‘Mi Yudansa Ta Bin for di Yehova’

Conocemento di Dios Ta Fortifica Bida di Famia

“MURAYA di Berlin.” Esei ta e nomber cu un pareha na Argentina a duna e muraya literal cu nan a traha den nan cas pa partie na dos! Nan tawatin desacuerdonan cu nan no por a remedia; nan tawatin echt rabia riba otro.

Lamentablemente, no ta e pareha aki so ta den e situacion ei. Hopi famia ta ser afecta pa pleito, infieldad y enemistad total. Esaki ta duele pasobra ta Dios mes a establece e areglo di bida di famia. (Genesis 1:27, 28; 2:23, 24) E regalo dibino aki ta un ambiente ideal pa mustra amor profundo. (Rut 1:9) Ora miembronan di famia ta cumpli cu e obligacionnan cu Dios a duna nan, nan por honra Yehova y ser un bendicion pa otro. *

Siendo cu ta Dios a institui e areglo di famia, nos tin cu laga su punto di bista influencia nos comprondemento di e manera cu famianan mester funciona. Den su Palabra tin hopi conseho practico diseña pa yuda famianan pa ta exitoso, specialmente ora cu dificultadnan surgi. Pa loke ta e papel di esposonan, Bijbel ta bisa: “Esposonan ... mester stima nan esposa manera nan mes curpa.” Ora e esposo ta cumpli cu e rekisito aki, ta un placer pa su esposa “respeta su esposo.”—Efesionan 5:25-29, 33.

Encuanto e relacion entre mayornan y nan yiunan, apostel Pablo a skirbi: “Tatanan, no proboca boso yiunan na rabia, ma lanta nan den e disiplina y instruccion di Señor.” (Efesionan 6:4) Esaki na su turno, ta crea un ambiente di amor den famia cu ta pone cu ta mas facil pa e yiunan obedece nan mayornan.—Efesionan 6:1.

E puntonan ei ta algun ehempel di e conseho sano cu Bijbel ta duna pa bida di famia. Door di aplica e principionan di Dios, hopi hende ta disfruta di felicidad den nan cas. Considera por ehempel e pareha na Argentina menciona den e introduccion. Despues cu nan tawatin tres luna ta studia Bijbel cu Testigonan di Yehova, nan a cuminsa aplica Bijbel su conseho sabi relaciona cu matrimonio. Nan a traha duro pa mehora nan comunicacion, pa mustra comprension pa otro y pa siña pordona otro. (Proverbionan 15:22; 1 Pedro 3:7; 4:8) Nan a siña domina nan rabia y acudi na Dios pa yudansa ora cu cosnan a parce di bai for di man. (Colosensenan 3:19) No a dura masha cu nan a kita e “Muraya di Berlin”!

Dios Por Fortifica un Famia

Conocemento y aplicacion di Dios su normanan por fortifica un famia pa resisti presion. Esaki ta masha importante pasobra Bijbel a profetisa cu famia lo ser ataca cruelmente den nos tempo. Pablo a predeci cu moralidad y sosiedad humano lo a bai hopi atras; locual nos ta mira actualmente. El a bisa cu “e ultimo dianan” lo ta caracterisa pa infieldad, falta di amor y desobediencia na mayornan, asta entre e hendenan “cu tin aparencia di ta religioso.”—2 Timoteo 3:1-5.

 Esfuersonan pa agrada Dios por yuda contraresta e influencianan negativo ei riba bida di famia. Hopi famia a realisa cu nan tin mester di un solucion cu ta bini di Dios pa yuda nan trata cu e tantisimo dificultadnan cu nan ta haya nan cu ne. Si miembronan di famia ta desea di mantene un bon relacion cu Dios, nan tin cu aplica principionan di Bijbel mas cu tur cos. Tambe nan tin cu realisa cu si Yehova “no traha e cas, ta en vano esnan cu ta trah’e ta traha cansa curpa.” (Salmo 127:1) Hende ta logra mayor felicidad den nan hogar door di pone Dios na prome luga den bida di famia.—Efesionan 3:14, 15.

Na Hawai, un homber cu yama Dennis a realisa con cierto esei ta. Aunke pa nomber e tawata un cristian, e tawata gusta uza palabranan ofensivo y bringa. Despues cu el sirbi den ehersito, el a bira asta mas agresivo y desagradabel. “Semper mi tawata den un of otro conflicto”, e ta corda. “Mi no tawatin cu nes kico pasa cu mi ni mi no tawatin miedo di muri. Y mi a sigui papia palabra malo y bringa. Mi esposa, kende tawata un Testigo di Yehova, a anima mi pa studia Bijbel.”

Dennis a resisti e intentonan di su esposa pa yud’e. Sinembargo, e esposa su conducta cristian a suavisa Dennis su actitud negativo. Cu tempo Dennis a bai un reunion cristian hunto cu su casa y e yiunan. Despues di esei, nan a cuminsa studia Bijbel cu Dennis y el a haci excelente progreso. El a stop cu e habito di huma cu e tawatin pa 28 aña largo y tambe a stop di asocia cu amigonan cu tawata haci tur e cosnan cu e tawata purba di laga. Gradicido na Yehova, Dennis a remarca: “Mi bida di famia a mehora. Nos tawata bai e reunionnan y sirbishi hunto como famia. Mi dos yiunan no tawatin miedo di mi mas pasobra mi a siña domina mi mal beis y a stop di insulta hende. Nos por a papia cu otro y disfruta di combersacionnan basa riba Bijbel. Si no tawata pa e berdad di Bijbel, lo mi no tawata aki awe; mi tawata un hende cu ta rabia masha lihe.”

Famianan por logra felicidad ora nan ta traha duro pa haci Yehova su boluntad. Experencia a mustra cu asta si ta un miembro so di un famia ta aplica principionan biblico, cosnan ta bai mas miho cu ora ningun hende no ta hacie. Fortifica un famia cristian ta trabou duro cu ta rekeri habilidad y tempo. Pero miembronan di e famianan ei tin e siguransa cu Yehova lo recompensa nan esfuerso pa edifica nan famia cu exito. Nan por ripiti e palabranan di e salmista: ‘Mi yudansa ta bin for di Yehova.’—Salmo 121:2.

[Nota]

[Comentario na pagina 9]

“Henter e famia den shelo y riba tera ta haya su nomber” for di Dios.—EFESIONAN 3:15

[Cuadro na pagina 8]

YEHOVA TA DUNA HOPI BALOR NA BIDA DI FAMIA

“Dios a bendiciona nan, y Dios a bisa nan: ‘Sea fructifero y multiplica, y yena e tera.’”—Genesis 1:28.

“Bendiciona ta tur esnan cu ta teme [Yehova] ... Bo esposa lo ta manera un mata di wendruif fructifero den e parti mas paden di bo cas.”—Salmo 128:1, 3.