Bo Fe Ta Motiva Bo na Accion?

UN OFICIAL di ehersito tawata combenci cu Hesus por a cura su esclabo paralitico. Pero e oficial di ehersito no a invita Hesus pa bini su cas. Podise el a sinti cu e no tawata digno di esei of cu como pagano e no por a ricibi Hesus. Mas bien, e oficial a manda algun anciano Hudiu bai serca Hesus y bis’e: “Señor, mi no ta digno pa bo bin bou di mi dak, ma djis papia un palabra, y mi sirbido lo ta cura.” Notando cu e oficial di ehersito tawata combenci cu Hesus por a cura hende asta for di un distancia, Hesus a bisa e multitud cu tawata siguie: “Di berdad mi ta bisa boso, mi no a haya ningun hende na Israel cu un fe asina grandi.”—Mateo 8:5-10; Lucas 7:1-10.

E experencia aki por yuda nos enfoca riba un aspecto importante di fe. Berdadero fe no ta nifica djis kere den un cos; mester tin accion su tras. Santiago, un di e escritornan di Bijbel, a splica: “Fe ..., si e no wordo compaña cu obranan, ta morto riba su mes.” (Santiago 2:17) Nos por compronde e punto aki mas miho ora nos considera un ehempel di bida real di loke por sosode ora fe bira inactivo.

Na aña 1513 prome cu nos era, e nacion di Israel a bira Yehova su pueblo special pa  medio di e aliansa di Lei. Como mediador di e aliansa ei, Moises a informa e yiunan di Israel loke Dios a bisa: “Si di berdad boso kier obedece mi bos y warda mi aliansa, e ora ei boso lo ta ... un nacion santo.” (Exodo 19:3-6) Si, pa Israel por tawata santo, nan mester a obedece Dios.

Hopi siglo despues, e Hudiunan a cuminsa duna mas importancia na studiamento di e Lei cu na aplicacion di su principionan. Den e buki The Life and Times of Jesus the Messiah (Bida y Epoca di Hesus e Mesias) Alfred Edersheim a skirbi: “Pa hopi tempo caba e [rabinan]—e ‘grandinan di mundo’ a establece cu estudio ta mas importante cu obra.”

Ta berdad cu Dios a manda e Israelitanan di antes pa studia su rekisitonan cu diligencia. E mes a bisa: “E palabranan aki, cu mi ta ordena bo awe, mester ta riba bo curason. Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” (Deuteronomio 6:6, 7) Pero e intencion di Yehova tawata pa estudio di e Lei bira mas importante cu loke esaki ta manda of indica hende pa haci? Laga nos mira.

Estudio Extenso

E ponemento di hopi enfasis riba studiamento di e Lei lo por a parce rasonabel pa e Israelitanan, ya cu segun un tradicion Hudiu, Dios mes tawata dedica tres ora pa dia na studia e Lei. Ya bo por imagina bo caba con algun Hudiu lo a rasona: ‘Si Dios mes ta studia e Lei regularmente, kico lo mester ta e caso di su criaturanan riba tera? Nan lo no mester ta completamente absorba den esei?’

Pa e tempo di e prome siglo di nos era, e intensidad cu cua e rabinan tawata analisa y  interpreta e Lei a bruha nan manera di pensa completamente. Hesus a bisa di nan: “E escribanan y e Farizeonan . . . ta papia, ma nan no ta haci ... Nan ta mara carganan pisa y ta pone nan riba scouder di hende, ma nan mes no ta dispuesto pa lanta ni un dede pa kita nan.” (Mateo 23:2-4) E lidernan religioso ei a pone un carga pisa di hopi regla riba e pueblo comun. Pero den nan hipocresia nan mes a crea ‘buraco’ den e reglanan aki cu lo a libra nan si di cumpli cu e mesun leinan ei. Ademas, cu tur e studiamento ei, e hendenan aki “a neglisha loke ta mas importante di e Lei: husticia, misericordia y fieldad.”—Mateo 23:16-24.

Esta un ironia! Den nan afan pa establece nan mes husticia, e escriba- y Farizeonan a kibra net e Lei cu nan a pretende di defende! Tur e siglonan di debate tocante palabra y otro detayenan menor di e Lei no a hala nan mas serca Dios. Nan tambe a wordo desvia pa loke apostel Pablo a yama “papiamento profano y vano”, “argumentonan contradictorio” y “conocemento” falso. (1 Timoteo 6:20, 21) Pero e efecto cu investigacion interminabel tawatin riba nan tawata un otro problema serio, esta, nan no a haya e clase di fe cu a motiva nan na e accion corecto.

Mente Yen di Conocemento, Curason sin Fe

E manera cu e lidernan religioso Hudiu a pensa tawata leu for di e manera cu Dios ta pensa! Un poco prome cu e Israelitanan a drenta e Tera Priminti, Moises a bisa nan: “Paga bon tino na tur e palabranan cu mi ta spierta boso cu ne awe, cu boso lo ordena boso yiunan pa percura di cumpli cu nan, tur e palabranan di e lei aki.” (Deuteronomio 32:46) Ta bisto anto cu e pueblo di Dios no mester tawata solamente studiante serio di e Lei sino tambe cumplido di e Lei.

Sinembargo, na varios ocasion e nacion di Israel a resulta di ta infiel na Yehova. En bes di haci e clase di obra corecto, e yiunan di Israel “no a ker’e ni a scucha su bos.” (Deuteronomio 9:23; Huesnan 2:15, 16; 2 Cronicanan 24:18, 19; Yeremias 25:4-7) E peor infieldad cu nan a comete tawata ora nan a rechasa Hesus como e Mesias. (Huan 19:14-16) Yehova Dios, na su turno, a rechasa Israel y a dirigi su atencion na e nacionnan.—Echonan 13:46.

Nos tin cu tene masha cuidou pa nos no cai den e mesun trampa—pensando cu nos por adora Dios cu mente yen di conocemento pero cu un curason sin fe. Cu otro palabra, studiamento di Bijbel mester bai mas aleu cu djis yena nos cabes cu conocemento. Conocemento exacto mester alcansa nos curason pa e por tin un efecto positivo riba nos bida. Tin sentido pa nos studia con pa planta berdura sin nunca hinca un simiña den tera? Claro cu no ta nada malo pa haya sa con tin cu cultiva y mantene un hardin, pero cu esei so nos lo no cosecha nada! Mescos tambe, hende cu ta siña e rekisitonan di Dios pa medio di un estudio di Bijbel mester permiti e simiñanan di e berdad alcansa nan curason pa e simiñanan aki spruit y impulsa nan na accion.—Mateo 13:3-9, 19-23.

“Sea Cumplidonan di e Palabra”

Apostel Pablo a bisa cu “fe ta bin for di tendemento.” (Romanonan 10:17) E secuencia aki di tende e Palabra di Dios pa despues eherce fe den su Yiu, Hesucristo, ta habri caminda pa nos haya bida eterno. Si, algo mas ta necesario cu djis bisa: ‘Mi ta kere den Dios y Cristo.’

Hesus a urgi su siguidonan pa nan tin e clase di fe cu lo motiva nan na accion: “Mi Tata ta wordo glorifica, cu boso ta carga hopi fruta y asina ta demostra di ta mi disipelnan.” (Huan 15:8) Despues, Santiago, mitar ruman di Hesus, a skirbi: “Sea  cumplidonan di e palabra y no solamente tendedonan.” (Santiago 1:22) Ma con nos por sa kico nos tin cu haci? Cu palabra y ehempel, Hesus a indica kico nos tin cu haci pa agrada Dios.

Tempo cu Hesus tawata riba tera, el a traha duro pa promove interesnan di Reino y pa glorifica e nomber di su Tata. (Huan 17:4-8) Den ki manera? Wel, kisas hopi hende ta pensa riba Hesus su milagernan di cura hende enfermo y coho. Pero e Evangelio di Mateo ta mustra bon cla den ki manera principal Hesus a glorifica e nomber di su Tata: “Hesus tawata pasa den tur e stadnan y pueblitonan, y tawata siña den nan snoanan y proclama e evangelio di reino.” Ta notabel cu Hesus no a limita su ministerio na papia de bes en cuando cu algun amigo y conoci of cu esnan cu el a topa den su bicindario. El a haci un gran esfuerso, probechando di tur medio disponibel pa el a bishita hende “den henter Galilea.”—Mateo 4:23, 24; 9:35.

Tambe Hesus a instrui su siguidonan pa participa den e obra di haci disipel. En berdad, el a pone un ehempel perfecto pa nan imita. (1 Pedro 2:21) Hesus a bisa su disipelnan fiel: “Pesei, bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.”—Mateo 28:19, 20.

Nos tin cu admiti cu e trabou di predica ta un berdadero desafio. Hesus mes a bisa: “Mi ta manda boso manera lamchi meimei di lobo.” (Lucas 10:3) Ora nos ta enfrenta oposicion, nos tendencia natural ta pa hala atras pa evita cu nos ta haya nos cu un dolor of ansiedad innecesario. Esei ta loke a sosode riba e anochi cu Hesus a wordo aresta. E apostelnan a hui bai despues cu miedo a podera di nan. Mas laat e mesun anochi ei, Pedro a nenga tres biaha cu e tawata conoce Hesus.—Mateo 26:56, 69-75.

Ademas, kisas lo bo keda sorprendi pa haya sa cu asta apostel Pablo a bisa cu el a hiba un lucha pa predica e bon nobo. El a skirbi e congregacion na Tesalonica: “Nos a tuma un curashi mediante nos Dios pa papia e bon nobo di Dios cu boso cu hopi lucha.”—1 Tesalonicensenan 2:1, 2, NW.

Tanto Pablo como e otro apostelnan a logra supera tur miedo di papia cu otro hende tocante e Reino di Dios, pues bo tambe por. Con asina? E paso di mas importante ta pa depende riba Yehova. Si nos pone tur nos fe den Yehova, e fe ei lo motiva nos na accion y nos lo por haci su boluntad.—Echonan 4:17-20; 5:18, 27-29.

Bo Actividad Lo Ser Recompensa

Yehova ta bon na haltura di e esfuerso cu nos ta haci pa sirbie. E sa por ehempel ki ora nos ta malo of cansa. E ta conciente cu tin biaha nos ta duda den nos mes. Ora problemanan financiero ta precupa nos of ora nos salu of nos emocionnan ta parce di traiciona nos, semper Yehova ta conciente di nos situacion.—2 Cronicanan 16:9; 1 Pedro 3:12.

Ora Yehova mira cu apesar di nos imperfeccion- y dificultadnan, nos fe ta impulsa nos na accion, e ta keda hopi contento! E sintimento tierno cu Yehova tin pa su fiel sirbidonan no ta djis un emocion vago; su tras tin un promesa. Bou di inspiracion dibino, apostel Pablo a skirbi: “Dios no ta inhusto pa lubida boso trabou y e amor cu boso a mustra pa su nomber, door cu boso a sirbi y ainda ta sirbi e santonan.”—Hebreonan 6:10.

Bo por confia e descripcion cu Bijbel ta duna di Yehova como “un Dios di fieldad y sin inhusticia”, y como “esun cu ta recompensa esnan cu ta busc’e.” (Deuteronomio 32:4; Hebreonan 11:6) Por ehempel, un señora na California, Merca, ta corda: “Mi tata a sirbi como un predicado di tempo completo pa dies aña prome cu el a cuminsa lanta  un famia. Mi tawata gusta tende ora e tawata conta con Yehova a sosten’e den su ministerio. Hopi biaha el a gasta su ultimo dollar na gasolin pa e por a sali den sirbishi. Ora e yega cas e ta haya, sin cu e tawata spera nada, pakete di cuminda ta ward’e na porta.”

Ademas di sosten material, “e Tata di misericordianan y Dios di tur consuelo” ta duna nos sosten emocional y spiritual. (2 Corintionan 1:3) Un testigo cu a wanta hopi prueba atrabes di añanan a bisa: “Un hende cu ta depende riba Yehova ta un hende satisfecho. E sintimento ei ta duna bo e oportunidad pa confia den Yehova y mira con e ta actua pa yuda bo.” Humildemente bo por acerca ‘Esun cu ta scucha oracion’, cu e siguransa cu lo e presta atencion na bo precupacionnan.—Salmo 65:2.

Trahadonan di e cosecha spiritual ta ricibi un gran recompensa. (Mateo 9:37, 38) Hopi cu ta participa den e ministerio publico tin un miho salu. Bo tambe por haya e beneficio ei. Pero, mas importante ainda, dunamento di testimonio na otro hende ta yuda nos fortalece nos bon relacion cu Dios.—Santiago 2:23.

Sigui Haci Bon

Lo ta un gran ekibocacion pa un sirbido di Dios kere cu Yehova ta keda desapunta si debi na enfermedad of biehes e no por haci tur loke e kier haci den e ministerio. Mescos ta conta tambe pa esnan cu debi na kebranto di salu, responsabilidad di famia of otro circunstancia no por haci masha.

Corda cu ora apostel Pablo a sinti cu un enfermedad of obstaculo a strob’e, el “a roga Señor tres biaha pa esaki por [a] kita” for di dje. En bes di cura Pablo pa asina e por a haci mas den Yehova su sirbishi, Dios a bis’e: “Mi gracia ta basta pa bo, pasobra mi poder ta wordo haci perfecto den debilidad.” (2 Corintionan 12:7-10) Pesei, bo por ta sigur cu apesar di cualkier circunstancia dificil cu bo por ta pasando aden, bo Tata celestial ta balora tur loke bo por haci pa promove su interesnan.—Hebreonan 13:15, 16.

Nos Creador amoroso no ta exigi mas di loke nos por duna. Simplemente e ta pidi nos pa nos tin e clase di fe cu ta motiva nos na accion.

[Plachi na pagina 26]

Studiamento di e Lei so tawata suficiente?

[Plachinan na pagina 29]

Tras di nos fe mester tin obra