Resureccion—Un Siñansa Cu Tin Efecto Riba Bo

“[Mi tin] speransa den Dios ... cu siguramente lo tin un resureccion di tanto e hustonan como e malbadonan.”—ECHONAN 24:15.

1. Con bin e resureccion a bira un punto di discusion dilanti e Sanedrin?

NA FIN di e di tres biahe cu apostel Pablo a haci como misionero na aña 56 di nos era, e tawata na Herusalem. Despues cu e Romanonan a arest’e, nan a permitie presenta dilanti e Consilio, e corte supremo Hudiu. (Echonan 22:29, 30) Ora Pablo a mira e miembronan di e corte ei, el a ripara cu algun tawata saduceo y otronan tawata farizeo. Tawatin un diferencia remarcabel entre e dos gruponan aki. E saduceonan no tawata kere den e resureccion, pero e farizeonan si. Pa mustra unda e tawata para riba e punto aki, Pablo a declara: “Rumannan, mi ta un farizeo, yiu di farizeonan; mi ta wordo husga pa motibo di e speransa y resureccion di e mortonan!” Su palabranan a causa un consternacion total den e asamblea!—Echonan 23:6-9.

2. Pakico Pablo tawata prepara pa defende su creencia den resureccion?

² Hopi aña mas prome, ora Pablo tawata riba caminda pa Damasco, el a haya un vision den cua el a tende e stem di Hesus. Asta el a puntra Hesus: “Kico mi mester haci, Señor?” Hesus a contest’e: “Lanta y sigui pa Damasco; y aya nan lo bisa bo tur loke a wordo designa pa bo haci.” Ora Pablo a yega Damasco, un disipel cristian cu yama Ananias a hay’e. Ananias tawata un bon yudansa p’e pasobra el a splic’e: “E Dios di nos tatanan a scohe bo pa conoce su boluntad y pa mira Esun husto [Hesus resusita] y pa tende un bos for di su boca.” (Echonan 22:6-16) Pesei anto, no tawata straño cu Pablo tawata prepara pa defende su creencia den resureccion.—1 Pedro 3:15.

El A Declara Publicamente e Speransa di Resureccion

3, 4. Con Pablo a demostra cu e ta un defensor balente di resureccion, y kico nos por siña for di su ehempel?

³ Despues Pablo a presenta dilanti Gobernado Felix. Na e ocasion ei, Tertulo, “un abogado” cu a presenta e caso di e Hudiunan contra Pablo, a acus’e di ta lider di un secta y di ta causante di rebeldia. Sin duda ni un momento so, Pablo a declara: “Esaki mi ta reconoce bo dilanti, cu segun e caminda cu nan ta yama un secta mi ta sirbi e Dios di nos tatanan.” Anto, yegando na e cuestion principal, el a continua: “[Mi tin] speransa den Dios, mescos cu e hombernan aki tambe ta spera, cu siguramente lo tin un resureccion di tanto e hustonan como e malbadonan.”—Echonan 23:23, 24; 24:1-8, 14, 15.

⁴ Rond di dos aña mas despues, e susesor di Felix, Porcio Festo, a invita Rei Herodes Agripa pa hunto nan interoga e preso Pablo. Festo a splica cu e hendenan cu a acusa Pablo no tawata di acuerdo cu ne pasobra el a insisti  cu ‘un tal homber cu a muri, Hesus, tawata bibo.’ Pablo a defende su mes puntrando: “Pakico boso ta considera esaki increibel, cu Dios ta lanta e mortonan?” Anto el a declara: “Cu yudansa di Dios, mi ta para te dia djawe dunando testimonio tanto na chikito como na grandi, sin bisa nada mas sino loke e Profetanan y Moises a bisa cu lo a bai sosode: cu e Cristo mester a sufri, y cu pa motibo di su resureccion for di e mortonan e lo mester tawata e prome pa proclama lus tanto na e pueblo Hudiu como na e paganonan.” (Echonan 24:27; 25:13-22; 26:8, 22, 23) Pablo si tawata un defensor balente di resureccion! Awe nos tambe, mescos cu Pablo, por proclama cu conviccion cu lo tin un resureccion. Pero, ki reaccion nos por spera? Probablemente e mesun reaccion cu Pablo a ricibi.

5, 6. (a) Ora e apostelnan a defende e siñansa di resureccion, con e hendenan a reacciona? (b) Kico ta importante pa nos por papia tocante nos speransa den e resureccion?

⁵ Wak kico a sosode mas prome durante Pablo su di dos biahe como misionero (rond di aña 49 pa 52 di nos era) ora el a bishita Atenas. El a rasona cu hende cu tawata kere den hopi dios, y el a urgi nan pa tuma nota di Dios su proposito pa nombra un homber cu mester husga e tera habita den husticia. Tawata trata aki di Hesus. Pablo a splica cu Dios a duna un garantia di esaki door di resusita Hesus. Con e hendenan a reacciona? Nos ta lesa: “Awor ora nan a tende di e resureccion di e mortonan, algun a haci bofon, ma otronan a bisa: ‘Nos lo tende di bo atrobe tocante di esaki.’”—Echonan 17:29-32.

⁶ Esei tawata e mesun reaccion cu Pedro y Huan a haya un poco despues di Pentecoste di aña 33 di nos era. Atrobe e saduceonan tawata e centro di e controversia. Echonan 4:1-4 ta conta loke a sosode: “Mientras cu nan [dos] tawata papia cu e pueblo, e sacerdotenan y e capitan di e guardia di tempel y e saduceonan a bin riba nan, masha rabia pa motibo cu nan tawata siña e pueblo y tawata proclama den Hesus e resureccion for di e mortonan.” Ma otronan si a reacciona positivamente. “Hopi di esnan cu a tende e mensahe a kere; y e cantidad di e hombernan a bira como cinco mil.” Pues, nos por spera tur tipo di reaccion ora nos ta papia tocante e speransa di resureccion. En bista di esei, ta masha importante pa nos fortalece nos fe den e siñansa aki.

Fe y Resureccion

7, 8. (a) Segun un carta dirigi na e congregacion Corintio den e prome siglo, con nos fe por ta en vano? (b) Con un comprondemento corecto di e speransa di resureccion ta distingui cristiannan berdadero for di esnan falso?

⁷ No ta tur hende cu a bira cristian den e prome siglo di nos era a haya cu tawata facil pa acepta e speransa di resureccion. Algun di nan cu tawatin problema pa kere den dje tawata miembro di e congregacion na Corinto. Pablo a skirbi nan: “Mi a duna boso loke mi tambe a ricibi, cu Cristo a muri pa nos picanan segun e Scrituranan y cu el a wordo dera, y cu el a wordo lanta riba e di tres dia segun e Scrituranan.” E ora ei Pablo a confirma e berdad aki door di declara cu Cristo resusita a “aparece na mas cu cincoshen ruman”, di cua mayoria, segun Pablo, ainda tawata na bida. (1 Corintionan 15:3-8) Mas aleu, el a rasona: “Si Cristo ta wordo predica, cu el a wordo lanta for di e mortonan, con algun di boso ta bisa cu no tin resureccion di e mortonan? Ma si no tin resureccion di e mortonan, anto ni Cristo tampoco no a wordo lanta; y si Cristo no a wordo lanta, e ora ei nos predicamento ta vano, y boso fe tambe ta vano.”—1 Corintionan 15:12-14.

⁸ Si, e siñansa di resureccion ta asina fundamental cu si e no wordo acepta como un realidad e fe cristian lo no tin sentido. En berdad, e comprondemento corecto di resureccion ta distingui cristiannan berdadero for di esnan falso. (Genesis 3:4; Ezekiel 18:4) Pesei  Pablo ta inclui e siñansa di resureccion den “e siñansa elemental” di cristianismo. Laga nos ta determina pa “yega na madures.” “Y esaki nos lo haci”, segun Pablo, “si Dios permiti.”—Hebreonan 6:1-3.

E Speransa di Resureccion

9, 10. Kico e palabra resureccion, manera e ta aparece den Bijbel, ta encera?

⁹ Pa fortalece nos fe den resureccion ainda mas, laga nos repasa preguntanan manera: Kico Bijbel kiermen ora e ta referi na resureccion? Con e siñansa di resureccion ta resalta e amor di Yehova? E contestanan riba e preguntanan aki lo hala nos mas serca Dios y na mes momento nan ta yuda nos siña otro hende.—2 Timoteo 2:2; Santiago 4:8.

¹⁰ “Resureccion” ta e traduccion di un palabra Griego cu literalmente ta nifica “lanta para atrobe.” Kico e expresion ei ta encera? Segun Bijbel, e speransa di resureccion ta e conviccion cu un persona morto por biba atrobe. Bijbel ta mustra mas aleu cu e persona ta bini bek sea cu un curpa humano of spiritual, dependiendo di si e tin un speransa di biba den shelo of riba tera. E amor, sabiduria y poder cu Yehova ta manifesta door di e speransa magnifico aki ta algo maraviyoso.

11. Kico e speransa di resureccion ta encera pa Dios su sirbidonan ungi?

¹¹ E resureccion di Hesus y di su rumannan ungi ta den un curpa spiritual cu ta cuadra cu nan sirbishi den shelo. (1 Corintionan 15:35-38, 42-53) Hunto nan lo sirbi como gobernante di e Reino Mesianico, cu lo haci e tera aki un Paradijs. Bou di Hesus como Sumo Sacerdote, e unginan ta forma un sacerdocio real. Den e mundo nobo di husticia nan lo aplica e beneficionan di e sacrificio di rescate di Cristo na humanidad. (Hebreonan 7:25, 26; 9:24; 1 Pedro 2:9; Revelacion 22:1, 2) Mientrastanto, e unginan cu ta na bida ainda aki riba tera ta desea di keda aproba den bista di Dios. Ora nan muri, nan lo ricibi nan ‘recompensa’ pa medio di resureccion pa un bida spiritual inmortal den shelo. (2 Corintionan 5:1-3, 6-8, 10; 1 Corintionan 15:51, 52; Revelacion 14:13) Pablo a skirbi: “Si nos a wordo uni cu ne den e semehansa di su morto, ciertamente nos lo ta uni cu ne tambe den e semehansa di su resureccion.” (Romanonan 6:5) Pero kico di esnan cu lo resusita pa biba riba tera atrobe como hende? Con e speransa di resureccion por hala nan mas serca Dios? Nos por siña hopi for di e ehempel di Abraham.

Resureccion y Amistad cu Yehova

12, 13. Ki base firme pa fe den resureccion Abraham tawatin?

¹² Abraham, kende Bijbel ta describi como “amigo di Dios”, tawata un homber cu un fe sobresaliente. (Santiago 2:23) Ora Pablo a menciona e homber- y mohenan fiel registra den capitulo 11 di Hebreonan, tres biaha el a referi na e fe di Abraham. (Hebreonan 11:8, 9, 17) E di tres biaha el a enfoca riba e fe cu Abraham a manifesta ora esaki a obedece Dios y prepara pa ofrece su yiu Isaak como un sacrificio. Yehova a garantisa Abraham cu e promesa di un simiña mediante Isaak lo a cumpli. Abraham tawata combenci di esei.  Asta si Isaak mester a muri como un sacrificio, Abraham “a considera cu Dios ta poderoso pa lanta hende asta for di morto.”

¹³ Segun cu cosnan a desaroya, ora Yehova a mira con fuerte Abraham su fe tawata, el a percura pa un bestia remplasa Isaak como sacrificio. Pero e experencia di Isaak a sirbi como un ilustracion di cu lo bini un resureccion, pasobra Pablo a splica: “For di cual tambe, figurativamente bisa, [Abraham] a ricibie [Isaak] bek.” (Hebreonan 11:19) Ademas, ya caba Abraham tawatin un base firme pa kere den resureccion. No ta Yehova a rebiba Abraham su podernan pa procrea ora e cu su esposa Sara a bini hunto den nan biehes y a produci nan yiu Isaak?—Genesis 18:10-14; 21:1-3; Romanonan 4:19-21.

14. (a) Segun Hebreonan 11:9 y 10, kico Abraham tawata anhela? (b) Pa Abraham por ricibi e bendicionnan di Reino den e mundo nobo, kico mester sosode cu ne ainda? (c) Con nos por ricibi e bendicionnan di Reino?

¹⁴ Pablo a describi Abraham como un residente stranhero y un hende cu a biba den tent y cu tawata “busca [“spera”, NW] e stad cu tin fundeshinan, di cual Dios ta e arkitecto y constructor.” (Hebreonan 11:9, 10) No tawata trata aki di un stad literal manera Herusalem, caminda e tempel di Dios tawata situa, sino mas bien un stad simbolico. Tawata e Reino celestial di Dios cu ta consisti di Cristo Hesus y su 144.000 cogobernantenan. Tambe Bijbel ta yama e 144.000 aki, ora cu nan ta den nan gloria celestial, “e stad santo, Herusalem nobo”, e “bruid” di Cristo. (Revelacion 21:2) Na 1914, Yehova a instala Hesus riba trono como Rei Mesianico di e Reino celestial y a mand’e bai goberna meimei di su enemigonan. (Salmo 110:1, 2; Revelacion 11:15) Pa Abraham, “amigo di Dios”, por ricibi e bendicionnan di e gobernacion di Reino, lo e tin cu biba atrobe. Mescos tambe, pa nos ricibi e bendicionnan di Reino, nos mester ta na bida den e mundo nobo di Dios, sea como miembro di e multitud grandi di sobreviviente di Armagedon of como hende cu a resusita for di morto. (Revelacion 7:9, 14) Pero kico ta e base pa e speransa di resureccion?

E Amor di Dios—Base pa e Speransa di Resureccion

15, 16. (a) Con e prome profecia den Bijbel ta pone e base pa nos speransa di resureccion? (b) Con creencia den resureccion ta hala nos mas serca Yehova?

¹⁵ E relacion estrecho cu nos tin cu nos Tata celestial amoroso, nos fe firme manera di Abraham y nos obediencia na e mandamentonan di Dios ta haci posibel pa Yehova declara nos husto y considera nos como su amigonan. Esaki ta duna nos e oportunidad pa beneficia di loke e Reino lo logra. En berdad, e prome profecia registra den e Palabra di Dios, na Genesis 3:15, ta pone e base pa e speransa di resureccion y amistad cu Dios. Di un banda e ta mustra cu e cabes di Satanas lo wordo herida y di otro banda cu e hilchi di e Simiña di e mohe di Dios lo wordo herida. E morto di Hesus na staca tawata un herida simbolico na hilchi. Su resureccion riba e di tres dia a cura e herida ei y a habri caminda pa tuma accion decisivo contra “esun cu tawatin poder riba morto, esta, Diabel.”—Hebreonan 2:14.

¹⁶ Pablo ta recorda nos cu “Dios ta demostra su mes amor pa cu nos den esaki,  cu tempo nos tawata pecado ainda, Cristo a muri pa nos.” (Romanonan 5:8) Nos aprecio pa e bondad inmereci di Dios aki en berdad ta hala nos mas serca Hesus y mas serca nos Tata celestial amoroso.—2 Corintionan 5:14, 15.

17. (a) Ki speransa Job a expresa? (b) Kico Job 14:15 ta revela tocante Yehova, y ki sintimento esaki ta duna bo?

¹⁷ Job, un homber fiel di e epoca precristian, tambe a anhela un resureccion. El a sufri pisa na man di Satanas. Distinto di su compañeronan falso, cu nunca no a papia di resureccion, Job a haya consuelo den e speransa aki y a puntra: “Si un hende muri, lo e bolbe biba?” Job mes a contesta bisando: “Tur e dianan di mi lucha lo mi spera, te ora mi liberacion bin.” Dirigiendo su mes na su Dios, Yehova, el a reconoce: “Abo lo yama, y ami lo contesta bo.” Relaciona cu e sintimentonan di nos Creador amoroso, Job a remarca: “Lo bo anhela na e obra di bo mannan.” (Job 14:14, 15) Si, Yehova ta anticipa ansiosamente e tempo ora hende fiel bolbe na bida den resureccion. Ora nos medita riba e amor y bondad inmereci cu e ta mustra na nos aunke cu nos ta imperfecto, esaki sigur ta hala nos mas serca dje!—Romanonan 5:21; Santiago 4:8.

18, 19. (a) Ki speransa tawatin pa Daniel bolbe biba? (b) Kico nos lo repasa den e siguiente articulo?

¹⁸ Profeta Daniel, cu e angel di Dios a describi como un “homber masha stima”, a hiba un bida largo di sirbishi fiel. (Daniel 10:11, 19) For di su exilio na aña 617 prome cu nos era te na su morto poco tempo despues cu el a haya un vision na aña 536, e di tres aña di Ciro, rei di Persia, el a mantene su integridad na Yehova. (Daniel 1:1; 10:1) Na un dado momento durante e di tres aña ei di Ciro, Daniel a haya un vision di e marcha di potencianan mundial cu ta culmina den e benidero tribulacion grandi. (Daniel 11:1–12:13) Door cu e no por a compronde e vision completamente, el a puntra e angel mensahero cu a dun’e e vision: “Mi señor, kico lo ta e fin di e eventonan aki?” E angel a contest’e halando atencion na “e tempo di e fin”, durante cua “esnan cu tin discernimento lo compronde.” Pa loke ta Daniel mes, ki speransa tawatin p’e? E angel a reconoce: “Lo bo bai sosega y lo lanta pa ricibi e parti cu ta toca bo na e fin di dianan.” (Daniel  12:8-10, 13) Daniel lo bolbe den “e resureccion di e hustonan”, durante Cristo su Reinado di Mil Aña.—Lucas 14:14.

¹⁹ Awor nos ta den e parti final di e tempo di fin y e momento pa e Reino di Mil Aña di Cristo cuminsa ta mas serca cu tempo nos a bira creyente. Pesei, nos tin cu puntra nos mes: ‘Lo mi ta den e mundo nobo pa asocia cu Abraham, Job, Daniel y otro homber- y mohenan fiel?’ Nos lo t’ei basta nos keda serca Yehova y obedece su mandamentonan. Den nos siguiente articulo, nos lo repasa e speransa di resureccion den mas detaye pa haya sa ken lo wordo resusita.

Bo Ta Corda?

• Con e hendenan a reacciona ora Pablo a papia di su speransa den resureccion?

• Pakico e speransa di resureccion ta distingui cristiannan berdadero for di esnan falso?

• Con nos por sa cu Abraham, Job y Daniel tawatin fe den e resureccion?

[Preguntanan di Estudio]

[Plachi na pagina 9]

Pablo a presenta dilanti Gobernado Felix y a declara cu conviccion e speransa di resureccion

[Plachi na pagina 10]

Pakico Abraham tawatin fe den e resureccion?

[Plachi na pagina 12]

Job a haya consuelo den e speransa di resureccion

[Plachi na pagina 12]

Daniel lo bolbe den e resureccion di e hustonan