Ken Lo Ser Resusita?

“No straña boso di esaki, pasobra e ora lo yega den cual tur cu ta den graf lo tende su bos, y lo sali.”—HUAN 5:28, 29.

1. Ki declaracion sobresaliente Moises a tende na e mata di sumpiña cu tawata kimando, y ken a hala atencion na e palabranan ei despues?

ALGO masha straño a tuma luga mas cu 3.500 aña pasa. Moises tawata cuidando e carnenan di e patriarca Jetro. Banda di Sero Horeb, e angel di Yehova a presenta na Moises den un vlam di candela meimei di un mata di sumpiña. Segun e relato di Exodo, Moises “a wak, y mira, e mata tawata tur na candela; sinembargo, e mata no a kima caba na nada.” E ora ei for di meimei di e mata di sumpiña un stem a yam’e. E stem a bis’e: “Ami ta e Dios di bo tata, e Dios di Abraham, e Dios di Isaak y e Dios di Yacob.” (Exodo 3:1-6) Hopi tempo despues den e prome siglo di nos era, e Yiu di Dios mes, Hesus, a hala atencion na e palabranan ei.

2, 3. (a) Ki recompensa Abraham, Isaak y Yacob lo ricibi? (b) Ki preguntanan ta surgi?

² Hesus tawata papiando cu algun saduceo. E saduceonan no tawata kere den resureccion. Hesus a declara: “Cu e mortonan ta wordo lanta, esei Moises tambe a mustra den e Scritura tocante di e mata, caminda e ta yama SEÑOR e Dios di Abraham, y e Dios di Isaak, y e Dios di Yacob. Awor e no ta e Dios di e mortonan, sino di e bibonan, pasobra pa e tur ta biba.” (Lucas 20:27, 37, 38) Cu e palabranan aki, Hesus a confirma cu for di e punto di bista di Dios, Abraham, Isaak y Yacob kendenan tawatin hopi tempo morto caba ainda tawata bibo den e memoria di Dios. Mescos cu Job, nan ta spera riba e fin di nan “sirbishi obligatorio”, nan soño den morto. (Job 14:14, NW) Nan lo ser resusita den e mundo nobo di Dios.

³ Pero kico di e miles di miyones di otro hende cu a muri atrabes di historia humano? Nan tambe lo ser resusita? Prome cu nos por haya un contesta satisfactorio riba e pregunta ei, laga nos haya sa for di e Palabra di Dios unda hende ta bai ora nan muri.

Unda e Mortonan Ta?

4. (a) Unda hende ta bai ora nan muri? (b) Kico ta Seol?

⁴ Bijbel ta declara cu e mortonan “no sa nada.” Ora un hende muri e no ta bai sufri tormento den fierno, ni pasa un tempo di  agonia den Limbo, * sino simplemente ta bolbe na stof. Pesei, e Palabra di Dios ta conseha e bibonan: “Tur loke bo man haya pa haci, hacie cu tur bo forsa; pasobra no tin ni actividad ni planificacion ni sabiduria den Seol, caminda bo ta bai.” (Eclesiastes 9:5, 10; Genesis 3:19) E palabra “Seol” ta desconoci pa hopi hende. E ta un expresion Hebreo di cua su origen no ta mucho cla. Hopi religion ta siña cu e mortonan ta na bida ainda, pero manera e Palabra inspira di Dios ta mustra, esnan cu ta den Seol ta morto, inconciente. Seol ta e graf comun di humanidad.

5, 6. Despues cu Yacob a muri, unda y hunto cu ken el a wordo dera?

⁵ E prome caminda cu e palabra “Seol” ta aparece den Bijbel ta na Genesis 37:35. Ora e patriarca Yacob a haya sa cu su yiu stima Yosef [Hose] supuestamente lo a muri, el a nenga di wordo consola y a bisa: “Lo mi baha bai den Seol na rou.” Keriendo cu su yiu tawata morto, Yacob a desea di muri y bai Seol. Despues, nuebe di Yacob su otro yiunan mas grandi kier a baha bai Egipto cu Benjamin, su yiu mas chikito, pa busca alivio pa e hamber cu a asota nan. Sinembargo, Yacob a nenga, bisando: “Mi yiu no ta bai ayanan cu boso, pasobra su ruman homber a muri y e so a keda. Si algo malo pasa cu ne durante di e biahe cu boso ta haci, boso lo haci mi cabei blanco baha cu tristesa den Seol.” (Genesis 42:36, 38) E dos referencianan aki ta conecta morto cu Seol, y no cu un bida despues di morto.

⁶ E relato di Genesis ta mustra cu Yosef a bira e administrado di alimento na Egipto. Esei a pone cu Yacob por a biaha bai Egipto pa aya e bolbe uni cu Yosef, locual tawata un reencuentro felis. Despues di esei, Yacob a biba den e tera ei te na su morto na e edad hopi avansa di 147 aña. Pa cumpli cu su ultimo deseo, su yiunan a hiba su restonan y dera nan den e cueba di Macpela den e tera di Canan. (Genesis 47:28; 49:29-31; 50:12, 13) Di e forma aki Yacob a wordo dera hunto cu su tata Isaak y su welo Abraham.

“Reuni cu Nan Tatanan”

7, 8. (a) Unda Abraham a bai ora el a muri? Splica. (b) Kico ta mustra cu otro hende tambe a bai Seol ora nan a muri?

⁷ Mas prome, ora Yehova a confirma su pacto cu Abraham y a priminti cu su desendencia lo a bira hopi, el a indica kico lo a sosode cu Abraham. Yehova a bis’e: “Abo, lo bo bai serca bo tatanan na pas; lo bo wordo dera na un edad hopi avansa.” (Genesis 15:15) Y esei ta netamente loke a sosode. Genesis 25:8 ta bisa: “Abraham a hala su ultimo rosea y a muri na un edad hopi avansa, un homber bieu y satisfecho di su bida, y el a wordo reuni cu su pueblo.” Ta na cua pueblo e ta referi aki? Genesis 11:10-26 ta menciona su antepasadonan for di tempo di Sem yiu di Noe. Pues ta serca esnan cu tawata drumi den Seol caba Abraham a wordo “reuni” ora el a muri.

⁸ E expresion “reuni cu su pueblo” ta aparece varios bes den e Scritura Hebreo. Pues, ta logico pa conclui anto cu tanto Ismael yiu di Abraham como Aron ruman di Moises a bai Seol ora nan a muri, wardando riba un resureccion. (Genesis 25:17; Numbernan 20:23-29) Moises tambe a bai Seol, aunke ni un hende no tawata sa unda su graf tawata. (Numbernan 27:13; Deuteronomio 34:5, 6) Mescos tambe, Hosue, susesor di Moises como lider di Israel, hunto cu henter un generacion di hende tambe a bai Seol ora nan a muri.—Huesnan 2:8-10.

9. (a) Con Bijbel ta mustra cu e palabra Hebreo “Seol” y e palabra Griego “Hades” ta referi na e mesun luga? (b) Ki speransa tin pa e personanan cu ta den Seol, of Hades?

⁹ Hopi siglo despues, David a bira rei di e 12 tribunan di Israel. Ora el a muri, el “a bai sosega serca su tatanan.” (1 Reinan 2:10) E tambe  a bai Seol? Ta interesante pa nota cu riba dia di Pentecoste di aña 33 di nos era, apostel Pedro a referi na e morto di David y a cita Salmo 16:10 [NW]: “Lo bo no laga mi alma den Seol.” Despues cu Pedro a menciona cu David tawata den su graf ainda, el a aplica e palabranan ei na Hesus y a indica cu David “a mira padilanti y a papia di e resureccion di e Cristo, cu e no a wordo laga den Hades, ni su carni no a mira corupcion. E Hesus aki Dios a lanta, di locual nos tur ta testigo.” (Echonan 2:29-32) Aki Pedro a uza e palabra “Hades”, e ekivalente Griego di e palabra Hebreo “Seol.” Pues, hende cu segun Bijbel ta den Hades ta den e mesun condicion cu esnan cu e ta bisa ta den Seol. Nan ta drumi den morto, wardando un resureccion.

Tin Hende Malbado den Seol?

10, 11. Pakico nos por bisa cu algun hende malbado ta bai Seol, of Hades, ora nan muri?

¹⁰ Despues cu Moises a guia e nacion di Israel y saca nan for di Egipto, a lanta un rebelion den desierto. Moises a bisa e pueblo pa separa nan mes for di e lidernan rebelde Core, Datan y Abiram, pasobra nan lo a muri un morto violento. Moises a splica: “Si e personanan aki muri di acuerdo cu e morto di henter humanidad y wordo castiga cu e castigo di henter humanidad, e ora ei no ta Yehova a manda mi. Pero si e ta algo crea cu Yehova lo bai crea, y tera habri su boca y guli nan hunto cu tur loke ta pertenece na nan y nan tin cu baha bibo den Seol, e ora ei boso lo sa sigur cu e hombernan aki a trata Yehova cu falta di respet.” (Numbernan 16:29, 30, NW) Pues sea cu ta tera a habri y guli nan of cu ta candela a caba cu nan manera a sosode den e caso di Core y e 250 levitanan cu a tuma parti pa nan, tur e rebeldenan aki a bin resulta den Seol, of Hades.—Numbernan 26:10.

¹¹ Simei, kende a maldiciona Rei David, a haya su castigo na man di Salomon, susesor di David. David a bisa Salomon: “No lag’e bai sin haya castigo, pasobra abo ta un homber sabi; y lo bo sa kico bo mester haci cu ne, y lo bo laga su cabei blanco baha tur na sanger den Seol.” Salomon a laga Benaia ehecuta e sentencia. (1 Reinan 2:8, 9, 44-46) Un otro victima di Benaia su spada di ehecucion tawata Joab, exhefe di ehersito di Israel. Su cabei blanco no a “baha bai na pas den Seol.” (1 Reinan 2:5, 6, 28-34) Tur e dos ehempelnan aki ta mustra cu e cantica inspira di David ta berdad: “E malbadonan lo bolbe na Seol, si, tur e nacionnan cu ta lubida Dios.”—Salmo 9:17.

12. Ken Ahitofel tawata, y unda el a bai ora el a muri?

¹² Ahitofel tawata e consehero personal di David. Nan tawata considera su conseho como si fuera ta di Yehova mes e tawata bini. (2 Samuel 16:23) Lamentablemente, e sirbido di confiansa aki a bira un traido y a join un rebelion bou di guia di Absalon, yiu di David. Aparentemente, David a referi indirectamente na e traicion aki ora el a  skirbi: “No ta un enemigo [a] reprocha mi, pasobra esei lo mi por a soporta; ni no ta esun cu [a] odia mi [a] halsa su mes contra mi, pasobra lo mi por a sconde p’e.” David a continua: “Laga morto cohe nan di sorpresa; laga nan baha bibo den Seol, pasobra tin maldad den nan cas, meimei di nan.” (Salmo 55:12-15) Dia Ahitofel y su socionan a muri, nan a bai Seol.

Ken Ta den Gehena?

13. Pakico Hudas ta ser yama “e yiu di perdicion?

¹³ Compara David su situacion cu esun di Hesus, e David Mayor. Hudas Iscariot, un di e 12 apostelnan di Cristo, a bira un traido mescos cu Ahitofel. Hudas su acto di traicion tawata mucho mas serio cu esun di Ahitofel. Hudas a actua contra Dios su Yiu unigenito. Den un oracion na fin di su ministerio riba tera, e Yiu di Dios a bisa di su siguidonan: “Mientras cu mi tawata cu nan, mi tawata warda nan den bo nomber cu bo a duna mi; y mi a warda nan y ni un di nan no a bai perdi, cu excepcion di e yiu di perdicion, pa e scritura wordo cumpli.” (Huan 17:12) Door di referi aki na Hudas como “e yiu di perdicion”, Hesus a indica cu ora Hudas a muri, no tawatin speransa mas pa e bini bek den un resureccion. E no a sigui biba den e memoria di Dios. E no a bai Seol, sino Gehena. Kico ta Gehena?

14. Kico Gehena ta representa?

¹⁴ Hesus a condena e lidernan religioso di su tempo pasobra nan a haci cada un di nan disipelnan ‘merecedor di Gehena.’ (Mateo 23:15, NW) E hendenan di e tempo ei tawata conoce e Roi di Hinom. E tawata sirbi como un dump den cua nan tawata tira cadaver di criminalnan ehecuta cu no tawata wordo considera digno di un entiero apropiado. Mas prome, Hesus mes a haci mencion di Gehena den su Sermon Riba Sero. (Mateo 5:29, 30, NW) Pesei, su nificacion simbolico tawata masha cla pa su oyentenan. Gehena a representa destruccion completo sin speransa di un resureccion. Ademas di Hudas Iscariot di tempo di Hesus, tawatin mas hende cu a bai Gehena, y no Seol of Hades ora nan a muri?

15, 16. Ken a bai Gehena ora nan a muri, y pakico nan a bai einan?

¹⁵ E prome sernan humano, Adam cu Eva, a wordo crea perfecto. Nan a peca den un forma delibera. Nan tawatin dilanti nan sea bida of morto eterno. Nan a desobedece Dios y a tuma parti pa Satanas. Pues ora nan a muri, no tawata posibel pa nan beneficia di e sacrificio di rescate di Cristo. Mas bien, nan a bai Gehena.

 ¹⁶ E prome yiu di Adam, Cain, a mata su ruman Abel y despues di esei a biba como fugitivo. Apostel Huan a describi Cain como un hende “cu tawata di e malbado.” (1 Huan 3:12) Ta rasonabel pa conclui cu ora el a muri, el a bai Gehena mescos cu su mayornan. (Mateo 23:33, 35, NW) E situacion di e homber husto Abel si ta completamente distinto! Pablo a splica: “Pa medio di fe Abel a ofrece na Dios un miho sacrificio cu Cain, door di cual el a obtene e testimonio cu e tawata husto, ora Dios a duna testimonio di su regalonan.” Pablo a agrega: “Y pa medio di fe ainda e ta papia, aunke cu e ta morto.” (Hebreonan 11:4) Si, actualmente Abel ta den Seol wardando riba un resureccion.

Un “Prome” y un “Miho” Resureccion

17. (a) Ken ta bai Seol durante ‘e tempo di fin’ aki? (b) Kico ta warda hende cu ta den Seol y kico ta warda esnan cu ta den Gehena?

¹⁷ Hopi hende cu ta lesa e informacion aki lo kier sa kico lo para di esnan cu ta muri durante ‘e tempo di fin.’ (Daniel 8:19) Revelacion capitulo 6 ta describi e careda di e cuater hinetenan durante e tempo ei. Ta interesante pa nota cu e ultimo den esakinan yama Morto, y Hades ta siguie. Pues, hopi di e hendenan cu ta muri un morto prematuro causa pa loke e hinetenan anterior haci ta bin resulta den Hades, pa warda einan riba un resureccion den e mundo nobo di Dios. (Revelacion 6:8) Anto kico ta warda hende cu ta den Seol (Hades) y kico ta warda esnan cu ta den Gehena? Den poco palabra, resureccion pa e prome grupo y destruccion pa e ultimo.

18. Ki expectativa “e prome resureccion” ta ofrece?

¹⁸ Apostel Huan a skirbi: “Bendiciona y santo ta esun cu tin parti den e prome resureccion; riba esakinan e di dos morto no tin poder, ma nan lo ta sacerdotenan di Dios y di Cristo y lo reina hunto cu ne pa mil aña.” Esnan cu lo ta cogobernante hunto cu Cristo ta ricibi “e prome resureccion”, pero ki speransa tin pa e resto di humanidad?—Revelacion 20:6.

19. Con algun hende ta beneficia di “un miho resureccion”?

¹⁹ For di tempo di Dios su sirbidonan Elias y Eliseo, e milager di resureccion a trece hende bek na bida. Pablo a bisa en detaye cu “mohenan a haya nan mortonan bek pa medio di resureccion; y otronan a wordo tortura, sin acepta nan liberacion, pa nan por a obtene un miho resureccion.” Si, e fiel sirbidonan aki cu a mantene nan integridad a anhela un resureccion cu lo a duna nan chens di biba no djis un par di aña mas pa despues muri, sino pa eternidad! Esei en berdad ta “un miho resureccion.”—Hebreonan 11:35.

20. Kico e siguiente articulo lo analisa?

²⁰ Si nos muri fiel prome cu Yehova pone fin na e mundo malbado aki, nos tin e speransa sigur di “un miho resureccion”, miho den e sentido cu e ta uno cu bista riba bida eterno. Hesus a priminti: “No straña boso di esaki, pasobra e ora lo yega den cual tur cu ta den graf lo tende su bos, y lo sali.” (Huan 5:28, 29) Nos siguiente articulo ta sigui analisa e proposito di resureccion. Lo e mustra con e speransa di resureccion ta fortalece nos pa warda integridad y yuda nos desaroya e spirito di sacrificio propio.

[Nota]

Bo Ta Corda?

• Pakico Bijbel ta bisa cu Yehova ta e Dios “di e bibonan”?

• Den ki condicion e hendenan den Seol ta?

• Kico ta warda e hendenan cu ta den Gehena?

• Con algun hende lo beneficia di “un miho resureccion”?

[Preguntanan di Estudio]

[Plachi na pagina 15]

Mescos cu Abraham, esnan cu ta bai Seol ta wardando riba un resureccion

[Plachi na pagina 16]

Pakico Adam cu Eva, Cain y Hudas Iscariot tur a bai Gehena?