Mayornan, Proteha Boso Herencia Precioso

“Sabiduria ta proteccion ... [E] ta preserva bida di esnan cu ta pose’e.” —ECLESIASTES 7:12.

1. Dicon mayornan mester mira nan yiunan como un regalo?

MAYORNAN ta trece na mundo un persona nobo y bibo cu tin caracteristicanan fisico y rasgonan di personalidad paresido na esnan di nan. Bijbel ta yama e chikitinnan ei ‘un herencia di Yehova.’ (Salmo 127:3) Siendo cu Yehova ta e berdadero Dunador di Bida, realmente e ta confiando mayornan cu loke eigenlijk ta di dje. (Salmo 36:9) Mayornan, con boso ta mira e echo cu boso a haya un regalo tan precioso for di Dios?

2. Con Manoa a reacciona ora el a haya sa cu lo e bira tata?

² Mayornan definitivamente mester ricibi tal regalo cu humildad y aprecio. Mas cu 3.000 aña pasa, e Israelita Manoa a reacciona asina ora cu un angel a informa su casa cu lo e duna lus na un yiu. Ora cu Manoa a tende e bon noticia, el a pidi den oracion: “O SEÑOR, pa fabor, laga e homber di Dios cu bo a manda bin serca nos atrobe, pa e siña nos kico nos mester haci pa e mucha cu mester nace.” (Huesnan 13:8) Mayornan, kico boso por siña for di e ehempel di Manoa?

Dicon Dios Su Yudansa Ta Necesario Awe

3. Dicon specialmente awe nos tin mester di Dios su yudansa pa lanta yiunan?

³ Awe mas cu nunca prome, mayornan tin mester di Yehova su yudansa pa lanta nan  yiunan. E motibo? Satanas e Diabel cu su angelnan a ser saca for di shelo y tira abou na tera. Bijbel ta spierta: “Ai di tera ... pasobra Diabel a baha bin serca boso cu gran furia, sabiendo cu ta ked’e solamente un poco tempo mas.” (Revelacion 12:7-9, 12) Bijbel ta splica cu Satanas ta “manera un leon cu ta gruña, buscando ken e por devora.” (1 Pedro 5:8) Leon normalmente ta yag riba e bestianan mas indefenso, cu hopi biaha ta e yiunan. Pues ta sabi anto pa mayornan Cristian acudi na Yehova pa haya guia pa proteha nan yiunan. Cuanto esfuerso boso ta haciendo pa proteha boso yiunan?

4. (a) Sabiendo cu tin un leon ta cana rond den nan bario mester motiva mayornan pa haci kico? (b) Kico muchanan tin mester pa nan haya proteccion?

⁴ Si boso sa cu tin un leon ta cana los den boso bario, proteccion di boso yiunan sigur lo ta boso precupacion principal. Satanas ta manera un bestia feros. E ta busca moda di corumpi e pueblo di Dios, pa asina haci nan indigno di haya Dios su aprobacion. (Job 2:1-7; 1 Huan 5:19) Mucha ta un blanco facil. Pa scapa for di e trampanan di Diabel, muchanan mester siña conoce Yehova y obedec’e. Conocemento di Bijbel ta esencial. Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Ademas, muchanan tin mester di sabiduria, esta, e habilidad di compronde y aplica loke nan siña. Siendo cu “sabiduria ta preserva bida di esnan cu ta pose’e”, boso como mayor tin cu inculca e berdad den curason di boso yiunan. (Eclesiastes 7:12) Con boso lo por haci esaki?

5. (a) Con un mayor por duna sabiduria? (b) Con Proverbionan ta describi e balor di sabiduria?

⁵ Boso por—y lo mester—lesa pa boso yiunan for di e Palabra di Dios. Pero yuda nan stima Yehova y obedec’e ta rekeri mas cu esei—yiunan mester tin comprondemento. Un ehempel: Podise mayornan ta bisa un mucha pa no crusa caya sin cu prome el a wak tur dos banda. Sinembargo, tin mucha no ta obedece. Dicon? Kisas no a splica nan suficiente biaha kico ta e consecuencianan si auto dal nan of no a splica nan esei den un manera cu ta laga nan compronde bon cla kico ta e peliger, y asina vence e “locura” cu lo por hiba na un accidente. Pa duna sabiduria na un otro hende ta tuma tempo, y tambe hopi pasenshi. Pero esta balioso sabiduria ta! Bijbel ta bisa: “Su camindanan ta camindanan agradabel, y tur su bereanan ta pas. E ta un palo di bida pa esnan cu ta gar’e tene, y felis ta tur esnan cu tene duro na dje.”—Proverbionan 3:13-18; 22:15.

E Siñansa Cu Ta Duna Sabiduria

6. (a) Dicon muchanan hopi bes no ta actua sabi? (b) Ki bataya ta tumando luga?

⁶ Hopi bes muchanan ta haci loke ta malo, no pasobra no a siña nan loke ta corecto, sino pasobra e siñansa no a alcansa nan curason, e hende cu nan ta di paden. Diabel ta hibando un lucha pa gana curason di muchanan. Su metodo ta pa percura expone nan na influencianan malbado di su mundo. Tambe e ta purba probecha di e inclinacion pecaminoso pa haci loke ta malo cu muchanan a hereda. (Genesis 8:21; Salmo 51:5) Mayornan tin cu reconoce cu ta un berdadero bataya ta tumando luga pa haya control di e curason di nan yiunan.

7. Dicon djis bisa un mucha loke ta bon y loke ta malo no ta basta?

⁷ Mayornan normalmente ta bisa un mucha loke ta bon y loke ta malo, keriendo cu asina nan a siñ’e un cierto principio moral. Kisas nan ta bisa e mucha cu ta malo pa gaña, horta of tene relacion sexual cu un hende cu bo no ta casa cu ne. Sinembargo, pa e mucha obedece e tin mester di un motivacion mas fuerte cu djis pasobra ta su mayornan ta bis’e. E cosnan aki ta leinan di Yehova. E mucha mester siña cu e proceder sabi ta di obedece e mandamentonan di Dios.—Proverbionan 6:16-19; Hebreonan 13:4.

8. Ki clase di siñansa por yuda muchanan actua sabi?

⁸ E universo sumamente complica, e variedad di cosnan bibo cu tin, e cambionan di temporada,  tur e cosnan ei por yuda un mucha compronde cu ta existi un Creador cu tin tur sabiduria. (Romanonan 1:20; Hebreonan 3:4) Ademas, mester siña e mucha cu Dios ta stim’e y cu el a haci areglo mediante e sacrificio di Su Yiu pa dun’e bida eterno y cu e por haci Dios contento door di obedece loke Dios ta bisa. E ora ei probablemente e mucha lo haya gana di sirbi Yehova, apesar di e intentonan di Diabel pa strob’e.—Proverbionan 22:6; 27:11; Huan 3:16.

9. (a) Kico siñansa cu ta salba bida ta rekeri? (b) Kico Bijbel ta manda tatanan haci, y kico esaki ta encera?

⁹ E clase di siñansa cu ta proteha un mucha y ta motiv’e pa haci loke ta corecto ta tuma tempo, atencion y planiamento. E ta rekeri pa mayornan acepta guia for di Dios. Bijbel ta bisa: “Boso, tatanan, ... lanta [boso yiunan] den e disiplina y instruccion di Señor.” (Efesionan 6:4) Kico esei ta nifica? E palabra Griego original pa “instruccion” ta transmiti e idea di “pone mente den.” Pues basicamente tatanan ta ser urgi pa pone e mente di Yehova den nan yiunan. Ki un gran proteccion esei lo ta pa e muchanan! Si yiunan tin e pensamentonan di Dios, su manera di pensa, inculca den nan mente, esei lo proteha nan pa no haci loke ta malo.

Deseo Motiva pa Amor

10. Pa instrui bo yiu na un manera efectivo, kico ta importante pa bo sa?

¹⁰ Sinembargo, pa bo por cumpli cu bo deseo di cria bo yiu na e manera corecto, bo esfuersonan mester ta motiva pa amor. Un factor importante ta bon comunicacion. Busca manera pa sa kico ta pasa den bida di bo yiu y con e ta mira cosnan. Den un ambiente comodo y trankil, uza tacto pa stimula bo yiu pa expresa su mes. Tin biaha, loke e bisa por shock bo. Pero tene cuidou pa bo no reacciona na un manera exagera. Mas bien, scucha cu interes.

11. Con un mayor por pone Dios su mente den un mucha?

¹¹ Por ta masha bon cu bo a lesa pa bo yiu for di Bijbel tocante Dios su lei cu ta prohibi relacion sexual, y asta a lesa esei varios biaha p’e. (1 Corintionan 6:18; Efesionan 5:5) Esaki kisas a graba den bo muchanan loke ta agrada Yehova y loke no ta agrad’e. Sinembargo, pa pone Yehova su mente den un mucha ta rekeri mas cu esei. Muchanan tin mester di yudansa pa rasona riba e importancia di Yehova su leinan. Mester combence nan cu su leinan ta husto y bon y cu obedece nan ta e cos corecto y amoroso pa haci. Ta solamente si bo rasona cu bo yiunan for di e Scritura di manera cu nan ta acepta Dios su punto di bista, lo bo por bisa cu bo a pone Yehova su mente den nan.

12. Con un mayor por yuda su yiu haya e punto di bista corecto di relacion sexual?

¹² Ora bo ta papia tocante sex, lo bo por puntra: “Bo ta kere cu si un hende obedece Yehova su lei di no tene relacion sexual prome cu matrimonio, esei lo strob’e di ta felis?” Anima bo  yiu pa splica su contesta. Despues di repasa Dios su areglo maraviyoso pa produci un yiu, lo bo por puntra: “Bo ta kere cu nos Dios amoroso lo a traha leinan cu ta stroba nos di gosa di bida? Of bo ta pensa cu su leinan t’ei pa haci nos felis y pa proteha nos?” (Salmo 119:1, 2; Isaias 48:17) Saca afo kico bo yiu ta pensa di e asunto aki. Caba lo bo por duna algun ehempel cu ta mustra con inmoralidad sexual a hiba na dolor di curason y problema. (2 Samuel 13:1-33) Door di rasona cu bo yiu di manera cu e ta compronde y ta acepta Dios su punto di bista, lo bo a logra pa un gran parti di pone Dios su mente den dje. Sinembargo, tin un cos mas cu bo por haci.

13. Si un mucha compronde kico tocante Yehova esei specialmente lo por motiv’e pa obedece Yehova?

¹³ Ta sabi pa bo siña bo yiu no solamente e consecuencianan di desobedece Yehova, sino tambe splic’e con Yehova personalmente ta ser afecta door di e manera cu nos ta biba. Mustra bo yiu for di Bijbel cu nos por haci Yehova tristo ora nos no haci su boluntad. (Salmo 78:41, NW) Lo bo por puntra: “Dicon lo bo no kier haci Yehova tristo?” Anto splic’e: “Dios su enemigo Satanas ta bisa cu nos ta sirbi Yehova pa motibonan egoista y no pasobra nos stim’e.” Caba splica cu door di mantene integridad, Job a haci Yehova su curason contento, y asina a contesta Satanas su acusacion falso. (Job 1:9-11; 27:5) Bo yiu tin cu compronde cu dependiendo con e comporta su mes, e por haci Yehova tristo of contento. (Proverbionan 27:11) E les sumamente importante aki y hopi otronan mas mayornan por siña muchanan door di uza e buki Siña for di e Gran Maestro. *

Bon Resultado

14, 15. (a) Ki lesnan den e buki Maestro a motiva muchanan? (b) Ki bon resultado abo tawatin uzando e buki? (Wak tambe e cuadro na pagina 18-19.)

¹⁴ Un welo na Croacia cu ta lesa e buki Maestro cu su nieto di shete aña a skirbi cu e mucha homber a cont’e lo siguiente: “Mama a bisa mi haci algo, ma prome mi no kier a hacie. Pero m’a corda riba e capitulo ‘Obediencia Ta Scapa Bo’, pesei mi a bai bek y a bis’e cu lo mi obedec’e.” Relaciona cu e capitulo “Pakico Nos No Mester Gaña”, un pareha na Florida, Merca, a bisa: “E ta haci preguntanan cu ta invita muchanan pa habri nan curason y admiti erornan cu normalmente nan lo no a admiti.”

¹⁵ E buki Maestro tin mas cu 230 plachi, y tin un comentario breve na cada plachi of grupo  di plachi. Un mama yen di aprecio a comenta: “Hopi biaha mi yiu homber ta keda wak un plachi y no kier pa bira e pagina. E plachinan no solamente ta atractivo sino tambe cu riba nan mes nan ta siña cierto lesnan, of a lo menos ta motiva e muchanan pa haci pregunta. E plachi caminda tin un mucha ta wak television den un camber scur a pone mi yiu homber puntra: ‘Mami, ta kico e mucha ei ta haciendo?’, den un tono cu a indica cu e tawata sa cu algo no ta bon.” E comentario bou di e plachi ei ta bisa: “Ken por mira tur cos cu nos haci?”

Educacion Hopi Importante pa Awe

16. Kico ta sumamente importante pa siña muchanan awe, y dicon?

¹⁶ Muchanan tin cu sa e uzo corecto y incorecto di nan partinan priva di curpa. Sinembargo, no ta semper facil pa papia tocante esaki. Un columnista di corant a remarca cu el a lanta den un tempo den cua hende a considera uzo di palabranan cu ta referi na e organonan sexual como ofensivo. Pa loke ta siña e cosnan aki na su yiunan, el a skirbi: “Lo mi tin cu bai perde berguensa.” En realidad, ora cu mayornan pa berguensa ta evita e topico di sex, esei no ta proteha un mucha. Personanan cu ta busca manera pa abusa sexualmente di mucha ta probecha di e muchanan su ignorancia. Siña for di e Gran Maestro ta trata cu e topico den un manera sano y respetuoso. Nos no ta pone nos yiunan perde nan inocencia door di informa nan tocante sex, al contrario, door di siña nan nos por proteha nan pa nan no perd’e.

17. Con e buki Maestro ta yuda mayornan siña nan yiunan tocante sex?

¹⁷ Den capitulo 10, cu ta trata tocante e angelnan malbado cu a bin na tera y procrea yiu, e buki ta puntra e mucha: “Kico abo sa tocante relacion sexual?” E buki ta duna un contesta simpel y respetuoso. Mas despues, capitulo 32 ta splica con por proteha muchanan contra personanan cu ta busca manera pa abusa sexualmente di nan. Hopi carta cu e editornan di e revista aki a haya ta informa cu e siñansa ei ta sumamente importante. Un carta a bisa: “Siman pasa mi yiu homber Javan a bishita su docter di mucha, e docter a puntra si nos a  papia cu ne tocante e uzo corecto di partinan priva di curpa. El a keda hopi impresiona cu nos a haci esei uzando nos buki nobo.”

18. Con e buki Maestro ta trata e asunto di rindi homenahe na emblemanan nacional?

¹⁸ Un otro capitulo ta trata cu e relato biblico di e tres hobennan Hebreo, Sadrak, Mesak y Abed-nego, kendenan a nenga di buig pa un imagen cu a representa e Estado di Babilonia. (Daniel 3:1-30) Tin hende no ta considera rindi homenahe na un imagen como algo cu ta igual na saluda bandera, manera e buki Maestro ta indica. Sinembargo, tuma nota di loke e escritor Edward Gaffney tawatin di bisa den un entrevista cu e revista U.S. Catholic. El a conta cu su yiu mohe a bis’e, despues di su prome dia na un scol publico, cu el a siña un “oracion nobo na scol.” El a pidi e yiu ripiti e oracion p’e. Gaffney a bisa: “El a pone su man na su curason y cu orguyo a cuminsa: ‘Mi ta hura lealtad na bandera ...’” Gaffney a sigui bisa: “Diripiente, mi a realisa un cos. Testigonan di Yehova tawatin rason. Tin un aspecto di spiritualidad nacional cu ta ser promovi den nos scolnan na un etapa hopi tempran, un lealtad incuestionabel y mas aya di tur limite.”

Ta Bale la Pena

19. Ki recompensa mayornan lo haya pasobra nan ta siña nan yiunan?

¹⁹ Di berdad siña bo yiunan ta bale la pena. Un mama na Kansas, Merca, no por a contene su lagrimanan ora el a haya un carta di su yiu  homber. E yiu a skirbi: “Mi ta sinti mi hopi afortuna di tawatin un criansa cu a yuda mi pa ta relativamente stabil y completo den sentido emocional. Abo cu Papi siguramente merece elogio.” (Proverbionan 31:28) Siña for di e Gran Maestro por yuda hopi mayor mas siña nan yiunan pa asina proteha e herencia precioso aki.

20. Kico mayornan mester corda semper, y ki efecto esei mester tin riba nan?

²⁰ Nos yiunan ta merece tur e tempo, atencion y esfuerso cu nos por duna nan. Ta pa un tempo cortico so nan ta keda mucha. Probecha di tur oportunidad pa bo ta cu nan y yuda nan. Si bo hacie, nunca lo bo lamenta esei. Nan lo bin stima bo. Semper corda esaki, bo yiunan ta un regalo cu Dios a duna bo. Nan ta un herencia masha precioso! (Salmo 127:3-5) Pues trata nan como tal, como si fuera bo tin cu rindi cuenta na Dios pa e manera cu bo a cria nan, pasobra de echo, ta asina ta.

[Nota]

Con Lo Bo Contesta?

• Dicon specialmente awe mayornan tin cu proteha nan yiunan?

• Ki clase di siñansa ta duna sabiduria?

• Ki asuntonan ta sumamente importante pa trata cu bo yiunan awe?

• Con e buki Maestro a yuda mayornan siña nan yiunan?

[Preguntanan di Estudio]

[Cuadro/Plachinan na pagina 18, 19]

Un Buki pa Tur Hende

Siña for di e Gran Maestro a ser prepara pa yuda mayornan of otro adultonan lesa y trata e siñansanan di Hesucristo cu mucha. Sinembargo, adultonan cu a lesa e buki riba nan mes a expresa aprecio sinsero pa loke nan a siña.

Un homber na Texas, Merca, a bisa: “Siña for di e Gran Maestro ta elocuente den su simplesa, motivando nos sea cual sea nos edad, manera den mi caso asta na edad di 76 aña. Masha, masha danki di un persona cu a sirbi Yehova desde su hubentud.”

Un lector di London, Inglatera, a informa: “E plachinan bunita sigur lo atrae tanto mayornan como muchanan. E preguntanan y layout di e buki ta maraviyoso, y ta fantastico pa mira e manera cu e ta trata asuntonan delicado, manera den capitulo 32, ‘Con Yehova A Proteha Hesus.’” E lector a conclui: “Maske e buki aki sin duda ta diseña principalmente pa yiunan di Testigonan di Yehova, mi ta imagina cu maestronan y otro hende tambe lo keda hopi contento pa haya un ehemplar. Mi ta spera ansiosamente di por uz’e den e lunanan y añanan benidero.”

Un señora di Massachusetts, Merca, a comenta riba e tantisimo “plachinan bon pensa.” El a remarca: “Mi a ripara cu maske e buki ta pa mucha, e topiconan cu e ta trata por yuda nos tambe como adulto pensa riba nos relacion personal cu Yehova.”

“Wauw! Ki un buki maraviyoso!” un señora di Maine, Merca, a bisa. “E no ta solamente pa mucha sino pa nos tur como yiunan di Dios. El a touch mi den lo mas profundo di mi ser y a lanta emocionnan y despues a calma nan, di manera cu mi a haya pas. Mi ta sinti mi asina serca di Yehova como mi Tata. El a kita tur e pena cu mi a sufri atrabes di añanan y a laga mi mira su proposito cla cla.” El a conclui: “Mi ta bisando tur hende: ‘Por fabor, les’e.’”

Un señora di Kyoto, Japon, a informa cu ora e tawata lesa pa su nietonan, nan tawata puntr’e cosnan manera: “‘Ta kico e mucha homber ei ta haciendo? Dicon nan ta zundra e mucha mohe aki? Kico e mama aki ta haciendo? Anto e leon aki awor?’ E buki ta siña nos cosnan cu nos ta interesa den dje, pues mi ta stim’e mas cu cualkier otro buki cu mi por a haya den un biblioteca.”

Un tata na Calgary, Canada, a bisa cu manera el a haya e buki, el a cuminsa les’e pa su yiu mohe di seis aña y su yiu homber di nuebe aña. El a informa: “Nan a reacciona mesora na un manera maraviyoso. Mi yiunan tawata lesa hunto cu mi y a contesta e preguntanan di curason. Nan a sinti nan mes parti di e estudio, y esei a duna nan un chens di expresa nan mes. Nan a haya un bida, y mi yiu mohe ta bisa cu e kier studia for di e buki tur anochi.”

Despues di un biaha cu nan a studia, e tata a conta: “Ami cu mi yiu homber a keda papia oranan largo tocante Yehova y su proposito. E tawatin hopi pregunta basa riba informacion den e buki. Mi wowo a yena cu awa ora cu el a bisa mi bon nochi y a puntra: ‘Nos por haci esaki un biaha mas, Papi? Mi tin hopi pregunta, y mi kier sa tur cos tocante Yehova.’”

[Plachi na pagina 15]

Mayornan, kico boso por siña for di e ehempel di Manoa?

[Plachi na pagina 16]

Muchanan, kico boso por siña for di e ehempel di e tres Hebreonan?

[Plachinan na pagina 17]

E plachinan cu nan comentario den e buki “Maestro” ta un herment potente pa siña mucha

Kico Ananias ta gaña Pedro?

Ken por mira tur cos cu nos haci?