Un Africano Humilde Cu A Stima e Palabra di Dios

BISHITANTENAN na Africa ta keda hopi bes sorprendi ora nan ripara con facil ta pa cuminsa un combersacion riba temanan biblico cu e hendenan local. Preguntanan manera: “Kico e Reino di Dios ta?” of “Tin un solucion duradero pa problemanan manera scarsedad di cuminda, malesa, guera y crimen?”, facilmente ta atrae hende pa scucha. Hopi hende gustosamente ta permiti un desconoci mustra nan e contestanan for di Bijbel. Hopi biaha esaki ta hiba na un estudio regular di Bijbel. Y segun cu e studiantenan ta haci progreso spiritual, nan ta bira Cristiannan batisa.

Na Echonan 8:26-40, Bijbel ta menciona un di e prome Africanonan cu a reacciona den e manera ei. E tawata un homber di Etiopia cu a bai Herusalem pa adora e Dios berdadero, Yehova.

Manera e plachi abou ta mustra, e Etiope tawata bayendo cas bek den su garoshi, y tawata lesa for di un rol habri. Un persona desconoci a acerc’e y puntr’e: “Bo ta compronde loke bo ta lesa?” Humildemente, e Etiope a admiti cu e mester di yudansa y a suplica e persona desconoci, e evangelisado Cristian Felipe, pa subi bin sinta den e garoshi. Caba el a pidi Felipe splic’e e nificacion di e parti di Scritura cu el a caba di lesa. Felipe a splic’e cu esei tawata un profecia cu a aplica na e morto resien di e Mesias, Hesucristo. Tambe Felipe a “predic’e Hesus” door di cont’e otro asuntonan relaciona cu e bon noticia tocante Hesus, incluyendo sin duda e resureccion di Hesus.

Despues di a tende e berdadnan maraviyoso aki, e Etiope kier a bira un disipel di Hesus y a puntra: “Kico ta stroba pa mi wordo batisa?” Despues di su bautismo, e Africano humilde aki a sigui su caminda pa cas contento di dje, y Bijbel no ta papia mas di dje.

Awe, Testigonan di Yehova ta yudando miyones di hende rond mundo siña e mesun bon noticia. Actualmente nan ta conduci rond di seis miyon estudio di Bijbel cu hende.