Matrimonio Por Tin Exito den e Mundo Djawe

“Bisti amor, cual ta e laso perfecto di unidad.” —COLOSENSENAN 3:14.

1, 2. (a) Ki echo relaciona cu e congregacion cristian ta un animacion? (b) Kico ta un matrimonio exitoso?

ORA nos wak den e congregacion cristian, no ta alentador pa mira asina hopi pareha casa cu ta fiel na nan partner pa 10, 20, 30 of asta mas aña? Nan a keda cu nan casa apesar di tur obstaculo.—Genesis 2:24.

² Mayoria hende lo admiti cu nan tawatin dificultad den nan matrimonio. Un observado a skirbi: “Matrimonionan felis no ta sin problema. Tin tempo bon y tin tempo malo ... Pero di un manera of otro ... e hendenan aki a keda casa apesar di e [agitacion] di bida moderno.” Parehanan exitoso a siña trata cu e tormentanan y crisisnan inevitabel cu e presionnan di bida ta trece cu ne, specialmente si nan a cria yiu. Experencia a siña parehanan asina cu amor berdadero “nunca no ta faya.”—1 Corintionan 13:8.

3. Kico estadistica ta indica tocante matrimonio y diborcio, y esaki ta hiba na ki preguntanan?

³ Na contraste, tin miyones di matrimonio cu a naufraga. Un informe a bisa: “Segun expectativa, mitar di tur matrimonio Mericano djawe lo caba den diborcio. Y mitar di e [diborcionan] ei lo tuma luga denter di e prome 7,8 añanan di matrimonio ... Di e 75 porshento di hende cu bolbe casa, 60 porshento lo bolbe diborcia.” Asta paisnan cu antes tawatin un porsentahe relativamente abou di diborcio a mira un cambio. Por ehempel, na Japon e porsentahe di diborcio a bira dobel den ultimo añanan. Kico ta algun di e presionnan cu a hiba na e situacion aki, presionnan cu tin biaha ta manifesta nan mes asta den e congregacion cristian? Kico ta necesario pa haci matrimonio un exito apesar di Satanas su esfuerso pa debilita e areglo?

 Trampanan Cu Mester Evita

4. Cua ta algun factor cu por debilita un matrimonio?

⁴ E Palabra di Dios ta yuda nos compronde e factornan cu por debilita un matrimonio. Por ehempel, considera e palabranan di apostel Pablo relaciona cu e condicionnan cu lo a existi durante e ultimo dianan aki: “Den e ultimo dianan temponan trabahoso lo bin. Pasobra hende lo ta stimado di nan mes, stimado di placa, gabado, arogante, blasfemado, desobedecido na mayornan, ingrato, impio [of, “desleal”, NW], sin amor, ireconsiliabel, cu mala lenga, sin dominio propio, grosero, odiado di loke ta bon, traido, imprudente, soberbe, mas bien stimado di placer cu stimado di Dios; cu tin aparencia di ta religioso berdad, ma cu ta nenga su poder; evita e sorto di hendenan aki.”—2 Timoteo 3:1-5.

5. Dicon un ‘stimado di su mes’ ta pone su matrimonio na peliger, y kico Bijbel ta conseha relaciona cu esaki?

⁵ Ora nos analisa e palabranan di Pablo, nos ta mira cu hopi di e cosnan cu el a menciona por contribui na desintegracion di relacionnan matrimonial. Por ehempel, hende cu ta “stimado di nan mes” ta egoista y no ta tene consideracion cu otro hende. Esposo of esposa cu ta stima nan mes so, ta dicidido pa haya loke nan kier. Nan ta inflexibel. Un actitud asina lo contribui na un matrimonio felis? Di ningun manera. Apostel Pablo sabiamente a conseha cristiannan, incluso parehanan casa: “No haci nada cu un actitud di egoismo of orguyo, ma cu humildad laga cada un di boso considera e otro mas importante cu e mes; no busca boso interes personal so, ma busca tambe interes di otronan.”—Filipensenan 2:3, 4.

6. Con amor pa placa por debilita un relacion matrimonial?

⁶ Amor pa placa tambe por causa desunion entre un esposo y esposa. Pablo a spierta: “Esnan cu kier bira rico ta cai den tentacion y den trampa y den hopi deseonan loco y dañino, cualnan ta hundi hende den ruina y destruccion. Pasobra amor pa placa ta raiz di tur sorto di maldad, y algun hende, door di desea esaki, a desvia for di e fe, y a traspasa nan mes cu hopi dolor.” (1 Timoteo 6:9, 10) Lamentablemente, e consecuencianan doloroso cu Pablo a spierta p’e ta un realidad den hopi matrimonio djawe. Den nan buskeda pa rikesa, hopi casa ta ignora e necesidadnan di nan pareha, incluso e necesidad basico di apoyo emocional y di compaño caluroso riba un base regular.

7. Den algun caso, ki comportacion a hiba na deslealtad matrimonial?

⁷ Tambe Pablo a bisa cu algun hende den e ultimo dianan aki lo ta “impio [of, desleal], sin amor, ireconsiliabel.” E voto matrimonial ta un promesa solem cu mester hiba na un laso permanente, no na traicion. (Malakias 2:14-16) Sinembargo, algun persona a dirigi nan atencion romantico na otro hende cu no ta nan casa. Un esposa di trinta y pico aña di edad kende su casa a bandon’e, a splica cu asta prome cu su esposo a bai, el a cuminsa actua mucho familiar, mucho cariñoso cu otro hende mohe. E esposo no a reconoce cu e tawata comporta su mes na un manera inapropiado pa un homber casa. E esposa a sintie hopi gehurt ora el a mira e comportacion di su esposo, y cu tacto el a purba spierta e esposo cu loke e tawata haci ta peligroso. Toch e esposo a comete adulterio. Apesar cu a duna e casa culpabel spiertamento bondadoso, e no kier a scucha. El a cana bai cai stret den e trampa.—Proverbionan 6:27-29.

8. Kico por hiba na adulterio?

⁸ Bijbel ta duna spiertamento bon cla contra adulterio. “Esun cu comete adulterio cu un mohe ta falta comprondemento; esun cu haci esaki ta caba cu su mes.” (Proverbionan 6:32) Por lo general, adulterio no ta un acto spontaneo y impulsivo. Manera e escritor  biblico Santiago a señala, un pica manera adulterio normalmente ta tuma luga solamente despues cu e ofensor a keda cu e pensamento pa comete adulterio. (Santiago 1:14, 15) E casa culpabel pocopoco ta stop di ta fiel na su partner na ken el a hura fieldad pa semper. Hesus a bisa: “Boso a tende cu a wordo bisa: ‘No comete adulterio’; ma ami ta bisa boso cu ken cu wak un mohe pa dese’e, ya caba el a comete adulterio cu ne den su curason.”—Mateo 5:27, 28.

9. Ki conseho sabi nos ta haya na Proverbionan 5:18-20?

⁹ Pesei e proceder sabi y fiel ta esun cu e buki biblico di Proverbionan ta anima pa sigui: “Laga bo fuente ta bendiciona, y alegra bo den e esposa di bo hubentud. Manera un bina amabel y un gazel gracioso, laga su pechonan satisface bo tur ora; sea semper encanta cu su amor. Mi yiu, pakico bo mester ta encanta cu un adultera, y brasa pecho di un mohe stranhero?”—Proverbionan 5:18-20.

No Core Casa

10. Dicon ta sabi pa tuma tempo pa siña conoce bo futuro casa?

¹⁰ Problemanan den matrimonio lo por surgi ora cu un pareha casa mucho pura. Kisas nan ta mucho jong y sin experencia. Of kisas nan no ta tuma tempo pa siña conoce otro, pa sa loke nan gusta of no gusta, nan metanan den bida, nan background familiar. Ta sabi pa bo tin pasenshi y tuma tempo pa siña conoce bo futuro casa. Pensa riba Yacob, yiu di Isaak. E tawatin cu traha shete aña pa su futuro suegro prome cu e tawatin mag di casa cu Raquel. E tawata dispuesto pa haci esei pasobra su sintimentonan tawata basa riba amor berdadero, no simplemente atraccion fisico.—Genesis 29:20-30.

11. (a) Kico e union matrimonial ta trece hunto? (b) Dicon ta masha importante pa uza nos abla na un manera sabi den matrimonio?

¹¹ Matrimonio ta mas cu djis un relacion romantico. E union matrimonial ta join dos persona di diferente background familiar y kende nan personalidad, composicion emocional y hopi bes asta nan educacion ta distinto. Tin biaha matrimonio ta uni dos cultura, asta dos idioma. En todo caso, e ta uni dos hende cu por expresa opinionnan distinto riba tur sorto di asunto. E dos opinionnan aki ta un parti masha real di un union matrimonial. Nan por expresa nan opinion door di critica y keha constantemente, of nan por anima otro y edifica otro calurosamente. Si, cu nos palabranan nos por sea hurt of cura nos casa. Papia sin pensa por causa hopi tension den un matrimonio.—Proverbionan 12:18; 15:1, 2; 16:24; 21:9; 31:26.

12, 13. Ki punto di bista realistico di matrimonio ta bon pa nos tin?

¹² Pesei, ta sabi pa tuma tempo pa realmente conoce bo futuro casa. Un ruman mohe cu experencia a yega di bisa: “Ora bo ta considera un futuro partner matrimonial,  pensa riba podise dies cos basico cu lo bo kier mira den e persona ei. Si bo por haya solamente shete di e dies cosnan, puntra bo mes: ‘Mi ta dispuesto pa pasa por halto di e tresnan cu e falta? Lo mi por tolera e deficiencianan ei riba un base diario?’ Si bo tin duda, hala atras y reflexiona.” Claro cu bo mester ta realistico. Si bo kier casa, sea conciente cu nunca lo bo no haya un casa perfecto. Pero na mesun momento, e persona cu finalmente bo casa cu ne tampoco no a haya un casa perfecto!—Lucas 6:41.

¹³ Matrimonio ta encera sacrificio. Pablo a enfatisa esaki ora el a bisa: “Mi no kier pa boso tin kibramento di cabes. Esun cu no ta casa ta ocupa su mes cu e cosnan di Señor, con e por agrada Señor; ma esun cu ta casa ta kibra su cabes cu e cosnan di mundo, con e por agrada su esposa, y su interesnan ta keda dividi. Y e mohe cu no ta casa y e birgen ta ocupa su mes cu e cosnan di Señor, pa e por ta santo tanto den curpa como den spirito; ma esun cu ta casa ta ocupa su mes cu e cosnan di mundo, con e por agrada su esposo.”—1 Corintionan 7:32-34.

Dicon Algun Matrimonio Ta Fracasa

14, 15. Kico por debilita e laso matrimonial?

¹⁴ Un señora cristian resientemente a pasa door di e trauma di diborcio ora cu su esposo a bai lag’e despues cu nan tawatin 12 aña casa y a cuminsa un relacion cu un otro mohe. Acaso e esposa a ripara señalnan di spiertamento prome cu e matrimonio a kibra? El a splica: “Mi casa a yega na un punto caminda e no tawata haci oracion mas. E tawata bin cu flou excuse pa no bai e reunionnan cristian y pa no bai predica. E tawata pretende cu e ta sea mucho druk of mucho cansa pa dedica tempo na mi. E no kier a papia cu mi. El a stop di papia tocante cosnan spiritual cu mi. Ta tristo cu el a cambia asina tanto. E no tawata mas e homber cu mi a casa cu ne.”

¹⁵ Mas hende ta informa cu nan a ripara e mesun señalnan, entre otro, cu nan casa a cuminsa neglisha estudio di Bijbel personal, oracion of asistencia na reunionnan cristian. Cu otro palabra, hopi persona cu finalmente a bai laga nan casa a permiti nan relacion cu Yehova debilita. Como resultado, nan no a enfoca mas riba asuntonan spiritual. Nan no tawata mira Yehova mas como un Dios bibo. E mundo nobo priminti a stop di ta un realidad. Den algun caso, e debilitacion spiritual aki a tuma luga asta prome cu e casa infiel a forma un relacion pafo di e matrimonio.—Hebreonan 10:38, 39; 11:6; 2 Pedro 3:13, 14.

16. Kico ta fortifica un matrimonio?

¹⁶ Na contraste, un pareha hopi felis ta atribui e exito di nan matrimonio na nan laso spiritual fuerte. Nan ta haci oracion hunto y ta studia hunto. E esposo a bisa: “Nos ta lesa Bijbel hunto. Nos ta sali den sirbishi hunto. Nos ta gusta haci cos hunto.” E les ta bon cla: Manteniendo un bon relacion cu Yehova lo yuda masha hopi pa haci un matrimonio solido.

Sea Realistico y Comunica

17. (a) Menciona dos cos cu ta contribui na un matrimonio exitoso. (b) Con Pablo ta describi amor cristian?

¹⁷ Tin dos otro cos cu ta contribui na un matrimonio exitoso: amor cristian y comunicacion. Ora dos hende ta enamora di otro, nan tin e tendencia di pasa por halto di otro su faltanan. E pareha kisas ta drenta den e matrimonio cu expectativanan exagera, kisas basa riba loke nan a lesa den bukinan di romance of a mira den pelicula. Sinembargo, cu tempo e pareha tin cu enfrenta realidad. E ora ei, faltanan chikito of cierto custumbernan cu ta un poco iritante por bira problemanan grandi. Si esei sosode, cristiannan tin cu desplega e fruta di spirito, di cua un aspecto ta amor. (Galationan 5:22, 23) En  berdad amor ta hopi poderoso, pero no amor romantico sino amor cristian. Pablo a describi e amor cristian ei, bisando: “Amor tin pasenshi, amor ta cariñoso ... e no ta busca su propio interes, e no ta wordo proboca, e no ta warda rencor, ... tur cos e ta tapa, tur cos e ta kere, tur cos e ta spera, tur cos e ta soporta.” (1 Corintionan 13:4-7) Ta bisto anto cu amor berdadero ta tene cuenta cu debilidad humano. Realisticamente, amor no ta spera perfeccion.—Proverbionan 10:12.

18. Con comunicacion por fortifica un relacion?

¹⁸ Comunicacion tambe ta masha esencial. Sin importa cuanto aña casa un pareha tin, nan mester papia cu otro y realmente scucha otro. Un esposo a bisa: “Nos ta expresa nos sintimentonan abiertamente, pero den un manera amigabel.” Na medida cu nan ta haya experencia, un esposo of un esposa ta siña scucha no solamente loke ta ser bisa sino tambe loke no ta ser bisa. Cu otro palabra, segun cu e añanan ta pasa, un pareha felismente casa ta siña distingui pensamento- y sintimentonan cu no a ser expresa. Algun esposa a bisa cu nan esposo no ta echt scucha nan. Algun esposo a keha cu ta parce cu nan esposa kier comunica na e momentonan mas incumbiniente. Comunicacion ta encera compasion y comprension. Comunicacion efectivo ta beneficia tanto e esposo como e esposa.—Santiago 1:19.

19. (a) Dicon por ta dificil pa pidi despensa? (b) Kico lo motiva nos pa pidi despensa?

¹⁹ Tin biaha comunicacion ta encera pidi despensa. Esei no ta semper facil. Bo mester ta humilde pa bo por admiti bo erornan. Sinembargo, esei realmente por yuda edifica un matrimonio fuerte! Un despensa sinsero por elimina un situacion cu den futuro lo por causa conflicto, y ta prepara e caminda pa berdadero pordon y un solucion di e problema. Pablo a declara: “Boso soporta otro y pordona otro, si un di boso tin un keho contra un otro; mescos cu Señor a pordona boso, asina boso tambe mester haci. Y ademas di tur e cosnan aki bisti amor, cual ta e laso perfecto di unidad.”—Colosensenan 3:13, 14.

20. Con un cristian mester trata su casa den priva y den presencia di otro hende?

 ²⁰ Un otro cos esencial den un matrimonio ta sosten mutuo. Un esposo y esposa cristian mester por confia otro y depende riba otro. Ni un di dos no mester traha na un manera fini contra e otro of haci cosnan pa kibra e otro su confiansa propio. Amorosamente nos ta elogia nos partner matrimonial; nos no ta critic’e severamente. (Proverbionan 31:28b) Anto sigur nos no ta rebah’e door di hacie e blanco di chiste- of chansanan estupido y desconsidera. (Colosensenan 4:6) Expresionnan regular di cariño ta fortifica tal sosten mutuo. Un caricia of un palabra suave di cariño por bisa: “Mi ta stima bo ainda. Mi ta contento cu bo ta cu mi.” Esakinan ta algun factor cu por influencia un relacion y yuda matrimonionan pa nan tin exito den e mundo djawe. Tin mas cos, y e siguiente articulo lo duna mas guia biblico encuanto con pa haci matrimonio un exito. *

[Nota]

Bo Por Splica?

• Cua ta algun factor cu por debilita un matrimonio?

• Dicon no ta sabi pa core casa?

• Ki efecto spiritualidad tin riba un matrimonio?

• Ki factornan ta yuda haci un matrimonio stabil?

[Preguntanan di Estudio]

[Plachi na pagina 12]

Matrimonio ta mas cu djis un relacion romantico

[Plachi na pagina 14]

Un bon relacion cu Yehova ta yuda un pareha haci nan matrimonio un exito