Ciencia y Religion—Con un Conflicto A Cuminsa
Ciencia y Religion—Con un Conflicto A Cuminsa
E ASTRONOMO di 70 aña, Nicolaus Copernicus, tawata riba su cama di morto, haciendo esfuerso pa lesa. E tawatin den su man e manuscrito cla pa ser publica di un documento cu el a skirbi. Sea cu e tawata sa of no, su buki lo a revoluciona humanidad su punto di bista di universo. Tambe lo el a start un controversia intenso den Cristiandad, y te awe mundo ta sinti e efectonan di e controversia ei.
Tawata aña 1543, y Copernicus tawata un Polaco Catolico. E buki di Copernicus, titula Dreimento di e Bolanan Celestial, a declara cu ta solo, y no e tera, tawata e centro di universo. Cu publicacion di djis e buki aki Copernicus a remplasa e teoria sumamente complica di tera como centro di universo, pa un teoria bunita y simpel.
Na prome instante, tawatin masha tiki indicacion di e clash cu lo a tuma luga den futuro. Un motibo tawata cu Copernicus a presenta su ideanan na un manera discreto. Ademas, parce cu e tempo ei Iglesia Catolico—cu a adopta e punto di bista cu ta tera ta e centro di universo—tawata mas habri pa speculacionnan cientifico. Asta papa mes a urgi Copernicus pa publica su buki. Ora cu Copernicus finalmente a public’e, e editor cu tawatin miedo a skirbi su propio prologo, y a presenta e concepto di cu solo ta e centro di universo como un ideal matematico, no necesariamente un berdad di astronomia.
E Conflicto Ta Bira Intenso
E siguiente participante riba escenario tawata e astronomo, matematico y fisico Italiano, Galileo Galilei (1564-1642), kende tambe tawata Catolico. El a haci uzo di telescopnan cu e mes a traha y den cua el a incorpora e lens cu hende a caba di inventa. Galileo a mira detayenan di shelo cu nunca prome hende a mira. Su observacionnan a combenc’e cu Copernicus tawatin rason. Galileo a mira tambe mancha riba solo, y esei a cuestiona un otro creencia filosofico y religioso sumamente importante—cu solo nunca ta cambia, ni fria ni muri.
Distinto for di Copernicus, Galileo a promove su ideanan cu curashi y celo. Anto el a haci esei den un ambiente religioso mas hostil, pasobra pa e tempo ei Iglesia Catolico abiertamente a bira contra di e teoria di Copernicus. Pesei ora cu Galileo a argumenta cu e concepto di solo como e centro di universo no solamente tawata corecto sino tambe a cuadra cu Scritura, iglesia a cuminsa sospech’e di herehia, esta, di ta bai contra di doctrina di iglesia. *
Galileo a bai Roma pa defende su mes, pero en vano. Na aña 1616 Iglesia Catolico a orden’e pa stop di promove Copernicus. Esei a silencia Galileo pa un tempo. Pero na 1632 el a publica un otro obra cu a apoya Copernicus. E siguiente aña mes, Inkisicion a sentencia Galileo na castigo di prizon pa bida largo. Sinembargo, debi na su edad nan a reduci e sentencia rapidamente na aresto domiciliario.
Hopi hende ta mira Galileo su conflicto cu iglesia como un gran triunfo di ciencia riba religion, y den un sentido mas amplio, como un triunfo asta riba Bijbel. Pero manera nos lo mira den e siguiente articulo, e conclusion simplista aki ta pasa por halto di hopi echo.
[Nota]
^ par. 7 Galileo innecesariamente a haci personanan poderoso su enemigo cu su palabranan na ora y sarcasmo skerpi. Ademas, door di argumenta cu e concepto di solo como centro di universo a harmonisa cu Scritura, el a presenta su mes como un autoridad riba asuntonan di religion, locual a proboca iglesia mas ainda.
[Plachi na pagina 3]
Copernicus
[Reconocemento]
Saca for di Giordano Bruno und Galilei
[Plachi na pagina 3]
Galileo ta defende su mes dilanti Inkisicion Romano
[Reconocemento]
For di e buki The Historian’s History of the World, Vol. IX, 1904
[Reconocemento pa Potret na pagina 3]
Fondo: Diagram cu ta describi Copernicus su concepto di e sistema solar