Confia den Yehova Su Palabra

“Mi ta confia den bo palabra.” —SALMO 119:42.

1. Kico bo por bisa tocante e identidad y caracter di e escritor di Salmo 119?

E COMPOSITOR di Salmo 119 a stima Yehova su palabra. Kisas tawata trata aki di Prins Ezekias di Huda. E sintimentonan expresa den e cantica inspira aki ta pas cu e caracter di Ezekias, kende “a tene duro na SEÑOR” tempo cu e tawata rei di Huda. (2 Reinan 18:3-7) Un cos ta sigur: E compositor tawata conciente di su necesidad spiritual.—Mateo 5:3.

2. Kico ta e tema di Salmo 119, y con e cantica aki a ser aregla?

² Un punto clave di Salmo 119 ta e balor di Dios su palabra of mensahe. * Probablemente e escritor a compone e cantica aki den un orden alfabetico pa yuda hende cord’e for di cabes. Su 176 versiculonan ta basa riba letternan sucesivo di e alfabet Hebreo. Den Hebreo original, cada un di e 22 strofanan di e salmo aki tin 8 liña cu ta cuminsa cu e mesun letter. E salmo aki ta papia di Dios su palabra, lei, testimonio- [of, recordatorio- *], caminda-, precepto-, statuto-, mandamento-, ordenansa- y dichonan. Den e articulo aki y esun siguiente nos lo analisa Salmo 119 a base di un traduccion exacto di e texto di e Scritura Hebreo. Ora nos medita riba e experencianan cu Yehova su sirbidonan di pasado y di actualidad a pasa aden, nos lo compronde e cantica cu Dios a inspira aki miho y haya mas aprecio pa e Palabra skirbi di Dios, Bijbel.

Obedece e Palabra di Dios y Lo Bo Ta Felis

3. Splica y ilustra kico kiermen cana sin mancha.

³ Si nos kier ta berdaderamente felis, nos tin cu cana den e lei di Dios. (Salmo 119:1-8) Ora nos haci esaki, Yehova lo considera cu ‘nos caminda ta sin mancha.’ (Salmo 119:1) E echo cu nos ta sin mancha no ta nifica cu nos ta perfecto, pero e ta indica si cu nos ta haci esfuerso pa cumpli cu Yehova Dios su boluntad. Noe tawata un homber “perfecto [of sin mancha] den su generacionnan” ya cu el a “cana cu Dios.” E patriarca fiel ei y su famia a sobrevivi e Dilubio pasobra el a hiba su bida manera Yehova a prescribi. (Genesis 6:9; 1 Pedro 3:20) Asina tambe, si nos kier sobrevivi fin di e mundo aki nos tin cu ‘cumpli cu Dios su preceptonan cu diligencia’, cu otro palabra, haci su boluntad.—Salmo 119:4.

4. Di kico nos felicidad y exito ta depende?

⁴ Hamas Yehova lo bandona hende cu ta ‘gradicie [“alab’e”, NW] cu rectitud di curason y cu  ta sigui warda su statutonan.’ (Salmo 119:7, 8) Dios no a bandona e lider Israelita Hosue, kende a sigui e conseho di ‘medita den e buki di lei di dia y anochi pa e por a haci tur loke tawata para skirbi den dje.’ Esei a hacie un homber exitoso y a yud’e actua sabi. (Hosue 1:8) Ora Hosue tawata yegando na fin di su bida, ainda e tawata alabando Dios y e por a recorda e Israelitanan: “Boso sa di henter boso curason y di henter boso alma cu ni un palabra di tur e bon palabranan cu SEÑOR boso Dios a papia tocante di boso no a faya.” (Hosue 23:14) Mescos cu Hosue y e escritor di Salmo 119, nos por haya felicidad y exito door di alaba Yehova y confia den su palabra.

Yehova Su Palabra Ta Mantene Nos Limpi

5. (a) Splica con ta posibel pa keda spiritualmente limpi. (b) Ki yudansa tin pa un hoben cu a comete un pica serio?

⁵ Nos por ta spiritualmente limpi si nos mantene nos mes alerta conforme Dios su palabra. (Salmo 119:9-16) Esaki ta e caso asta si nos mayornan no a pone un bon ehempel pa nos. Aunke Ezekias su tata tawata un adorado di dios falso, Ezekias a “tene su caminda puro [of limpi]”, posiblemente, di influencia pagano. Supone cu un hoben cu ta sirbi Dios awe ta comete un pica serio. Si e arepenti, haci oracion, busca yudansa di su mayornan y di ancianonan Cristian amoroso, lo e por bira manera Ezekias door di ‘tene su caminda limpi y mantene su mes alerta.’—Santiago 5:13-15.

6. Menciona algun hende mohe cu a ‘tene nan caminda limpi y mantene nan mes alerta conforme Dios su palabra.

⁶ Aunke Rahab y Rut a biba hopi tempo prome cu Salmo 119 a wordo componi, ‘nan a tene nan caminda limpi.’ Rahab tawata un prostituta Cananeo, pero el a bira conoci pa su fe como adorado di Yehova. (Hebreonan 11:30, 31) E Moabita Rut a bandona su diosnan, a sirbi Yehova y a cumpli cu e Lei cu Dios a duna Israel. (Rut 1:14-17; 4:9-13) Tur e dos mohenan aki cu no tawata Israelita a ‘mantene nan mes alerta conforme Dios su palabra’ y nan tawatin e privilegio maraviyoso di bira antepasado di Hesucristo.—Mateo 1:1, 4-6.

7. Con Daniel y e tres otro hobennan Hebreo a pone un bon ehempel den keda spiritualmente limpi?

⁷ Aunke “intencion di curason di hende ta malo for di su hubentud”, hobennan por sigui un caminda limpi asta den e mundo corupto aki bou di dominio di Satanas. (Genesis 8:21; 1 Huan 5:19) Como exiliado na Babilonia, Daniel y tres otro hoben Hebreo a ‘mantene nan mes alerta conforme Dios su palabra.’ Por ehempel, nan no a contamina nan mes “cu e miho cuminda di rei.” (Daniel 1:6-10) E Babilonionan a come bestia impuro cu tawata prohibi bou di e Lei di Moises. (Levitico 11:1-31; 20:24-26) Nan no tawatin custumber di laga bestia mata sangra, y nan comemento di carni cu no a sangra a viola e lei di Dios tocante sanger.  (Genesis 9:3, 4) Nada straño anto cu e cuater Hebreonan no a come e cuminda exkisito di e rei! E hobennan ei deboto na Dios a keda spiritualmente limpi y door di esei a pone un bon ehempel.

Dios Su Palabra Ta Yuda Hende Keda Fiel

8. Ki actitud y conocemento nos tin mester si nos kier compronde y aplica e lei di Dios?

⁸ Algo hopi importante cu por yuda nos keda fiel na Dios ta ora nos tin delicia den su palabra. (Salmo 119:17-24) Si nos ta manera e escritor inspira di e cantica, nos lo tin un deseo fuerte pa compronde e “cosnan maraviyoso” di e lei di Dios. Constantemente nos lo ‘anhela e ordenansanan di Yehova’ y haya ‘delicia den su recordatorionan.’ (Salmo 119:18, 20, 24) Asta si nos tin un par di aña so dedica na Yehova, nos a forma ‘un anhelo pa e lechi puro di e palabra’? (1 Pedro 2:1, 2) Nos tin cu capta e siñansanan basico di Bijbel pa nos por ta den un miho posicion pa compronde y aplica e lei di Dios.

9. Con nos mester reacciona ora tin un conflicto entre e lei di Dios y loke hende ta exigi di nos?

⁹ Kisas nos tin delicia den e recordatorionan di Dios, pero kico nos lo haci si pa un of otro motibo “prinsnan” papia contra nos? (Salmo 119:23, 24) Awe, hopi bes hende cu tin puesto di autoridad ta purba forsa nos pa pone leinan humano prome cu e lei di Dios. Ora tin un conflicto entre loke hende ta exigi di nos y e boluntad di Dios, kico nos lo haci? Nos delicia den Dios su palabra lo yuda nos keda fiel na dje. Mescos cu e apostelnan di Hesucristo cu a wordo persigui, nos lo bisa: “Nos mester obedece Dios mas cu hende.”—Echonan 5:29.

10, 11. Ilustra con nos por mantene integridad na Yehova bou di e circunstancianan di mas dificil.

¹⁰ Nos por keda fiel na Yehova asta bou di e circunstancianan di mas dificil. (Salmo 119:25-32) Si nos kier tin exito den mantene nos integridad na Dios, nos mester ta dispuesto pa acepta su siñansa y tambe pidie di curason pa e instrui nos. Tambe nos tin cu scohe “e caminda di fieldad.”—Salmo 119:26, 30.

¹¹ Ezekias, e probabel escritor di Salmo 119, a scohe “e caminda di fieldad.” El a haci esei maske e tawata rondona pa adoradonan falso, y talbes obheto di mofa di parti di e miembronan di e palacio real. Muy probablemente, “su alma no por a drumi di desconsuelo” pa motibo di e circunstancianan ei. (Salmo 119:28, NW) Pero Ezekias a confia den Dios, e tawata un bon rei y el a haci loke tawata “bon den bista di SEÑOR.” (2 Reinan 18:1-5) Si nos confia den Dios, nos tambe por wanta prueba como wardadonan di integridad.—Santiago 1:5-8.

 Yehova Su Palabra Ta Duna Nos Curashi

12. Con nos por aplica Salmo 119:36 y 37 personalmente?

¹² Si nos sigui e guia di Dios su palabra, nos ta haya e curashi necesario pa enfrenta e pruebanan di bida. (Salmo 119:33-40) Cu humildad nos ta busca e instruccion di Yehova pa asina nos por cumpli cu su lei ‘cu henter nos curason.’ (Salmo 119:33, 34) Mescos cu e salmista, nos ta pidi Dios: “Inclina mi curason na bo recordatorionan, y no na ganashi deshonesto.” (Salmo 119:36) Mescos cu apostel Pablo, nos ta “comporta nos mes den tur cos na un manera honorabel.” (Hebreonan 13:18) Si un doño di trabou ta spera pa nos haci algo deshonesto, cu curashi nos ta pega na e instruccionnan di Dios—y semper Yehova ta bendiciona un conducta asina. De echo, e ta yuda nos mantene tur mal deseo bou di control. Pesei laga nos pidie den oracion: “Kita mi bista for di banidad.” (Salmo 119:37) Hamas nos lo kier desea ningun banidad cu Dios ta odia. (Salmo 97:10) Dos di e cosnan cu e oracion aki lo yuda nos evita ta pornografia y spiritismo.—1 Corintionan 6:9, 10; Revelacion 21:8.

13. Con Hesus su disipelnan persigui a haya e curashi necesario pa duna testimonio cu frankesa?

¹³ Conocemento exacto di Dios su palabra ta duna nos confiansa pa duna testimonio cu curashi. (Salmo 119:41-48) Y en berdad nos tin mester di curashi pa ‘contesta esun cu ta reprocha nos.’ (Salmo 119:42) Tin biaha, nos por ta manera Hesus su disipelnan cu a sufri persecucion y cu a pidi den oracion: “SEÑOR, . . . laga bo sirbidonan papia bo palabra cu tur confiansa [“curashi”, NW].” Cu ki resultado? “Nan tur a wordo yena cu spirito santo y a cuminsa papia e palabra di Dios cu tur frankesa.” Mescos tambe awe SEÑOR Soberano ta duna nos curashi pa papia su palabra cu frankesa.—Echonan 4:24-31.

14. Kico ta yuda nos duna testimonio cu curashi, mescos cu Pablo?

¹⁴ Si nos tin delicia den “e palabra di berdad” y ta ‘warda e lei di Dios continuamente’, nos lo haya e curashi necesario pa duna testimonio sin tin nodi tene berguensa. (Salmo 119:43, 44) Estudio diligente di e Palabra skirbi di Dios ta ekipa nos pa ‘papia di su recordatorionan dilanti reinan.’ (Salmo 119:46) Oracion y Yehova su spirito tambe lo yuda nos papia loke ta apropiado na un manera apropiado. (Mateo 10:16-20; Colosensenan 4:6) Pablo a papia cu curashi tocante e recordatorionan di Dios cu e gobernantenan di prome siglo. Por ehempel, el a duna testimonio na e gobernante Romano Felix, kende “a scuch’e ora cu e tawata papia di fe den Cristo Hesus.” (Echonan 24:24, 25) Tambe Pablo a duna testimonio dilanti Gobernado Festo y Rei Agripa. (Echonan 25:22–26:32) Cu e respaldo di Yehova, nos tambe por ta testigonan cu curashi y nunca tene “berguensa di e evangelio.”—Romanonan 1:16.

Dios Su Palabra Ta Duna Nos Consuelo

15. Con e Palabra di Dios por duna nos consuelo ora otro hende ta haci bofon di nos?

¹⁵ Yehova su Palabra ta ofrece consuelo constantemente. (Salmo 119:49-56) Tin biaha nos ta den hopi necesidad di consuelo. Aunke nos ta papia cu curashi como Testigo di Yehova, “e arogantenan”—personanan cu ta actua cu arogancia contra Dios—tin biaha ta “haci masha bofon” di nos. (Salmo 119:51) Sinembargo, ora nos ta haci oracion, nos por corda cierto cosnan positivo cu e Palabra di Dios ta trece dilanti y asina nos ta haya ‘consuelo pa nos mes.’ (Salmo 119:52) Durante nos suplicanan, nos por corda un lei of principio biblico cu ta duna nos e consuelo y animo cu nos mester den un situacion di tension.

16. Apesar di persecucion, kico sirbidonan di Dios no a haci?

¹⁶ E arogantenan cu tawata haci bofon di e salmista tawata Israelita—miembronan di un nacion dedica na Dios. Esta un berguensa! Ma distinto di nan, laga nos ta determina pa nunca desvia for di e lei di Dios. (Salmo 119:51) Durante e persecucion Nazi y otro experencianan similar atrabes di añanan, miles di sirbido di Dios a nenga di desvia for di e lei- y principionan cu nos por haya den e Palabra di Dios. (Huan 15:18-21) Y no ta un carga pa obedece Yehova,  pasobra su statutonan ta manera melodianan di consuelo pa nos.—Salmo 119:54; 1 Huan 5:3.

Sea Gradicido pa Yehova Su Palabra

17. Kico aprecio pa Dios su palabra ta impulsa nos pa haci?

¹⁷ Nos ta demostra nos gratitud pa Dios su palabra door di biba di acuerdo cu ne. (Salmo 119:57-64) E salmista a ‘priminti di warda Yehova su palabranan’, y asta ‘mei anochi e tawata lanta pa gradici Dios pa Su ordenansanan husto.’ Si nos spierta anochi, lo ta un bon oportunidad pa expresa nos gratitud na Dios den oracion! (Salmo 119:57, 62) Nos aprecio pa Dios su palabra ta impulsa nos pa busca siñansa dibino y ta haci nos ‘compañeronan gososo di esnan cu ta teme Yehova’, esta, personanan cu tin un temor respetuoso di Dios. (Salmo 119:63, 64) Unda nos por haya miho compañerismo aki riba tera?

18. Con Yehova ta contesta nos oracionnan ora ‘e lasonan of cabuyanan di e malbadonan ta rondona nos’?

¹⁸ Ora nos ta haci oracion cu henter nos curason y ta pidi Yehova humildemente pa siña nos, nos ta ‘buscando su fabor.’ Nos tin cu haci oracion specialmente ora ‘e lasonan [of cabuyanan] di e malbadonan ta rondona nos.’ (Salmo 119:58, 61) Yehova por corta e cabuyanan enemigo cu ta stroba nos y di e forma ei libra nos pa sigui cu e obra di predica e Reino y haci disipel. (Mateo 24:14; 28:19, 20) Esaki a keda demostra bes tras bes den paisnan caminda nos obra ta prohibi.

Tene Fe den Dios Su Palabra

19, 20. Den ki sentido por ta bon pa pasa den un afliccion?

¹⁹ Fe den Dios y den su palabra ta yuda nos wanta dificultad y haci su boluntad. (Salmo 119:65-72) Aunke e personanan arogante a ‘saca mentira contra dje’, e salmista a canta: “Ta bon pa mi cu mi a wordo afligi.” (Salmo 119:66, 69, 71) Den ki sentido por ta bon pa un sirbido di Yehova pasa den afliccion?

²⁰ Ora nos pasa den un afliccion, sin duda nos ta suplica Yehova di curason, y esei ta hala nos mas serca dje. Nos por dedica mas tempo pa studia e Palabra skirbi di Dios y haci mas esfuerso pa aplic’e. Esaki ta resulta den un bida mas felis. Pero kico nos por haci si nos ta reacciona riba afliccion na un manera cu ta saca na cla caracteristicanan indeseabel manera falta di pasenshi y orguyo? Cu oracion sinsero y cu yudansa di Dios su Palabra y spirito, nos por vence e debilidadnan ei y “bisti e hende nobo” of un personalidad nobo, mas plenamente. (Colosensenan 3:9-14) Ademas, ora nos ta wanta contratiempo, nos fe ta bira mas fuerte. (1 Pedro 1:6, 7) Pablo a beneficia di su tribulacionnan pa motibo cu esakinan a hacie mas dependiente di Yehova. (2 Corintionan 1:8-10) Nos ta laga sufrimento tene un bon efecto riba nos?

Confia Semper den Yehova

21. Kico ta sosode ora Dios brongosa e arogantenan?

²¹ Dios su palabra ta duna nos un base solido pa confia den dje. (Salmo 119:73-80) Si nos realmente ta confia den nos Creador, nos lo no tin nodi sinti berguensa. Sinembargo, pa motibo di loke otro hende ta haci, nos tin mester di consuelo y tin biaha nos tin gana di pidi den oracion pa “laga e arogantenan keda brongosa.” (Salmo 119:76-78) Ora Yehova ta brongosa hende asina, nan camindanan malbado ta sali na cla y Yehova su nomber sagrado ta keda santifica. Nos por ta sigur cu esnan cu ta persigui e pueblo di Dios no ta gana net nada. Por ehempel, nan no a logra ni lo no logra hamas tampoco pa caba cu Testigonan di Yehova, kendenan  ta confia den Dios cu henter nan curason.—Proverbionan 3:5, 6.

22. Den ki sentido e salmista tawata ‘manera un boter di cuero den huma’?

²² Dios su palabra ta fortalece nos confiansa den dje ora nos ta ser persigui. (Salmo 119:81-88) Debi cu e arogantenan tawata persigui e salmista, el a sinti su mes “manera un saco [“boter”, NW] di cuero den huma.” (Salmo 119:83, 86) Den tempo di Bijbel, e hendenan tawata uza boter traha di cuero di bestia pa warda awa, biña y otro likidonan. Ora nan no tawata uza e boternan aki, y a colga nan banda di un candela den un cuarto sin schoorsteen, esakinan lo por a krimp. Dificultad of persecucion a yega di pone bo sinti bo ‘manera un boter di cuero den huma’? Si ta asina, confia den Yehova y pidie den oracion: “Rebiba mi segun bo misericordia, pa asina mi warda e recordatorio di bo boca.”—Salmo 119:88.

23. Kico nos a considera den nos analisis di Salmo 119:1-88, y kico nos por puntra nos mes segun cu nos ta anticipa e estudio di Salmo 119:89-176?

²³ Loke nos a considera den e prome mitar di Salmo 119 ta mustra cu Yehova ta tene misericordia di su sirbidonan pa motibo cu nan ta confia den su palabra y tin delicia den su statuto-, recordatorio-, mandamento- y leinan. (Salmo 119:16, 47, 64, 70, 77, 88) E ta contento cu e personanan cu ta dedica na dje ta mantene nan mes alerta conforme su palabra. (Salmo 119:9, 17, 41, 42) Segun cu bo ta anticipa e estudio di e resto di e bunita salmo aki, bo por puntra bo mes: ‘Realmente mi ta laga Yehova su palabra lusa mi caminda?’

[Nota]

Con Lo Bo Contesta?

• Di kico berdadero felicidad ta depende?

• Con Yehova su palabra ta mantene nos spiritualmente limpi?

• Den ki maneranan Dios su palabra ta duna curashi y consuelo?

• Pakico nos mester tin fe den Yehova y den su palabra?

[Preguntanan di Estudio]

[Plachi na pagina 11]

Rut, Rahab y e tres hobennan Hebreo exilia na Babilonia ‘a mantene nan mes alerta conforme Dios su palabra’

[Plachi na pagina 12]

Cu curashi Pablo a ‘papia di Dios su recordatorionan dilanti reinan’