Hende Por Caba cu Pobresa?

MIYONES di hende a crece sin sa kico ta pobresa. Nunca nan mester a bai drumi cu hamber ni pega soño temblando di friu. Sinembargo, hopi di e personanan aki ta sinti duele di hende pober y ta haci extra esfuerso pa yuda nan.

Pero, pobresa ta sigui ser un realidad cruel pa hende asota pa guera civil, inundacion, secura y otro problemanan. E factornan aki ta un pesadiya pa cunukeronan di Africa cu apenas ta logra mantene nan cabes riba awa. Algun a haya nan obliga di bandona nan cas y muda bai stadnan grandi of di biba como refugiado den un otro pais. Otro habitantenan di cunucu ta bai biba den stad pasobra nan ta ser atrai door di promesanan di un miho bida.

Stadnan sobrepobla hopi bes ta bira pesta di pobresa. Si tin espacio mes pa planta einan, ta masha poco. Ta dificil pa haya trabou. Puro desesperacion ta pone hopi hende bai den e mundo di criminalidad. Habitantenan di stad ta sclama pa ausilio, pero gobiernonan humano no por resolve e problema creciente di pobresa. Referiendo na un informe di Nacionnan Uni publica na november 2003, e corant The Independent di London a declara: “Mas y mas hende na mundo ta sufriendo di hamber.” E corant a agrega: “Segun calculo, rond mundo tin un 842 miyon hende cu ta malnutri awe. Ademas, e cifra ei ta asta aumenta tur aña cu 5 miyon hende mas cu ta sufri di hamber.”

Tin biaha e sucursal di Testigonan di Yehova na Sur Africa ta ricibi carta di hende hopi pober. Por ehempel, un homber di Bloemfontein a skirbi: “Mi no tin trabou, y ki ora cu mi haya un chens mi ta horta den stad. Si mi no hacie, nos ta keda cu hamber pa varios dia, pa no papia mes di e friu intenso cu nos tin cu soporta. No tin ningun trabou. Hopi hende ta cana rond riba caya buscando trabou y algo pa come. Mi sa di otronan cu ta busca cuminda den bari di sushi. Algun ta comete suicidio. Hopi hende ta deprimi y desespera mescos cu mi. Ta parce cu no tin speransa pa futuro. E Dios cu a crea nos cu e necesidad di come y bisti, no ta mira e cosnan aki?”

Tin contestanan alentador pa e precupacionnan di e homber aki. Manera e siguiente articulo lo mustra, Bijbel, e Palabra di Dios ta duna contesta riba e preguntanan aki.