“Boso A Wordo Cumpra pa un Prijs”

“Boso a wordo cumpra pa un prijs: pesei glorifica Dios.”—1 CORINTIONAN 6:20.

1, 2. (a) Segun e Lei di Moises, con mester a trata esclabonan Israelita? (b) E esclabo cu a stima su shon tawatin ki opcion?

“SCLABITUD tawata un cos comun y generalmente acepta den e mundo di antiguedad”, segun Holman Illustrated Bible Dictionary. E diccionario ta agrega: “E economia di Egipto, Grecia y Roma tawata basa riba labor di esclabo. Den e prome siglo Cristian, un di cada tres persona na Italia y un di cada cinco den otro paisnan tawata esclabo.”

² Aunke den antiguo Israel tambe a existi sclabitud, e Lei di Moises a percura pa esclabonan Hebreo haya proteccion. Por ehempel, un rekisito di e Lei tawata cu un Israelita no por a sirbi como esclabo pa mas cu seis aña. Den e di shete aña, e mester a “sali liber, sin paga nada.” Pero e reglanan relaciona cu e manera pa trata esclabo tawata asina husto y humano cu e Lei di Moises tawatin e siguiente areglo: “Si e esclabo bisa bon cla: ‘Mi stima mi shon, mi esposa y mi yiunan; mi no kier sali liber’, e ora ei su shon mester hib’e dilanti di e huesnan. Despues e shon mester hib’e na e porta of na e kozijn-di-porta, y su shon mester bora su horea cu prim; y e esclabo mester sirbie pa semper.”—Exodo  21:2-6; Levitico 25:42, 43; Deuteronomio 15:12-18.

3. (a) Ki tipo di sclabitud e Cristiannan di prome siglo a acepta? (b) Kico ta motiva nos pa sirbi Dios?

³ E areglo aki di sclabitud boluntario a duna un bista adelanta di e tipo di sclabitud cu Cristiannan berdadero ta bou di dje. Por ehempel, e escritornan biblico Pablo, Santiago, Pedro y Hudas a identifica nan mes como sirbido [of, “esclabo”, NW] di Dios y di Cristo. (Tito 1:1; Santiago 1:1; 2 Pedro 1:1; Hudas 1) Pablo a recorda e Cristiannan Tesalonicense cu nan a ‘bandona nan idolonan pa sirbi un Dios bibo y berdadero como esclabo.’ (1 Tesalonicensenan 1:9, NW) Kico a motiva e Cristiannan ei pa boluntariamente bira esclabo di Dios? Wel, kico tawata e motivacion den caso di e esclabo Israelita cu a renuncia su libertad personal? Acaso no tawata amor pa su shon? Sclabitud Cristian ta basa riba amor pa Dios. Ora nos siña conoce y stima e Dios bibo y berdadero, nos ta sinti nos motiva pa sirbie ‘cu henter nos curason y cu henter nos alma.’ (Deuteronomio 10:12, 13) Pero kico bira esclabo di Dios y di Cristo ta encera? Ki efecto esaki tin riba nos bida diario?

‘Haci Tur Cos pa e Gloria di Dios’

4. Con nos ta bira esclabo di Dios y di Cristo?

⁴ Un esclabo ta un persona cu ta e propiedad legal di un otro of di otronan, y cu ta obliga na rindi obediencia absoluto. Nos ta bira Yehova su propiedad legal na momento cu nos dedica nos bida na dje y batisa. Apostel Pablo a splica: “Boso no ta pertenece na boso mes ... Pasobra boso a wordo cumpra pa un prijs.” (1 Corintionan 6:19, 20) E prijs ei naturalmente ta Hesucristo su sacrificio di rescate, ya cu a base di esei Dios ta acepta nos como su sirbidonan, sea cu nos ta Cristiannan ungi of nan compañeronan cu un speransa terenal. (Efesionan 1:7; 2:13; Revelacion 5:9) Pues, for di momento di nos bautismo, ‘nos ta di Yehova.’ (Romanonan 14:8) Siendo cu nos a ser cumpra cu e sanger precioso di Hesucristo, nos ta bira su esclabo tambe y nos ta bou di e obligacion di warda su mandamentonan.—1 Pedro 1:18, 19.

5. Kico ta nos obligacion principal como esclabo di Yehova, y con nos por cumpli cu ne?

⁵ Esclabonan mester obedece nan shon. Nos sclabitud ta boluntario y ta ser motiva door di nos amor pa e Shon. Prome Huan 5:3  ta declara: “Esaki ta e amor di Dios, cu nos ta warda su mandamentonan; y su mandamentonan no ta pisa.” Pues den nos caso, nos obediencia ta prueba di nos amor y tambe di nos sumision. E ta bisto den tur loke nos ta haci. Pablo a bisa: “Sea cu boso ta come of bebe of kico cu boso ta haci, haci tur pa e gloria di Dios.” (1 Corintionan 10:31) Den bida diario, asta den cosnan chikito, nos kier mustra cu nos ta ‘sirbi Yehova’ manera esclabo.—Romanonan 12:11.

6. Con e echo cu nos ta esclabo di Dios ta influencia e decisionnan cu nos ta tuma den bida? Ilustra esaki cu un ehempel.

⁶ Por ehempel, ora di tuma decision, nos kier percura pa tene cuenta cu e boluntad di nos Shon celestial, Yehova. (Malakias 1:6) Decisionnan dificil lo por pone na prueba nos obediencia na Dios. Nos lo haci caso e ora ei di Dios su conseho en bes di sigui e inclinacionnan di nos curason “engañoso” y “corupto”? (Yeremias 17:9) Melisa, un Cristian soltera, tawatin un poco tempo batisa ora cu un yoncuman a cuminsa interesa den dje. E tawata parce un hende decente, y tawata studia Bijbel caba cu Testigonan di Yehova. Apesar di esei, un anciano a papia cu Melisa y a mustr’e cu ta sabi pa haci caso di Yehova su mandamento pa casa “basta ta den Señor.” (1 Corintionan 7:39; 2 Corintionan 6:14) Melisa a admiti: “No tawata facil pa mi sigui e conseho aki. Pero mi a dicidi cu siendo cu mi a haci un dedicacion na Dios pa haci su boluntad, lo mi obedece su instruccionnan bon cla.” Reflexionando riba loke a sosode despues, el a bisa: “Mi ta masha contento cu mi a sigui e conseho. Poco despues e mucha homber a stop di studia. Si mi a sigui cu mi amistad cu ne, aworaki lo mi tawata casa cu un incredulo.”

7, 8. (a) Dicon nos no mester ta demasiado precupa pa agrada hende? (b) Ilustra con nos por vence miedo di hende.

⁷ Como esclabo di Dios, nos no mester bira esclabo di hende. (1 Corintionan 7:23) Ta berdad cu ningun di nos no gusta ta impopular, pero nos tin cu corda cu Cristiannan tin normanan cu ta distinto for di esnan di mundo. Pablo a puntra: “Ta hende mi ta trata di agrada?” Su conclusion tawata: “Si ainda ta hende mi tawata trata di agrada, lo mi no tawata un sirbido di Cristo.” (Galationan 1:10)  Simplemente nos no mag entrega na presion di nos pareunan y bira personanan cu ta trata di agrada hende. Kico anto nos por haci ora nos ser presiona pa adapta na e normanan di mundo?

⁸ Considera e ehempel di Elena, un hoben Cristian na Spaña. Den su klas tawatin varios mucha cu tawata donor di sanger. Nan tawata sa cu Elena, como un Testigo di Yehova, lo no a duna sanger ni acepta transfusion di sanger. Ora un oportunidad a presenta cu Elena por a splica su posicion na henter e klas, el a ofrece pa duna un presentacion. Elena a conta: “Francamente, mi tawata hopi nervioso pa haci esaki. Pero mi a prepara bon, y e resultado tawata sorprendente. Mi a gana e respet di hopi di e muchanan den mi klas, y e docente a bisa mi cu e ta admira e trabou cu mi ta haci. Mas cu tur cos, mi a sinti mi satisfecho cu mi a defende e nomber di Yehova y cu mi por a splica bon cla e motibonan di mi posicion basa riba Bijbel.” (Genesis 9:3, 4; Echonan 15:28, 29) Si, como esclabo di Dios y di Cristo, nos ta sobresali como diferente. Sinembargo, den hopi caso nos lo gana e respet di otro hende si nos ta cla pa defende nos creencianan cu respet.—1 Pedro 3:15.

9. Kico nos ta siña di un angel cu a aparece na apostel Huan?

⁹ Un otro beneficio di corda cu nos ta esclabo di Dios ta cu esei por yuda nos keda humilde. Na un ocasion, apostel Huan tawata asina impresiona cu e vision magnifico di Herusalem celestial cu el a cai abou pa adora dilanti pia di e angel cu a fungi como bosero di Dios. E angel a bis’e: “No haci e cos ei; mi ta un co-sirbido [of, coesclabo] di bo y di bo rumannan, e profetanan, y di esnan cu ta warda e palabranan di e buki aki; adora Dios.” (Revelacion 22:8, 9) E angel ei definitivamente a pone un excelente ehempel pa tur esclabo di Dios! Cierto Cristiannan kisas ta den puesto di responsabilidad special den e congregacion. No obstante, Hesus a bisa: “Ken cu kier bira grandi entre boso lo ta boso sirbido, y ken cu kier ta esun di prome entre boso lo ta boso esclabo.” (Mateo 20:26, 27) Como siguidonan di Hesus, nos tur ta esclabo.

“Nos A Haci Solamente Loke Nos Mester A Haci”

10. Duna algun ehempel biblico pa mustra cu no tawata semper facil pa fiel sirbidonan di Dios haci su boluntad.

¹⁰ Haci e boluntad di Dios no ta semper facil pa hende imperfecto. Profeta Moises no tawata masha dispuesto pa obedece ora cu Yehova a pidie bai y libra e yiunan di Israel for di sclabitud den Egipto. (Exodo 3:10, 11; 4:1, 10) Ora cu Yonas a ricibi e asignacion pa proclama un mensahe di huicio na e hendenan di Ninive, el a “lanta pa hui bai Tarsis for di e presencia di SEÑOR.” (Yonas 1:2, 3) Baruk, e secretario di profeta Yeremias, a keha cu el a cansa. (Yeremias 45:2, 3) Con nos mester reacciona ora nos deseo of preferencia personal ta na conflicto cu e hacimento di Dios su boluntad? Un comparacion cu Hesus a conta ta duna e contesta.

11, 12. (a) Conta brevemente e comparacion di Hesus cu tin para skirbi na Lucas 17:7-10. (b) Ki les nos ta saca for di e comparacion di Hesus?

¹¹ Hesus a conta di un esclabo cu a pasa henter dia ta cuida e tou di su shon den cunucu.  Ora e esclabo a yega cas, cansa despues di casi 12 ora di trabou pisa, su shon no a invit’e pa cai sinta y disfruta di un bon cena. Al contrario, e shon a bis’e: “Prepara algo pa mi come, y faha bo mes y sirbi mi te ora cu ami a caba di come y bebe; y despues abo por come y bebe.” E esclabo por a atende su propio necesidad despues cu el a sirbi su shon. Hesus a conclui e comparacion bisando: “Asina boso tambe, ora boso haci tur loke boso a wordo ordena, bisa: ‘Nos ta esclabonan inutil; nos a haci solamente loke nos mester a haci.’”—Lucas 17:7-10.

¹² Hesus no a duna e comparacion aki pa mustra cu Yehova no ta aprecia loke nos ta haci den sirbishi. Bijbel ta declara bon cla: “Dios no ta inhusto pa lubida boso trabou y e amor cu boso a mustra pa su nomber.” (Hebreonan 6:10) Mas bien, e punto di Hesus su parabola ta cu un esclabo no por agrada su mes ni consentra riba su propio comodidad. Ora nos a dedica nos mes na Dios y a scohe pa ta su esclabo, nos a bai di acuerdo pa pone su boluntad prome cu esun di nos. Nos tin cu somete nos propio boluntad na e boluntad di Dios.

13, 14. (a) Den ki circunstancianan kisas nos tin cu supera nos propio inclinacionnan? (b) Dicon nos tin cu laga Dios su boluntad prevalece?

¹³ Kisas ta rekeri hopi esfuerso di nos parti pa nos studia e Palabra di Dios y e publicacionnan di e “esclabo fiel y prudente” riba un base regular. (Mateo 24:45) Esaki por ta e caso specialmente si nunca nos no tawata gusta lesa of si un publicacion ta trata “e profundidadnan di Dios.” (1 Corintionan 2:10) Pero apesar di esei nos mester traha tempo pa estudio personal, no ta berdad? Kisas nos tin cu disiplina nos mes pa cai sinta y no pasa pura pura door di e material di estudio. Pasobra si nos no haci esei, ta con nos lo por siña gusta “cuminda solido [cu] ta pa hende madura”?—Hebreonan 5:14.

¹⁴ Kico di e biahanan cu nos ta yega cas cansa despues di un dia largo di trabou? Podise nos tin cu forsa nos mes pa asisti na reunionnan Cristian. Of kisas predica na hende straño ta bai contra nos inclinacion natural. Pablo mes a reconoce cu por sosode cu nos ta declara e bon nobo ‘contra nos boluntad.’ (1 Corintionan 9:17) Sinembargo, nos ta haci e cosnan aki pasobra Yehova—nos Shon celestial cu nos stima—ta bisa nos cu nos mester haci nan. Y semper nos ta sinti nos satisfecho y refresca despues cu nos a haci e esfuerso pa studia, pa asisti na reunion y pa predica, no ta asina?—Salmo 1:1, 2; 122:1; 145:10-13.

No “Wak Patras”

15. Con Hesus a pone un ehempel di sumision na Dios?

¹⁵ Hesucristo a demostra su sumision na su Tata celestial den un manera extraordinario. El a bisa su disipelnan: “Mi a baha for di shelo, no pa haci mi mes boluntad, sino e boluntad di esun cu a manda mi.” (Huan 6:38) Ora cu e tawata den agonia den e hofi di Getsemani, el a pidi den oracion: “Mi Tata, si ta posibel, laga e copa aki pasa bai for di mi; sinembargo, no manera ami kier, ma manera abo kier.”—Mateo 26:39.

16, 17. (a) Con nos mester mira e cosnan cu nos a laga atras? (b) Mustra con Pablo tawata realistico ora el a evalua su prospectonan mundano como “basura.”

¹⁶ Hesucristo kier pa nos keda fiel na nos decision pa ta esclabo di Dios. El a bisa: “Ningun hende cu ta pone man na ploeg y ta wak patras no ta apto pa e reino di Dios.” (Lucas 9:62) Keda pensa riba e cosnan cu nos a laga atras, definitivamente no ta e cos corecto pa haci ora nos ta traha como esclabo pa Dios. Mas bien nos mester tin gran aprecio pa loke nos a gana ora nos a scohe pa bira esclabo di Dios. Pablo a skirbi e Filipensenan: “Mi ta considera tur cos como pierde compara cu e balor superior di conoce Cristo Hesus mi Señor, pa kende mi a sufri pierde di tur cos, y  ta considera nan como basura, pa mi por gana Cristo.”—Filipensenan 3:8.

¹⁷ Pensa un rato riba tur e cosnan cu Pablo a considera como basura y cu el a bandona na fabor di e recompensanan spiritual como esclabo di Dios. El a laga atras no solamente e comodidadnan di mundo sino tambe e posibilidad di bira un futuro lider di Hudaismo. Si Pablo a sigui practica Hudaismo, por ta masha bon cu lo el a yega na un puesto similar cu esun di Simeon, yiu di Pablo su educado, Gamaliel. (Echonan 22:3; Galationan 1:14) Apesar di cu Simeon tawatin algun duda, el a bira un lider di e Farizeonan y a hunga un papel prominente den e rebelion Hudiu contra Roma di aña 66 pa 70 di nos era. El a muri den e conflicto ei na man di sea extremistanan Hudiu of di e ehersito Romano.

18. Duna un ehempel pa mustra con logronan spiritual ta duna satisfaccion.

¹⁸ Hopi Testigo di Yehova a sigui e ehempel di Pablo. Jean por ehempel ta conta: “Despues di un par di aña cu mi a caba scol, mi a haya trabou como secretaria ehecutivo serca un abogado prominente na London. Mi a gusta mi trabou y tawata gana bon placa, pero den mi curason mi tawata sa cu lo mi por a haci mas pa sirbi Yehova. Finalmente, mi a entrega mi retiro y a cuminsa traha pionero. Mi ta masha gradicido cu mi a dal e paso ei casi 20 aña pasa! Mi sirbishi di tempo completo a enrikece mi bida mas cu mi trabou di secretaria hamas lo por a haci. No tin nada cu ta duna mas satisfaccion cu mira con e Palabra di Yehova por cambia bida di un persona. Ta un cos maraviyoso di por tin un parti den esei. Loke nos ta duna Yehova no ta nada compara cu loke nos ta ricibi.”

19. Kico mester ta nos determinacion, y dicon?

¹⁹ Nos circunstancianan kisas ta cambia cu tempo. Sinembargo, nos dedicacion na Dios ta keda mescos. Nos ta keda esclabo di Yehova, y e ta laga na nos pa dicidi con ta e miho manera pa nos uza nos tempo, energia, talentonan y otro pocesionnan. Pues, e decisionnan cu nos ta tuma relaciona cu esaki por refleha nos amor pa Dios. Tambe nan ta mustra te na ki grado nos ta dispuesto pa haci sacrificio personal. (Mateo 6:33) Sin importa den ki circunstancia nos ta, nos no mester ta dicidido pa duna Yehova lo miho? Pablo a skirbi: “Si e boluntad t’ei, e ta aceptabel segun loke un hende tin, no segun loke e no tin.”—2 Corintionan 8:12.

“E Beneficio Cu Bo Tin”

20, 21. (a) Ki fruta e esclabonan di Dios ta produci? (b) Con Yehova ta recompensa esnan cu ta dun’e lo miho?

²⁰ Ser esclabo di Dios no ta opresivo. Al contrario, e ta spar nos di un forma di sclabitud perhudicial cu ta horta nos di felicidad. Pablo a skirbi: “Awor cu boso a wordo libra di pica y a bira esclabo di Dios, e beneficio cu boso tin ta resulta den santificacion, y e fin, bida eterno.” (Romanonan 6:22) Nos forma di sirbi Dios manera esclabo ta produci beneficio cu ta resulta den santificacion, esta, cu nos ta cosecha e beneficionan di conducta cu ta santo of moralmente limpi. Es mas, e ta hiba na bida eterno den futuro.

²¹ Yehova ta generoso pa cu su esclabonan. Ora nos ta haci nos best den su sirbishi, e ta habri “e bentananan di shelo”, y ta basha riba nos ‘asina tanto bendicion, cu nos no tin suficiente luga pa conten’e.’ (Malakias 3:10) Ki dushi lo ta pa sigui sirbi como esclabo di Yehova pa tur eternidad!

Bo Ta Corda?

• Dicon nos ta bira esclabo di Dios?

• Con nos ta demostra nos sumision na e boluntad di Dios?

• Dicon nos mester ta prepara pa pone Yehova su boluntad prome cu esun di nos?

• Dicon nos no mester “wak patras”?

[Preguntanan di Estudio]

[Plachi na pagina 16, 17]

E areglo di sclabitud boluntario den Israel a duna un bista adelanta di nos sirbishi como esclabo Cristian

[Plachi na pagina 17]

Nos ta bira esclabo di Dios ora nos batisa

[Plachi na pagina 17]

Cristiannan ta pone e boluntad di Dios na prome luga

[Plachi na pagina 18]

Moises no tawata masha dispuesto pa acepta su asignacion