No Biba Mas pa Nos Mes

“[Cristo] a muri pa tur, pa esnan cu ta biba no biba mas pa nan mes.” —2 CORINTIONAN 5:15.

1, 2. Ki mandamento biblico a motiva e siguidonan di Hesus di prome siglo pa vence egoismo?

TAWATA Hesus su ultimo anochi riba tera. Denter di apenas algun ora lo el a duna su bida na fabor di tur cu lo eherce fe den dje. Durante e anochi ei, Hesus a conta su fiel apostelnan hopi cos importante. Un di nan tawata un mandamento relaciona cu un cualidad cu lo a resulta di ta un rasgo cu ta identifica su siguidonan. El a bisa: “Un mandamento nobo mi ta duna boso, pa boso stima otro, y mescos cu ami a stima boso, pa boso tambe stima otro. Na esaki tur hende lo sa cu boso ta mi disipel, si boso tin amor un pa otro.”—Huan 13:34, 35.

² Cristiannan berdadero mester desplega amor abnega of di sacrificio propio pa otro y pone e bienestar di nan rumannan den fe prome cu nan mes bienestar. Nan no mester ni basila pa ‘duna nan bida pa nan amigonan.’ (Huan 15:13) Con e Cristiannan di prome a reacciona riba e mandamento nobo? E escritor di siglo 2, Tertuliano, den su obra famoso Defensa a cita loke otro hende a bisa di e Cristiannan: ‘Wak con nan ta stima otro; con nan ta cla pa asta muri pa otro.’

3, 4. (a) Dicon nos mester contraresta of resisti egoismo? (b) Kico nos lo considera den e articulo aki?

³ Nos tambe tin cu sigui “carga peso di otro, y asina cumpli cu e lei di Cristo.” (Galationan 6:2) Sinembargo, egoismo ta un di e obstaculonan mas grandi pa obedece e lei di Cristo y pa ‘stima Yehova nos Dios cu henter nos curason, alma y mente y stima nos prohimo manera nos mes.’ (Mateo 22:37-39) Como hende imperfecto, nos ta inclina di ta precupa solamente cu nos propio deseo- y necesidadnan. Agrega na esaki, e stress di bida diario, e ambiente competitivo na scol of na trabou, y e  lucha pa haya e necesidadnan di bida, anto como consecuencia e tendencia egoista cu nos ta nace cu ne ta bira mas fuerte. E inclinacion aki pa egoismo no ta birando menos. Apostel Pablo a spierta: “Den e ultimo dianan ... hende lo stima nan mes mas cu tur cos.”—2 Timoteo 3:1, 2, BPK.

⁴ Durante e ultimo parti di su ministerio riba tera, Hesus a duna su disipelnan un proceso di tres paso cu lo por a yuda nan vence egoismo. Kico esei tawata, y con nos por beneficia di su instruccionnan?

Un Antidoto Efectivo!

5. Mientras cu Hesus tawata predica den e parti nort di Galilea, kico el a revela na su disipelnan, y dicon esei a shock nan?

⁵ Hesus tawata predica serca di Cesarea di Filipo den e parti nort di Galilea. E area trankil y pintoresco aki kisas a parce un luga mas apropiado pa dedica tempo na placer cu pa siña tocante abnegacion of nenga bo mes. Sinembargo, mientras Hesus tawata einan el a cuminsa mustra su disipelnan cu “e mester bai Herusalem, y sufri hopi cos na man di e ancianonan y sacerdotenan principal y escribanan, y wordo mata, y wordo lanta riba e di tres dia.” (Mateo 16:21) E informacion nobo aki lo mester a shock e disipelnan di Hesus, pasobra te cu e momento ei nan tawata spera cu nan Lider lo a establece su Reino riba tera!—Lucas 19:11; Echonan 1:6.

6. Dicon Hesus a scual Pedro formalmente?

⁶ Mesora Pedro “a hala [Hesus] un banda y a cuminsa reprend’e, bisando: ‘Dios libra [of, “sea bondadoso cu bo mes”, NW], Señor! Esaki nunca lo no sosode cu bo.’” Con Hesus a reacciona? “El a bira y a bisa Pedro: ‘Kita for di mi dilanti, Satanas! Bo ta un piedra di trompica pa mi; pasobra bo no tin bo pensamento riba e cosnan di Dios, sino riba esnan di hende.’” Ki un contraste grandi tawatin entre nan dos su actitud! Hesus boluntariamente a acepta e bida di sacrificio propio cu Dios a asigna na dje, un bida cu denter di un par di luna lo a hiba na su morto riba un staca di tormento. Pero Pedro a recomend’e un proceder mas comodo. “Sea bondadoso cu bo mes”, el a bisa. Pedro sin duda tawatin bon intencion. Toch Hesus a reprend’e pasobra Pedro na e ocasion ei a laga Satanas influenci’e. Pedro ‘no a pensa manera Dios, ma manera hende.’—Mateo 16:22, 23; BPK.

7. Manera ta para skirbi na Mateo 16:24, ki proceder Hesus a describi pa su siguidonan?

⁷ Awendia nos por tende ideanan paresido na loke Pedro a bisa Hesus. Mundo hopi bes ta urgi un persona pa ‘trata bo mes bon’ of ‘sigui e caminda di menos resistencia.’ Di otro banda, Hesus a recomenda un actitud mental completamente distinto. El a bisa su disipelnan: “Si un hende kier bin mi tras, lag’e nenga su mes, y hisa su [“staca di tormento”, NW], y sigui mi.” (Mateo 16:24) “E palabranan aki no ta un invitacion na hende djafo pa bira disipel”, segun The New Interpreter’s Bible, “sino un invitacion na esnan cu a reacciona caba riba e yamada di Cristo pa nan reflexiona riba e nificacion di ser disipel.” E tres pasonan cu Hesus a describi den e texto biblico ei ta pasonan cu creyentenan mester tuma. Laga nos considera e pasonan un pa un.

8. Splica kico ta nifica nenga bo mes.

⁸ Na prome luga, nos tin cu nenga nos mes. E palabra Griego pa “nenga bo mes” ta indica cu un persona ta dispuesto pa rechasa of bisa no na deseonan egoista of na cumbiniencia personal. Nenga nos mes no ta djis un asunto cu de bes en cuando nos ta renuncia cierto placernan; tampoco e no ta nifica cu nos ta  bira personanan cu ta hiba un bida di nenga nos mes tur cos, kisas te na e grado di perhudica nos mes. Nos no ta ‘pertenece mas na nos mes’ den e sentido cu boluntariamente nos ta entrega henter nos bida y tur cos den dje na Yehova. (1 Corintionan 6:19, 20) Nos bida lo bira un bida enfoca riba sirbi Dios en bes di ta enfoca riba nos mes. Nenga nos mes ta encera un determinacion pa haci e boluntad di Dios, apesar cu esaki kisas no ta loke nos normalmente lo kier a haci. Nos ta demostra cu nos ta exclusivamente dedica na Dios ora cu nos haci un dedicacion na dje y batisa. Anto despues di esei nos ta haci esfuerso pa cumpli cu nos dedicacion pa e resto di nos bida.

9. (a) Ora Hesus tawata riba tera, kico un staca di tormento a representa? (b) Den ki manera nos ta hisa nos staca di tormento?

⁹ E di dos paso ta cu nos mester hisa nos staca di tormento. Den prome siglo, un staca di tormento a representa sufrimento, berguensa y morto. Normalmente, nan tawata ehecuta solamente hende criminal riba un staca di tormento of colga nan curpa morto na staca. Cu e expresion aki Hesus a mustra cu un Cristian mester ta prepara pa acepta persecucion, desprecio of asta morto, ya cu e no ta parti di mundo. (Huan 15:18-20) Nos normanan Cristian ta haci nos distinto for di e hendenan di mundo, pues mundo lo por ‘calumnia nos.’ (1 Pedro 4:4) Esaki lo por sosode na scol, na trabou of asta den nos famia. (Lucas 9:23) Apesar di esei, nos ta dispuesto pa soporta e desprecio di mundo pasobra nos no ta biba mas pa nos mes. Hesus a bisa: “Bendiciona boso ta ora cu hende insulta boso y persigui boso, y ta gaña tur clase di maldad riba boso pa mi causa. Regociha y sea contento, pasobra boso recompensa den shelo ta grandi.” (Mateo 5:11, 12) Si, loke ta conta ta cu nos tin Dios su aprobacion.

10. Kico sigui Hesus continuamente ta encera?

¹⁰ Na di tres luga, Hesucristo a bisa cu nos mester siguie continuamente. Segun An Expository Dictionary of New Testament Words, di W. E. Vine, e palabra Griego traduci como “sigui” ta nifica ser un compañero, “un persona cu ta bai den mesun caminda.” Prome Huan 2:6 ta declara: “Esun cu bisa cu e ta permanece den [union cu Dios] mester cana na mesun manera cu [Cristo] a cana.” Con Hesus a cana? Hesus su amor pa su Tata celestial y pa su disipelnan no a laga luga pa egoismo. Pablo a skirbi: “Cristo no a agrada su mes.” (Romanonan 15:3) Asta ora Hesus tawata cansa of a sinti hamber, el a pone e bienestar di otro hende prome cu su propio bienestar. (Marco 6:31-34) Tambe Hesus a haci esfuerso vigoroso den e trabou di predica y di siña hende tocante e Reino. Acaso nos no mester imit’e segun cu celosamente nos ta cumpli cu nos tarea di ‘haci disipel di hende di tur nacion, siñando nan pa cumpli cu tur loke Hesus a ordena’? (Mateo 28:19, 20) Den tur su conducta, Cristo a laga un ehempel pa nos, y nos tin cu “sigui den su pasonan” cu sumo cuidou y atencion.—1 Pedro 2:21.

11. Pakico ta importante pa nos nenga nos mes, hisa nos staca di tormento y sigui Hesucristo continuamente?

¹¹ Ta masha importante pa nos nenga nos mes, hisa nos staca di tormento y sigui nos Gran Ehempel continuamente. Esaki ta un antidoto pa egoismo, es decir, e ta contrarest’e, ya cu egoismo definitivamente ta un obstaculo pa desplega amor di sacrificio propio. Ademas, Hesus a bisa: “Ken cu kier salba su bida lo perd’e; ma ken cu perde su bida pa mi causa lo hay’e. Pasobra ki probecho un hende lo tin si e gana henter mundo, ma perde su alma? Of kico un hende lo duna en cambio di su alma?”—Mateo 16:25, 26.

Nos No Por Sirbi Dos Shon

12, 13. (a) Kico tawata un precupacion pa e gobernante hoben cu a pidi Hesus conseho? (b) Ki conseho Hesus a duna e homber hoben, y dicon?

¹² Algun luna despues cu Hesus a enfatisa cu ta necesario pa su disipelnan nenga nan  mes, un gobernante hoben y rico a acerc’e y a bisa: “Maestro, kico ta e cos bon cu mi mester haci pa mi por haya bida eterno?” Hesus a bis’e cu e mester “warda e mandamentonan” y a menciona algun di nan. E homber hoben a bis’e: “Tur e cosnan aki mi a warda.” E homber aparentemente tawata sinsero y a haci su best pa obedece e mandamentonan di e Lei. Pesei el a puntra: “Kico mas mi falta?” Como contesta Hesus a duna e homber hoben un invitacion unico: “Si bo kier ta perfecto [“completo”, New American Standard Bible], bai y bende bo propiedadnan y duna na hende pober, y lo bo tin tesoro den shelo; y bin, sigui mi.”—Mateo 19:16-21.

¹³ Hesus a mira cu pa e homber hoben sirbi Yehova di henter alma, e mester a deshaci di e distraicion di mas grandi den su bida—su rikesa material. Un berdadero disipel di Cristo no por sirbi dos shon. E “no por sirbi Dios y rikesa.” (Mateo 6:24) E mester tin un ‘wowo bon’, es decir, un bista cu ta enfoca riba asuntonan spiritual. (Mateo 6:22) Deshaci di bo propiedadnan y duna nan na hende pober ta un acto di sacrificio propio. A cambio di e sacrificio material aki, Hesus a ofrece e gobernante hoben e privilegio sumamente precioso di acumula tesoro den shelo; un tesoro cu lo a nifica bida eterno p’e y cu lo a hiba na e prospecto di un dia goberna hunto cu Cristo den shelo. E homber hoben no tawata cla pa nenga su mes. “El a bai tur tristo, pasobra e tawata doño di hopi propiedad.” (Mateo 19:22) Sinembargo, otro siguidonan di Hesus a reacciona na un manera distinto.

14. Con cuater piscado a reacciona riba Hesus su invitacion pa siguie?

¹⁴ Un dos aña prome, Hesus a duna un invitacion similar na cuater piscado cu tawata yama Pedro, Andres, Santiago y Huan. Dos di nan tawata piscando na e momento ei, y e dos otronan tawata druk ta drecha nan redanan. Hesus a bisa nan: “Sigui mi, y lo mi haci boso piscado di hende.” Nan tur cuater cu tempo a bandona nan negoshi di piscamento y a sigui Hesus pa resto di nan bida.—Mateo 4:18-22.

15. Con un Testigo di Yehova di nos tempo a haci sacrificio pa sigui Hesus?

¹⁵ Hopi Cristian djawe a imita e ehempel di e cuater piscadonan en bes di e ehempel di e gobernante hoben y rico. Nan a sacrifica rikesa y e oportunidad pa gana fama y exito den e mundo aki afin di por sirbi Yehova. Deborah por ehempel a bisa: “Tempo cu mi tawatin 22 aña, mi mester a tuma un decision grandi.” El a splica: “Mi tawatin rond di seis luna ta studia Bijbel, y mi kier a dedica mi bida na Yehova, pero mi famia tawata hopi contra di esei. Nan tawata multimiyonario, y segun nan, si mi bira un Testigo esei lo a causa berguensa pa nan debi na nan status social. Nan a duna mi 24 ora pa dicidi kico mi a prefera—un bida di luho of e berdad. Si mi no kibra tur contacto cu e Testigonan, mi famia lo a deshereda mi. Yehova a yuda mi tuma e decision corecto y a  duna mi e fortalesa pa cumpli cu ne. Mi a pasa e ultimo 42 añanan den sirbishi di tempo completo, y no ta duel mi ni un tiki. Door di bira lomba pa un estilo di bida egoista, orienta riba placer, mi a scapa di e infelicidad y falta di proposito den bida cu mi ta mira den e miembronan di mi famia. Hunto cu mi casa, mi a yuda mas cu shen persona siña e berdad. E yiunan spiritual aki ta hopi mas precioso pa mi cu cualkier rikesa material.” Miyones di otro Testigo di Yehova ta sinti mescos cu Deborah. Kico di abo?

16. Con nos por demostra cu nos no ta biba mas pa nos mes?

¹⁶ E deseo pa no biba mas pa nan mes a motiva miles di Testigo di Yehova pa sirbi como pionero, esta, como proclamado di Reino di tempo completo. Otronan, kende nan circunstancia no ta permiti nan participa den e sirbishi di tempo completo, ta cultiva e spirito di pionero y ta apoya e trabou di predica e Reino lo miho cu nan por. Mayornan ta demostra un actitud similar ora nan ta dedica gran parti di nan tempo y tambe ta sacrifica interesnan personal afin di por duna educacion spiritual na nan yiunan. Den un manera of otro, nos tur por mustra cu interesnan di Reino ta bin na prome luga den nos bida.—Mateo 6:33.

Ken Su Amor Ta Obliga Nos?

17. Kico ta motiva nos pa haci sacrificio?

¹⁷ Demostra amor di sacrificio propio no ta e caminda di mas facil pa sigui. Pero pensa un rato riba kico ta e cos cu ta obliga of motiva nos. Pablo a skirbi: “E amor di Cristo ta obliga nos, yegando na e conclusion aki, cu un a muri pa tur ... Y el a muri pa tur, pa esnan cu ta biba no biba mas pa nan mes, ma pa esun cu a muri y cu a resusita pa nan motibo.” (2 Corintionan 5:14, 15) Ta e amor di Cristo ta obliga nos pa no biba mas pa nos mes. Ki un motivacion poderoso esei ta! Siendo cu Cristo a muri pa nos, nos ta sinti e obligacion moral pa biba p’e, no ta berdad? De echo, ta gratitud pa e amor tan profundo cu Dios y Cristo a mustra na nos a obliga nos dedica nos bida na Dios y bira disipel di Cristo.—Huan 3:16; 1 Huan 4:10, 11.

18. Dicon un bida di sacrificio propio ta bale la pena?

¹⁸ Ta bale la pena pa nos no biba mas pa nos mes? Despues cu e gobernante hoben y rico a rechasa Cristo su invitacion y a bai, Pedro a bisa Hesus: “Ata nos a bandona tur cos y a sigui bo; kico anto nos lo haya?” (Mateo 19:27) Pedro y e otro apostelnan realmente a nenga nan mes. Kico lo tawata nan recompensa? Hesus a papia prome di e privilegio cu nan lo tin di goberna hunto cu ne den shelo. (Mateo 19:28) Na e mesun ocasion ei Hesus a referi na bendicionnan cu delaster un sirbido di dje lo por a ricibi. El a bisa: “No tin ningun hende cu a bandona cas of ruman hombernan of ruman mohenan of mama of tata of yiunan of cunucunan pa mi motibo y pa motibo di evangelio, cu lo no ricibi shen bes mas tanto den e tempo aki ... y den e siglo cu ta bin, bida eterno.” (Marco 10:29, 30) Nos ta haya hopi mas di loke nos a sacrifica. Acaso nos tatanan, mamanan, ruman hombernan, ruman mohenan y yiunan spiritual no ta hopi mas balioso cu cualkier cos cu nos a renuncia pa motibo di e Reino? Ken tawatin e bida cu mas satisfaccion—Pedro of e gobernante hoben y rico?

19. (a) Berdadero felicidad ta depende di kico? (b) Kico nos lo considera den e siguiente articulo?

 ¹⁹ Cu echo y palabra Hesus a mustra cu nos ta haya felicidad door di duna y door di sirbi, no door di ta egoista. (Mateo 20:28; Echonan 20:35) Ora cu nos no ta biba mas pa nos mes ma ta sigui Cristo continuamente, nos ta haya gran satisfaccion den bida awor y nos tin e prospecto di bida eterno den futuro. Claro cu ora nos nenga nos mes, Yehova ta bira nos Doño. Pues nos ta bira esclabo di Dios. Dicon e sclabitud aki ta duna satisfaccion y beneficio? Con e ta influencia e decisionnan cu nos ta tuma den bida? E siguiente articulo lo considera e preguntanan aki.

Bo Ta Corda?

• Dicon nos mester contraresta nos tendencianan egoista?

• Kico ta nifica nenga nos mes, hisa nos staca di tormento y sigui Hesus continuamente?

• Kico ta motiva nos pa no biba mas pa nos mes?

• Dicon ta bale la pena pa hiba un bida di sacrificio propio?

[Preguntanan di Estudio]

[Plachi na pagina 11]

“Sea bondadoso cu bo mes, Señor”

[Plachi na pagina 13]

Kico a stroba e gobernante hoben di sigui Hesus?

[Plachinan na pagina 15]

Amor ta obliga Testigonan di Yehova pa sirbi como proclamadonan celoso di e Reino