E Influencia di Hesus Rond Mundo

“TUR loke Hesus a bisa segun e Evangelionan, tanto den priva como den publico, lo no a tuma mas cu dos ora”, e traductor di Bijbel Edgar Goodspeed a skirbi. “Sinembargo e tiki ei tawata asina impactante, conmovedor y penetrante cu nos por bisa sin duda cu ningun otro hende no a influencia mundo asina tanto.”

Tempo cu Hesucristo a caba cu su ministerio terenal na aña 33 di nos era, e tawatin por lo menos 120 siguido, tanto homber como mohe. (Echonan 1:15) Awe, mas cu dos mil miyon hende ta bisa cu nan ta Cristian. Miyones di hende mas ta reconoce Hesus como un profeta. No cabe duda cu loke el a siña hende tawatin un influencia notabel riba nan.

Asta lidernan cu no ta Cristian a reconoce e influencia cu Hesus tawatin rond mundo. Por ehempel, e rabi Hudiu Hyman Enelow a skirbi: “Hesus a bira e personahe mas popular, cu mas a ser studia y esun cu mas a influencia e historia di religion di humanidad.” Tambe Enelow a declara: “Ken por logra sa tur loke Hesus a nifica pa humanidad? E amor cu el a lanta den hende, e consuelo cu el a duna, e bon cu el a impulsa hende pa haci y e speransa y goso cu el a duna nan—tur esei ta incomparabel den historia di humanidad. Ni e persona mas famoso di e rasa humano no tawatin e mesun poder di atraccion cu Hesus. El a bira e personahe mas fasinante den historia.” Y e lider Hindu Mohandas K. Gandhi a  bisa: “Mi no conoce ningun otro hende cu a haci asina tanto pa humanidad manera Hesus. De echo, no tin nada malo den cristianismo.” Sinembargo, el a agrega: “Ta boso Cristiannan ta e problema. Boso ta leu di aplica boso mes siñansanan.”

Evidencia ta mustra cu pa hopi tempo caba cristiandad no ta cumpliendo cu Hesus su siñansanan. Cecil John Cadoux, historiado di cristianismo, a comenta cu “e degeneracion gradual y constante di normanan moral den henter e Iglesia” a hala “atencion di lidernan Cristian for di ... 140 A.D. caba.” El a bisa: “E slekmento di e rigor moral cu tawatin prome aya naturalmente lo contribui na e proceso den cua hende lo imita e comportacion di mundo.”

E proceso aki a acelera den siglo 4, ora e emperado Romano Constantino a acepta cristianismo. Cadoux a skirbi: “Historiadonan no a keda sin ripara, y algun di nan a lamenta, e echo cu Iglesia a compromete su mes di un manera asina bergonsoso mediante su pacto cu Constantinus.” Pa hopi siglo djei padilanti, e asina yama Cristiannan a haci hopi cos malo cu a trece reproche riba e nomber di Cristo.

Pues, e preguntanan cu nos kier haya contesta p’e ta: Kico realmente Hesus a siña hende? Y ki efecto su siñansanan mester tin riba nos?

[Plachi na pagina 3]

“Mi no conoce ningun otro hende cu a haci asina tanto pa humanidad manera Hesus.”

—Mohandas K. Gandhi

[Plachi na pagina 3]

“Ningun otro hende no a influencia mundo asina tanto.”

—Edgar Goodspeed

[Reconocemento]

Culver Pictures