Guia Sabi pa Parehanan Casa

“Esposanan, sea sumiso na boso mes esposo, manera na Señor. Esposonan, stima boso esposa.” —EFESIONAN 5:22, 25.

1. Kico ta e punto di bista corecto di matrimonio?

HESUS a bisa cu matrimonio ta ora Dios uni un homber cu un mohe pa nan bira “un carni.” (Mateo 19:5, 6) Esei ta encera cu dos persona cu personalidad distinto ta siña desaroya interesnan en comun y ta traha hunto pa alcansa metanan en comun. Matrimonio ta un compromiso di bida largo, no un acuerdo temporal cu facilmente bo por kibra. Den hopi pais no ta dificil pa haya un diborcio, pero den bista di un cristian, e relacion matrimonial ta sagrado. Ta un motibo hopi serio so por ta e base pa pone fin na dje.—Mateo 19:9.

2. (a) Ki yudansa tin disponibel pa parehanan casa? (b) Dicon ta importante pa haci esfuerso pa un matrimonio por ta exitoso?

² Un consehero matrimonial a bisa: “Un bon matrimonio ta un proceso di cambio continuo segun cu e ta refleha cuestionnan nobo, trata cu problemanan cu ta surgi, y ta uza e recursonan disponibel na cada etapa di bida.” Pa casanan cristian, e recursonan ei ta entre otro, conseho sabi for di Bijbel, apoyo di nan rumannan cristian, y un relacion intimo cu Yehova mediante oracion. Un matrimonio exitoso ta sobrevivi apesar di dificultadnan, y atrabes di añanan e ta trece felicidad y satisfaccion pa e  esposo y esposa. Mas importante ainda, e ta trece honor na Yehova Dios, e Originador di matrimonio.—Genesis 2:18, 21-24; 1 Corintionan 10:31; Efesionan 3:15; 1 Tesalonicensenan 5:17.

Imita Hesus y Su Congregacion

3. (a) Menciona e puntonan principal di Pablo su conseho na parehanan casa. (b) Ki ehempel excelente Hesus a pone?

³ Dos mil aña pasa, apostel Pablo a duna conseho sabi na parehanan cristian ora el a skirbi: “Mescos cu e iglesia ta sumiso na Cristo, asina tambe e esposanan mester ta sumiso na nan esposo den tur cos. Esposonan, stima boso esposa, mescos cu Cristo tambe a stima e iglesia y a entrega su mes p’e.” (Efesionan 5:24, 25) E comparacionnan aki ta excelente! Esposanan cristian cu ta keda humildemente sumiso na nan esposo ta imita e congregacion door di reconoce y cumpli cu e principio di hefatura. Esposonan creyente cu ta sigui stima nan esposa, sea den tempo bon of dificil, ta demostra cu nan ta sigui estrechamente Cristo su ehempel di stima e congregacion y percura p’e.

4. Con esposonan por sigui Hesus su ehempel?

⁴ Esposonan cristian ta e cabes di nan famia, pero nan tambe tin un cabes, Hesus. (1 Corintionan 11:3) Pues, mescos cu Hesus a percura pa su congregacion, asina esposonan amorosamente ta percura pa nan famia den un sentido spiritual y material, asta si esei ta rekeri sacrificio personal. Nan ta pone e bienestar di nan famia prome cu nan propio deseo- y preferencianan. Hesus a bisa: “Tur loke boso kier pa hende haci pa boso, haci mescos pa nan.” (Mateo 7:12) E principio ei ta aplica specialmente den matrimonio. Pablo a mustra esaki ora el a bisa: “Esposonan tambe mester stima nan esposa manera nan mes curpa. ... Nunca ni un hende no a odia su mes carni, ma ta aliment’e y ta cuid’e.” (Efesionan 5:28, 29) Un homber mester alimenta y cuida su casa cu e mesun diligencia cu e ta alimenta y cuida su mes.

5. Con esposanan por imita e congregacion cristian?

⁵ Esposanan cu ta adora Dios ta wak riba e congregacion cristian como un ehempel. Tempo cu Hesus tawata riba tera, su siguidonan gustosamente a bandona nan ocupacionnan di antes y a siguie. Despues cu Hesus a subi na shelo, nan a sigui someti na dje, y den transcurso di casi 2.000 aña, e berdadero congregacion cristian a keda someti na dje y a sigui su liderato den tur cos. Asina tambe esposanan cristian no ta desprecia nan esposo of trata na minimisa e areglo biblico di hefatura den matrimonio. Mas bien, nan ta apoya nan esposo, ta sumiso na dje, ta coopera cu ne y asina nan ta anim’e. Ora cu tanto e esposo como e esposa ta actua den un manera amoroso asina, nan matrimonio lo tin exito y nan tur dos lo haya goso den e relacion.

Sigui Biba cu Nan cu Comprension

6. Ki conseho Pedro a duna esposonan, y dicon e ta importante?

⁶ Apostel Pedro tambe tawatin conseho pa parehanan casa, y su palabranan na esposonan  ta hopi direct. El a bisa: “Biba cu boso esposanan cu comprension, manera cu un vaso mas delicado, como cu e ta hende mohe; y dun’e honor como coheredero di e gracia di bida, pa boso oracionnan no wordo stroba.” (1 Pedro 3:7) E seriedad di e conseho di Pedro ta bisto den e ultimo palabranan di e versiculo ei. Si un esposo keda sin duna honor na su esposa, esei lo afecta e esposo su relacion cu Yehova. Su oracionnan lo ser stroba.

7. Con un esposo mester duna honor na su esposa?

⁷ Pues anto, con esposonan por duna honor na nan esposa? Duna honor na bo esposa ta nifica trat’e amorosamente, cu respet y dignidad. Trata un esposa na tal manera bondadoso lo tawata un nobedad pa hopi hende. Un experto di asuntonan Griego a skirbi: “Bou di lei Romano un mohe no tawatin ningun derecho. Pa lei el a keda semper un mucha ... E tawata totalmente bou di control di su esposo, y completamente indefenso.” Ki un contraste grandi cu siñansa cristian! E esposo cristian a duna honor na su esposa. Loke a dirigi e manera cu el a trata su esposa tawata principionan cristian, no capricho personal. Ademas, el a trat’e cu “comprension”, y a tene cuenta cu su esposa ta un vaso mas delicado.

Den Ki Sentido “un Vaso Mas Delicado”?

8, 9. Den ki maneranan hende mohe ta igual cu hende homber?

⁸ Ora cu Pedro a bisa cu e mohe ta “un vaso mas delicado”, e no tawata kiermen cu hende mohe ta mas suak cu hende homber den sentido intelectual of spiritual. Ta berdad cu hopi hende homber cristian tin privilegionan den congregacion cu hende mohe no por spera di haya, y den e famia hende mohe ta someti na nan esposo. (1 Corintionan 14:35; 1 Timoteo 2:12) No obstante, Dios ta rekeri e mesun fe, perseverancia y normanan moral halto for di tur hende, homber y mohe. Y manera Pedro a bisa, tanto esposo como esposa ta “coheredero di e gracia di bida.” Pa loke ta toca salbacion, nan tin mesun posicion dilanti di Yehova Dios.  (Galationan 3:28) Pedro su carta tawata dirigi na cristiannan ungi di prome siglo. Pues, su palabranan a recorda esposonan cristian cu como “coheredero cu Cristo”, nan y nan esposa tawatin e mesun speransa celestial. (Romanonan 8:17) Un dia, ambos lo a sirbi como sacerdote y rei den Dios su Reino celestial!—Revelacion 5:10.

⁹ Esposanan cristian ungi di ningun manera tawata inferior na nan esposonan cristian ungi. Y en principio, esei ta conta tambe pa esnan cu tin e speransa di biba riba tera. Tanto hende homber como hende mohe di e “multitud grandi” ta laba nan pañanan y haci nan blanco den sanger di e Lamchi. Tanto hende homber como hende mohe ta participa “di dia y anochi” den e grito mundial di alabansa na Yehova. (Revelacion 7:9, 10, 14, 15) Tanto hende homber como hende mohe ta spera ansiosamente pa disfruta di “e libertad glorioso di e yiunan di Dios”, ora cu nan lo deleita den e “loke ta bida berdadero.” (Romanonan 8:21; 1 Timoteo 6:19) Sea ungi of di e otro carnenan, tur cristian ta sirbi Yehova hunto como “un tou” bou di “un wardado.” (Huan 10:16) Esei ta un motibo hopi combencente pa un esposo y esposa cristian mustra e debido honor na otro!

10. Den ki sentido hende mohe ta “un vaso mas delicado”?

¹⁰ Den ki manera anto, hende mohe ta “un vaso mas delicado”? Podise Pedro tawata referi na e echo cu por lo general hende mohe su curpa ta mas chikito y nan tin menos forsa fisico cu hende homber. Ademas, den nos condicion imperfecto, e privilegio unico di haya yiu ta caba cu salu fisico di e hende mohe. Mohenan den edad pa haya yiu kisas ta confronta malestar fisico riba un base regular. Definitivamente nan tin mester di cuido y consideracion special ora nan ta sufri di tal malestar of ta soporta e agotacion di embaraso y di duna lus. Un esposo cu ta duna honor na su esposa y ta reconoce cu su esposa tin mester di apoyo, lo contribui masha hopi na e exito di e matrimonio.

Den un Famia Dividi den e Aspecto Religioso

11. Den ki sentido un matrimonio por tin exito asta si e esposo y esposa no ta di mesun religion?

¹¹ Pero kico si parehanan casa tin diferente punto di bista religioso debi cu un di nan a acepta e berdad cristian despues cu nan tawata casa caba y e otro no a acepta e berdad? Un matrimonio asina por tin exito? E experencia di hopi ta bisa cu si. Un esposo y esposa cu no tin e mesun religion toch por tin un matrimonio exitoso den e sentido cu e por dura y trece felicidad pa nan tur dos. Ademas, e matrimonio ainda ta valido den bista di Yehova; ainda nan ta “un carni.” Pesei, casanan cristian ta haya e conseho pa  keda cu e partner incredulo si e partner ei ta di acuerdo pa keda. Si nan tin yiu, e yiunan ta beneficia di e fieldad di e mayor cristian.—1 Corintionan 7:12-14.

12, 13. Siguiendo e conseho di Pedro, con esposanan cristian por yuda esposonan incredulo?

¹² Pedro a duna palabranan bondadoso di conseho na mohenan cristian cu ta biba den un famia dividi den e aspecto religioso. En principio por aplica su palabranan tambe na esposonan cristian cu ta den mesun situacion. Pedro a skirbi: “Boso, esposanan, sea sumiso na boso mes esposonan, pa si algun di nan ta desobedecido na e palabra, nan por wordo gana sin palabra pa medio di e conducta di nan esposanan, ora nan observa boso conducta puro y respetuoso.”—1 Pedro 3:1, 2.

¹³ Si un esposa cu tacto por splica su creencianan religioso na su esposo, esei lo ta hopi bon. Pero kico si e no kier scucha? Esei ta su decision. No obstante, esei no kiermen cu tur cos ta perdi, ya cu conducta cristian tambe ta duna un testimonio potente. Hopi esposo cu na principio no tawata interesa of cu tawata asta opone e religion di nan casa a haya e “disposicion corecto pa bida eterno” despues di mira e conducta excelente di nan esposa. (Echonan 13:48, NW) Asta si un esposo no acepta e berdad cristian, lo e por keda faborablemente impresiona door di e conducta di su esposa, y esei por fortifica e laso matrimonial. Un esposo kende su casa ta un Testigo di Yehova a admiti cu e nunca lo por cumpli cu e normanan halto di e Testigonan. Pero toch e ta yama su mes “e esposo felis di un esposa encantador” y sinseramente el a elogia su esposa y e esposa su compañeronan Testigo den un carta na un corant.

14. Con esposonan por yuda nan esposa incredulo?

¹⁴ Esposonan cristian cu a aplica e principionan di e palabranan di Pedro tambe a logra gana nan casa na nan banda door di nan conducta. Esposanan incredulo a ripara con nan esposo a haya un sentido di responsabilidad, a stop di malgasta cen na humamento, bebemento y wega di placa, y no ta papia cosnan ofensivo mas. Algun di e esposanan incredulo aki a sera conoci cu otro miembronan di e congregacion cristian. Nan a keda impresiona cu e amoroso hermandad cristian, y loke nan a observa entre e rumannan a hala nan na Yehova.—Huan 13:34, 35.

“E Persona Scondi di e Curason”

15, 16. Ki clase di conducta di un esposa cristian lo por gana un esposo incredulo na su banda?

¹⁵ Ki clase di conducta lo por gana un esposo na bo banda? En realidad, esei ta e clase di conducta cu hende mohe cristian naturalmente ta cultiva. Pedro a bisa: “No laga boso dornamento ta di pafo so—vlechtmento di cabei, bistimento di hoya di oro, of bistimento di paña luhoso; ma lag’e ta e persona scondi di e curason, cu e calidad incoruptibel di un spirito suave y keto, locual ta precioso den bista di Dios. Pasobra na e manera aki prome aya e mohenan santo tambe, kendenan tawata spera den Dios, tawata dorna nan mes, siendo sumiso na nan mes esposo. Asina Sara a obedece Abraham y a yam’e señor, y boso a bira su yiunan, si boso haci loke ta corecto sin tene miedo di nada.”—1 Pedro 3:3-6.

¹⁶ Pedro ta conseha un mohe cristian pa no depende riba aparencia di pafo. Mas bien, e mester laga su esposo ripara e efecto cu siñansanan di Bijbel tin riba su persona interno. Laga e esposo mira su personalidad nobo den accion. Podise lo e mira e contraste entre esei y e personalidad bieu cu e esposa tawatin. (Efesionan 4:22-24) Sigur lo e haya e esposa su “spirito suave y keto” un cos refrescante y atractivo. Tal actitud no solamente ta agrada un esposo sino tambe ta “precioso den bista di Dios.”—Colosensenan 3:12.

17. Con Sara ta un excelente ehempel pa esposanan cristian?

¹⁷ Sara ta ser menciona como un ehempel, y e ta un ehempel digno pa esposanan cristian sea cu nan esposo ta creyente of no. No tin duda cu Sara a mira Abraham como  su cabes. Asta den su curason, el a yam’e “señor.” (Genesis 18:12, NW) Sinembargo, esei no a rebaha su dignidad. E tawata claramente un mohe spiritualmente fuerte cu su propio fe firme den Yehova. De echo, e ta parti di e “nubia asina grandi di testigonan” kende nan ehempel di fe mester motiva nos pa ‘core cu perseverancia e careda cu ta poni nos dilanti.’ (Hebreonan 11:11; 12:1) Pa un esposa cristian no ta un humiliacion pa e ta manera Sara.

18. Ki principionan nos mester tene na mente den un cas dividi?

¹⁸ Den un cas caminda e casanan ta di diferente religion, e esposo ta keda e cabes. Si e ta esun den e berdad, lo e mustra consideracion pa e creencianan di su esposa sin compromete su propio fe. Si e esposa ta e creyente, e tampoco lo no compromete su fe. (Echonan 5:29) Pero toch lo e no cuestiona e hefatura di su esposo. Lo e honra e esposo su posicion y keda bou “di e lei” di su esposo.—Romanonan 7:2.

E Guia Sabi di Bijbel

19. Cua ta algun presion cu ta afecta e laso matrimonial, pero con por resisti e presionnan ei?

¹⁹ Awe, tin hopi cos cu por pone presion riba e laso matrimonial. Tin hende homber cu no ta asumi nan responsabilidadnan. Tin hende mohe cu ta nenga di acepta e hefatura di nan casa. Den algun matrimonio, un casa ta maltrata e otro sea fisicamente of verbalmente. Pa cristiannan, tension economico, imperfeccion humano y e spirito di mundo cu su inmoralidad y sentido troci di norma y balor por pone nan lealtad na prueba. Sinembargo, esposo- y esposanan cristian cu ta sigui e principionan di Bijbel, sea cual sea nan situacion, ta ricibi Yehova su bendicion. Asta si ta un partner so den e matrimonio ta aplica principionan biblico, e situacion ta miho cu si ningun di dos no tawata aplica nan. Ademas, Yehova ta stima y ta yuda su sirbidonan cu ta keda fiel na nan promesa matrimonial asta den situacionnan dificil. E no ta lubida nan lealtad.—Salmo 18:25, NW; Hebreonan 6:10; 1 Pedro 3:12.

20. Ki conseho Pedro tawatin pa tur cristian?

²⁰ Despues di conseha homber- y mohenan casa, apostel Pedro a conclui cu palabranan sinsero di estimulo. El a bisa: “Finalmente, boso tur sea di acuerdo cu otro, teniendo compasion cu otro, stimando manera ruman, y sea misericordioso y humilde den spirito, no pagando malo cu malo of insulto cu insulto, ma mas bien dunando un bendicion; pasobra boso a wordo yama pa e proposito aki pa boso por a hereda un bendicion.” (1 Pedro 3:8, 9) En berdad un conseho sabi pa tur, specialmente pa parehanan casa!

Bo Ta Corda?

• Con esposonan cristian ta imita Hesus?

• Con esposanan cristian ta imita e congregacion?

• Den ki manera esposonan ta duna honor na nan esposa?

• Cua ta e miho proceder pa un esposa cristian kende su esposo no ta un creyente?

[Preguntanan di Estudio]

[Plachi na pagina 16]

Un esposo cristian ta stima su casa y percura p’e

Un esposa cristian ta respeta y honra su casa

[Plachi na pagina 17]

Distinto for di lei Romano, siñansa cristian a rekeri di un esposo pa e duna honor na su casa

[Plachi na pagina 18]

Tanto hende homber como hende mohe di e “multitud grandi” ta spera ansiosamente riba bida eterno den Paradijs

[Plachi na pagina 20]

Sara a mira Abraham como su señor