Pregunta di Lector

E echo cu David y su hombernan a come e pannan di e presencia acaso ta indica cu ora hende ta den circunstancia dificil nan por kibra Dios su lei sin haya castigo?—1 Samuel 21:1-6.

Segun Levitico 24:5-9, e pannan di e presencia cu a ser remplasa tur sabat, tawata reserva pa e sacerdotenan come. E principio tras di esei tawata cu e pannan ta santo y mester a sirbi como cuminda pa e hombernan ocupa den Dios su sirbishi—e sacerdotenan. Definitivamente lo tawata robes pa duna e pannan na un simpel obrero of come nan djis pa smak. Pero toch e sacerdote Ahimelek no a comete pica ora el a duna e pannan di e presencia na David y su hombernan.

David aparentemente tawata riba un mision special pa Rei Saul. David y su hombernan tawatin hamber. Ahimelek a haci sigur prome cu nan tawata limpi den sentido ceremonial. Aunke cu tecnicamente e echo cu nan a come e pannan di e presencia tawata contra lei, toch e tawata na harmonia cu e uzo basico stipula pa e pannan di e presencia. Teniendo cuenta cu esei, Ahimelek por a haci un excepcion riba e regla. Hesucristo mes a uza e incidente aki pa ilustra con incorecto tawata pa haci un aplicacion demasiado stricto di e lei di sabat segun e interpretacion di e Farizeonan.—Mateo 12:1-8.

Sinembargo, esaki no ta nifica cu hende por viola e lei di Dios ora circunstancianan bira dificil. Por ehempel, un situacion aparentemente critico a surgi ora cu guereronan Israelita tawata bringa contra e Filisteonan. Rei Saul a bisa: “Maldiciona sea e homber cu come cuminda prome cu nochi sera y prome cu mi tuma vengansa riba mi enemigonan.” Bijbel ta bisa: “Riba e dia ei nan a derota e Filisteonan.” E soldanan tawata cansa di e bataya y hambra, ‘y e pueblo a cuminsa mata e bestianan riba suela y a come nan cu sanger cu tur.’ (1 Samuel 14:24, 31-33) Nan a peca contra Yehova door di viola su lei tocante sanger. Nan accionnan no tawata na harmonia cu e unico uzo cu Dios a stipula pa sanger, esta, “pa haci expiacion” pa pica. (Levitico 17:10-12; Genesis 9:3, 4) Misericordiosamente, Yehova a acepta sacrificionan special na fabor di esnan cu a peca.—1 Samuel 14:34, 35.

Si, Yehova ta spera di nos cu nos ta obedece su leinan den tur circunstancia. Apostel Huan a bisa: “Esaki ta e amor di Dios, cu nos ta warda su mandamentonan.”—1 Huan 5:3.

[Plachi na pagina 30]

Tur sabat tawata pone pannan di e presencia nobo den e tabernakel