Un Morto Tragico

OWEN, un mucha homber di dos aña y mei, tawata hunga den baño na su cas. El a logra subi yega na un cashi di remedi cu su mayornan a kere tawata fuera di su alcanse. Di tur loke tawatin den e cashi, su bista a cai riba un boter. El a habrie y bebe e likido cu tawatin den dje, locual a resulta fatal.

E boter tawata contene un acido cu ta kima, y lamentablemente esaki a costa bida di e hobensito Owen. Esei a kibra curason di su mayornan. E tata, Percy, a busca consuelo serca su iglesia. El a puntra e pasto: “Pakico e cos aki a pasa cu nos?” E pasto a contesta: “Dios tawata kier un angel chikito mas den shelo.” Grandi tawata desconsuelo di e mayor; el a sinti cu esei tawata un gran inhusticia. Ta Dios mes tawata kier pa algo tragico asina sosode? Desilusiona, Percy a dicidi cu e no kier tin nada mas di aber cu su iglesia.

Ora Percy tawata pensa riba loke a sosode, e tawata puntra su mes: ‘Mi yiu chikito ta sufriendo ainda? Lo mi mir’e un dia atrobe?’

Kisas abo tambe a yega di puntra bo mes kico ta sosode ora un hende muri y si ta posibel cu un dia lo bo por topa bo sernan keri atrobe. Bijbel, e Palabra di Dios, ta contesta e preguntanan aki. E tin contestanan bon cla y palabranan cu por consola tur hende cu tambe a perde un ser keri den un morto tragico. Y mas importante ainda, e ta revela un speransa glorioso cu Dios a duna—e resureccion.

Por fabor, lesa e siguiente articulo pa bo haya sa mas di e speransa maraviyoso aki.