E Palabra di Yehova Ta Bibo

Puntonan Sobresaliente di e Buki di Prome Samuel

TA AÑA 1117 prome cu nos era. Un tresshen aña despues cu Hosue a completa e conkista di e Tera Priminti. E ancianonan di Israel ta acerca e profeta di Yehova cu un peticion remarcabel. E profeta ta haci oracion tocante e asunto, y Yehova ta otorga nan loke nan a pidi. Esaki ta marca fin di e periodo di e Huesnan y comienso di e era di reinan humano cu ta goberna Israel. E buki biblico di Prome Samuel ta relata susesonan excitante rond di e tempo importante ei di cambio den historia di e nacion di Israel.

Prome Samuel a ser skirbi door di Samuel, Natan y Gad, y ta abarca un periodo di 102 aña, for di 1180 pa 1078 prome cu nos era. (1 Cronicanan 29:29) E ta un relato tocante cuater lider di Israel. Dos a sirbi como hues, dos como rei; dos tawata obediente na Yehova, dos no. Tambe nos ta sera conoci cu dos mohe ehemplar y un guerero balente pero suave. E ehempelnan ei ta siña nos lesnan balioso tocante actitudnan y accionnan cu ta bon pa imita y pa evita. Pues, e contenido di Prome Samuel por eherce poder riba nos pensamento- y accionnan.—Hebreonan 4:12.

SAMUEL TA REMPLASA ELI COMO HUES

(1 Samuel 1:1–7:17)

Ta tempo di e Fiesta di Recohemento, y Ana, kende ta biba na Rama, ta supercontento. * Yehova a contesta su oracionnan, y el a duna lus na un yiu homber. Pa Ana cumpli cu su promesa, e ta hiba su yiu homber Samuel pa sirbi na ‘e cas di Yehova.’ Einan e mucha ta “sirbi SEÑOR dilanti di sacerdote Eli.” (1 Samuel 1:24; 2:11) Ora Samuel ta hopi jong ainda Yehova ta papia cu ne y ta pronuncia huicio contra e cas di Eli. Segun cu Samuel ta crece, henter e pueblo di Israel ta bin reconoc’e como un profeta di Yehova.

Cu tempo, e Filisteonan ta bin bringa contra Israel. Nan ta captura e Arca y mata e dos yiu hombernan di Eli. Ora Eli ta tende e noticia, e ta cai muri. El a “husga Israel cuarenta aña.” (1 Samuel 4:18) E Arca den man di e Filisteonan ta resulta desastroso, pesei nan ta mand’e bek pa e Israelitanan. Awor ta Samuel ta husga Israel, y tin pas den e pais.

Contesta Riba Pregunta Biblico:

2:10—Dicon Ana a pidi den oracion pa Yehova “duna forsa na Su rei” mientras cu Israel no tawatin ningun rei humano? E Lei di Moises a profetisa cu e Israelitanan lo haya un rei humano. (Deuteronomio 17:14-18) Yacob a bisa den su profecia na su cama di morto: “E scepter [un simbolo di autoridad di rei] lo no kita for di Huda.” (Genesis 49:10) Ademas, relaciona cu Sara—e antepasado di e Israelitanan—Yehova a bisa: “Reinan di pueblonan lo sali for di dje.” (Genesis 17:16) Pues anto, Ana a haci oracion tocante un futuro rei.

3:3—Ta den e Santisimo mes Samuel tawata drumi? No, no ta eiden. Samuel tawata un Levita di e famia no sacerdotal di e Coatitanan. (1 Cronicanan 6:33-38) Como tal, e no tawatin mag di “bai paden pa mira e cosnan santo.” (Numbernan 4:17-20) E unico parti di e santuario cu Samuel tawatin acceso na dje tawata e patio di e tabernakel. Ta einan lo e mester tawata drumi. Aparentemente, Eli tambe tawata drumi un caminda eibanda den e patio. E expresion “caminda e arca di Dios tawata”, evidentemente ta referi na e area di e tabernakel.

 7:7-9, 17—Dicon Samuel a ofrece un sacrificio kima na Mizpa y a traha un altar na Rama, siendo cu mester a ofrece sacrificio riba un base regular solamente na e luga cu Yehova a scohe? (Deuteronomio 12:4-7, 13, 14; Hosue 22:19) Despues cu nan a kita e Arca sagrado for di e tabernakel na Silo, Yehova su presencia no tawata bisto mas einan. Pues como Dios su representante, Samuel a ofrece un sacrificio kima na Mizpa y tambe el a traha un altar na Rama. Yehova aparentemente a aproba e accionnan aki.

Les pa Nos:

1:11, 12, 21-23; 2:19. Ana su actitud di haci oracion, su humildad, su aprecio pa Yehova su bondad y su cariño maternal duradero ta un bon ehempel pa tur hende mohe temeroso di Dios.

1:8. Elcana sigur a pone un bon ehempel di fortalece otro hende cu palabra! (Job 16:5) Na prome luga, el a haci Ana cu tawata deprimi un pregunta cu no a contene acusacion. El a puntra: “Pakico bo curason ta tristo asina?” Esaki a anima Ana pa expresa loke e ta sinti. Caba Elcana a sigur’e di su amor, bisando: “Mi no ta nifica mas pa bo cu dies yiu homber?”

2:26, NW; 3:5-8, 15, 19. Nos ta bira “mas agradabel” pa Dios y pa hende door di cumpli diligentemente cu e trabou cu Dios a asigna nos, door di probecha di entrenamento spiritual y door di ta cortes y respetuoso.

4:3, 4, 10. Asta un obheto asina santo manera e arca di aliansa no a resulta di ta un amulet cu ta duna proteccion. Nos tin cu ‘warda nos di idolonan.’—1 Huan 5:21.

E PROME REI DI ISRAEL —UN EXITO OF UN FRACASO?

(1 Samuel 8:1–15:35)

Samuel ta keda fiel na Yehova henter su bida, pero su yiu hombernan si no ta cana den un manera cu ta agrada Dios. Ora e ancianonan di Israel ta pidi pa haya un rei humano, Yehova ta duna nan un rei. Samuel ta sigui Yehova su instruccion y ta ungi Saul, un nechi Benjaminita, como rei. Saul ta fortalece su posicion como rei door di derota e Amonitanan.

Saul su yiu homber balente, Yonatan, ta derota un guarnicion of post militar di e Filisteonan. E Filisteonan ta bin contra Israel cu un ehersito inmenso. Saul ta drenta den panico y desobedientemente e mes ta ofrece un sacrificio kima. Yen di curashi Yonatan ta bai cu solamente e hoben cu ta carga su arma y ta ataca un otro post militar di e Filisteonan. Sinembargo, Saul su huramento imprudente ta pone cu e victoria no ta dje completo ei. Saul ta sigui “bringa contra tur su enemigonan na tur banda.” (1 Samuel 14:47) Sinembargo, despues di derota e Amalekitanan, e ta desobedece Yehova door di spar loke a ser “poni bou di maldicion.” (Levitico 27:28, 29) Consecuentemente, Yehova ta rechasa Saul como rei.

Contesta Riba Pregunta Biblico:

9:9—Kico ta e importancia di e expresion “esun cu awor ta wordo yama profeta, antes tawata wordo yama mirado”? E palabranan aki kisas ta indica cu segun cu e profetanan a bira mas prominente den e tempo di Samuel y durante e era di e reinan di Israel, e palabra “mirado” a ser remplasa pa e palabra “profeta.” Samuel ta ser considera e prome di e fila di profetanan.—Echonan 3:24.

14:24-32, 44, 45—Yonatan a perde Dios su fabor pasobra el a come miel y asina viola e huramento di Saul? Ta parce cu esaki no a pone Yonatan perde Dios su fabor. Na prome luga, Yonatan no tawata sa di e huramento di su tata. Ademas, e huramento di Saul, motiva sea pa celo falso of un punto di bista robes di su poder como rei, a causa problema pa e pueblo. Con un huramento asina por tawatin Dios su aprobacion? Aunke Yonatan tawata dispuesto pa acepta e consecuencianan di a kibra e huramento, su bida a keda gespar.

15:6—Dicon e Keneonan a ricibi consideracion special serca Saul? E Keneonan tawata yiunan di Moises su suegro. Nan a yuda e Israelitanan despues cu esakinan a bai for di Sero Sinai. (Numbernan 10:29-32) Den e tera  di Canan, e Keneonan a biba tambe pa un tempo hunto cu e yiunan di Huda. (Huesnan 1:16) Aunke despues nan a bai biba meimei di e Amalekitanan y varios otro pueblo, e Keneonan a keda cu lasonan amistoso cu Israel. Cu bon motibo anto, Saul a spar e Keneonan.

Les pa Nos:

9:21; 10:22, 27. E actitud modesto y humilde cu Saul tawatin na principio ora cu el a bira rei a proteh’e di actua imprudente ora cu algun ‘homber perverso’ no a acepta su nombramento como rei. Tal actitud mental definitivamente ta sirbi como un proteccion contra actonan descabeya!

12:20, 21. Nunca permiti “cosnan vano”, manera confiansa den hende y den e poder militar di nacionnan of idolatria, desvia bo di sirbi Yehova.

12:24. Un cos importante cu por yuda nos mantene temor respetuoso pa Yehova y sirbie di henter nos curason ta di “considera ki cosnan grandi el a haci” pa su pueblo den tempo antiguo y tambe tempo moderno.

13:10-14; 15:22-25, 30. Tene cuidou pa nos no tin e actitud di bai mas aya di nos autoridad, expresa sea pa medio di actonan desobediente of pa medio di un actitud orguyoso.—Proverbionan 11:2.

UN MUCHA WARDADO DI CARNE TA SER SCOHI PA BIRA REI

(1 Samuel 16:1–31:13)

Samuel ta ungi David di e tribu di Huda pa bira e futuro rei. Poco despues, David ta mata e gigante Filisteo Goliat cu un solo piedra di su slinger. David cu Yonatan ta forma un amistad hopi pega. Saul ta pone David na encargo di su guereronan. Como reaccion riba e tantisimo victorianan di David, e mohenan di Israel ta canta: “Saul a mata su milnan, y David su dies milnan.” (1 Samuel 18:7) Yen di envidia, Saul ta purba mata David. Despues cu Saul ta ataca David tres biaha, David ta hui bai y bira un fugitivo.

Durante David su añanan como fugitivo, e ta spar Saul su bida dos biaha. Tambe e ta sera conoci y cu tempo ta casa cu bunita Abigail. Ora cu e Filisteonan ta bin pa bringa contra Israel, Saul ta consulta Yehova. Pero Yehova a bandon’e y Samuel tawata morto. Desespera, Saul ta consulta un spiritista, y e ta bisa Saul cu lo e ser mata den e bataya contra e Filisteonan. Durante e bataya ei, Saul ta keda gravemente herida, y nan ta mata su yiunan. E relato ta termina cu Saul muriendo como un fracaso. David ta biba scondi ainda.

Contesta Riba Pregunta Biblico:

16:14—Ta ki spirito malo tawata terorisa Saul? Den e idioma original, e palabra “spirito” no ta referi necesariamente na un criatura spiritual. E por nifica un estado mental. Siendo cu e texto ta papia di e “spirito malo” como si fuera el a bin for di Yehova, e no por ta un demoño, pero mas bien ta referi na Saul su estado mental, su impulso interno pa haci loke ta malo. Ora Yehova a kita su spirito santo, Saul a perde e proteccion di e spirito santo y a ser domina pa su propio mal actitud of spirito. Como cu Yehova a permiti e spirito ei remplasa Su spirito santo, Bijbel ta referi na e spirito malo aki como “un spirito malo for di SEÑOR.”

 17:55-58—En bista di 1 Samuel 16:17-23, dicon Saul a puntra ta yiu di ken David tawata? Saul su pregunta no tawata djis tocante con yama e tata di David. Muy probablemente e kier a sa ki clase di homber tawata tata di un mucha cu a caba di efectua e hazaña asombroso di mata un gigante.

Les pa Nos:

16:6, 7. En bes di keda impresiona cu aparencia exterior di hende of core husga nan, nos tin cu purba mira nan manera Yehova ta mira nan.

17:47-50. Cu curashi nos por enfrenta oposicion of persecucion na man di enemigonan paresido na Goliat pasobra ‘e bataya ta di Yehova.’

18:1, 3; 20:41, 42. Nos por haya berdadero amigo entre e hendenan cu ta stima Yehova.

21:12, 13. Yehova ta spera di nos cu nos ta uza nos facultad y habilidad mental pa trata cu situacionnan dificil den bida. El a duna nos su Palabra inspira, cu ta duna nos prudencia, conocemento y discernimento. (Proverbionan 1:4) Tambe nos tin e yudansa di ancianonan Cristian nombra.

24:6; 26:11. David a pone un excelente ehempel di berdadero respet pa e ungi di Yehova!

25:23-33. Abigail su sensates y discernimento ta un bon ehempel.

28:8-19. Spiritonan malbado, den nan intento pa dual hende of perhudica nan, por pretende di ta cierto personanan morto. Nos mester keda liber di tur forma di spiritismo.—Deuteronomio 18:10-12.

30:23, 24. E decision aki, basa riba Numbernan 31:27, ta mustra cu Yehova ta balora personanan cu ta sirbi di apoyo den e congregacion. Pues, sea loke sea nos ta haci, laga nos ‘haci nos trabou di curason, como pa Yehova y no pa hende.’—Colosensenan 3:23.

Kico Ta “Miho cu Sacrificio”?

Ki berdad fundamental e experencianan di Eli, Samuel, Saul y David ta enfatisa? Esaki: “Obedece ta miho cu sacrificio, y scucha ta miho cu vet di carne chubato. Pasobra rebeldia ta manera e pica di bruheria, y capricho ta manera inikidad y idolatria.”—1 Samuel 15:22, 23.

Ki un gran privilegio nos tin di por participa den e trabou mundial di predica e Reino y haci disipel! Segun cu nos ta ofrece Yehova “e fruta di nos lipnan”, nos tin cu haci nos best pa obedece e guia cu e ta duna mediante su Palabra skirbi y mediante e parti terenal di su organisacion.—Oseas 14:2; Hebreonan 13:15.

[Nota]

[Plachi na pagina 23]

E prome rei di Israel a cambia for di un gobernante humilde y modesto, pa un monarca orguyoso y caprichoso

[Plachi na pagina 24]

Di kico nos por tin sigur ora nos ta enfrenta oposicion for di enemigonan paresido na Goliat?