“Fiel Bou di Prueba”

NA PRINCIPIO di april 1951, e poderoso gobierno Sovietico a lansa un atake repentino contra un grupo di cristian inocente den e parti west di Union Sovietico—Testigonan di Yehova. Miles di famia—incluso mucha chikito, mohe na estado y hende di edad—a ser hinca den trein di carga pa nan cuminsa un biahe dificil y agotador di 20 dia largo cu a hiba nan Siberia. Nan a ser condena na exilio permanente den condicionnan severo y primitivo.

Na april 2001, a conmemora e di 50 aniversario di e suseso historico aki na Moscu cu publicacion di un video cu ta presenta un documentario di e opresion cu Testigonan di Yehova a sufri na ex Union Sovietico pa decadanan largo. Den e documentario, historiadonan y personanan cu tawata testigo di e susesonan ta conta con e Testigonan di Yehova a sobrevivi y a asta prospera apesar di presion extremo.

Entretanto, miyones di hende na Rusia y otro caminda a wak e documentario aki, Fiel bou di Prueba—Testigonan di Yehova na Union Sovietico. Anto tanto publico en general como historiadonan tawatin masha palabra di elogio p’e. At’aki dos comentario di academiconan Ruso cu ta biba den e area caminda nan a manda mayoria famia Testigo di Yehova den exilio:

“Mi a gusta e video aki masha hopi mes. Semper mi tawata gusta e representantenan di boso religion, pero despues di a wak e video, e bon impresion cu mi tawatin di boso a bira asta mas fuerte. E video tawata hopi profesional! Mi a gusta specialmente e manera cu boso a presenta cada persona individualmente. Aunke mi ta Ortodox y mi no tin intencion di cambia mi religion, mi ta encanta cu e Testigonan. Lo mi tin gana pa nos facultad keda cu un ehemplar di e video aki. Ami cu mi coleganan a dicidi di laga nos studiantenan wak e y inclui e den e curiculo.”—Profesor Sergei Nikolayevich Rubtsov, cabes di e facultad di historia na e Universidad Pedagogico di Estado, Irkutsk, Rusia.

“Mi a keda contento cu e video aki. Semper ora hende ta traha un pelicula tocante represion, ta masha dificil pa nan desaroya e historia den un manera logico. Pero boso a logra hacie. Por fabor sinti boso liber pa trece mas di boso videonan pa mi.”—Profesor Sergei Ilyich Kuznetsov, cabes di e facultad di historia na e Universidad di Estado di Irkutsk, Rusia.

Testigonan di Yehova cu ta biba na Siberia tambe a aprecia e documentario masha. At’aki algun ehempel di nan reaccion:

“Durante e tempo cu e susesonan den e video aki tawata tumando luga, hopi hende na Rusia tawata mal informa tocante e actividad di Testigonan di Yehova. Pero ora nan wak e video aki, nan por compronde cu nos organisacion  no ta djis un tipo di secta, manera nan a pensa anteriormente. Otro personanan cu resientemente a bira Testigo di Yehova a bisa: ‘Nos no por a imagina cu nos tawata biba y traha hunto cu rumannan cristian cu a wanta asina tanto cos!’ Despues cu un Testigo a wak e video, el a expresa su deseo pa bira pionero, un predicado di tempo completo.”—Anna Vovchuk, cu nan a exilia na Siberia.

“Ora e video a pasa con polis secreto tawata bati na porta di cas di un Testigo, mi curpa a coi ril. Tawata precis manera nan a bati na nos porta. Y mi ta corda con mi mama a bisa: ‘Ta candela lo tin cualkier caminda.’ Pero tambe e video a recorda mi cu hopi Testigo a sufri mas cu mi. Tur e informacion aki ta duna nos mas fortalesa y entusiasmo pa sigui sirbi Yehova.”—Stepan Vovchuk, cu nan a exilia na Siberia.

“Mi ta yiu homber di Testigonan cu a ser exilia. Pesei mi a pensa cu mi a tende hopi cos caba di e tempo ei. Pero despues cu mi a wak e video, mi a bin realisa cu practicamente mi no tawata sa nada. Segun cu mi tawata scucha e entrevistanan, mi wowonan a yena cu awa. Awor e experencianan no ta djis historia pa mi, sino relatonan di bida real. E video a fortalece mi relacion cu Dios y a yuda mi prepara pa soporta tur dificultad cu por bini den futuro.”—Vladimir Kovash, Irkutsk.

“Pa mi, e video aki tawata mas poderoso cu un relato skirbi. Ora mi a wak y tende e entrevistanan cu e rumannan, mi a sinti como si fuera mi tambe a pasa door di e experencianan ei hunto cu nan. E ehempel di e ruman homber cu a pinta postkaart pa su yiu mohenan chikito mientras e tawata den prizon ta motiva mi pa purba alcansa curason di mi yiunan cu e berdadnan di Bijbel. Masha danki! E video aki a laga e Testigonan di Yehova na Rusia sinti mas cu nunca cu nan ta parti di e organisacion mundial di Yehova.”—Tatyana Kalina, Irkutsk.

“E dicho ‘mira un biaha ta miho cu tende shen biaha’, sigur ta aplica den caso di e video aki. E ta asina bibo, asina real! Y e tin asina hopi di aber cu nos! Despues cu mi a wak e, mi tawatin mester di hopi tempo pa mi pensa. E video a duna mi e oportunidad pa hinca mi mes den sapato di e Testigonan cu a bai den exilio. Awor ora mi compara mi circunstancia cu esnan di nan, esaki ta yuda mi haya un otro punto di bista di nos problemanan actual.”—Lidia Beda, Irkutsk.

Te cu awor, e video Fiel bou di Prueba a keda produci na 25 idioma y rond mundo e ta hayando bon acohida. * Canalnan di television na St. Petersburg, Omsk y otro stadnan na Rusia a transmiti henter e documentario. Esaki a sosode tambe den e stadnan di Ucrania Vynnytsya, Kerch, Melitopol y den e region di Lviv. Tambe el a gana premio serca huradonan internacional cu ta evalua video.

E poder di e mensahe di e documentario aki ta sinta den e ehempelnan di miles di hende comun y coriente cu a desplega un curashi y fortalesa spiritual extraordinario atrabes di añanan largo di persecucion. Testigonan di Yehova na Union Sovietico realmente a duna evidencia di ta fiel bou di prueba. Si bo kier wak e documentario aki, Testigonan di Yehova gustosamente lo busc’e pa bo. Por fabor tuma contacto cu un di nan caminda bo ta biba.

[Nota]

[Reconocemento pa Potret na pagina 8]

Stalin: U.S. Army photo

[Reconocemento pa Potret na pagina 9]

Stalin: U.S. Army photo