Samson A Triunfa Mediante e Forsa di Yehova!

ENEMIGONAN vengativo ta saca Samson su wowonan y ta lag’e haci trabou forsa. Despues nan ta sac’e for di prizon y hib’e den un tempel pagano pa entretene e multitud. Nan ta oblig’e marcha dilanti di miles di espectador y ta haci bofon di dje. E prizonero no ta un criminal ni un comandante di un ehersito enemigo. E ta un adorado di Yehova y a sirbi como hues den Israel pa 20 aña.

Con bin Samson—e homber di mas fuerte cu hamas a biba—a hay’e den un situacion asina humiyante? Acaso su forsa extraordinario lo salb’e? Kico tawata e secreto di Samson su forsa? Tin algo cu nos por siña for di e relato di su bida?

Lo E “Cuminsa Libra Israel”

E yiunan di Israel cada bes tawata desvia for di adoracion berdadero. Pesei ora nan ‘a bolbe haci maldad den bista di Yehova, Yehova a entrega nan den man di e Filisteonan pa cuarenta aña.’—Huesnan 13:1.

E relato di Samson a cuminsa ora cu e angel di Yehova a aparece na e esposa steril di un homber Israelita cu yama Manoa y a inform’e cu lo e duna lus na un yiu homber. E angel a bis’e: “Nabaha lo no pasa riba su cabes, pasobra e mucha lo ta un Nazareo pa Dios for di den bariga di su mama; y e lo cuminsa libra Israel for di man di e Filisteonan.” (Huesnan 13:2-5) Prome cu Samson a ser consebi, Yehova a determina cu Samson lo haya un tarea spesifico. For di momento cu e nace lo e tawata un Nazareo, es decir, un persona scohi pa un tipo special di sirbishi sagrado.

E Ta “Net Esun Apropiado den Mi Bista”

Segun cu Samson a crece, ‘Yehova a sigui bendicion’e.’ (Huesnan 13:24) Un dia Samson a bai serca su tata y su mama y a bisa nan: “Mi a mira un mohe na Timna, un di e yiu mohenan di e Filisteonan; pesei awor, busc’e pa mi como esposa.” (Huesnan 14:2) Imagina bo nan sorpresa. En bes di libra Israel for di man di e opresornan, nan yiu kier a forma un aliansa matrimonial cu nan. Casa cu un mohe cu tawata adorado di diosnan pagano tawata contra e Lei di Dios. (Exodo 34:11-16)  Pa e motibo ei e mayornan a expresa nan desaprobacion: “Ta ningun mohe no tin entre e yiu mohenan di bo famianan, of entre henter nos pueblo, cu bo ta bai busca un esposa serca e Filisteonan insircuncida?” Ma Samson a insisti: “Busc’e pa mi, pasobra t’e mi ta gusta” of literalmente, “e ta net esun apropiado den mi bista.”—Huesnan 14:3; NW.

Den ki manera e mohe Filisteo en particular aki tawata “net esun apropiado” pa Samson? No den e sentido cu e tawata “bunita, agradabel, atractivo”, segun e Cyclopedia di McClintock y Strong, “sino apropiado pa logra un meta, proposito of obhetivo.” Cua meta? Huesnan 14:4 ta splica cu Samson “tawata busca un oportunidad contra e Filisteonan.” Samson tawata interesa den e mohe pa e proposito ei. Segun cu Samson a crece bira adulto, “e spirito di SEÑOR a cuminsa mov’e”, of stimul’e na accion. (Huesnan 13:25) Pues tawata e spirito di Yehova cu a motiva Samson pa haci e peticion remarcabel aki pa un casa y e tawata tambe e forsa cu a motiva henter su carera como hues di Israel. Samson a haya e chens cu e tawata busca? Laga nos considera prome con Yehova a sigur’e di apoyo dibino.

Samson tawata riba caminda pa Timna, e stad di su futuro esposa. E relato biblico ta conta: “[Samson] a yega te na e cunucunan di wendruif di Timna; y mira, un leon chikito a bin contra dje ta gruña. Y e spirito di SEÑOR a bin riba dje cu poder, asina cu el a scheur e leon.” E demostracion remarcabel aki di forsa a tuma luga ora cu Samson tawata su so. No tawatin ningun testigo. Acaso esaki tawata Yehova su manera di sigura Samson cu como un Nazareo e tawata capasita pa cumpli cu e encargo cu Dios a dun’e? Bijbel no ta bisa, pero Samson definitivamente a realisa cu tal poder extraordinario no tawata di su mes. E mester a bin di Dios. E por a steun cu Yehova lo yud’e cu e trabou su dilanti. Fortifica door di e incidente cu e leon, Samson “a sigui bai abou y a cuminsa papia cu e mohe; y ainda e tawata apropiado den bista di Samson.”—Huesnan 14:5-7; NW.

Ora cu mas despues Samson a regresa pa tuma e mohe y bai cas cu ne, “el a kita for di caminda pa wak e cadaver di e leon; y mira, tawatin un neishi di abeha y miel den curpa di e leon.” Tumando nota di esaki, Samson a conta e siguiente charada na 30 yoncuman Filisteo cu a compañ’e durante su casamento: “For di e comedo a sali algo pa come, y for di esun fuerte a sali algo dushi.” Si nan a rei e charada, Samson lo a duna nan 30 paña-djabou y 30 set di paña-pa-cambia. Si nan no por a saca e charada, nan lo mester a duna  Samson mes tanto paña. E Filisteonan no por a saca e charada pa tres dia. Riba e di cuater dia, nan a dicidi na menasa e mohe. Nan a bis’e: “Papia dushi-dushi cu bo esposo, lok e pa e bisa nos e charada, pa nos no kima abo y e cas di bo tata cu candela.” Esta cruel! Si e Filisteonan tawata trata nan mes hendenan den e manera aki, imagina bo e situacion penoso di e Israelitanan oprimi!—Huesnan 14:8-15.

E mohe morto spanta a presiona Samson pa bis’e e contesta. Demostrando falta di amor y lealtad na Samson, el a conta e yoncumannan mesora kico tawata e contesta. Nan a saca e charada, y Samson tawata sa dicon. El a bisa nan: “Si boso no a ploeg cu mi bishe, boso lo no a haya sa mi charada.” E chens cu Samson tawata busca awor a presenta su mes. “E ora ei e spirito di SEÑOR a bin riba dje cu poder, y el a baha bai Askelon, y a mata trinta di nan hombernan y a cohe nan botin, y a duna e setnan di paña-pa-cambia na esnan cu a saca e charada.”—Huesnan 14:18, 19.

Samson su accion na Askelon a ser motiva pa un deseo di tuma vengansa? No. Tawata un acto di Dios mediante su libertado scohi. Mediante Samson, Yehova a cuminsa un lucha contra e opresornan cruel di su pueblo. E campaña aki mester a sigui. E siguiente oportunidad a presenta ora cu Samson a bin pa bishita su casa.

Samson So Ta Bringa Contra e Filisteonan

Ora Samson a regresa Timna, e ta descubri cu tata di su esposa, pensando cu Samson lo tawata odia su casa, a duna e mohe na un otro homber. Samson di pafo a parce ofendi. El a cohe 300 zoro y mara nan dos dos cu un flambeu meimei di nan rabo. Ora el a los e zoronan, nan a pega cunucunan y tambe hofi di wendruif y di oleifi na candela, y asina nan a destrui Filisteo su tres cosechanan principal di aña. E Filisteonan furioso a desplega crueldad. Nan a considera Samson su casa y tata di e casa responsabel y a kima nan. Nan vengansa cruel a sirbi Samson su proposito. E na su turno a ataca nan cu un gran matansa.—Huesnan 15:1-8.

Acaso e Israelitanan a compronde cu ta Yehova Dios a bendiciona Samson y nan a bin join e pa trece un fin na e dominacion Filisteo? No. Pa evita problema, e hombernan di Huda a manda 3.000 homber pa aresta Dios su lider scohi y pa entreg’e na su enemigonan. Sinembargo, e falta di lealtad aki di parti di Israel a duna Samson e oportunidad pa causa mas perdida na su enemigonan. Ora cu e tawata a punto di ser entrega na e Filisteonan, “e spirito di SEÑOR a bin riba dje cu poder, asina cu e cabuyanan cu tawatin na su brasanan a bira manera lino kima cu candela, y su cabuyanan a cai for di su mannan.” E ora ei el cohe un cacumbein di un burico y mata mil enemigo cu ne.—Huesnan 15:10-15.

Suplicando Yehova, Samson a bisa: “Bo a duna e gran liberacion aki pa medio di man di bo sirbido, y awor mi mester muri di sed y cai den man di hendenan insircuncida?” Yehova a scucha Samson su oracion y a contest’e. “Dios a split e spelonk ..., asina cu a sali awa for di dje. Ora cu el a bebe, su forsa a bolbe y el a rebiba.”—Huesnan 15:18, 19.

Samson tawata determina pa cumpli cu su obhetivo, esta, bringa contra e Filisteonan. E echo cu el a keda na cas di un prostituta na Gaza tawata cu e proposito di bringa contra e enemigonan di Dios. Samson tawatin mester di alohamento pa pasa anochi den un stad enemigo, y el a logra haya esei den cas di un prostituta. Samson no tawatin ningun proposito inmoral na mente. El a sali meianochi for di cas di e mohe, gara e portanan di e stad y e dos balkinan, anto el a carga nan hiba te riba un sero serca di Hebron, cu tawata keda 60 kilometer leu. El a haci esaki cu Dios su  aprobacion y cu e forsa cu Dios a dun’e.—Huesnan 16:1-3, NW.

E manera cu e spirito santo tawata obra den Samson su caso tawata unico debi na e circunstancianan extraordinario. Fiel sirbidonan di Dios djawe por steun riba e mesun spirito ei pa duna nan forsa. Hesus a sigura su siguidonan cu Yehova lo “duna e spirito santo na esnan cu pidie.”—Lucas 11:13.

Dicon Yehova ‘A Bai for di Samson’?

Despues a sosode cu Samson a enamora di un mohe cu yama Dalila. E cinco prinsnan principal di e Filisteonan tawata asina ansioso pa caba cu Samson cu nan a bai pidi Dalila yuda nan. Nan a acerc’e y a bis’e: “Papia dushi-dushi cu Samson, y mira unda su forsa grandi ta sinta, y con nos por podera di dje.” Como soborno, cada un di e prinsnan a ofrec’e “mil un shen pida plata.”—Huesnan 16:4, 5.

Si e pidanan di plata tawata ciclo, e oferta di 5.500 ciclo tawata un soborno hopi grandi. Abraham a paga 400 ciclo pa un luga di dera su casa, y e prijs di un esclabo tawata solamente 30 ciclo. (Genesis 23:14-20; Exodo 21:32) E echo cu e prinsnan—gobernantenan di cinco stad Filisteo—a paga Dalila un soborno y no a haci un yamada riba dje pa ofrece su servicio como muestra di lealtad na su pueblo, ta indica cu kisas Dalila tawata un mohe Israelita. En todo caso, Dalila a acepta e oferta.

Tres biaha Samson a duna Dalila contesta falso riba su pregunta, y tres biaha Dalila a traicion’e door di purba entreg’e na su enemigonan. Pero “a sosode cu door cu Dalila tawata pone presion riba dje tur dia cu su palabranan y tawata rog’e, Samson a fada pa muri.” Finalmente Samson a revela e berdad—nunca e no a corta su cabei. Si cort’e, lo e bira debil y lo e ta mescos cu tur otro homber.—Huesnan 16:6-17.

Esei tawata Samson su caida. Dalila a logra hay’e den un posicion pa por a feita su cabes. Sinembargo, Samson su poder no tawata literalmente den su cabei. Su cabei simplemente a representa su relacion special cu Dios como un Nazareo. Ora Samson a hinca su mes den un situacion cu a afecta su posicion como Nazareo door cu nan a feita su cabes, ‘Yehova a bai for di dje.’ E ora ei e Filisteonan a podera di Samson, hacie ciego y ser’e den prizon.—Huesnan 16:18-21.

Ki un les poderoso esaki ta siña nos! Acaso nos no mester mira nos relacion cu Yehova como algo sumamente balioso? Si den un manera of otro nos ta compromete nos dedicacion na Dios como Cristian, con nos por spera pa Dios sigui bendiciona nos?

“Laga Mi Muri Hunto cu e Filisteonan”

Filisteonan contento a gradici nan dios Dagon pa Samson su derota. Pa celebra nan victoria, nan a hiba nan prizonero na e tempel di Dagon. Pero Samson tawata sa e berdadero motibo di su caida. E tawata sa dicon Yehova a bandon’e, y Samson a repenti di su fayo. Mientras cu Samson tawata den prizon, su cabei a bolbe crece bira hopi. Awor cu e tawata dilanti di miles di Filisteo, kico lo el a haci?

Samson a pidi den oracion: “O Señor DIOS, pa fabor, corda riba mi y pa fabor, duna mi forsa e biaha aki so, o Dios, pa mi tuma vengansa awor mes riba e Filisteonan pa mi dos wowonan.” Anto el a pusha su curpa contra e dos pilarnan cu tawata sostene e luga, anto “el a dobla su curpa cu tur su forsa.” Cu ki resultado? “E cas a bash’abou riba e prinsnan y riba henter e pueblo cu tawata den dje. Asina esnan cu el a mata na su morto tawata mas cu esnan cu el a mata durante di su bida.”—Huesnan 16:22-30.

Pa loke ta forsa fisico, Samson tawata e homber di mas fuerte cu a biba. Su echonan poderoso tawata realmente remarcabel. Pero mas importante ainda, e Palabra di Yehova ta conta Samson entre e hendenan cu tawatin fe fuerte.—Hebreonan 11:32-34.

[Plachi na pagina 26]

Kico tawata e secreto di Samson su forsa?