E Speransa di Resureccion—Kico e Ta Nifica pa Bo?

“Bo ta habri bo man, y ta satisface e deseo di tur ser bibo.” —SALMO 145:16.

1-3. Ki speransa pa futuro algun persona tin? Duna ehempel.

MAINTA, Christopher di nuebe aña di edad cu su ruman homber, hunto cu nan omo, tanta y dos primo a predica di cas pa cas den nan ministerio cristian den bicindario di Manchester, Inglatera. Spierta!, compañero di e revista aki, a splica loke a sosode. “Atardi nan a sali bai dal un keiro na Blackpool, un area turistico cant’i costa no mucho leu. Nan tur 6 tawata entre e 12 hendenan cu a perde nan bida instantaneamente den un accidente riba caretera, cu polis a describi como un ‘berdadero holocausto.’”

² E anochi prome cu e accidente tragico, e famia a asisti na e Estudio di Buki di Congregacion, caminda a trata e tema di morto. Tata di Christopher a conta: “Semper Christopher tawata un mucha cu a gusta medita. E anochi ei el a papia bon cla tocante un mundo nobo y su speransa pa futuro. Despues diripiente, durante e estudio, Christopher a bisa: ‘E bon di ser un Testigo di Yehova ta cu aunke morto ta haci dolor, nos sa cu un dia nos lo mira otro atrobe riba tera.’ Ningun di nos cu tawata einan por a imagina nos con memorabel e palabranan ei lo a bira. *

³ Añanan mas prome, na 1940, un Testigo Austriaco cu yama Franz a haya sa cu nan lo a bai ehecut’e na guiyotina pasobra el a nenga di kibra su lealtad na Yehova. For di un centro di detencion na Berlin, Franz a skirbi su mama: “Cu e conocemento cu mi tin, si mi a haci e huramento [militar], lo mi a comete un pica cu merece morto. Esei lo ta malo pa mi. Lo mi no haya resureccion. ... Y awor, mi mama stima y tur mi rumannan, awe nan a duna mi e sentencia, y no spanta, ta sentencia di morto, y lo mi wordo ehecuta mañanmainta. Dios ta duna mi forsa, mescos cu semper el a duna tur cristian berdadero den pasado. ... Si boso para firme te na morto, nos lo topa otro atrobe den e resureccion. ... Te despues ora nos topa atrobe.” *

4. Ki efecto e experencianan relata aki tin riba bo, y kico nos lo considera siguientemente?

⁴ E speransa di resureccion a nifica hopi pa tanto Christopher como Franz. Pa nan e tawata algo real. E relatonan aki sigur ta conmove nos! Pa nos por haya mas aprecio pa Yehova y fortalece nos speransa den e resureccion, laga nos considera awor pakico e resureccion lo tuma luga y ki efecto esaki mester tin riba nos personalmente.

Vision di e Resureccion Riba Tera

5, 6. Kico e vision cu apostel Huan a skirbi na Revelacion 20:12 y 13 ta revela?

⁵ Den un vision di susesonan durante e Reinado di Mil Aña di Cristo Hesus, apostel Huan a mira e resureccion riba tera tuma luga. El a skirbi: “Mi a mira e mortonan,  grandi y chikito. ... Y lama a entrega e mortonan cu tawata den dje, y morto y Hades a entrega e mortonan cu tawata den nan.” (Revelacion 20:12, 13) Sea cual sea nan posicion—“grandi” of “chikito”—tur esnan cu ta den e gara di Hades (Seol), graf comun di humanidad, lo ser laga liber. Esnan cu a perde nan bida den lama tambe lo bolbe bek na bida e tempo ei. E suseso maraviyoso aki ta parti di e proposito di Yehova.

⁶ Ora Cristo cuminsa su reinado di mil aña, lo e mara Satanas y tir’e den abismo. Pues durante e reinado ei Satanas lo no por gaña ningun di e personanan resusita aki ni ningun sobreviviente di e tribulacion grandi pasobra lo e ta inactivo. (Revelacion 20:1-3) Mil aña por parce un tempo largo pa bo, pero en realidad, pa Yehova e ta manera “un dia.”—2 Pedro 3:8.

7. Kico lo ta e base pa huicio durante Cristo su Reinado di Mil Aña?

⁷ Di acuerdo cu e vision, Cristo su Reinado di Mil Aña lo ta un tempo di huicio. Apostel Huan a skirbi: “Mi a mira e mortonan, grandi y chikito, para dilanti di e trono, y bukinan a wordo habri; y un otro buki a wordo habri, cual ta e buki di bida; y e mortonan a wordo husga for di loke tawata para skirbi den e bukinan, segun nan obranan. ... Y nan a wordo husga, cada un di nan segun nan obranan.” (Revelacion 20:12, 13) Ripara cu e base pa e huicio aki no ta loke e persona a haci of laga di haci prome cu el a muri. (Romanonan 6:7) Mas bien, esei tin di aber cu e “bukinan” cu lo wordo habri den futuro. Ta loke un persona haci despues cu el a siña loke e bukinan ta contene lo determina si su nomber ta skirbi den “e buki di bida.”

“Resureccion di Bida” of “Resureccion di Huicio”

8. Kico lo ta e dos posibel resultadonan pa hende resusita?

⁸ Mas prome den e vision, Huan ta describi Hesus cu “e yabinan di morto y di Hades.” (Revelacion 1:18) E ta sirbi como Yehova su “Prins di bida”, kende a ricibi poder pa husga “e bibonan y e mortonan.” (Echonan 3:15; 2 Timoteo 4:1) Con lo e haci esaki? Door di trece bek na bida esnan cu ta drumi den morto. Hesus a bisa: “No straña boso di esaki, pasobra e ora lo yega den cua tur cu ta den graf lo tende su bos, y lo sali.” Anto el a agrega: “Esnan cu a haci bon, pa un resureccion di bida, esnan cu a comete maldad, pa un resureccion di huicio.” (Huan 5:28-30) Pues, kico ta warda homber- y mohenan fiel di antiguedad den futuro?

9. (a) Ora e hendenan bolbe bek den e resureccion, kico hopi di nan lo siña sin duda? (b) Ki inmenso obra di educacion lo ser efectua?

⁹ Ora e hendenan fiel aki di antiguedad bolbe den e resureccion, lo no tarda mucho pa nan ripara cu e promesanan cu nan a confia aden awor ta un realidad. Nan lo ta masha interesa pa haya sa e identidad di e Simiña di e mohe di Dios, menciona den e prome profecia di Bijbel na Genesis 3:15. Nan lo keda hopi contento ora nan tende cu e Mesias priminti aki, Hesus, a keda fiel te na morto, entregando su bida como un sacrificio di rescate! (Mateo 20:28) Esnan cu ta ricibi nan bek na bida lo haya un goso grandi den yuda nan compronde cu e rescate ta un expresion di Yehova su bondad inmereci y misericordia. Ora e personanan resusita ei haya sa kico e Reino di Dios ta logrando den cumplimento di e proposito pa e tera, sin duda nan curason lo basha over cu expresionnan di alabansa na Yehova. Nan lo tin amplio oportunidad pa demostra nan debocion na nan tata celestial amoroso y na su Yiu. Pa tur hende na bida e tempo ei lo ta un placer pa participa den e inmenso obra di educacion cu lo ta necesario pa siña e miles di miyones di hendenan cu lo sali for di graf, kendenan tambe lo mester acepta e rescate cu Dios a percura.

10, 11. (a) Ki oportunidad e Mil Aña lo duna tur hende riba tera? (b) Ki efecto esaki mester tin riba nos?

 ¹⁰ Dia Abraham resusita, lo e haya un gran consuelo ora e mira con e bida cu el a anhela bou di mando di e “stad” ei a bira realidad. (Hebreonan 11:10) E homber fiel Job lo mester keda masha contento ora e haya sa cu e manera cu el a hiba su bida a fortalece otro sirbidonan di Yehova pa nan tambe a wanta pruebanan di integridad! Y Daniel lo ta hopi ansioso pa haya sa con e profecianan cu el a ser inspira pa skirbi a cumpli!

¹¹ En berdad, tur hende cu haya bida den e husto mundo nobo, sea door di resureccion of door di sobrevivi e tribulacion grandi, lo tin hopi di siña tocante Yehova su proposito pa tera y su habitantenan. E oportunidad di biba pa semper y alaba Yehova pa tur eternidad sigur lo haci e programa di educacion pa e Mil Aña un berdadero placer. Sinembargo, loke ta mas importante ta kico cada un di nos lo haci segun cu nos ta siña e contenido di e bukinan. E informacion vital aki lo fortalece nos pa resisti e ultimo intento di Satanas pa desvia nos for di e berdad. Nos lo medita riba dje y tum’e na pecho?

12. Kico lo yuda cada hende participa plenamente den tanto e obra educacional como e trabou di transforma tera den un paradijs?

¹² Nos no mester lubida tampoco riba e bendicionnan maraviyoso cu nos lo haya como resultado di e beneficionan di e sacrificio di rescate di Cristo. Hende treci bek na bida den e resureccion lo no tin e tipo di enfermedadnan y incapasidadnan cu ta existi actualmente. (Isaias 33:24) Un curpa sano cu e posibilidad di haya salu perfecto despues lo permiti tur habitante di e mundo nobo participa plenamente den e obra educacional di yuda e miles di miyones di hendenan resusita haya e caminda cu ta hiba na bida. E habitantenan ei tambe lo participa den e proyecto di mas grandi cu a yega di ser realisa riba tera, esun di transforma e planeta completo den un paradijs pa e gloria di Yehova.

13, 14. Pakico Satanas lo ser libra na e prueba final, y kico lo ta e posibel resultado pa cada un di nos individualmente?

¹³ Ora Satanas ser libra for di abismo pa e prueba final, lo e purba gaña hende atrobe. Segun Revelacion 20:7-9, tur e ‘nacionnan engaña’, of gruponan di hende, lo cai bou di e influencia malbado di Satanas y lo haya nan huicio di destruccion: ‘Candela lo baha for di shelo y devora nan.’ Pa e hendenan aki cu a haya un resureccion durante e Mil Aña, e destruccion aki lo pone nan resureccion resulta den un huicio di condenacion. Na contraste, e wardadonan di integridad resusita lo haya e don di bida eterno. Nan resureccion en berdad lo ta “un resureccion di bida.”—Huan 5:29.

¹⁴ Con e speransa di resureccion por consola nos asta awor? Y mas importante ainda, kico nos tin cu haci pa garantisa cu nos lo ricibi su beneficionan den futuro?

Lesnan Cu Nos Por Siña Awor

15. Con creencia den resureccion por ta un yudansa pa bo aworaki?

¹⁵ Kisas resientemente bo a perde un ser stima den morto y talbes ainda bo no a logra adapta bo bon na e situacion nobo cu un perdida grandi asina ta trece cu ne. E speransa di resureccion ta yuda bo haya un trankilidad y fortalesa interno cu otro hende cu no conoce e berdad no tin. Pablo a consola e Tesalonicensenan: “Nos no kier, rumannan, pa boso keda den ignorancia tocante di esnan cu a muri, pa boso no ta tristo manera e otronan cu no tin speransa.” (1 Tesalonicensenan 4:13) Bo ta imagina bo mes den e mundo nobo, presenciando e resureccion? Haya consuelo awor door di medita riba e speransa di topa bo sernan keri atrobe.

16. Kico probablemente lo ta bo sintimentonan si bo tin cu wordo resusita?

 ¹⁶ Kisas actualmente bo ta sufriendo di consecuencianan fisico di e rebelion di Adam, talbes den forma di malesa. No laga e angustia cu esaki ta causa pone bo lubida e speransa gososo di experencia personalmente e resureccion y bolbe bek na bida cu salu y energia renoba den e mundo nobo. E tempo ei ora bo wowonan habri y bo mira caranan yen di goso cu lo ta ansioso pa mustra bo con contento nan ta di por a mira bo resusita, lo bo gradici Dios sigur pa su bondad inmereci.

17, 18. Ki dos les importante nos mester corda?

¹⁷ Mientrastanto, tin dos les cu nos mester corda. Uno ta e importancia di rindi un sirbishi di henter alma na Yehova aworaki. Siguiendo e ehempel di nos Doño, Cristo Hesus, nos bida di sacrificio propio ta demostra amor pa Yehova y pa nos prohimo. Si oposicion of persecucion pone nos perde nos trabou of nos libertad, sin importa e pruebanan cu nos lo tin cu enfrenta, nos ta determina pa para firme den fe. Asta si opositornan menasa nos cu morto, e speransa di resureccion ta consola nos y fortalece nos pa keda leal na Yehova y na su Reino. Si, nos celo pa e trabou di predica e Reino y haci disipel ta duna nos e speransa cu nos lo ricibi e bendicionnan eterno cu Yehova tin prepara pa e hustonan.

¹⁸ Un di dos les tin di aber cu e manera cu nos ta enfrenta e tentacionnan causa door di nos imperfeccion. Nos conocemento di e speransa di resureccion y nos aprecio pa Yehova su bondad inmereci ta fortalece nos determinacion pa para firme den fe. Apostel Huan a spierta nos: “No stima mundo, ni e cosnan cu tin den mundo. Si un hende ta stima mundo, e amor di e Tata no ta den dje. Pasobra tur loke cu tin den mundo, e deseo di carni y e deseo di wowo y e orguyo di bida, no ta bin di e Tata, sino di e mundo. Y e mundo ta pasa bai y su deseonan tambe, ma esun cu haci e boluntad di Dios ta permanece pa semper.” (1 Huan 2:15-17) Ora nos compara e atraccion di e mundo aki den forma di materialismo cu “e bida berdadero”,  lo e no trek nos masha. (1 Timoteo 6:17-19) Si nos ser tenta pa comete inmoralidad, nos lo resisti firmemente. Nos ta realisa cu si nos persisti den un conducta cu ta desagrada Yehova y nos muri prome cu Armagedon, nos lo ta den e mesun situacion cu esnan cu lo no haya un resureccion.

19. Ki gran honor nos no mester lubida?

¹⁹ Riba tur cos, hamas nos mester lubida e gran honor cu nos tin di haci Yehova su curason contento awor y pa semper. (Proverbionan 27:11) Nos fieldad te na morto of nos integridad te na fin di e mundo malbado aki ta demostra na Yehova na ken su banda nos ta para den e cuestion di soberania universal. E ora ei bida den Paradijs riba tera, sea door di sobrevivi e tribulacion grandi of door di haya un resureccion milagroso, lo ta un goso indescribibel!

Dios Lo Satisface Nos Deseonan

20, 21. Asta si nos no a haya contesta riba tur nos preguntanan tocante resureccion, kico lo yuda nos keda fiel? Splica.

²⁰ Nos analisis di e siñansa di resureccion no a contesta tur pregunta. Por ehempel, kico Yehova lo haci pa cu hende cu tawata casa ora nan a muri? (Lucas 20:34, 35) Hende lo resusita na e luga caminda nan a muri? Nan lo bini bek na bida den bicindario di nan famianan? Y ainda tin hopi otro pregunta relaciona cu resureccion. Ma nos tin cu corda e palabranan di Yeremias: “SEÑOR ta bon pa esnan cu ta warda riba dje, pa e alma cu ta busc’e. Ta bon pa warda den silencio riba e salbacion di SEÑOR.” (Lamentacion 3:25, 26) Na Yehova su debido tempo, tur nos preguntanan lo ser contesta na nos pleno satisfaccion. Pakico nos por ta sigur di esaki?

²¹ Reflexiona riba e palabranan inspira di e salmista ora el a canta di Yehova: “Bo ta habri bo man, y ta satisface e deseo di tur ser bibo.” (Salmo 145:16) Segun cu nos ta bira grandi, nos deseonan ta cambia. Loke nos a antoha tempo nos tawata mucha no ta loke nos ta desea awe. Nos experencia di bida y tambe nos speransanan ta determina con nos ta mira bida. Pero den e mundo nobo, nos por ta sigur cu Yehova lo satisface cualkier deseo apropiado cu nos por tin.

22. Pakico nos tin bon motibo pa alaba Yehova?

²² Loke ta importante aworaki ta pa cada un di nos keda fiel. “Loke ta ser spera di mayordomonan ta pa un homber ser haya fiel.” (1 Corintionan 4:2, NW) Nos ta mayordomonan di e glorioso bon nobo di e Reino di Dios. E manera diligente cu nos ta predica e bon nobo aki na tur hende ta yuda nos keda riba e caminda cu ta hiba na bida. Nunca pasa por halto di e echo cu “tempo y suseso imprevisto” ta bini riba nos tur. (Eclesiastes 9:11, NW) Pa contraresta cualkier ansiedad innecesario cu e insiguridadnan di bida ta causa, tene firme na e speransa glorioso di resureccion. Realisa cu si ta parce cu bo ta bai muri prome cu Cristo su Reinado di Mil Aña cuminsa, bo por haya consuelo den e echo cu lo bini alivio sigur. Na e tempo cu Yehova fiha pa esei, lo bo por ripiti e palabranan di Job dirigi na e Creador: “Abo lo yama, y ami lo contesta bo.” Alaba sea Yehova, kende ta ansioso pa resusita tur esnan cu ta den su memoria!—Job 14:15.

[Nota]

Bo Ta Corda?

• A base di kico hende lo ser husga durante e Mil Aña?

• Pakico algun hende lo haya “un resureccion di bida” y otronan “un resureccion di huicio”?

• Con e speransa di resureccion por consola nos awor?

• Con e palabranan di Salmo 145:16 ta yuda nos trata cu preguntanan tocante resureccion cu no a haya contesta?

[Preguntanan di Estudio]

[Plachi na pagina 21]

Con creencia den resureccion por yuda nos awor?