El A Triunfa na un Manera Special
El A Triunfa na un Manera Special
BO TA haya oposicion pa motibo di bo fe—podise na trabou, na scol, den famia of debi na restriccionnan cu gobierno ta impone? Si esei ta e caso, no desanima. Hopi Testigo di Yehova a haya nan cu pruebanan similar, pero nan a triunfa. Considera e ehempel di Erna Ludolph.
Erna a nace na 1908, na Lübeck, Alemania. E tawata e unico miembro di su famia cu tawata sirbi Yehova. Ora e regimen di Hitler a bini na poder na 1933, cosnan a bira dificil pa Testigonan di Yehova. Erna su coleganan di trabou a denunci’e pasobra el a nenga di duna e saludo di Hitler, y esaki a pone cu e nazinan a arest’e. El a pasa ocho aña den varios prizon y camponan di consentracion na Hamburg-Fuhlsbüttel, Moringen, Lichtenburg y Ravensbrück. Tempo cu Erna tawata na Ravensbrück, a sosode algo cu a resulta den un triunfo p’e.
Un Cria Unico
Profesor Friedrich Holtz y su esposa, Alice, tawata biba na Berlin. Nan no tawata miembro di e partido nazi ni nan no a apoya su ideologia. Sinembargo nan tawata famia di un oficial halto di SS cu tawata encarga cu cierto prizoneronan den campo di consentracion. Pesei, ora e profesor y su esposa tawata busca un cria, e oficial di SS aki a permiti nan scohe un prizonero femenino. Pues na maart 1943, Alice a bai Ravensbrück pa scohe un cria. Anto ta ken el a scohe? Erna Ludolph. Erna a muda bai biba serca famia Holtz, y nan a trat’e bon. Ora guera a termina, el a muda hunto cu e mesun famia aki bai e stad Halle na costa di Riu Saale. Einan atrobe Erna a hay’e cu oposicion. E biaha aki di parti di e autoridadnan socialista na Oost Alemania. Na 1957 e famia a ser deporta pa West Alemania, y Erna a bai hunto cu nan. Porfin Erna tawata liber pa practica su fe.
Den ki sentido Erna a triunfa den un manera special? Como resultado di Erna su conducta excelente y su manera habil di predica e mensahe di Bijbel, Alice Holtz y su cinco yiunan a batisa como Testigo di Yehova. Ademas, 11 di Alice su nietonan tambe ta Testigo. Actualmente dos di nan ta sirbi na e sucursal di Testigonan di Yehova na Selters, Alemania. “Nos famia ta den e berdad principalmente pa motibo di Erna su ehempel”, segun Susanne, un di e yiu mohenan di Alice. Erna su perseverancia a resulta den un gran bendicion. Kico di bo situacion? Bo fiel perseverancia den circunstancianan dificil tambe por resulta den bendicion. Si, un conducta excelente y predicacion habil lo por yuda bo triunfa na un manera special. *
[Nota]
^ par. 6 Mientras tawata prepara e articulo aki pa public’e, Erna Ludolph a fayece na edad di 96 aña. El a keda fiel te na su morto.
[Plachi na pagina 31]
Erna Ludolph (sinta) hunto cu miembronan di famia Holtz