Laga Dios Su Palabra Lusa Bo Caminda

“Bo palabra ta ... un lus pa mi caminda.”—SALMO 119:105.

1, 2. Bou di ki circunstancia Yehova su palabra lo lusa nos caminda?

YEHOVA su palabra lo lusa nos caminda basta nos permiti esei. Pa nos disfruta di e lus spiritual ei, nos mester ta studiantenan diligente di e Palabra skirbi di Dios y aplica su conseho. Ta e ora ei so nos por bisa mescos cu e salmista: “Bo palabra ta un lampi pa mi pia y un lus pa mi caminda.”—Salmo 119:105.

² Awor laga nos considera Salmo 119:89-176. E versiculonan aki, aregla den 11 strofa, ta sumamente rico na informacion! Nan por yuda nos keda riba e caminda cu ta hiba na bida eterno.—Mateo 7:13, 14.

Pakico Nos Mester Tin Delicia den Dios Su Palabra?

3. Con Salmo 119:89 y 90 ta mustra cu nos por depende di Dios su palabra?

³ Hende cu tin delicia den Yehova su palabra ta haya stabilidad spiritual. (Salmo 119:89-96) E salmista a canta: “Pa semper, o SEÑOR, bo palabra ta estableci den shelo ... Bo a establece tera, y e ta keda para.” (Salmo 119:89, 90) Pa  medio di Yehova su palabra—su “ordenansanan di e shelonan”—solo, luna y streya ta move perfectamente den nan orbitanan y tera ta firmemente estableci pa semper. (Job 38:31-33; Salmo 104:5) Nos por depende riba cada palabra cu ta sali for di e boca di Yehova; loke Dios bisa ‘lo no keda sin alcansa’ e cumplimento di su proposito.—Isaias 55:8-11.

4. Con delicia den Dios su palabra por yuda Su sirbidonan cu ta pasa den afliccion?

⁴ Si e salmista ‘no tawatin delicia den e lei di Dios, lo el a perece den su afliccion.’ (Salmo 119:92) No ta hende straño a persiguie; tawata e propio Israelitanan kibrado di lei cu a odi’e. (Levitico 19:17) Pero esaki no tawata demasiado p’e, pasobra e tawata stima e lei di Dios cu a sosten’e. Na Corinto, apostel Pablo tawata “den peliger meimei di rumannan falso”, talbes incluso “super-apostelnan” cu tawata buscando un acusacion contra dje. (2 Corintionan 11:5, 12-14, 26) Ma Pablo a sobrevivi spiritualmente pasobra e tawatin delicia den Dios su palabra. Ya cu nos tin delicia den e Palabra skirbi di Yehova y ta aplica loke e ta bisa, nos ta stima nos rumannan. (1 Huan 3:15) Ni sikiera e odio di e mundo aki no por pone nos lubida instruccionnan di Dios. Nos ta sigui haci su boluntad den union amoroso cu nos rumannan segun cu nos ta den expectativa pa sirbi Yehova gososamente pa semper.—Salmo 119:93.

5. Con Rei Asa a busca Yehova?

⁵ Ora nos ta expresa nos debocion na Yehova, nos por bis’e den oracion: “Mi ta di bo, salba mi, pasobra mi a busca bo preceptonan.” (Salmo 119:94) Rei Asa a busca Dios y a elimina apostasia for di Huda. Na un asamblea grandi den e di 15 aña di e reinado di Asa (aña 963 prome cu nos era), e habitantenan di Huda a ‘sera un aliansa pa busca e SEÑOR.’ Dios a “laga nan hay’e” y a sigui “duna nan sosiego na tur banda.” (2 Cronicanan 15:10-15) E ehempel aki mester motiva ken cu a drif bai for di e congregacion Cristian pa bolbe busca Dios. Lo e bendiciona y proteha esnan cu ta bolbe cuminsa asocia activamente cu su pueblo.

6. Ki accion lo proteha nos contra daño spiritual?

⁶ Yehova su palabra ta duna nos sabiduria cu por proteha nos for di daño spiritual. (Salmo 119:97-104) E mandamentonan di Dios ta haci nos mas sabi cu nos enemigonan. Ora nos haci caso di su recordatorionan nos ta haya perspicasia, y door di ‘warda su preceptonan nos ta compronde mas cu e bieunan.’ (Salmo 119:98-100) Si Yehova su dichonan ‘ta mas dushi cu miel den nos boca’, nos lo odia y evita “tur caminda di mentira.” (Salmo 119:103, 104) Esaki lo sirbi como un proteccion contra daño spiritual ora nos topa hende arogante, feros y malbado den e ultimo dianan aki.—2 Timoteo 3:1-5.

Un Lampi pa Nos Pia

7, 8. Na harmonia cu Salmo 119:105, kico nos tin cu haci?

⁷ Dios su palabra ta un fuente confiabel y constante di lus spiritual. (Salmo 119:105-112) Sea nos ta Cristiannan ungi of  nos ta nan compañeronan, esta, di e “otro carnenan”, nos ta declara: “Bo palabra ta un lampi pa mi pia y un lus pa mi caminda.” (Huan 10:16; Salmo 119:105) Dios su palabra ta manera un lampi cu ta lusa nos caminda, pa asina nos no trompica y cai spiritualmente. (Proverbionan 6:23) Pero ta nos cada un personalmente mester laga Yehova su palabra ser un lampi pa nos pia.

⁸ Nos mester ta mes firme cu e compositor di Salmo 119. E tawata determina pa no desvia for di Dios su mandamentonan. El a bisa: “Mi a hura y lo mi confirma esaki, cu lo mi warda [Yehova su] ordenansanan husto.” (Salmo 119:106) Laga nos nunca minimisa e balor di studia Bijbel regularmente y participa den reunionnan Cristian.

9, 10. Con nos por sa cu hende dedica na Yehova por ‘desvia for di su preceptonan’, pero con nos por evita esaki?

⁹ E salmista no a ‘desvia for di Dios su preceptonan’, pero esei por sosode cu un persona dedica na Yehova. (Salmo 119:110) Rei Salomon a desvia, aunke e tawata miembro di un nacion dedica na Yehova y na principio el a actua na harmonia cu e sabiduria cu Dios a dun’e. “E mohenan stranhero a [pone] asta Salomon comete pica” door di seducie pa e bai adora dios falso.—Nehemias 13:26; 1 Reinan 11:1-6.

¹⁰ Satanas, “e yagdo” di parha, ta pone hopi trampa. (Salmo 91:3) Por ehempel, un ruman cu un tempo tawata hunto cu nos, lo por purba pone nos desvia for di e caminda di lus spiritual y drenta den e scuridad di apostasia. Entre e Cristiannan na Tiatira, tawatin “e mohe Jezabel”, posiblemente un grupo di hende mohe cu tawata siña otronan practica idolatria y comete fornicacion. Hesus no a tolera e mal cosnan ei, y nos tampoco no mester tolera nan. (Revelacion 2:18-22; Hudas 3, 4) Pesei laga nos pidi Yehova su yudansa den oracion pa nos no desvia for di su preceptonan sino keda den lus dibino.—Salmo 119:111, 112.

Sosteni Door di Dios Su Palabra

11. Di acuerdo cu Salmo 119:119, con Dios ta mira e malbadonan?

¹¹ Si nos no desvia for di Dios su statutonan, lo e sostene nos. (Salmo 119:113-120) Nos no ta aproba hende “indeciso”, mescos cu Hesus tampoco no ta aproba personanan lou cu awe ta pretende di ta Cristian. (Salmo 119:113; Revelacion 3:16) Pa motibo cu nos ta sirbi Yehova di henter nos curason, e ta ‘nos luga di sconde’ y lo e sostene nos. Lo e ‘rechasa tur esnan cu ta desvia for di su statutonan’ ora nan ta recori na triki y engaño. (Salmo 119:114, 117, 118; Proverbionan 3:32) E ta mira e malbadonan como “scuma” sushi, manera e impuresanan cu ta ser elimina for di metal precioso manera plata y oro. (Salmo 119:119; Proverbionan 17:3) Laga nos semper manifesta amor pa Dios su recordatorionan, pasobra nos sigur no kier ta hunto cu e malbadonan riba e monton di desperdicio cu ta bai pa destruccion!

12. Pakico ta importante pa nos tin temor di Yehova?

¹² E salmista a bisa: “Mi carni ta tembla di temor pa bo [Yehova].” (Salmo 119:120) Si nos kier pa Yehova sostene nos como su sirbidonan, ta importante pa nos tin un temor saludabel di dje, y nos ta manifesta esei door di evita  loke e ta desaproba. Un temor respetuoso di Yehova a yuda Job hiba un bida husto. (Job 1:1; 23:15) Sin importa kico nos tin cu wanta, temor di Dios por yuda nos hiba un bida cu tin su aprobacion. Pero pa nos por wanta nos tin cu haci oracion sinsero cu fe.—Santiago 5:15.

Oracion den Fe

13-15. (a) Pakico nos por tin fe cu nos oracionnan lo wordo contesta? (b) Kico por sosode si nos no sa kico pa bisa den oracion? (c) Ilustra con Salmo 119:121-128 por cuadra cu e ‘kehamento cu nos no por expresa’ den oracion.

¹³ Nos por haci oracion cu e fe cu Dios lo actua na nos fabor. (Salmo 119:121-128) Mescos cu e salmista, nos ta sigur cu nos oracionnan lo ser contesta. Pakico? Pasobra nos ta stima e mandamentonan dibino “mas cu oro, si, mas cu oro fini.” Ademas, ‘nos ta considera como recto tur Dios su preceptonan tocante di tur cos.’—Salmo 119:127, 128.

¹⁴ Yehova ta tende nos peticionnan pasobra nos ta haci oracion cu fe y tambe pasobra nos ta cumpli cuidadosamente cu su preceptonan. (Salmo 65:2) Pero kico lo pasa si nos haya nos mes den problema cu ta tolondra nos asina tanto cu nos no sa mes kico pa bisa den oracion? E ora ei “e spirito mes ta intercede pa nos cu kehamento cu no por wordo expresa.” (Romanonan 8:26, 27) Na momentonan asina, Dios ta acepta expresionnan den su Palabra como oracion cu ta representa nos necesidadnan.

¹⁵ E Scritura ta yen di oracion- y pensamentonan cu ta cuadra cu cierto ‘kehamento cu nos no a expresa.’ Por ehempel, considera Salmo 119:121-128. E manera cu cosnan ta ser expresa aki kisas ta cuadra cu nos circunstancianan. Por ehempel, si nos tin miedo di wordo estafa, nos por pidi e yudansa di Dios den e manera cu e salmista a hacie. (Versiculo 121-123) Supone cu nos tin cu tuma un decision sumamente dificil. E ora ei nos por pidi Yehova uza su spirito pa yuda nos corda y aplica su testimonionan of recordatorionan. (Versiculo 124, 125) Aunke nos “ta odia tur caminda  di mentira”, nos lo tin cu pidi Dios actua na nos fabor pa nos no sucumbi na tentacion pa kibra su lei. (Versiculo 126-128) Si nos lesa Bijbel tur dia, kisas e partinan probechoso ei ta bini na nos mente ora nos ta suplica Yehova.

Yuda Door di e Recordatorionan di Yehova

16, 17. (a) Pakico nos mester di Dios su recordatorionan, y con nos mester mira nan? (b) Kico otro hende por pensa di nos, pero kico ta loke realmente ta conta?

¹⁶ Si nos kier pa Dios tende nos oracion y si nos kier tin su fabor, nos mester haci caso di su recordatorionan. (Salmo 119:129-136) Como hende cu sa lubida, nos mester di Yehova su recordatorionan maraviyoso cu ta pone nos corda bek riba su instruccion y mandamentonan. Claro cu nos ta masha gradicido pa e lus spiritual cu cada comprondemento nobo di Dios su palabranan ta trece. (Salmo 119:129, 130) Tambe nos ta gradicido cu Yehova a laga ‘su cara resplandece riba nos’ como muestra di su aprobacion, aunke ‘awa ta basha for di nos wowo’ pa motibo cu otro hende ta viola su lei.—Salmo 119:135, 136; Numbernan 6:25.

¹⁷ Si nos cumpli cu Dios su recordatorionan husto nos por sigui conta cu su fabor. (Salmo 119:137-144) Como sirbido di Yehova, nos ta reconoce cu e tin e derecho di hala nos atencion riba su recordatorionan y spera cu nos ta obedece e mandamentonan aki. (Salmo 119:138) Siendo cu e salmista a obedece Dios su mandamentonan, pakico el a bisa: “Mi ta chikito y desprecia”? (Salmo 119:141) Aparentemente, e tawata referiendo na e manera cu su enemigonan a mir’e. Ora nos ta para firme pa husticia sin compromete, talbes otro hende ta desprecia nos. Pero loke ta conta realmente ta cu Yehova ta wak nos cu fabor pasobra nos ta biba segun su recordatorionan husto.

Den Pas y Siguridad

18, 19. Kico ta e resultadonan ora nos ta warda Dios su recordatorionan?

¹⁸ Door di warda Dios su recordatorionan, nos ta mantene un relacion estrecho cu ne. (Salmo 119:145-152) Pa motibo cu nos ta presta atencion na Yehova su recordatorionan, nos ta sinti nos liber pa invoc’e cu henter nos curason, y nos por spera cu e ta tende nos. Kisas nos ta spierta “prome cu marduga” y roga su yudansa. Esaki ta un bon ora pa haci oracion! (Salmo 119:145-147) Ademas, Dios ta serca nos pasobra nos ta evita conducta indecente y ta mira su palabra como e berdad, mescos cu Hesus a haci. (Salmo 119:150, 151; Huan 17:17) Nos relacion cu Yehova ta sostene nos den e mundo turbulento aki y lo yuda nos pasa door di su guera grandi di Armagedon.—Revelacion 7:9, 14; 16:13-16.

¹⁹ Debi na nos respet profundo pa Dios su palabra, nos tin berdadero siguridad. (Salmo 119:153-160) Distinto di e malbadonan, nos si ‘no a desvia for di Yehova su testimonionan’, of recordatorionan. Nos ta stima e preceptonan di Dios y pesei nos ta sinti nos sigur den su bondad amoroso. (Salmo 119:157-159) Yehova su recordatorionan ta stimula nos memoria pa nos corda loke e ta rekeri di nos den situacionnan spesifico. Di otro banda, e ordonan di Dios ta cosnan cu e ta manda nos haci y nos ta reconoce mesora cu nos Creador tin derecho di duna nos ordo. Conciente cu ‘Dios su palabra den su totalidad ta berdad’ y cu nos no por dirigi nos pasonan independiente di dje, nos ta acepta su instruccion gustosamente.—Salmo 119:160; Yeremias 10:23.

20. Pakico nos tin “pas abundante”?

²⁰ Nos amor pa e lei di Yehova ta duna nos un pas abundante. (Salmo 119:161-168) Persecucion no ta kita e “pas [incomparabel] di Dios” for di nos. (Filipensenan 4:6, 7) Nos ta balora e ordenansanan di Yehova asina tanto cu constantemente nos ta alab’e pa nan—“shete biaha pa dia.” (Salmo 119:161-164) E salmista a canta: “Esnan cu ta stima bo lei tin gran pas, y nada no ta haci nan trompica.” (Salmo 119:165) Si nos como personanan individual ta stima y warda e lei di Yehova, nos lo no laga  loke otro hende bisa ni nada otro pone nos trompica spiritualmente.

21. Ki ehempel biblico ta mustra cu nos no mester laga dificultad cu por surgi den e congregacion pone nos trompica?

²¹ Hopi individuo di tempo di Bijbel no a laga nada bira un piedra di trompica permanente pa nan. Por ehempel, e homber Cristian Gayo no a laga e conducta malbado di Diotrefes pon’e trompica, ma el a sigui ‘cana den e berdad.’ (3 Huan 1-3, 9, 10) Pablo a anima e mohenan Cristian Evodia [Euodias] y Sintike fuertemente “pa nan biba den harmonia cu otro den Señor”, ya cu probablemente a surgi algun dificultad entre nan. Aparentemente, nan a haya yudansa pa resolve nan problema, y nan a sigui sirbi Yehova fielmente. (Filipensenan 4:2, 3) Pues anto, nos no mester laga ningun tipo di dificultad cu por surgi den e congregacion pone nos trompica. Laga nos consentra riba warda e preceptonan di Yehova, cordando cu ‘tur nos camindanan ta su dilanti.’ (Salmo 119:168; Proverbionan 15:3) E ora ei nada lo por kita nos “pas abundante” permanentemente for di nos.

22. (a) Si nos obedece Dios, ki privilegio nos por tin? (b) Con nos mester mira algun di e personanan cu a dual for di e congregacion Cristian?

²² Si nos ta obedece Yehova semper, nos lo tin e privilegio di sigui alab’e. (Salmo 119:169-176) Door di biba na harmonia cu e statutonan di Dios, no solamente nos ta disfruta di siguridad spiritual sino tambe ‘nos lipnan ta sigui expresa alabansa pa Yehova.’ (Salmo 119:169-171, 174) Esaki ta e mayor privilegio cu nos por tin den e ultimo dianan aki. E salmista kier a sigui biba y alaba Yehova, pero aunke Bijbel no ta duna e detayenan, el a “cana dual manera un carne perdi.” (Salmo 119:175, 176) Algun persona cu a dual for di e congregacion Cristian kisas ainda ta stima Dios y kier alab’e. Pesei laga nos haci tur loke ta na nos alcanse pa yuda nan di manera cu nan por bolbe haya siguridad spiritual y sinti e goso di alaba Yehova hunto cu su pueblo.—Hebreonan 13:15; 1 Pedro 5:6, 7.

Lus Permanente pa Nos Caminda

23, 24. Ki beneficionan bo a saca for di Salmo 119?

²³ Salmo 119 por beneficia nos den varios manera. Por ehempel, e por haci nos mas dependiente di Dios, pasobra e ta mustra cu “cana den e lei di SEÑOR” ta trece berdadero felicidad. (Salmo 119:1) E salmista ta recorda nos cu ‘e totalidad di Dios su palabra ta berdad.’ (Salmo 119:160) Esaki sigur mester aumenta nos aprecio pa henter e Palabra skirbi di Dios. Ora nos medita riba Salmo 119, esei mester motiva nos pa studia e Scritura diligentemente. Bes tras bes e salmista a pidi Dios: “Siña mi bo statutonan.” (Salmo 119:12, 68, 135) Tambe el a suplica Dios: “Siña mi bon discernimento y conocemento, pasobra mi ta kere bo mandamentonan.” (Salmo 119:66) Ta bon pa nos haci oracion den un manera similar.

²⁴ Siñansa dibino ta haci posibel cu nos por tin un relacion intimo cu Yehova. Bes tras bes e salmista a yama su mes un sirbido di Dios. De echo, el a dirigi su mes na Yehova cu e palabranan conmovedor aki: “Mi ta di bo.” (Salmo 119:17, 65, 94, 122, 125; Romanonan 14:8) Esta un privilegio pa sirbi y alaba Yehova como un di su Testigonan! (Salmo 119:7) Abo ta sirbiendo Dios cu goso como un proclamado di Reino? Si ta asina, bo por tin e garantia cu Yehova lo sigui sostene bo y bendiciona bo den e actividad privilegia aki si bo confia semper den su palabra y lag’e lusa bo caminda.

Con Lo Bo Contesta?

• Pakico nos mester tin delicia den Dios su palabra?

• Con Dios su palabra ta sostene nos?

• Den ki maneranan e recordatorionan di Yehova ta yuda nos?

• Dicon e pueblo di Yehova tin pas y siguridad?

[Preguntanan di Estudio]

[Plachi na pagina 16]

Dios su palabra ta un fuente di lus spiritual

[Plachi na pagina 17]

Si nos ta stima e recordatorionan di Yehova, hamas lo e mira nos como “scuma” sushi

[Plachinan na pagina 18]

Si nos lesa Bijbel tur dia, ora nos ta haci oracion mesora partinan probechoso ta bini na nos mente