Pregunta di Lector

Dicon Pablo a skirbi relaciona cu un esposa cristian: “Lo e ser warda den siguridad mediante hayamento di yiu”?—1 Timoteo 2:15, NW.

Segun e contexto, kico Pablo tawata kiermen? Bou di inspiracion di spirito santo e tawata duna conseho tocante e papel di hende mohe cristian den e congregacion. El a skirbi: “Mi kier pa hende mohe dorna nan mes cu bisti apropia, decente y modera, no cu cabei tur na vlecht y oro of perla of bisti costoso, sino mas bien cu bon obra, manera ta pas pa mohenan cu ta teme Dios.” (1 Timoteo 2:9, 10) Pablo tawata urgi su ruman mohenan cristian pa nan ta modesto of decente, balansa ora di scohe adorno personal, y pa nan ta ‘dorna’ cu bon obra.

Caba, Pablo a splica ken ta cabes di e mohe den e areglo di congregacion. El a bisa: “Mi no ta permiti hende mohe siña hende homber ni eherce autoridad riba hende homber, ma pa keda keto.” (1 Timoteo 2:12; 1 Corintionan 11:3) El a splica e base pa e areglo aki door di mustra cu aunke Satanas no a gaña Adam, Eva si “a ser completamente gaña y a yega di ta den transgresion.” Con un mohe cristian por evita di comete e mesun eror cu Eva a comete? Pablo ta contesta: “Sinembargo, lo e ser warda den siguridad mediante hayamento di yiu, con tal cu nan ta sigui den fe y amor y santificacion hunto cu sano huicio.” (1 Timoteo 2:14, 15, NW) Kico Pablo tawata kiermen cu e palabranan aki?

Algun traductor ta laga parce cu un hende mohe mester haya yiu pa e haya salbacion. Por ehempel, Beibel na papiamentu koriente ta bisa: “Hende mohe lo keda salba pa medio di hayamento di yiu.” Sinembargo, e interpretacion aki di e palabranan di Pablo no ta corecto. Hopi texto di Bijbel ta mustra cu pa un persona ser salba e tin cu conoce Yehova, kere den Hesus, eherce fe y demostra e fe ei mediante obra. (Huan 17:3; Echonan 16:30, 31; Romanonan 10:10; Santiago 2:26) Ademas, Pablo no tawata kiermen cu tur hende mohe creyente lo ta garantisa di un parto safe. Tawatin hende mohe cu a haya yiu sin problema, sea cu nan tawata creyente of no. Y lamentablemente tawatin algun hende mohe creyente y tambe no creyente cu a muri durante parto.—Genesis 35:16-18.

Otro consehonan cu Pablo a duna relaciona cu hende mohe mas despues den e mesun carta aki ta yuda nos compronde kico e tawata kiermen. El a spierta tocante cierto biudanan mas jong cu ‘no solamente tawata cana pornada, ma tambe tawata siña haci redo y mete den asunto di otro hende, papiando cosnan cu no a cumbini.’ Kico Pablo a conseha? El a sigui: “Pesei, mi kier pa e biudanan mas hoben casa, haya yiu, percura pa nan cas, y no duna e enemigo ocasion pa papia malo di nan.”—1 Timoteo 5:13, 14.

Pablo a resalta e papel positivo di hende mohe den e areglo di famia. Door di ocupa su mes cu actividadnan manera ‘haya yiu y percura pa su cas’, un hende mohe cu a sigui “den fe y amor y santificacion hunto cu sano huicio” lo no tawata inclina na conducta cu no ta edificante. Su spiritualidad lo tawata conserva, of “warda den siguridad.” (1 Timoteo 2:15, NW) E actividadnan aki lo a yuda hopi hende mohe hoben evita e trampanan di Satanas.

Loke Pablo a bisa Timoteo ta recorda nos tur, homber y mohe, pa nos uza nos tempo na un manera beneficioso. E Palabra di Dios ta conseha tur cristian: “Pesei, mira bon con boso ta cana, no manera hende bobo, ma manera hende sabi.”—Efesionan 5:15.