Storia di Bida

Nos A Uza Nos Circunstancia Cu Tawata Cambia pa Predica den Luganan Leu

SEGUN E RELATO DI RICARDO MALICSI

Ora mi a perde trabou debi na mi posicion di neutralidad cristian, ami cu mi famia a pidi Yehova yuda nos plania nos futuro. Den nos oracion, nos a expresa nos deseo di expande nos sirbishi. Poco despues di esei, nos a cuminsa un recorido cu a hiba nos na ocho pais riba dos continente. Como resultado, nos por a efectua nos sirbishi den luganan leu.

MI A nace na Filipinas na aña 1933 den un famia cu tawata afilia cu e Iglesia Filipino Independiente. Tur 14 miembro di nos famia tawata pertenece na e iglesia ei. Ora mi tawatin rond di 12 aña, mi a pidi Dios den oracion pa dirigi mi na e religion berdadero. Un di mi maestronan a inscribi mi pa un les di religion, y mi a bira un Catolico deboto. Nunca mi no tawata falta confesion riba diasabra ni santo sacrificio di misa riba diadomingo. Sinembargo, pocopoco mi a bira malcontento cu e religion y tawata yen di duda. Preguntanan tocante kico ta pasa cu hende ora nan muri y tocante fierno di candela y Trinidad tawata molestia mi. E contestanan duna door di lidernan religioso tawata bashi y no a satisface mi.

Mi Ta Haya Contesta Satisfactorio

Tempo mi tawata studia na universidad, mi a join un club pa studiantenan masculino cu a hinca mi den bringamento, hungamento di wega di placa, humamento y otro actividadnan inmoral. Un anochi, mi a sera conoci cu mama di un di mi compañeronan di klas. E señora  tawata un Testigo di Yehova. Mi a hacie e mesun preguntanan cu mi a haci mi maestronan di religion. El a contesta tur mi preguntanan for di Bijbel, y mi a keda combenci cu loke el a bisa tawata e berdad.

Mi a cumpra un Bijbel y cuminsa studi’e cu e Testigonan. Poco despues mi tawata asisti na tur e reunionnan di Testigonan di Yehova. Haciendo caso di e conseho sabi di Bijbel cu “mal compania ta daña bon custumber”, mi a distancia mi mes for di mi amigonan inmoral. (1 Corintionan 15:33) Esaki a yuda mi haci progreso den mi estudio di Bijbel y cu tempo mi a dedica mi mes na Yehova. Despues cu mi a batisa na aña 1951, mi a sirbi pa un tempo como un predicado di tempo completo (un pionero). Anto na december 1953 mi a casa cu Aurea Mendoza Cruz, kende a bira mi partner di bida largo y fiel colaborado den sirbishi.

Un Contesta Riba Nos Oracionnan

Nos realmente kier a sirbi como pionero. Sinembargo, nos deseo pa sirbi Yehova mas plenamente no a cristalisa mesora. Asina mes, nos no a stop di pidi Yehova pa habri caminda pa nos den su sirbishi. Sinembargo, nos bida tawata duro. Pero nos a keda cu nos metanan spiritual na mente, y ora mi tawatin 25 aña mi a keda nombra como sirbido di congregacion, e superintendente presidente den un congregacion di Testigonan di Yehova.

Segun cu mi a progresa den conocemento di Bijbel y a haya un miho comprondemento di Yehova su principionan, mi a bin realisa cu mi empleo a viola e posicion cu mi a tuma como cristian pa keda neutral a base di mi consenshi. (Isaias 2:2-4) Mi a dicidi di kita for di trabou. Esaki a resulta un berdadero test di nos fe. Con lo mi a bai percura pa e necesidadnan di mi famia? Atrobe nos a acerca Yehova Dios den oracion. (Salmo 65:2) Nos a cont’e nos precupacionnan y temornan, pero tambe nos a expresa na dje nos deseo di sirbi caminda tawatin mas necesidad di predicado di Reino. (Filipensenan 4:6, 7) Nunca nos a imagina cu un variedad asina grandi di oportunidad lo a habri pa nos!

Cuminsando cu Nos Recorido

Na april 1965, mi a acepta un trabou como supervisor di trabounan di candela y rescate na Aeropuerto Internacional Vientiane, na Laos, y nos a muda bai einan. Den e stad di Vientiane tawatin 24 Testigo, y tawata dushi pa predica hunto cu e misioneronan y e poco rumannan local cu tawatin. Despues, nan a transferi mi pa Aeropuerto Udon Thani, Tailandia. No tawatin ningun otro Testigo den e pueblo Udon Thani. Como famia, nos so a conduci tur e reunionnan semanal. Nos a predica di cas pa cas, haci rebishita y a cuminsa estudionan di Bijbel.

Nos a corda Hesus su conseho na su disipelnan cu nan mester sigui “carga hopi fruta.” (Huan 15:8) Pues, nos a dicidi di imita nan ehempel y a sigui proclama e bon nobo. No a tarda hopi cu nos tawatin resultado. Un hobensita Tailandes a acepta e berdad y a bira nos ruman mohe spiritual. Dos Norteamericano tambe a acepta e berdad y cu tempo a bira ancianonan cristian. Nos a sigui predica e bon nobo pa mas cu dies aña den parti nort di Tailandia. Nos ta masha felis cu awor tin un congregacion na Udon Thani! Algun di e simiñanan di e berdad cu nos a sembra ainda ta produci resultado.

Pero lamentablemente nos tawatin cu muda atrobe, y nos a pidi den oracion pa “e Señor di cosecha” yuda nos pa nos sigui participa den e trabou di predica. (Mateo 9:38) Nos a keda transferi pa Teheran, capital di Iran. Esaki tawata durante reinado di e Shah.

Predicando den Teritorionan Dificil

Ora nos a yega Teheran, nos a localisa nos rumannan spiritual mesora. Nos tawata asocia cu un grupo chikito di Testigo cu a consisti di 13 nacionalidad. Nos tawatin cu haci ahuste pa nos por a predica e bon nobo na Iran. Aunke nos no a experencia persecucion abierto, nos mester tawata cauteloso.

 Debi na e orario di trabou di personanan interesa, tawatin biaha cu nos mester a conduci estudionan di Bijbel 12 or djanochi of mas laat, y nan a dura te den oranan tempran di mainta. Sinembargo, nos tawata hopi felis di por a mira e fruta di e trabou duro ei! Un cantidad di famia Filipino y Coreano a acepta e berdad cristian y a dedica nan mes na Yehova.

Mi siguiente asignacion di trabou tawata na Dhaka, Bangladesh. Nos a yega einan na december 1977. Esaki tawata un otro pais caminda no tawata facil pa efectua nos actividad di predica. Sinembargo, semper nos tawatin na mente cu nos mester keda activo. Bou di e guia di Yehova su spirito, nos a logra haya hopi famia cu tawata afirma di ta cristian. Algun di nan tawatin sed pa e awanan refrescante di e berdad cu tin den e Santo Scritura. (Isaias 55:1) Como resultado, nos a cuminsa hopi estudio di Bijbel.

Nos tawata tene na mente cu Dios su boluntad ta pa “tur clase di hende ser salba.” (1 Timoteo 2:4, NW) Afortunadamente, ningun hende no a purba causa problema pa nos. Pa vence cualkier prehuicio, nos a haci sigur di uza un introduccion masha amigabel. Mescos cu apostel Pablo, nos a purba “bira tur cos pa tur hende.” (1 Corintionan 9:22) Ora hende tawata puntra nos e motibo di nos bishita, nos a splica nan esei bondadosamente, y nos a descubri cu mayoria hende tawata hopi amabel.

Na Dhaka nos a haya un Testigo local y nos a anim’e pa e join nos den nos reunionnan cristian y despues den e trabou di predica. Mi casa tawata studia Bijbel cu un famia y a invita nan na nos reunionnan. Mediante Yehova su bondad amoroso, henter e famia ei a bin den e berdad. Despues, dos yiu mohe di e famia a yuda traduci literatura biblico na Bengali, y hopi di nan famianan tambe a bin siña conoce Yehova. Hopi otro studiante di Bijbel a acepta e berdad. Mayoria di nan awor ta sirbi como anciano of pionero.

Como cu Dhaka ta un stad cu tin un poblacion hopi grandi, nos a invita algun di nos famianan pa bin yuda nos den e trabou di predica. Varios di nan a reacciona faborablemente y a join nos na Bangladesh. Nos ta masha contento y gradicido na Yehova cu nos tawatin e oportunidad di predica e bon nobo den e pais ei! Cu un comienso masha chikito di solamente un persona, Bangladesh tin awor dos congregacion.

Na juli 1982, nos tawatin cu muda for di Bangladesh. Cu awa na wowo nos a bai laga e rumannan. No mucho tempo despues, mi a haya empleo na Aeropuerto Internacional di Entebbe, na Uganda, caminda nos lo a keda cuater aña y shete luna. Kico nos lo por haci pa honra Yehova su gran nomber den e pais aki?

Sirbiendo Yehova na Oost Africa

Ora nos a yega Aeropuerto Internacional di Entebbe, un chauffeur a bin busca ami cu mi casa pa hiba nos na nos alohamento. Segun cu nos tawata saliendo for di aeropuerto, mi a cuminsa predica na e chauffeur tocante e Reino di Dios. El a puntra mi: “Ta Testigo di Yehova bo ta?” Ora mi a contesta cu si, e chauffeur di: “Un di bo rumannan ta traha den e toren di control.” Mesora mi a pidie hiba mi einan. Nos a sera conoci cu e ruman, cu tawata hopi contento di mira nos, y nos a haci areglo pa reunion y sirbishi di veld.

 Tawatin solamente 228 publicado di Reino na Uganda e tempo ei. Hunto cu un par di ruman na Entebbe, nos a dedica nos prome aña na sembra simiña di e berdad. Ya cu e hendenan einan tawata gusta lesa, nos por a laga hopi literatura, incluso cientos di revista. Nos a invita rumannan di Kampala, e capital, pa bin yuda nos predica e teritorio di Entebbe den finnan di siman. Na mi prome discurso publico, e asistencia tawata cinco, cu ami aden.

Durante e siguiente tres añanan, nos a experencia algun di e momentonan mas felis di nos bida, mirando con e hendenan cu nos a siña tawata reacciona bon y haci progreso rapido. (3 Huan 4) Na un asamblea di sircuito, seis di nos studiantenan di Bijbel a batisa. Hopi di nan a bisa cu nan a ser anima pa drenta e sirbishi di tempo completo debi cu nan a mira nos sirbi como pionero, maske nos tawatin trabou full-time.

Nos a realisa cu nos luga di empleo tambe por ta un teritorio fructifero. Na un ocasion, mi a acerca un funcionario di departamento di candela di aeropuerto y a comparti cu ne e speransa biblico di bida den un paradijs riba tera. Mi a mustr’e for di su propio Bijbel cu humanidad obediente lo biba den pas y union, y lo no sufri mas di pobresa, falta di vivienda, guera, malesa ni morto. (Salmo 46:9; Isaias 33:24; 65:21, 22; Revelacion 21:3, 4) Lesando esaki den su propio Bijbel a lanta su interes. Nos a cuminsa un estudio di Bijbel mesora. E tawata asisti na tur reunion, y poco despues el a dedica su mes na Yehova y a batisa. Mas despues el a join nos den e sirbishi di tempo completo.

Dos biaha disturbionan civil a lanta cabes na Uganda mientras cu nos tawata einan, pero esei no a trece un paro na nos actividadnan spiritual. E miembronan di famia di personanan cu tawata traha pa agencianan internacional a keda transferi pa Nairobi, Kenia, pa seis luna. Nos cu a keda atras na Uganda a sigui cu nos reunionnan cristian y cu e trabou di predica, aunke nos mester tawata prudente y cauteloso.

Na april 1988, mi a termina mi asignacion di trabou y nos a bolbe muda. Nos a bai laga Congregacion Entebbe cu un satisfaccion profundo debi na e desaroyonan spiritual cu a tuma luga einan. Na juli 1997, nos a haya chens di bolbe bishita Entebbe. Pa e tempo ei, algun di nos exstudiantenan di Bijbel tawata sirbi como anciano. Nos a keda hopi emociona ora nos a mira cu tawatin 106 persona presente na e Reunion Publico!

Mudando pa Teritorio Birgen

Acaso nos lo a haya oportunidadnan nobo? Si, mi siguiente asignacion di trabou tawata na Aeropuerto Internacional di Mogadishu, na Somalia. Nos tawata dicidido pa haci bon uzo di e oportunidad nobo aki pa sirbi den un teritorio birgen.

Nos actividad di predica tawata limita principalmente na personal di embahada, trahadonan Filipino y otro hende stranhero. Hopi bes nos tawata topa nan na mercado. Tambe nos tawata haci bishitanan amistoso na nan cas. Door di combina ingeniosidad, creatividad, prudencia y pleno confiansa den Yehova, nos a logra comparti e berdad biblico cu otro hende, y esaki a produci fruta entre hendenan di diferente nacionalidad. Despues di dos aña,  nos a bai for di Mogadishu, un poco prome cu guera a cuminsa einan.

E Organisacion Internacional di Aviacion Civil siguientemente a asigna mi na Yangon, Myanmar. Atrobe, nos tawatin excelente oportunidad pa yuda personanan di curason honrado siña tocante Dios su proposito. Despues di Myanmar, nan a asigna nos na Dar es Salaam, Tanzania. Na Dar es Salaam tawata hopi mas facil pa predica e bon nobo di cas pa cas pasobra tawatin un comunidad di abla Ingles.

Den tur e paisnan cu nos a traha, nos tawatin masha tiki problema pa efectua nos ministerio, aunke den hopi caso, tawatin restriccion riba e trabou di Testigonan di Yehova. Debi na e status di mi trabou, cu por lo general tawata conecta cu agencianan gubernamental of internacional, hende no tawata cuestiona nos actividadnan.

Mi empleo a exigi di mi cu mi casa pa nos biba den un pais tras di otro durante tres decada. Sinembargo, nos a considera mi trabou simplemente como un medio pa alcansa nos meta principal. Y e meta ei tawata semper pa promove interesnan di e Reino di Dios. Nos ta gradici Yehova cu el a yuda nos haci bon uzo di nos circunstancia cu tawata cambia y disfruta di e privilegio maraviyoso di plama e bon nobo den luganan leu.

Bek Caminda Tur Cos A Cuminsa

Na edad di 58 aña, mi a dicidi di baha cu pension prematuro y regresa Filipinas. Ora nos a yega bek, nos a pidi Yehova pa dirigi nos pasonan. Nos a cuminsa sirbi den un congregacion na Ciudad Trece Martires, den e provincia di Cavite. Na principio ora nos a yega, tawatin solamente 19 proclamado di e Reino di Dios. Areglonan a ser haci pa actividadnan di predica diariamente, y nos a cuminsa hopi estudio di Bijbel. E congregacion a cuminsa crece. Na dado momento, mi esposa tawatin 19 estudio di Bijbel y ami tawatin 14.

No a tarda hopi cu e Salon di Reino a bira mucho chikito. Nos a resa na Yehova tocante esaki. Un ruman homber spiritual cu su casa a dicidi di duna un pida tereno, y sucursal a aproba un fiansa pa construi un Salon di Reino nobo. E edificio nobo tawatin un gran impacto riba e trabou di predica, y e asistencia tawata subi tur siman. Actualmente, nos ta biaha mas cu un ora ida y buelta pa yuda un otro congregacion cu tin 17 publicado.

Ami cu mi esposa ta aprecia e privilegio cu nos tawatin di sirbi den asina tanto pais. Mirando bek riba nos bida di muda di un luga pa otro, nos ta sinti un profundo satisfaccion sabiendo cu nos a uza nos bida den e miho manera posibel—pa yuda otro hende siña tocante Yehova!

[Mapa na pagina 24, 25]

(Pa e texto den su formato completo , wak e publicacion)

TANZANIA

UGANDA

SOMALIA

IRAN

BANGLADESH

MYANMAR

LAOS

TAILANDIA

FILIPINAS

[Plachi na pagina 23]

Ami hunto cu mi casa, Aurea