Con pa Laga Cada Dia Conta

“SIÑA nos conta nos dianan, pa nos por presenta na bo un curason yen di sabiduria.” (Salmo 90:12) Esaki tawata un oracion humilde di un escritor di Bijbel, Moises. Kico precis el a pidi? Nos tambe tin cu haci e peticion respetuoso ei?

Den versiculo 10, Moises a lamenta cu hende su bida ta masha cortico. Na un otro ocasion el a registra e declaracion di Job, kende a bisa: “Hende cu a nace di mohe ta biba poco dia y ta yen di problema.” (Job 14:1) Ta bisto cu Moises tawata bon conciente con pasahero bida di hende imperfecto ta. Pesei, el a considera cada dia di bida como un regalo precioso. Den su suplica na Dios, Moises a expresa su deseo pa biba e resto di su dianan na un manera sabi cu ta agrada su Creador. Nos tambe no tin cu haci esfuerso pa uza nos dianan na un manera significativo? Si nos kier Yehova su aprobacion awor, esei mester ta nos determinacion.

Un otro factor cu a motiva tanto Moises como Job ta un factor cu mester motiva nos tambe. Tur e dos hombernan deboto aki a anhela un futuro recompensa—bida riba tera den miho condicionnan. (Job 14:14, 15; Hebreonan 11:26) Ora nos ricibi e recompensa ei, morto lo no pone fin na e bon obranan di ningun hende. E proposito di nos Creador ta pa hende fiel biba den paradijs riba tera pa semper. (Isaias 65:21-24; Revelacion 21:3, 4) Abo tambe por tin e speransa aki si bo ‘conta bo dianan pa bo por presenta na Yehova un curason yen di sabiduria.’