Gana Conocemento Awor y pa Semper

E MEDICO Aleman Ulrich Strunz a skirbi un serie di buki titula Forever Young. Den nan el a trece padilanti cu ehercicio, nutricion y un bida salu por promove miho salu y posiblemente hiba na un bida mas largo. Pero e no ta priminti su lectornan cu door di sigui su conseho nan lo por biba literalmente pa semper.

Sinembargo tin un clase di conocemento cu si ta priminti bida eterno. Si bo biba pa semper, lo bo por sigui gana e conocemento util ei pa semper. Hesus a bisa Dios den un oracion: “Esaki ta nifica bida eterno, cu nan ta ganando conocemento di bo, e unico Dios berdadero, y di esun cu bo a manda, Hesucristo.” (Huan 17:3, NW) Laga nos cuminsa na defini e expresion “bida eterno” anto despues establece kico e conocemento ta encera y con bo por obten’e.

Segun Bijbel, pronto e Creador lo transforma tera den un paradijs literal cu e condicionnan ideal pa un bida largo. Pa e Paradijs ei bira realidad lo mester bini un accion drastico, mescos cu a tuma luga den tempo di Noe ora Dios a manda un Dilubio. Mateo capitulo 24, versiculo 37 pa 39, ta mustra cu Hesus a compara nos tempo cu “e dianan di Noe”, den cua e hendenan “no a compronde” con critico nan situacion tawata. Nan no a haci caso tampoco di e mensahe cu Noe a predica. Anto a bini “e dia cu Noe a bai den e arca” y e Dilubio a destrui tur hende cu a rechasa  e conocemento aki. Noe y e personanan cu tawata hunto cu ne den e arca a salba.

Hesus a indica cu un “dia” similar ta biniendo den nos tempo. Hende cu ta haci caso di e conocemento relaciona cu e suseso aki lo tin e speransa di no solamente sobrevivi, sino tambe di biba pa semper. Ademas, e mortonan cu ta den e memoria di Dios lo ser lanta na bida cu e speransa di no tin cu muri nunca mas. (Huan 5:28, 29) Ripara con Hesus a expresa e dos pensamentonan aki. Ora el a papia cu Marta tocante e resureccion di e mortonan, el a bisa: “Esun cu kere den mi lo biba, maske e muri, y tur esnan cu ta biba y ta kere den mi lo no muri nunca.” Tur cos ta mustra cu e “dia” aki ta masha serca, locual ta nifica cu probablemente “lo [bo] no muri nunca.”—Huan 11:25-27.

E ora ei Hesus a puntra Marta: “Bo ta kere esaki?” El a contesta: “Si, Señor.” Si Hesus haci bo e mesun pregunta aki awe, kico lo bo contesta? Podise bo ta haya cu ta dificil pa kere cu hende tin e posibilidad di no muri nunca. Pero asta si bo reacciona asina, sin duda lo bo tin gana di por kere esei. Imagina bo cuanto cos lo bo por siña si bo “no muri nunca”! Pensa con lo bo disfruta di tur e cosnan cu bo ta desea di por siña y haci awor pero cu nunca bo no tin tempo pa nan. Y djis imagina bo di por ta hunto atrobe cu bo sernan stima cu a muri bai laga bo! Kico ta e conocemento cu lo por haci e cosnan ei posibel, y con bo por hay’e?

E Conocemento Cu Ta Duna Bida Ta na Nos Alcanse

E conocemento di Dios y di Cristo ta fuera di nos alcanse? No. Ta berdad cu hende no por caba di siña for di tur loke e Creador a traha. Ma Hesus no tawata referiendo na astronomia of un otro ramo di ciencia ora el a conecta “conocemento” cu “bida eterno.” Proverbionan capitulo 2, versiculo 1 y 5, ta indica cu e “conocemento di Dios” ta consisti di principalmente e “palabranan” y “mandamentonan” cu nos por haya den Bijbel. Y pa loke ta Hesus, Huan 20:30 y 31 ta indica cu e cosnan skirbi ta tur loke nos mester pa nos “por tin bida.”

Consecuentemente, e conocemento di Yehova y Hesucristo manera Bijbel ta trece esei dilanti ta suficiente pa mustra bo con pa haya bida eterno. Bijbel ta un buki unico. Den su bondad, e Creador a inspira hende pa skirbie den un manera cu asta personanan cu no tin mucho scol y cu no a haya oportunidad pa studia por haya suficiente conocemento pa gana bida eterno. Di otro banda, hende cu ta siña cosnan lihe y cu tin hopi tempo y recurso na nan disposicion semper lo por siña algo nobo for di e Scritura inspira. E echo cu bo por lesa e articulo aki ta un prueba cu bo tin e capasidad pa siña. Pero con bo mester uza e capasidad ei?

Na tur parti di mundo, experencia a mustra cu e manera mas eficas pa haya e conocemento aki ta pa medio di un estudio personal di Bijbel bou di guia di un hende cu ya a compronde e informacion. Mescos cu Noe a haci esfuerso pa comparti conocemento cu e hendenan di su tempo, Testigonan di Yehova ta dispuesto pa bini bo cas y analisa Bijbel hunto cu bo. Kisas nan ta uza e foyeto Kico Dios Ta Rekerí di Nos? of e buki cu e titulo apropiado Conocimentu cu Ta Hiba na Bida Eterno. *  Asta si bo tin problema cu e idea cu den e Paradijs riba tera hende fiel “lo no muri nunca”, bo por siña pone bo confiansa den e promesa aki pa medio di e consideracionnan biblico ei. Pesei si bo ta desea di biba pa semper of bo kier djis wak si ta rasonabel pa kere cu bo por biba pa semper, kico bo mester haci? Acepta e oportunidad aki pa studia Bijbel.

Cuanto tempo un estudio asina ta tuma? E foyeto di 32 pagina cu nos a caba di menciona, disponibel den centenares di idioma, ta contene apenas 16 les cortico. Of si bo por aparta mas o menos un ora pa siman, lo bo tin mester di un par di luna so pa studia e temanan clave di Bijbel, uzando e buki Conocimentu cu Ta Hiba na Bida Eterno. E publicacionnan aki a yuda hopi hende haya bastante conocemento y desaroya un amor profundo pa Dios. E Creador lo recompensa esnan cu echt ta stim’e y ta laga nan haya bida eterno.

En berdad e conocemento cu ta duna bida ta na nos alcanse, y e ta disponibel mesora. Bo por haya Bijbel completo, of por lo menos parcialmente, den mas cu 2.000 idioma. Pa Testigonan di Yehova den 235 pais ta un placer pa duna bo yudansa personal y tambe suministra e publicacionnan basa riba Bijbel pa bo por sigui haya mas conocemento.

Estudio Personal

Bo relacion cu Dios ta un asunto personal entre abo cu e Creador. Ta abo so por manten’e y fortalec’e, y ta E so por duna bo bida eterno. Pesei bo mester tin un estudio personal di su Palabra skirbi. Door di laga un hende bini bo cas riba un base regular, lo bo ripara cu ta mas facil pa aparta tempo pa studia.

Siendo cu Bijbel y e yudansanan pa studia Bijbel ta contene “e conocemento di Dios”, ta na su luga pa bo cuida nan bon. (Proverbionan 2:5) Asina lo bo tin nan pa hopi aña. Si bo ta biba den un pais den desaroyo, kisas bo no a haya hopi buki na scol. Talbes bo a siña principalmente door di scucha y observa. Por ehempel na Benin, nan ta papia mas cu 50 idioma. Pesei, no ta nada straño pa bo topa hende cu ta domina cuater of cinco idioma, aunke nunca nan no a haya un buki den e idiomanan aki den nan man. Bo capasidad pa siña door di scucha, observa y consentra ta un don. Ma lo bo ripara cu buki por ta un bon yudansa pa bo den bo estudio.

Asta si bo no tin hopi espacio na cas, purba haya un luga apropiado pa warda bo Bijbel y otro publicacionnan basa riba Bijbel. Warda nan na un luga caminda bo por haya nan mesora y caminda nan no ta daña.

Estudio di Famia

Si bo ta un mayor, bo mester ta interesa den yuda bo yiunan gana e mesun conocemento cu abo ta hayando. Den paisnan den desaroyo, hopi bes mayornan tin custumber di siña nan yiunan varios di e cosnan cu nan mester por haci den bida; por ehempel, cushna, piki palo, saca awa, planta, pisca y bende y cumpra riba mercado. Sin duda e educacion ei por yuda nan haya nan propio sosten den bida. Sinembargo, e conocemento cu por hiba na bida eterno mes hopi mayor ta laga afo.

Sea cual sea bo situacion, probablemente bo ta ripara cu bo no tin hopi tempo. E Creador tambe ta conciente di esaki. Pa loke ta e manera di siña yiu Su camindanan, tuma nota kico el a bisa hopi tempo pasa: “Siña nan cu tur diligencia na bo yiunan, y papia di nan ora bo ta sinta den bo cas, ora bo ta cana riba caminda, ora bo ta bai drumi y ora bo ta lanta.” (Deuteronomio 6:7) Cu e pensamentonan aki como base, pakico bo no ta purba desaroya bo mes programa di siñansa, manera lo siguiente:

1. “Ora bo ta sinta den bo cas”: Haci esfuerso pa studia Bijbel regularmente cu bo yiunan na cas, kisas un biaha pa siman, mescos cu un otro persona a studia cu bo. Testigonan  di Yehova ta saca publicacionnan basa riba Bijbel specialmente pa educa yiu di tur edad.

2. “Ora bo ta cana riba caminda”: Papia cu bo yiunan informalmente tocante Yehova, mescos cu bo ta siña nan di e cosnan cu nan mester por haci den bida of duna nan guia den un manera informal.

3. “Ora bo ta bai drumi”: Haci oracion cu bo yiunan tur anochi.

4. “Ora bo ta lanta”: Hopi famia a haya resultadonan satisfactorio for di nan consideracion di un texto di Bijbel tur mainta. Testigonan di Yehova ta uza e foyeto Eksaminando e Skritura Diariamente * como base pa esaki.

Den paisnan den desaroyo, hopi mayor ta haci bastante esfuerso pa garantisa cu un di nan yiunan ta haya un bon educacion. Den e manera ei e yiu lo por percura pa su mayornan ora nan bira bieu. Sinembargo, si bo studia Bijbel y yuda tur bo yiunan haci mescos, lo bo gana e conocemento cu lo permiti tanto abo como henter bo famia biba pa semper.

Lo yega e dia cu nos lo haya sa tur cos? No. Segun cu nos tera ta sigui su biahe atrabes di e universo interminabel, nos lo sigui gana conocemento. Si, Eclesiastes 3:11 ta bisa: “El [Dios] a traha tur cos apropiado na su tempo. Tambe el a pone eternidad den nan curason, sin cu hende por haya sa e trabou cu Dios a haci for di principio te na fin.” Ganamento di conocemento ta un placer cu lo no caba nunca.

[Nota]

[Comentario na pagina 5]

‘Esaki ta nifica bida eterno, cu nan ta gana conocemento ...’

[Plachinan na pagina 7]

Yuda bo famia gana conocemento awor y pa semper