Resureccion un Speransa Glorioso

HOPI hende ta kere den un resureccion. E buki santo di islam, Coran, ta dedica henter un capitulo na resureccion. Sura 75 ta bisa parcialmente: “Mi ta hura pa e Dia di Resureccion ... Hende ta kere cu Nos no por trece su wesonan hunto? ... E ta puntra: ‘Ki dia ta e Dia di Resureccion?’ E no tin, (e mes), poder pa duna bida na e mortonan?”—Sura 75:1-6, 40.

The New Encyclopædia Britannica ta remarca cu “zoroastrismo ta kere cu na final lo vence Maldad, cu lo tin un resureccion general, un Ultimo Huicio y e restauracion di un mundo limpi pa e hustonan.”

E Encyclopaedia Judaica ta defini e resureccion como “e creencia cu na final curpa di e mortonan lo rebiba y bolbe biba riba tera.” E mesun obra di referencia ta bisa tambe cu e creencia adopta door di hudaismo, esta, cu hende tin un alma inmortal, ta presenta un dilema. E ta admiti: “Basicamente e dos creencianan aki, esta, resureccion y inmortalidad di alma, ta contradeci otro.”

Hinduismo ta siña cu hende ta pasa den un serie di renacemento, of reencarnacion. Pa esaki por ta e caso, hende mester tin un alma cu ta sigui biba despues di morto. E buki sagrado di e hindunan, Bhagavad Gita, ta declara: “Loke ta yena tur parti di e curpa ta indestructibel. No tin ni un hende cu por caba cu e alma inmortal.”

E diferencia entre budismo y hinduismo ta cu pa budismo no ta existi un alma inmortal. No obstante, awe hopi budista na Lehano Oriente ta kere den un alma inmortal cu ta pasa di un forma di bida pa otro. *

Confusion Tocante e Siñansa di Resureccion

Hopi bes e sirbishinan di entiero cu ta ser efectua den cristiandad ta referi na tanto e alma cu ta sigui biba despues di morto como na e resureccion. Por ehempel, pastonan anglicano tin custumber di resita e siguiente palabranan: “Siendo cu den su gran misericordia e Dios Todopoderoso a haya ta bon pa tuma serca dje e alma di nos ruman stima aki cu a bai laga nos, nos ta entrega su curpa na tera; tera na tera, shinishi na shinishi, stof na stof; cu e speransa sigur di e Resureccion pa bida eterno, pa medio di nos Señor Hesucristo.”—The Book of Common Prayer.

Kisas e declaracion aki ta pone bo puntra bo mes: Ta kico Bijbel ta siña anto, resureccion of e doctrina di un alma inmortal? Pero, tuma nota di e comentario di parti di un profesor protestant Frances Oscar Cullmann. E ta skirbi den su buki Immortalité de l’âme ou Résurrection des morts? (Inmortalidad di  Alma of Resureccion di Morto?): “Tin un diferencia grandisimo entre e speransa cristian di resureccion di morto y e creencia Griego di inmortalidad di alma. ... Aunke mas despues cristianismo a establece un conexion entre e dos creencianan aki, y awe e cristian promedio ta confundi nan tur cu otro, mi no ta mira motibo pa sconde loke ami y mayoria experto den Bijbel ta considera e berdad. ... E bida y idea di e Testament Nobo ta completamente domina pa fe den e resureccion. ... E hende completo, kende ta realmente morto, ta ser treci bek na bida mediante un obra nobo di creacion di Dios.”

Nada straño anto cu por lo general hende ta confundi tocante morto y resureccion. Pa sali for di e confusion aki, nos tin cu acudi na Bijbel, cu ta presenta berdadnan cu Yehova Dios, e Creador di hende, a revela. Bijbel ta papia di varios caso di resureccion. Laga nos analisa cuater di e relatonan aki y mira kico nan ta revela.

“Mohenan A Haya Nan Mortonan Bek pa Medio di Resureccion”

Den su carta na e Hudiunan cu a bira cristian, apostel Pablo a bisa cu mohenan di fe “a haya nan mortonan bek pa medio di resureccion.” (Hebreonan 11:35) Un di e mohenan ei tawata biba na Sarepta, un stad di Fenicia banda di Sidon na Costa di Lama Mediteraneo. E tawata un biuda cu a ricibi Elias, profeta di Dios, hospitalariamente y a dun’e cuminda asta den un tempo di hamber extremo. Lamentablemente, e mohe aki su yiu homber a bira malo y muri. Mesora Elias a subi cu e mucha bai na e camber den dak caminda e tawata keda y a pidi Yehova pa restaura bida di e mucha. Un milager a sosode, y e mucha a “rebiba.” Elias a entreg’e bek na su mama y a bis’e: “Mira, bo yiu ta bibo!” Con e mama a reacciona? Contento, el a contesta: “Awor mi sa cu bo ta un homber di Dios, y cu e palabra di SEÑOR den bo boca ta berdad.”—1 Reinan 17:22-24.

Casi 100 kilometer sur di Sarepta tawata biba un pareha generoso cu a percura pa profeta Eliseo, susesor di Elias. E esposa tawata un mohe prominente den su stad natal di Sunem. Tanto e como su esposo tawata di acuerdo pa laga Eliseo keda na nan cas den un camber den dak. Nan tristesa pa motibo cu nan no tawatin yiu a cambia bira goso ora e mohe a duna lus na un yiu homber. Segun cu e hobensito tawata crece, hopi bes e tawata compaña e cosechadonan y su tata den cunucu. Pero riba un dia algo lamentabel a sosode. E mucha a grita cu e tawatin dolor di cabes. Un sirbido a core hib’e cas bek. Su mama a pon’e riba su scochi, ma pocopoco pero sigur e mucha a muri. E mama desconsola a dicidi di busca yudansa serca Eliseo. Cu un sirbido el a biaha den direccion nortwest pa Sero Carmelo, caminda Eliseo tawata kedando.

Eliseo a cuminsa na manda su sirbido, Gehazi, y esaki a mira cu en berdad e mucha tawata morto. Eliseo y e mohe a bini atras, pero kico a sosode ora cu nan a yega Sunem finalmente? E relato na 2 Reinan 4:32-37 ta  bisa: “Ora cu Eliseo a drenta e cas, mira, e mucha tawata drumi morto riba su cama. [Anto] el a drenta y a sera e porta tras di nan dos, y a haci oracion na SEÑOR. Y el a bai ariba y a drumi riba e mucha, y a pone su boca riba su boca, su wowonan riba su wowonan y su mannan riba su mannan, y el a rek su mes riba dje; y e mucha su curpa a bira cayente. Despues el a bolbe bai y a cana un biaha bai-bin den e cas, y a bai ariba y a rek su mes riba dje; y e mucha a nister shete biaha y a habri wowo. Y e homber di Dios a yama Gehazi y a bisa: ‘Yama e Sunamita aki.’ Asina Gehazi a yama e Sunamita. Y ora cu el a yega serca dje, el a bisa: ‘Hisa bo yiu.’ E ora ei el a drenta y a tira su curpa abou na pia di Eliseo y a buig te na suela; y el a hisa su yiu homber y a sali bai.”

Mescos cu e biuda di Sarepta, e mohe di Sunem tawata sa cu loke a sosode tawata cu poder di Dios. Tur e dos mohenan aki a haya un goso grandi ora Dios a restaura bida di nan yiunan.

Resureccion Durante Hesus Su Ministerio

Rond di 900 aña despues, un poco mas panort di Sunem pafo di e pueblo di Nain, a tuma luga un resureccion. Ora Hesucristo y su disipelnan tawata biaha for di Capernaum y tawata yegando na e porta di Nain, nan a topa un procesion funebre y Hesus a tuma nota di un biuda cu a perde su unico yiu homber. Hesus a bis’e pa e stop di yora. Lucas, un docter, a describi loke a sosode despues: “[Hesus] a yega serca y a mishi cu e [tabla] di morto; y e cargadonan di morto a keda para. Y el a bisa: ‘Hoben, mi ta bisa bo: Lanta!’ Y e morto a lanta sinta y a cuminsa papia. Y Hesus a entreg’e bek na su mama.” (Lucas 7:14, 15) E hendenan cu a mira e milager aki a duna gloria na Dios. Noticia di e resureccion a plama bai den direccion sur yega te Hudea y den henter e districto. Ta interesante pa nota cu e disipelnan di Huan Bautista a tende di e milager aki y a informa Huan di dje. Huan, na su turno, a manda nan pa busca Hesus y puntr’e si ta E tawata e Mesias tan spera. Hesus a bisa nan: “Bai conta Huan loke boso a mira y tende: e ciegonan ta mira, e lamnan ta cana, e leprosonan ta wordo haci limpi, e sordonan ta tende, e mortonan ta wordo lanta y na e pobernan evangelio ta wordo predica.”—Lucas 7:22.

E milager di resureccion di mas conoci cu Hesus a efectua tawata esun di su bon amigo Lazaro. Den e caso aki, despues cu Lazaro a muri, a dura un tiki tempo prome cu Hesus a  yega na e cas di famia. Ora Hesus a alcansa Betania finalmente, Lazaro tawatin cuater dia morto caba. Na momento cu Hesus a manda nan kita e baranca cu tawata tapa e entrada di e graf, Marta no tawata kier. El a bisa: “Señor, ya e mester ta hole malo caba, pasobra e tin cuater dia morto.” (Huan 11:39) Pero, e echo cu Lazaro su curpa a cuminsa putri no a stroba e resureccion. Riba ordo di Hesus, “esun cu a muri a bin pafo, cu su mannan y pianan lora den paña di graf, y tawatin un lenso lora rond di su cara.” Loke Hesus su enemigonan a haci despues ta confirma cu ta Lazaro mes a wordo resusita.—Huan 11:43, 44; 12:1, 9-11.

Kico nos por conclui for di e cuater relatonan aki di resureccion? Pa cuminsa, cada persona resusita a bini bek na bida como e mesun hende. Nan tur a wordo reconoci, asta door di nan famianan mas pega. Ningun di e personanan resusita a papia di loke a sosode durante e tempo cortico cu nan tawata morto. Ningun no a bisa cu nan a pasa pa un otro mundo. Aparentemente, nan tur a regresa bon di salu. Pa nan, tawata como si fuera nan a drumi un rato pa un poco despues nan spierta, manera Hesus a indica. (Huan 11:11) No obstante, despues di un tempo, nan tur a muri atrobe.

Hunto cu Nos Sernan Keri Atrobe —Un Speransa Glorioso

Un poco despues di e morto tragico di Owen, menciona den e articulo anterior, su tata a bai cas di un biciña. Einan el a mira riba un mesa un papel di invitacion cu ta anuncia un discurso publico organisa door di Testigonan di Yehova. E tema di e discurso, “Unda e Mortonan Ta?”, a hala su atencion. Esei tawata exactamente e pregunta cu e tawatin na mente. El a asisti na e discurso y a haya berdadero consuelo for di Bijbel. El a haya sa cu e mortonan no ta sufri. En bes di wordo tormenta den fierno di candela of tuma door di Dios pa bira angel den shelo, e mortonan, entre cua Owen, ta warda den graf te ora yega e momento pa wordo lanta den e resureccion.—Eclesiastes 9:5, 10; Ezekiel 18:4.

Bo famia a sufri un perdida tragico? Abo, mescos cu tata di Owen, ta puntra bo mes na unda bo defunto sernan keri ta awor y ki posibilidad tin pa bo mira nan atrobe? Si ta asina, nos ta invita bo pa considera kico Bijbel ta siña mas aleu tocante e resureccion. Podise bo ta puntra bo mes: ‘Ki dia e resureccion lo tuma luga? Ken exactamente lo beneficia di dje?’ Por fabor, lesa e siguiente articulonan pa bo haya contesta riba e preguntanan aki y otronan.

[Nota]

[Plachi na pagina 5]

Elias a pidi Yehova pa restaura bida di un mucha

[Plachi na pagina 5]

Yehova a uza Eliseo pa resusita yiu homber di e Sunamita

[Plachi na pagina 6]

Hesus a resusita yiu di e biuda di Nain

[Plachi na pagina 7]

E resureccion lo bolbe uni famianan cu nan sernan keri