Nos Yiunan—Un Herencia Precioso

“Mira, yiunan ta un herencia di SEÑOR; e fruta di bariga ta un recompensa.”—SALMO 127:3.

1. Con e prome baby humano por a nace?

CONSIDERA e susesonan milagroso cu Yehova Dios a haci posibel door di e manera cu el a crea e prome homber y mohe. Tanto e tata como e mama, Adam cu Eva, a contribui cu un parti di nan mes cu a desaroya den matris di Eva y a bira un hende nobo completamente forma—e prome baby humano. (Genesis 4:1) Te cu awe, e manera cu un yiu ta ser consebi y nace ta algo cu ta impresiona nos sin fin y hopi hende ta describi esei como simplemente un milager.

2. Dicon lo bo bisa cu loke ta sosode den matris di un mohe na estado ta un milager?

² Den mas o menos 270 dia, e cel original cu a wordo crea den e mama despues di e mama su union cu e tata, ta crece bira un baby cu ta consisti di miles di miyones di cel. E cel original ei ta contene e instruccionnan necesario pa produci mas cu 200 tipo di cel. Siguiendo e instruccionnan maraviyoso ei cu ta bai mas aya di loke hende por compronde, e celnan aki cu ta asombrosamente complica ta desaroya precis den e orden y manera corecto pa crea un persona nobo y bibo.

3. Dicon hopi hende cu ta pensa logico ta di acuerdo cu ta Dios mester ta responsabel pa e nacemento di un ser humano nobo y bibo?

³ Pues, segun bo, ken realmente a traha e baby? Definitivamente ta Esun cu na prome luga a crea bida. E salmista biblico a canta: “Reconoce cu [Yehova], e ta Dios. E ta esun cu a traha nos, y no ta nos a traha nos mes.” (Salmo 100:3) Mayornan, boso sa bon bon cu no ta boso tawata asina genial pa por a trece un cos tan precioso manera boso yiu na mundo. Ta solamente un Dios cu sabiduria infinito por ta responsabel pa e formacion milagroso di un ser humano nobo y bibo. Pa miles di aña, hende cu ta pensa logico a duna e Magnifico Creador credito pa e formacion di un yiu den matris di su mama. Abo tambe ta haci esei?—Salmo 139:13-16.

4. Ki deficiencia humano nunca nos por culpa Yehova di dje?

⁴ Pero acaso Yehova ta un Creador sin sintimento cu simplemente a start un proceso biologico pa hende homber y hende mohe por produci desendiente manera nan mes? Tin hende sin sintimento, pero Yehova si nunca no ta asina. (Salmo 78:38-40) Bijbel ta bisa na Salmo 127:3: “Mira, yiunan ta un herencia di SEÑOR; e fruta di bariga ta un recompensa.” Laga nos ban considera kico un herencia ta, y kico e ta demostra.

Un Herencia y un Recompensa

5. Dicon yiu ta un herencia?

⁵ Un herencia ta manera un regalo. Hopi biaha mayornan ta traha masha duro pa nan por laga un herencia atras pa nan yiunan. E herencia por ta consisti di placa, propiedad of kisas un obheto di balor special. En todo caso, un herencia ta muestra di un mayor su amor. Bijbel ta bisa cu e herencia cu Dios a duna mayornan ta nan yiunan. Nan ta un regalo cu Dios a duna mayornan den su amor. Si bo ta un mayor, lo bo bisa cu bo accionnan ta mustra cu bo ta mira bo yiunan como un regalo cu e Creador di universo a confia bo cu ne?

6. Cu ki proposito Dios a capasita hende pa haya yiu?

 ⁶ Yehova a duna e regalo aki cu e proposito di pobla tera cu e desendientenan di Adam cu Eva. (Genesis 1:27, 28; Isaias 45:18) Yehova no a crea cada ser humano individualmente, manera el a haci cu e miyones di angelnan. (Salmo 104:4; Revelacion 4:11) Mas bien, Dios a scohe pa crea hende cu e capasidad di produci yiu cu lo a parce nan mayornan den maneranan facil pa identifica. Ta realmente un privilegio maraviyoso pa un mama y tata produci y cuida un persona nobo asina! Como mayor, boso ta gradici Yehova cu el a haci posibel pa boso disfruta di e herencia precioso aki?

Siña for di e Ehempel di Hesus

7. Na contraste cu algun mayor, con Hesus a mustra interes y compasion pa “e yiunan di hende”?

⁷ Lamentablemente, no ta tur mayor ta considera yiu como un recompensa. Hopi mayor ta mustra tiki compasion pa nan yiunan. Mayornan asina no ta refleha e actitud di Yehova ni di su Yiu. (Salmo 27:10; Isaias 49:15) Na contraste, considera e interes cu Hesus tawatin den mucha chikito. Bijbel ta bisa cu asta prome cu Hesus a bin na tera como hende—tempo cu e tawata un persona spiritual poderoso den shelo—su “delicia tawata den e yiunan di hende.” (Proverbionan 8:31) Su amor pa hende tawata asina grandi cu boluntariamente el a duna su bida como rescate di manera cu nos lo por haya bida eterno.—Mateo 20:28; Huan 10:18.

8. Con Hesus a pone un bon ehempel pa mayornan?

⁸ Ora Hesus tawata riba tera el a pone un excelente ehempel pa mayornan. Considera kico el a haci. El a dedica tempo na mucha, asta ora cu e tawata hopi druk y bou di presion. El a wak nan hunga riba plenchi na plasa y a uza aspectonan di nan comportacion den su siñansa. (Mateo 11:16, 17) Durante Hesus su ultimo biahe pa Herusalem, e tawata sa cu lo e mester a sufri y ser mata. Pesei ora hende a bin cu nan yiunan chikito serca dje, su disipelnan a purba manda e muchanan bai. Kisas nan kier a spar Hesus di mas stress. Pero Hesus a scual su disipelnan. Mustrando su “delicia” den mucha chikito, el a bisa: “Laga e muchanan bin serca mi; no stroba nan.”—Marco 10:13, 14.

9. Dicon loke nos ta haci kisas ta asta mas importante cu loke nos ta bisa?

⁹ Nos por siña for di Hesus su ehempel. Ora un mucha bin serca nos, asta si kisas nos ta druk, con nos ta reacciona? Manera Hesus? Loke mucha tin mester, specialmente di nan mayornan, ta net loke Hesus tawata dispuesto pa duna nan—tempo y atencion. Ta berdad cu palabranan manera “mi ta stima bo” ta importante. Pero accion ta bisa mas cu palabra. Bo amor ta mas bisto na loke bo ta haci, cu na loke bo ta bisa. Ta door di duna bo yiunan cuido, tempo y atencion bo ta mustra cu bo ta stima nan. Sinembargo, haciendo tur e cosnan ei kisas no ta produci resultadonan concreto, a lo menos no dje lihe manera lo bo ta spera. Pasenshi ta necesario. Nos por siña haya pasenshi si nos imita e manera cu Hesus a trata cu su disipelnan.

Hesus Su Pasenshi y Cariño

10. Con Hesus a siña su disipelnan un les di humildad, y e tawatin exito na prome instante?

¹⁰ Hesus tawata conciente di e competencia constante cu tawatin entre su disipelnan pa haya fama y importancia. Un dia, despues cu el a yega na Capernaum cu su disipelnan, el a  puntra nan: “‘Ta kico boso tawata discuti na caminda?’ Ma nan a keda keto, pasobra na caminda nan a discuti cu otro cual di nan tawata esun di mas grandi.” En bes di scual nan severamente, Hesus cu pasenshi a duna nan un ehempel practico den un esfuerso pa siña nan humildad. (Marco 9:33-37) E les ei a produci e resultado desea? No mesora. Un seis luna despues, Santiago cu Huan a urgi nan mama pa pidi Hesus puestonan prominente den e Reino. Un biaha mas, Hesus cu pasenshi a corigi nan manera di pensa.—Mateo 20:20-28.

11. (a) Ki tarea di custumber e apostelnan di Hesus no a haci ora nan a yega den un sala ariba hunto cu Hesus? (b) Kico Hesus a haci, y su esfuerso tawatin exito na e ocasion ei?

¹¹ Un poco despues tawata Pasco di aña 33 di nos era, y Hesus a reuni den priva cu su apostelnan pa celebra esei. Ora nan a yega den e sala ariba, ni un di e 12 apostelnan no a tuma e iniciativa pa haci e servicio di custumber di laba e pianan tur na stof di e otronan, un tarea humilde cu normalmente un cria of un hende mohe den cas a haci. (1 Samuel 25:41; 1 Timoteo 5:10) Lo mester a duel Hesus hopi pa mira cu su disipelnan a sigui demostra cu nan ta aspira rango y posicion! Pesei Hesus a laba pia di cada un di nan y despues a pidi nan sinseramente pa sigui su ehempel di sirbi otro. (Huan 13:4-17) Acaso nan a haci esei? Bijbel ta bisa cu mas despues e anochi ei “tambe a lanta un discusion entre nan tocante cual di nan tawata wordo considera di ta esun di mas grandi.”—Lucas 22:24.

12. Con mayornan lo por imita Hesus den nan esfuerso pa instrui nan yiunan?

¹² Mayornan, ora boso yiunan no ta haci caso di boso conseho, boso ta compronde con Hesus lo mester a sinti? Tuma nota cu Hesus no a stop di purba yuda su apostelnan, aunke nan tawata slow pa corigi nan faltanan. Su pasenshi cu tempo a duna fruta. (1 Huan 3:14, 18) Mayornan, boso ta haci bon di imita Hesus su amor y pasenshi, y nunca stop cu boso esfuersonan pa instrui boso yiunan.

13. Dicon mayornan no mester core cu un yiu na moda bruto ora cu e ta haci pregunta?

¹³ Muchanan mester sinti cu nan mayornan ta stima nan y ta interesa den nan. Hesus kier a sa kico su disipelnan tawata pensa, pesei el a scucha nan ora nan tawatin pregunta. El a puntra nan kico nan tawata pensa di cierto asuntonan. (Mateo 17:25-27) Si, pa por siña mucha bon, nos mester scucha nan cu atencion y berdadero interes. Pues anto, un mayor mester resisti e inclinacion cu ora un yiu kier bin puntr’e un cos, e ta core cu ne na moda bruto door di bisa: “Aworaki no. Bo no ta mira cu mi ta bezig?” Si di berdad e mayor ta ocupa, e mester bisa e mucha cu lo e papia cu ne tocante e asunto despues. Anto mayornan mester haci sigur cu nan ta papia riba e asunto tambe despues. Asina e mucha lo sinti cu e mayor realmente ta interesa den dje, y lo e ta mas dispuesto pa confia e mayor su cosnan.

14. Kico mayornan por siña for di Hesus relaciona cu mustramento di cariño na nan yiunan?

¹⁴ Acaso ta apropiado pa mayornan mustra nan cariño door di pasa nan brasa rond di nan yiunan su scouder y door di tene nan den nan brasa? Un biaha mas mayornan por siña for di  Hesus. Bijbel ta bisa cu “el a tuma nan den su brasa y a bendiciona nan, poniendo su mannan riba nan.” (Marco 10:16) Con bo ta kere cu e muchanan a reacciona? Sin duda esei a laga nan sinti bon, y a atrae nan na Hesus! Mayornan, si tin berdadero cariño y amor entre boso y boso yiunan, nan lo ta mas dispuesto pa acepta boso esfuerso pa disiplina nan y siña nan.

E Asunto di Cuanto Tempo pa Mucha

15, 16. Menciona un concepto popular den criamento di yiu, y kico aparentemente a motiva e concepto ei?

¹⁵ Tin hende a cuestiona si ta di berdad muchanan tin mester di hopi tempo y atencion amoroso di nan mayornan. Un concepto den criamento di yiu cu expertonan a promove cu masha exito ta e asina yama tempo di calidad. Segun esnan cu ta boga pa e idea aki, mucha no tin mester di mucho tempo di nan mayornan, basta cu e poco tempo cu e mayornan ta dedica na nan ta bale la pena, pues tempo yena cu actividadnan bon plania y prepara. Pero di berdad e concepto aki di tempo di calidad ta un bon idea? Ta cu bienestar di e muchanan na mente e idea aki a lanta?

¹⁶ Un escritor cu a papia cu hopi mucha a bisa cu e cos cu muchanan “tawata kier mas di nan mayornan ta mas tempo”, hunto cu “pleno atencion.” Un punto interesante ta cu un profesor di universidad a comenta: “E expresion [tempo di calidad] a lanta door cu mayornan tawata sinti nan culpabel. Hende tawata duna nan mes un excuse pa pasa menos tempo cu nan yiunan.” Ta cuanto tempo mayornan lo mester dedica na nan yiunan?

17. Kico yiunan mester haya di nan mayornan?

¹⁷ Bijbel no ta bisa cuanto tempo. Sinembargo, Bijbel a urgi mayornan Israelita pa papia cu nan yiunan ora nan tawata den nan cas, ora nan a cana riba caminda, ora nan a bai drumi y ora nan a lanta. (Deuteronomio 6:7) Esaki ta nifica claramente cu mayornan tin cu comunica cu nan yiunan y siña nan constantemente tur dia.

18. Con Hesus a probecha di oportunidadnan pa instrui su disipelnan, y kico mayornan por siña for di esaki?

¹⁸ Hesus a instrui su disipelnan cu exito segun cu el a come cu nan, biaha cu nan y asta relax cu nan. Pues, el a probecha di tur oportunidad pa siña nan. (Marco 6:31, 32; Lucas 8:1; 22:14) Den mesun manera, mayornan Cristian mester ta alerta pa uza tur oportunidad pa establece y mantene bon comunicacion cu nan yiunan y instrui nan den e caminda di Yehova.

Kico pa Siña Yiu y Con pa Hacie

19. (a) Kico mas ta necesario fuera di dedica tempo na yiunan? (b) Kico principalmente mayornan tin cu siña nan yiunan?

¹⁹ Pero djis pasa tempo cu bo yiunan y asta  siña nan no ta basta. Pa bo cria nan cu exito bo mester tene cuenta cu algo mas. Ta masha importante tambe kico bo ta siña nan. Tuma nota con Bijbel ta enfatisa ta kico esaki mester ta. E ta bisa: “E palabranan aki, cu mi ta ordena bo awe ..., siña nan cu tur diligencia na bo yiunan.” Ta kico ta “e palabranan aki” cu nos mester siña nos yiunan? Evidentemente, nan ta e palabranan cu a caba di ser menciona, esta: “Stima SEÑOR bo Dios cu henter bo curason, cu henter bo alma y cu tur bo forsa.” (Deuteronomio 6:5-7) Hesus a bisa cu di tur Dios su mandamentonan, esaki ta esun di mas importante. (Marco 12:28-30) Pues mayornan tin cu siña nan yiunan principalmente tocante Yehova Dios, y splica nan dicon ta e so merece nos amor y debocion completo.

20. Kico Dios a manda mayornan di pasado siña nan yiunan?

²⁰ Sinembargo, “e palabranan aki” cu Dios ta urgi mayornan pa siña nan yiunan ta encera mas cu simplemente stima Dios cu henter bo ser. Den e capitulo anterior di Deuteronomio, lo bo nota cu Moises a ripiti e leinan cu Dios a skirbi riba tabla di piedra, e Dies Mandamentonan. E leinan aki a inclui mandamentonan pa no gaña, no horta, no mata y no comete adulterio. (Deuteronomio 5:11-22) Pues, Dios a mustra mayornan di e tempo aya e importancia di inculca balornan moral den nan yiunan. Mayornan Cristian djawe tambe mester siña nan yiunan na un manera similar pa nan por yuda e muchanan haya un futuro sigur y felis.

21. Kico Bijbel kiermen cu e instruccion pa “inculca” e palabra di Dios den mente di mucha?

²¹ Tuma nota cu mayornan ta haya instruccion con pa siña nan yiunan “e palabranan” of mandamentonan aki: “Siña nan cu tur diligencia na bo yiunan.” E palabra Hebreo traduci aki como ‘siña cu tur diligencia’ ta nifica “inculca”, esta, “siña door di ripiticion of conseho: curasha of graba den mente.” Pues basicamente, Dios ta bisa mayornan pa nan tin un  programa plania pa siña nan yiunan for di Bijbel cu e proposito spesifico di inculca of graba asuntonan spiritual den nan mente.

22. Kico Dios a manda mayornan Israelita haci pa asina instrui nan yiunan, y kico esaki a nifica?

²² Pa un programa plania asina bira posibel, e mayornan mester tuma e iniciativa. Bijbel ta bisa: “Mara nan [esta, “e palabranan aki”, of e mandamentonan di Dios] como un señal na bo man y como un banchi na bo frenta. Skirbi nan riba e kozijnnan-di-porta di bo cas y riba bo portanan di cura.” (Deuteronomio 6:8, 9) Esaki no kiermen cu mayornan mester skirbi e leinan di Dios literalmente riba kozijn di nan porta of mara un copia di nan na man di nan yiunan of na nan frenta. Mas bien, e punto ta cu constantemente mayornan mester corda nan yiunan tocante Dios su siñansanan. Nan mester siña nan yiunan na un manera asina regular y constante cu ta como si fuera Dios su siñansanan semper ta den bista di e muchanan.

23. Kico nos lo considera den e les di otro siman?

²³ Kico ta algun cos hopi importante cu mayornan mester siña nan yiunan? Dicon ta di sumo importancia awe pa siña mucha y tambe entrena nan pa proteha nan mes? Ki yudansa tin disponibel awor pa mayornan pa yuda nan siña nan yiunan na un manera efectivo? Den e siguiente articulo nos lo considera e preguntanan aki y otro preguntanan mas cu ta interesa hopi mayor.

Con Lo Bo Contesta?

• Dicon mayornan mester considera nan yiunan precioso?

• Kico mayornan y otro hende por siña di Hesus?

• Cuanto tempo mayornan mester dedica na nan yiunan?

• Kico mester siña yiunan, y con mester siña nan esei?

[Preguntanan di Estudio]

[Plachi na pagina 10]

Ki les mayornan por saca for di Hesus su manera di siña?

[Plachi na pagina 11]

Ki ora y con mayornan Israelita mester a siña nan yiunan?

[Plachi na pagina 12]

Mayornan mester tene e siñansanan di Dios den bista di nan yiunan