Ki Influencia Hesucristo Tin Riba Abo?

EN BISTA di loke nos a considera den e articulo anterior, por tin cualkier duda cu Hesus su siñansanan tawatin un impacto rond mundo? Pero, e pregunta cu cada un di nos mester haci nos mes ta: “Ki influencia Hesus su siñansanan tin riba ami personalmente?”

Hesus su siñansanan a toca un gran variedad di topico. E lesnan balioso cu nan ta trece padilanti por tin efecto riba tur aspecto di nos bida. Laga nos focus riba loke Hesus a siña nos relaciona cu pone prioridad den bida, cultiva amistad cu Dios, establece bon relacion cu otro hende, soluciona problema y evita actonan di violencia.

Pone Prioridad den Bida

E bida rush rush den e mundo djawe ta kita asina hopi tempo y energia for di nos cu hopi bes e cosnan spiritual ta ser hala un banda. Tuma por ehempel e caso di un homber di  binti y pico aña cu nos lo yama Jerry. Jerry ta gusta combersa riba topiconan spiritual y e ta duna hopi balor na loke e ta siña for di nan, pero e ta lamenta: “Echt mi no tin tempo pa haci esei tur ora bai. Mi ta traha seis dia pa siman. Diadomingo ta e unico dia liber cu mi tin. Y ora mi caba di haci e cosnan cu mi tin cu haci, mi ta keda mucho cansa.” Si abo ta den e mesun situacion, bo por beneficia for di loke Hesus a siña otro hende den e Sermon Riba Sero.

Hesus a bisa un multitud di hende cu a reuni pa tend’e: “No precupa boso mes pa boso bida, kico boso lo come of kico boso lo bebe; tampoco pa boso curpa, kico boso lo bisti. Bida no ta mas cu cuminda, y curpa mas cu paña di bisti? Mira e parhanan di shelo cu no ta sembra ni cosecha, ni ta warda den mangasina, y toch boso Tata celestial ta alimenta nan. Boso no tin mucho mas balor cu nan? ... No precupa boso mes anto, bisando: ‘Kico nos lo come?’ of ‘Kico nos lo bebe?’ of ‘Kico nos lo bisti?’ Pasobra tur e cosnan aki e paganonan ta busca; ma boso Tata celestial sa cu boso tin mester di tur e cosnan aki. Ma busca prome e reino di Dios y su husticia, y tur e cosnan aki lo wordo añadi na boso.” (Mateo 6:25-33) Kico nos ta siña for di esei?

Hesus no tawata kiermen cu nos mester keda sin percura pa nos necesidadnan fisico y pa esnan di nos famia. Bijbel ta bisa: “Si un hende no provee pa su mes hendenan, y specialmente pa esnan di su cas, el a nenga e fe y ta piyo cu un incredulo.” (1 Timoteo 5:8) Sinembargo, Hesus a priminti cu si nos duna prioridad na e cosnan di mas importante y pone e cosnan spiritual na prome luga, Dios lo percura pa nos demas necesidadnan. E les cu nos ta siña aki ta kico pa pone como prioridad. Esnan cu sigui e conseho aki lo haya felicidad, pasobra Bijbel ta bisa: “Felis ta esnan cu ta conciente di nan necesidad spiritual.”—Mateo 5:3, NW.

Cultiva Amistad cu Dios

Esnan cu ta conciente di nan necesidad spiritual ta mira e importancia pa cultiva un bon relacion cu Dios. Con nos por forma un bon relacion cu un otro hende? No ta door di purba conoce e persona ei mas miho? Nos mester tuma tempo pa siña conoce su punto di bista, actitud-, habilidad- y logronan, loke e ta gusta y loke e no ta gusta. Ora nos kier forma un amistad cu Dios ta e mesun cos. Conocemento exacto di Dios ta necesario. Ora Hesus a haci oracion na Dios tocante su disipelnan, el a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Si, pa nos cultiva un relacion intimo cu Dios nos mester siña conoc’e. E unico fuente di e conocemento ei ta e Palabra inspira di Dios, Bijbel. (2 Timoteo 3:16) Nos mester aparta tempo pa studia e Scritura.

Sinembargo, conocemento so no ta basta. Den e mesun oracion, Hesus a bisa: “Nan [su disipelnan] a warda bo palabra.” (Huan 17:6) No ta conocemento di Dios so nos mester; nos mester actua tambe na harmonia cu e conocemento ei. Di ki otro manera nos lo por bira amigo di Dios? Nos realmente por spera cu nos amistad cu un hende ta crece si nos actua deliberadamente di un manera cu ta bai contra e ideanan y principionan di e persona ei? Claro cu no. Dios su punto di bista y principionan mester guia tur nos pasonan den bida. Wak con dos di su  principionan ta aplica na nos relacion cu otro sernan humano.

Establece Bon Relacion cu Otro Hende

Na un ocasion, Hesus a conta un cuenta cortico pa siña hende un les balioso encuanto relacionnan humano. El a conta tocante un rei cu kier a regla cuenta cu su sirbidonan. Un di nan tawatin un debe grandi y no por a pag’e bek. Pa e homber paga su debe, e rei a duna ordo pa bende e homber, su esposa y su yiunan. E debedo a cai na rudia su dilanti y a rog’e: “Tene pasenshi cu mi y lo mi paga bo tur cos.” E rei a sinti compasion p’e y a cansela su debe. Pero ora e esclabo a sali bai y a topa cu un compañero-esclabo di dje cu tawata deb’e un suma chikito, e si a exigie pa e pag’e. Maske su compañero a rog’e pa e tene misericordia di dje, el a tir’e den prizon te ora cu e lo a paga tur su debe. Ora cu e rei a haya sa, el a rabia cu ne y a puntr’e: “Abo tambe no mester a tene misericordia di bo compañero-esclabo, mescos cu ami a tene misericordia di bo?” Y el a laga encarsela e esclabo cu no a pordona su compañero te ora cu e lo a paga tur loke cu e tawata debe. Pa siña hende un les for di e cuenta, Hesus a bisa: “Asina tambe mi Tata celestial lo haci cu boso, si cada un di boso no pordona su ruman di henter su curason.”—Mateo 18:23-35.

Como hende imperfecto, nos ta comete hopi falta. Nunca nos no por paga Dios e debe inmenso cu nos a acumula p’e echo cu nos ta peca contra dje. E unico cos cu nos por haci ta pidie pordon. Y Yehova Dios ta cla pa pordona tur nos faltanan, basta nos pordona nos rumannan pa e picanan cu nan a comete contra nos. Ki un les impactante! Hesus a siña su siguidonan pa pidi den oracion: “Pordona nos nos debenan, mescos cu nos tambe ta pordona nos debedonan.”—Mateo 6:12.

Yega na Raiz di e Problema

Hesus ta compronde naturalesa humano hopi bon. Pesei su conseho pa soluciona problema tawata yega na raiz di e asunto. Considera e siguiente dos ehempelnan.

Hesus a bisa: “Boso a tende cu a wordo bisa na e hendenan di prome aya: ‘No mata’ y ‘Esun cu mata lo ta culpabel dilanti di corte.’ Ma ami ta bisa boso cu ken cu rabia cu su ruman lo ta culpabel dilanti di corte.” (Mateo 5:21, 22) Aki Hesus a mustra cu raiz di e problema di matamento ta bai mas profundo cu e acto di violencia mes. Ta e actitud cu ta desaroya den curason di e asesino ta raiz di e problema. Si hende no laga resentimento y rabia lanta den nan, violencia premedita lo disparce. Ta hopi dramamento di sanger lo por a wordo evita si hende a aplica e siñansa aki!

Wak con Hesus ta yega na raiz di un otro problema cu ta causa masha hopi tristesa. El a bisa e multitud: “Boso a tende cu a wordo bisa: ‘No comete adulterio’; ma ami ta bisa boso cu ken cu wak un mohe pa dese’e, ya caba el a comete adulterio cu ne den su curason. Y si bo wowo drechi haci bo trompica, sac’e tir’afo.” (Mateo 5:27-29) Hesus a siña hende cu e problema ta bai mas profundo cu e comportacion inmoral mes. Loke ta causa e problema ta locual ta bin prome cu ne, esta, deseonan inmoral. Si un persona percura pa no keda pensa riba un deseo robes y “sac’e” for di su mente y ‘tir’e afo’, e ora ei lo e vence e problema di inmoralidad cu lo por presenta.

“Pone Bo Spada Bek na Su Luga”

Riba e anochi cu nan a traiciona y aresta Hesus, un di su disipelnan a saca su spada pa defend’e. Hesus a orden’e: “Pone bo spada bek na su luga; pasobra tur esnan cu saca spada lo perece pa medio di spada.” (Mateo 26:52) E siguiente mainta Hesus a bisa Poncio Pilato: “Mi reino no ta di e mundo  aki. Si mi reino tawata di e mundo aki, mi sirbidonan lo a bringa, pa mi no wordo entrega na e Hudiunan; ma t’asina cu mi reino no ta di e mundo aki.” (Huan 18:36) E siñansa aki ta practico?

Ki actitud e prome Cristiannan tawatin pa cu e siñansa di Hesus pa no uza violencia? E buki The Early Christian Attitude to War (Con e Prome Cristiannan A Mira Guera) ta bisa: “E echo cu nan [Hesus su siñansanan] a prohibi tur tipo di violencia y actonan cu ta herida otro hende, a implica claramente cu participacion den guera tawata inaceptabel ... E prome Cristiannan a sigui loke Hesus a bisa al pie de la letra, y a compronde su siñansanan encuanto suavidad y violencia. Nan a mira un relacion estrecho entre nan religion y pas; nan a condena guera fuertemente pa motibo di e dramamento di sanger cu e ta causa.” Esta diferente historia humano lo tawata si tur esnan cu ta bisa cu nan ta Cristian en berdad a sigui e siñansa aki!

Bo Por Beneficia di Tur e Siñansanan di Hesus

E siñansanan di Hesus cu nos a considera ta excelente, simpel y poderoso. Hende por beneficia di su siñansanan door di siña conoce nan y aplica nan. *

Testigonan di Yehova den bo area lo ta contento pa yuda bo mira con lo bo por beneficia di e siñansanan cu ta refleha un sabiduria cu ningun otro ser humano a yega di desplega. Nos ta invita bo calurosamente pa tuma contacto cu nan of skirbi nan na e adres riba pagina 2 di e revista aki.

[Nota]

[Plachi na pagina 5]

“Boso Tata celestial ta alimenta nan”

[Plachi na pagina 7]

E siñansanan di Hesus por tin un bon influencia riba bo bida