono skerpi of ofensivo cu ta hinca manera cuchiu.

Sinembargo, aunke nan ta parce di ta completamente contra otro, probablemente nan ta di acuerdo riba algun asunto. Podise nan ta reconoce cu nan tin problema serio y cu kibra cu un amigo intimo ta algo tristo. Probablemente cada un ta sinti e dolor di e conflicto cu ta mescos cu un herida cu pus, y nan tur dos sa cu nan mester haci algo pa cur’e. Pero ken lo dal e prome paso pa drecha e amistad daña y haci pas? Ningun di dos no ta dispuesto.

Dos mil aña pasa, tawatin biaha cu e apostelnan di Hesucristo tawatin discusionnan fuerte cu otro. (Marco 10:35-41; Lucas 9:46; 22:24) Despues di un di nan discusionnan, Hesus a puntra: “Ta kico boso tawata discuti na caminda?” Berguensa a pone cu nan a keda keto y ni un no a responde. (Marco 9:33, 34) Hesus su siñansanan a yuda nan drecha cu otro. Su conseho, y esun di algun di su disipelnan, ta sigui yuda hende soluciona nan conflictonan y drecha nan amistadnan cu a kibra. Laga nos mira con.

Traha Duro pa Haci Pas

“Mi no kier papia cu e persona ei. Mi no kier mir’e ni pinta.” Si bo a yega di expresa e palabranan ei relaciona cu un persona, bo tin cu tuma accion, manera e siguiente relatonan di Bijbel ta mustra.

Hesus a siña: “Si bo presenta bo ofrenda na altar, y ayanan bo corda cu bo ruman tin algo contra bo, laga bo ofrenda ayanan dilanti di altar, y bai; reconsilia cu bo ruman prome.” (Mateo 5:23, 24) Tambe el a bisa: “Si bo ruman peca contra bo, bai y mustr’e su falta entre abo cu ne so.” (Mateo 18:15) Sea cu ta abo a ofende un persona of ta e persona a ofende bo, Hesus su palabranan ta enfatisa cu ta abo tin cu papia riba e asunto mesora cu e otro persona. Bo tin cu haci esaki cu “un spirito di mansedumbre [of, “suavidad”, NW].” (Galationan 6:1) E meta di e combersacion ei no ta pa bo hustifica bo mes djis pa bo keda bon mira den bista di otronan of pa obliga e contrapartida pa pidi despensa, ma pa reconsilia of haci pas. E conseho biblico aki ta duna resultado?

Ernest ta supervisor den un oficina grandi. * Pa hopi aña su trabou a rekeri pa e trata cu asuntonan delicado cu tur clase di hende y tambe mantene un bon relacion di trabou cu e personanan aki. El a yega di mira con lihe conflictonan personal por desaroya. El a bisa: “De bes en cuando mi a yega di tin desacuerdo cu otro hende. Pero ora esei ta e caso, mi ta sinta hunto cu e persona y papia riba e problema. Bai serca nan directamente. Enfrenta nan cu e meta di haci pas. Semper e ta funciona.”

Alicia tin amiga di diferente cultura, y el a bisa: “Tin bes mi ta bisa algo, y despues mi ta sinti cu kisas mi a ofende un persona. Mi ta bai serca e persona ei y pidie despensa. Podise mi ta pidi despensa mas di loke ta necesario pasobra asta si e persona no a sintie ofendi, ami ta sinti mi miho door cu mi a pidie despensa. E ora ei mi ta sigur cu no tin ningun malcomprondemento.”

 Con pa Vence Obstaculonan

Sinembargo, hopi bes tin hopi obstaculo cu ta blokia e caminda cu ta hiba na pas den pleitonan personal. Bo a yega di bisa: “Dicon ta ami ta esun cu tin cu haci pas prome? Ta e a causa e problema.” Of bo a yega di bai serca un persona pa resolve un problema, y e persona ta bisa bo: “Mi no tin nada di combersa cu bo”? Algun hende ta reacciona asina debi na e echo cu nan a ser gehurt emocionalmente. Proverbionan 18:19 ta bisa: “Un ruman ofendi ta mas dificil pa gana cu un stad fortifica, y pleito ta manera baranan di un kasteel.” Pesei, tene cuenta cu e persona su sintimentonan. Si e rechasa bo, laga un poco tempo pasa y purba atrobe. Kisas e ora ei e “stad fortifica” ta habri y podise a kita e “baranan” for di e porta cu ta hiba na reconsiliacion.

Un otro obstaculo pa pas por tin di aber cu un persona su sentido di respet propio. Pa algun hende, pidi despensa of asta papia cu un contrapartida ta un humiliacion. Ta bon pa un persona precupa cu su respet propio. Pero si e nenga di haci pas, su respet propio ta aumenta of e ta mengua? Acaso loke nos ta kere ta un precupacion pa respet propio, en realidad ta un capa pa nos orguyo?

E escritor di Bijbel, Santiago, ta mustra cu tin un conexion entre e spirito di pleito y orguyo. Despues cu el a saca na cla e ‘pleitonan’ y ‘conflictonan’ cu algun cristian tawatin cu otro, el a sigui bisa: “Dios ta resisti e orguyosonan, ma ta duna gracia na e humildenan.” (Santiago 4:1-3, 6) Con orguyo por stroba nos di haci pas?

Orguyo ta gaña hende, poniendo nan kere cu nan ta miho cu otronan. Hende arogante ta pensa cu nan tin e autoridad pa husga e balor moral di nan prohimo. Den ki manera? Ora surgi desacuerdo, hopi bes nan ta mira nan contrapartida como un caso perdi, no tin speransa pa mehoracion. Orguyo ta pone algun hende condena esnan cu no ta pensa mescos cu nan como hende cu no ta ni merece atencion, te pa pidi nan despensa sinsero. Pesei hende cu ta ser motiva pa orguyo personal, hopi bes ta permiti conflictonan sigui existi en bes di resolve nan manera mester ta.

Mescos cu un baricada ta para trafico riba un caretera, asina orguyo hopi bes ta frena pasonan cu ta hiba na pas. Pues si bo ripara cu bo ta resistiendo esfuersonan pa haci pas cu un persona, podise bo tin un lucha cu orguyo. Con bo por vence orguyo? Door di cultiva e cualidad net contrario—humildad.

Haci Net Lo Contrario

Bijbel ta recomenda humildad masha hopi mes. “E recompensa di humildad y e temor di SEÑOR ta rikesa, honor y bida.” (Proverbionan 22:4) Na Salmo 138:6 nos ta lesa loke Dios ta pensa di hende humilde y di hende orguyoso: “Pasobra aunke SEÑOR ta halsa, toch e ta atende e hende humilde; ma e hende orguyoso e ta conoce djaleu.”

Hopi hende ta pensa cu humildad y humiliacion ta mescos. Ta parce cu gobernantenan di mundo tambe ta pensa asina. Aunke nacionnan completo ta somete nan mes na boluntad di e lidernan politico, nan si no tin e curashi pa humildemente admiti nan erornan. Si bo tende un gobernante bisa “despensa mi”, esei ta algo digno di ser menciona den noticia. Ora cu resientemente un exfuncionario di gobierno a pidi disculpa pa su fayonan den un desaster fatal, su palabranan a bira titularnan di noticia.

Humildad ta e cualidad di ser humilde of di tin un opinion modesto di bo mes. E ta lo contrario di orguyo of arogancia. Pues humildad ta describi e punto di bista cu un persona tin di su mes, no loke otro hende ta pensa di dje. Pesei, ser humilde ta diferente for di ser humilia, cu ta algo cu otro hende ta haci cu un persona. Si un persona humildemente ta admiti su fayonan y sinseramente ta pidi pordon, esei no ta humili’e; mas bien esei ta mehora su reputacion. Bijbel ta bisa: “Prome cu su caida curason di un hende ta halsa su mes, ma humildad ta bin prome cu honor.”—Proverbionan 18:12.

 Relaciona cu politiconan cu no ta pidi disculpa pa nan erornan, un observado a bisa: “Lamentablemente ta parce cu nan ta pensa cu admiti bo erornan ta un señal di debilidad. Hende debil y insigur casi nunca ta bisa: ‘Despensa.’ Ta hende generoso y cu curashi no ta sinti cu nan ta bira menos si nan bisa: ‘M’a faya.’” Esei ta e caso tambe asta si bo no tin poder politico. Si bo haci esfuerso pa remplasa orguyo cu humildad, bo chens di logra pas den pleitonan personal lo aumenta masha hopi. Wak con un famia a descubri e berdad aki.

Un malcomprondemento a causa tension entre Julie y su ruman homber William. William a rabia asina tanto cu Julie cu su casa Joseph, cu el a kibra tur contacto cu nan. Asta el a debolbe tur e regalonan cu Julie cu Joseph a dun’e atrabes di añanan. Segun cu lunanan tawata pasa, amargura a remplasa e amistad intimo cu un tempo e ruman homber aki y su ruman mohe tawatin cu otro.

Sinembargo, Joseph a dicidi di aplica Mateo 5:23 y 24. El a purba acerca su sua cu un spirito di suavidad y a mand’e algun carta personal den cua el pidie despensa pasobra el a ofend’e. Joseph a curasha su esposa pa pordona su ruman homber. Cu tempo, William a ripara cu Julie cu Joseph sinseramente kier a haci pas, y su actitud a cambia. William cu su esposa a bai topa cu Julie cu Joseph; nan tur a pidi otro despensa, brasa otro y a restaura nan amistad.

Si bo ta anhela pa resolve un conflicto personal cu un persona, tene pasenshi y aplica e siñansanan di Bijbel y haci esfuerso pa haci pas cu e persona ei. Yehova lo yuda bo. Loke Dios a bisa Israel di antiguedad lo resulta cierto den bo caso: ‘Mara bo pone atencion na mi mandamentonan! E ora ei bo pas lo ta manera un riu, y bo husticia manera ola di lama.’—Isaias 48:18.

[Nota]

[Plachi na pagina 7]

Hopi bes pidi despensa ta trece pas bek den un relacion