Un “Pim” Ta Duna Prueba Cu Bijbel Su Historia Ta Veridico
Un “Pim” Ta Duna Prueba Cu Bijbel Su Historia Ta Veridico
DEN tempo di Rei Saul, e Israelitanan tawatin cu bai serca herero Filisteo pa laga slijp nan hermentnan di metal. Bijbel ta declara: “E prijs tawata dos tercer parti di un ciclo pa e ploegnan, e chapinan, e forkinan y e hachanan, y pa laga slijp e machetenan.”—1 Samuel 13:21.
Den e versiculo aki e palabra na Hebreo original pa “dos tercer parti di un ciclo” ta pim y e ta aparece un solo biaha den Bijbel. Kico tawata un pim? E contesta riba e pregunta ei a keda un misterio te na aña 1907 di nos era, ora cu arkeologonan a coba saca e prome piedra di peso pim na e antiguo stad di Gezer. Traductornan di Bijbel di mas prome tawatin dificultad pa traduci e palabra “pim.” Por ehempel, King James Version a traduci 1 Samuel 13:21: “Sinembargo nan tawatin un veilo pa e chapinan, y pa e ploegnan, y pa e forkinan y pa e hachanan y pa slijp e puinan.”
Expertonan sa awor cu un pim tawata un midi di peso di un promedio di 7,82 gram, of aproximadamente dos tercer parti di un ciclo; ciclo tawata e unidad basico di peso Hebreo. E Filisteonan tawata cobra e Israelitanan un pim di fragmento di plata pa slijp nan hermentnan. Ora cu e reino di Huda y su capital, Herusalem, a cai na aña 607 prome cu nos era, nan a stop di uza e sistema di peso basa riba ciclo. Pero, con e peso di pim ta duna prueba cu e historia di e Scritura Hebreo ta veridico?
Wel, algun experto ta pretende cu e texto di e Scritura Hebreo, incluso e buki di Prome Samuel, ta data di e periodo Griego-Romano, tin asta ta bisa cu e ta data di siglo 2 pa siglo 1 prome cu nos era. Pesei segun nan, “pa reconstrui un ‘Israel antiguo’ of uno ‘biblico’”, e texto di e Scritura Hebreo no ta sirbi pasobra e ta ‘“no historico”, di poco of ningun balor mes, ya cu un Israel antiguo of biblico ta simplemente un invento literario moderno di Hudiu y Cristian.’
Sinembargo, referiendo na e peso di pim menciona na 1 Samuel 13:21, William G. Dever, profesor di arkeologia y antropologia di Medio Oriente, a bisa: “No ta posibel cu [pim] a ser ‘inventa’ door di escritornan cu a biba den e periodo Griego-Romano varios siglo despues cu e pesonan aki a disparce y a ser lubida. De echo, e pida texto biblico aki ... no a ser comprendi sino te na principio di siglo 20 A.D., ora cu e prome ehempelnan arkeologico concreto a keda descubri cu e palabra Hebreo pîm riba nan.” E profesor a sigui bisa: “Si tur e relatonan biblico ta ‘inventonan literario’ di e periodo Griego-Romano, ki mishi e relato en particular aki den e Bijbel Hebreo? Claro cu un hende lo por bisa cu e incidente di pîm ta ‘djis un detaye.’ Esei ta berdad; pero manera ta bon conoci, ‘historia ta consisti di detaye.’”
[Plachi na pagina 29]
Un peso pim tawata rond di dos tercer parti di un ciclo