Ciencia y Bijbel Realmente Ta Contradeci Otro?

E SIMIÑANAN di e clash entre Galileo y Iglesia Catolico a keda sembra siglonan prome cu Copernicus y Galileo a nace. E Griegonan di antiguedad a tuma e punto di bista cu tera ta e centro di universo y e idea ei a ser haci famoso door di e filosofo Aristoteles (384-322 prome cu nos era [P.E.C.]) y e astronomo-astrologo Tolomeo (siglo 2 di nos era [E.C.]). *

Aristoteles su concepto di universo a ser influencia door di e pensamento di e matematico y filosofo Griego Pitagoras (siglo 6 P.E.C.). Aristoteles a tuma Pitagoras su punto di bista cu circulo y bola tawata formanan perfecto. Pesei Aristoteles a kere cu shelo tawata un serie di bola den otro, manera e capanan di un siboyo. Cada capa tawata di cristal, cu e tera como punto central. Streyanan tawata move den circulo, y a ricibi nan movecion for di e bola di mas pafo, caminda e poder dibino tawata situa. Tambe Aristoteles a kere cu solo y otro obhetonan celestial tawata perfecto, sin ningun marca of mancha, y cu nan no a ser afecta pa cambio.

Aristoteles su gran concepto tawata un producto di filosofia, no di ciencia. Den su opinion, un tera cu ta den movecion tawata contra sentido comun. Tambe el a rechasa e idea di espacio bashi, ya cu el a pensa cu  si mundo ta den movecion esei lo a causa friccion y un dia lo el a stop di move si no tin un forsa constante ta ten’e den movecion. Como cu Aristoteles su concepto a parce logico a base di loke cientificonan tawata sa e tempo ei, hende por lo general tawata di acuerdo cu Aristoteles pa casi 2.000 aña. Te den siglo 16, ainda filosofo Frances Jean Bodin a expresa e punto di bista popular ei bisando: “Ni un hende cu sano huicio, of cu tin e minimo conocemento di fisica, hamas lo pensa cu tera, cu ta pisa y dificil pa maneha ..., ta tambalia ... rond di su propio as y tambe rond di solo; pasobra si mundo djis move un tiki, nos lo mira stadnan y baluartenan, pueblitonan y seronan benta plat abou.”

Iglesia Ta Adopta Aristoteles

Un stap mas cu a hiba na e confrontacion entre Galileo y iglesia a tuma luga den siglo 13 y a envolve e autoridad Catolico Tomas Aquino (1225-74). Aquino tawatin un respet profundo pa Aristoteles, y a referi na dje como E Filosofo. Cinco aña largo Aquino a lucha pa combina e filosofia di Aristoteles cu e siñansa di iglesia. Segun Wade Rowland den su buki Galileo’s Mistake (E Eror di Galileo), ya pa tempo di Galileo, “un mescla di Aristoteles den e teologia di Aquino a bira doctrina fundamental di Iglesia di Roma.” Corda tambe cu den e temponan ei no tawatin un comunidad cientifico para riba su mes. Educacion tawata pa gran parti den man di iglesia. Anto iglesia tawata por lo general e unico autoridad riba tereno di religion y ciencia.

Awor e escenario tawata cla pa e confrontacion entre iglesia y Galileo. Asta prome cu Galileo a mete cu astronomia, el a skirbi un articulo tocante movecion. E articulo a cuestiona hopi suposicion di Aristoteles, kende tawata gosa di hopi respet. Sinembargo, ta Galileo su apoyo firme di e concepto cu solo ta e centro di universo y su declaracion cu esei ta cuadra cu Scritura tawata loke cu a hiba na su huicio dilanti di tribunal di Inkisicion na aña 1633.

Den su defensa, Galileo a afirma su fe firme den Bijbel como Dios su Palabra inspira. Tambe el a argumenta cu e Scritura a ser skirbi pa beneficio di hende comun y coriente y cu no mester a interpreta e referencianan biblico na e supuesto movecion di solo literalmente. Su argumentonan tawata en vano. Como cu Galileo a rechasa e interpretacion di Scritura basa riba filosofia Griego, nan a conden’e. Ta te na aña 1992 numa Iglesia Catolico oficialmente a admiti cu nan a comete un eror ora nan a husga Galileo.

Lesnan Cu Nos Por Saca

Kico nos por siña for di e susesonan aki? Pa cuminsa, Galileo no tawatin problema cu Bijbel. Mas bien, el a cuestiona e siñansanan di iglesia. Un escritor di temanan religioso a comenta: “Parce cu e lesnan cu nos ta saca for di Galileo no ta cu Iglesia a tene mucho duro na berdadnan biblico; sino mas bien cu e no a tene suficiente duro na nan.” Iglesia, door di permiti filosofia Griego influencia su teologia, a sucumbi pa tradicion en bes di sigui e siñansanan di Bijbel.

Tur esaki ta recorda nos di e spiertamento biblico: “Mira pa ni un hende no cohe boso preso door di filosofia y engaño vano, segun tradicion di hende, segun e principionan elemental di mundo, y no segun Cristo.”—Colosensenan 2:8.

Mescos cu den e tempo aya, awe tambe hopi hende den Cristiandad ansiosamente ta acepta teoria- y filosofianan cu ta contradeci Bijbel. Un ehempel ta Darwin su teoria di evolucion, cu nan a acepta na luga di e relato di creacion cu tin den Genesis. Door di haci e  cambio aki, e iglesianan de echo a haci Darwin un Aristoteles moderno y evolucion un creencia religioso fundamental. *

Ciencia Berdadero Ta Cuadra cu Bijbel

Lo anterior di ningun manera mester descurasha interes den ciencia. Un cos ta sigur, Bijbel mes ta invita nos pa siña for di loke Dios a crea y pa tuma nota di Dios su cualidadnan asombroso den loke nos ta mira. (Isaias 40:26; Romanonan 1:20) Claro cu Bijbel no ta pretende di ta duna les di ciencia. Mas bien e ta revela Dios su normanan, tambe aspectonan di su personalidad cu creacion so no por siña nos, y su proposito pa hende. (Salmo 19:7-11; 2 Timoteo 3:16) Sinembargo, ora Bijbel ta referi na fenomenonan natural, consistentemente e ta exacto. Galileo mes a bisa: “Tanto e Santo Scritura como naturalesa a bin di e Palabra Dibino ... Dos berdad nunca por contradeci otro.” Considera e siguiente ehempelnan.

Un cos mas fundamental cu e movecion di streya y planeta ta cu tur materia den universo ta ser goberna pa lei, manera por ehempel e lei di gravedad of zwaartekracht. Fuera di Bijbel, ta Pitagoras a haci e mencion di mas bieu na leinan fisico, y e tawata kere cu por a splica universo mediante calculacionnan matematico. Dos mil aña despues, Galileo, Kepler y Newton finalmente a proba cu materia ta ser goberna door di leinan logico.

E prome referencia biblico na lei natural nos ta haya den e buki di Job. Rond di aña 1600 P.E.C., Dios a puntra Job: “Bo conoce e ordenansanan [of, leinan] di e shelonan?” (Job 38:33) E buki di Yeremias, skirbi den siglo 7 P.E.C., ta referi na Yehova como Creador di “lei fiho di luna y streyanan” y “e leinan fiho pa shelo y tera.” (Yeremias 31:35; 33:25)  En bista di e declaracionnan aki, comentarista biblico G. Rawlinson a remarca: “Tanto e escritornan sagrado como ciencia moderno ta afirma basta firme cu lei ta prevalece den e mundo material.”

Si nos uza Pitagoras como punto di referencia, anto e declaracion di Job tawata un mil aña prome cu su tempo. Corda cu Bijbel su meta no ta pa djis revela echonan fisico sino principalmente pa inculca den nos cu Yehova ta e Creador di tur cos, e ta esun cu por crea leinan fisico.—Job 38:4, 12; 42:1, 2.

Un otro ehempel cu nos por considera ta cu e awanan di mundo ta pasa door di un ciclo di movecion cu nan ta yama e ciclo di awa. Simplemente bisa, awa ta evapora for di lama, forma nubia, cai como awasero of sneu riba tera, y cu tempo ta bolbe bek na lama. E referencianan no biblico di mas bieu na e ciclo aki ta di siglo 4 P.E.C. Sinembargo, pa cientos di aña prome cu esei nos ta haya declaracionnan tocante e ciclo di awa den Bijbel. Por ehempel, den siglo 11 P.E.C., Rei Salomon di Israel a skirbi: “Tur riu ta core bai lama, toch lama no ta yena. Na e luga for di unda riunan ta bin, aya nan ta bolbe bai.”—Eclesiastes 1:7.

Asina tambe rond di aña 800 P.E.C., profeta Amos, un humilde wardado di carne y cunukero, a skirbi cu Yehova ta esun cu “ta yama e awanan di lama y ta basha nan afo riba superficie di tera.” (Amos 5:8) Sin uza palabranan complica y tecnico, tanto Salomon como Amos a describi cu exactitud e ciclo di awa, cada un for di un angulo un poco diferente.

Bijbel ta papia tambe di e echo cu Dios “ta colga tera riba nada”, of segun Beibel na papiamentu koriente, “a pone mundo caminda no tawatin nada pa want’e.” (Job 26:7) En bista di e conocemento cu tawatin disponibel na aña 1600 P.E.C., cu ta mas o menos e tempo cu e palabranan ei a keda expresa, ta un homber extraordinario so por a declara cu un obheto solido por keda colga den espacio sin ningun sosten fisico. Manera nos a menciona anteriormente, Aristoteles mes a rechasa e concepto di un espacio bashi, y el a biba mas cu 1.200 aña despues.

Bo no ta haya cu ta masha asombroso cu Bijbel ta haci declaracionnan asina exacto, specialmente si bo tuma na cuenta e ideanan robes pero supuestamente di sentido comun cu tawata reina den e tempo cu a skirbi Bijbel? Pa hende pensativo, esaki ta un evidencia mas cu Bijbel ta inspira door di Dios. Pesei lo ta sabi di nos parti pa no laga ningun siñansa of teoria cu ta contradeci e Palabra di Dios influencia nos facilmente. Manera historia a mustra bes tras bes, filosofianan humano, asta esnan di personanan sumamente intelectual, por ta popular pa un tempo, mientras cu ‘e palabra di Yehova ta permanece pa semper.’—1 Pedro 1:25.

[Nota]

[Cuadro/Plachi na pagina 6]

E Actitud di e Protestantnan

Lidernan di e Reformacion Protestant tambe a denuncia e concepto di solo como centro di universo. Entre e lidernan ei tawatin Martin Luther (1483-1546), Philipp Melanchthon (1497-1560) y Johannes Calvijn (1509-64). Luther a bisa di Copernicus: “E bobo aki kier cambia henter e ciencia di astronomia.”

E reformadonan a basa nan argumento riba un interpretacion literal di cierto textonan biblico, manera e relato na Hosue capitulo 10 cu ta bisa cu solo y luna “a keda para.” * Dicon e reformadonan a tuma e posicion aki? E buki Galileo’s Mistake ta splica cu mientras cu e Reformacion Protestant a kibra e yugo di Iglesia Catolico, e no a “deshaci di e autoridad fundamental” di Aristoteles y Tomas Aquino, kendenan su punto di bista a ser “acepta tanto door di Catolico como Protestant.”

[Nota]

[Plachinan]

Luther

Calvijn

[Reconocemento]

For di e buki Servetus and Calvin, 1877

[Plachi na pagina 4]

Aristoteles

[Reconocemento]

For di e buki A General History for Colleges and High Schools, 1900

[Plachi na pagina 5]

Tomas Aquino

[Reconocemento]

For di e buki Encyclopedia of Religious Knowledge, 1855

[Plachi na pagina 6]

Isaac Newton

[Plachi na pagina 7]

Mas cu 3.000 aña pasa, Bijbel a describi e ciclo di awa di e tera