Haci Guera Cu Palabra​—Dicon Esei Ta Haci Daño?

“Di ki fuente tin guera y di ki fuente tin pelea den boso?”—SANTIAGO 4:1, NW.

E ESCRITOR di Bijbel Santiago no a dirigi e pregunta aki na e soldanan di e legionnan Romano cu tawata bringa gueranan pa conkista cierto luganan; ni e no tawata analisando e motibonan tras di e peleanan di gueria di e Sicarionan Hudiu di prome siglo. Santiago tawata referi na pleito cu a envolve por lo menos dos persona. Dicon? Pasobra pleitonan personal ta mes destructivo cu guera. Tuma nota di e siguiente relatonan biblico.

E yiu hombernan di e patriarca Yacob a odia nan ruman Yosef (Hose) asina tanto cu nan a bend’e como esclabo. (Genesis 37:4-28) Mas despues, Rei Saul di Israel a purba mata David. Dicon? Pasobra el a envidia David. (1 Samuel 18:7-11; 23:14, 15) Den prome siglo, dos mohe cristian, Evodia (Euodias) y Sintike, a perturba e pas di henter un congregacion cu nan pleitonan.—Filipensenan 4:2.

Den temponan mas resien, hende tawata regla nan problemanan door di enfrenta otro den un duelo cu spada of cu pistol. Hopi bes un di e contrincantenan aki a muri of el a keda mancaron pa resto di su bida. Awendia, hende cu ta den enemistad cu otro por lo general ta uza palabranan amargo y skerpi como nan arma. Aunke podise no tin dramamento di sanger, atakenan verbal ta hurt sintimento y ta haci daño na hende su reputacion. Hopi bes hende inocente ta sufri den e ‘gueranan’ aki.

Considera loke a sosode algun aña pasa ora un pasto Anglicano a acusa un otro di mal maneho di e placa di iglesia. Nan pleito a bira publico, y a crea desunion entre e miembronan di e misa caminda nan tawata sirbi. Algun miembro a nenga di asisti na misa si e pasto cu nan tawata contra dje tawata esun cu ta presidi. E miembronan tawatin un desprecio asina intenso pa otro, cu nan tawata ignora otro ora nan tawata den misa pa adoracion. Ora cu e pasto cu a acusa esun, na su turno a ser acusa di mal comportacion sexual, e pleito a escala.

 E arsobispo di Canterbury a haci un apelacion na e dos pastonan, referiendo na nan pleito como “un cancer” y “un escandalo cu ta deshonra e nomber di Nos Señor.” Na 1997 un di e pastonan a bai di acuerdo pa baha cu pension. E otro a keda cu su puesto te ora e mester a bai pasobra el a yega e edad cu e mester a baha cu pension. Sinembargo, el a keda te na e ultimo momento posibel, y a baha dia cu el a haci 70 aña di edad, dia 7 di augustus 2001. The Church of England Newspaper a menciona cu e dia cu el a baha tawata e dia di fiesta di “San” Victricio. Ken tawata “San” Victricio? E tawata un obispo di siglo 4 cu segun informe, nan a bati pasobra el a nenga di bringa den ehersito. Indicando e contraste entre e dos actitudnan ei, e corant a bisa: “Nenga di bringa un guera eclesiastico no tawata un caracteristica di [e pasto cu tawata bayendo cu pension].”

E pastonan ei por a evita di haci daño na nan mes y na otro hende si nan a aplica e conseho na Romanonan 12:17 y 18, cu ta bisa: “Nunca paga malo cu malo na ningun hende. Respeta loke ta corecto den bista di tur hende. Si ta posibel, asina leu cu ta depende di boso, sea na pas cu tur hende.”

Kico di abo? Si un persona ofende bo, rencor ta motiva bo pa haci guera cu palabra? Of bo ta evita palabranan skerpi cu ta ofende, y asina tene e porta pa logra pas habri? Si bo ofende un hende, bo ta evita e persona ei, sperando cu segun cu tempo pasa lo e lubida e problema? Of bo ta cla pa pidi despensa? Sea cu bo ta pidi un persona pordon of ta abo ta esun cu ta pordona un persona, esfuersonan pa haci pas lo contribui na bo bienestar. Manera e siguiente articulo ta mustra, conseho di Bijbel por yuda nos resolve asta conflictonan bieu.