‘Mantene Bo Mes Frena bou di Maldad’
‘Mantene Bo Mes Frena bou di Maldad’
“Un esclabo di Señor no tin nodi bringa, sino mester ta amabel pa cu tur, ... manteniendo su mes frena bou di maldad.”—2 TIMOTEO 2:24, NW.
1. Con bin de bes en cuando nos ta topa hende cu ta papia malo cu nos ora nos ta participa den actividad cristian?
CON bo ta reacciona ora bo haya bo confronta cu hende cu no tin un opinion faborabel di bo of di loke bo ta representa? Ora Pablo a describi e ultimo dianan, el a profetisa cu hende lo ta “blasfemado, ... cu mala lenga, sin dominio propio, grosero.” (2 Timoteo 3:1-5, 12) Bo por topa hende asina den bo ministerio of den otro actividadnan.
2. Ki textonan por yuda nos trata na un manera sabi cu hende cu ta papia malo cu nos?
2 No ta tur hende cu ta insulta nos no tin interes den loke ta corecto. Dificultad serio of frustracion por pone hende papia malo diripiente cu ken cu ta rond di nan. (Eclesiastes 7:7) Hopi ta actua den e manera aki pasobra nan ta biba y traha den un ambiente caminda ta normal pa papia bruto cu otro. Aunke esaki no ta haci e forma di papia ei aceptabel pa nos como cristiannan, e ta yuda nos compronde si pakico otro hende ta uz’e. Con nos mester reacciona ora hende ta papia malo cu nos? Proverbionan 19:11 ta bisa: “Prudencia di un hende ta haci cu e no ta rabia lihe.” Y Romanonan 12:17 y 18 ta conseha nos: “Nunca paga malo cu malo na ningun hende. . . . Si ta posibel, asina leu cu ta depende di boso, sea na pas cu tur hende.”
3. Kico e mensahe cu nos ta predica tin di aber cu pas?
3 Si nos ta berdaderamente pacifico, esaki lo ta bisto den e actitud cu nos ta desplega. Lo e ta refleha den loke nos ta bisa y haci, talbes den nos expresion di cara y den nos tono di bos. (Proverbionan 17:27) Ora Hesus a manda su apostelnan bai predica, el a conseha nan: “Ora boso drenta e cas, cuminda e hendenan cu e saludo di pas. Si e hendenan di e cas ta digno, laga e pas cu boso a desea nan, baha riba nan y si e hendenan di e cas no ta digno, hala boso palabranan di pas atras.” (Mateo 10:12, 13, BPK) E mensahe cu nos ta hiba ta un evangelio, es decir, un bon noticia. Bijbel ta yam’e e “evangelio di pas”, “e evangelio di e gracia di Dios” y “evangelio aki di e reino.” (Efesionan 6:15; Echonan 20:24; Mateo 24:14) Nos meta no ta pa critica e otro persona su creencianan ni pa debati cu ne tocante su punto di bista, sino pa comparti cu ne e bon nobo di e Palabra di Dios.
4. Kico bo por bisa ora un hende bisa bo “Mi no ta interesa” prome cu bo haya un oportunidad di bisa sikiera e motibo di bo bishita?
4 Sin sikiera scucha nos na drechi, kisas un doño di cas ta corta nos bisando: “Mi no ta interesa.” Den hopi caso, bo por haya chens di bisa: “Mi tawatin gana di lesa djis un texto cortico for di Bijbel.” Kisas e no tin nada contra esei. Den otro casonan, kisas ta miho pa bisa: “Mi tawatin gana di conta bo di un tempo den cua lo no tin inhusticia mas y den cua tur hende lo siña stima otro.” Si e persona no pidi bo splic’e e asunto mesora, bo por agrega: “Pero mi ta mira cu esaki no ta un bon momento pa bo.” Asta si e doño di cas reacciona na un manera agresivo, nos mester conclui cu e “no ta digno”? Sea cual sea e reaccion, corda e conseho di Bijbel pa ta “amabel pa cu tur, ... frena bou di maldad.”—2 Timoteo 2:24, NW.
Masha Agresivo Pero Mal Guia
5, 6. Con Saulo a trata e siguidonan di Hesus, y pakico el a actua asina?
5 Den e prome siglo, un homber cu yama Saulo tawata bon conoci pa su manera di papia irespetuoso, asta pa su comportacion violento. Bijbel ta bisa cu e tawata “yen di menasa y gusto pa mata e disipelnan di Señor.” (Echonan 9:1, 2) Despues el a reconoce cu e tawata “un blasfemado y un persiguido y masha agresivo mes.” (1 Timoteo 1:13) Aunke algun di su famianan kisas a bira cristian caba, el a bisa di su mes actitud pa cu siguidonan di Cristo: “Siendo masha furioso mes riba nan, mi a bai te na stadnan stranhero pa persigui nan.” (Echonan 23:16; 26:11; Romanonan 16:7, 11) No tin evidencia cu e disipelnan a purba drenta den un debate publico cu Saulo tempo cu e tawata comportando su mes den e manera ei.
6 Pakico Saulo a actua asina? Hopi aña despues, el a skirbi: “Mi a actua ignorantemente den incredulidad.” (1 Timoteo 1:13) E tawata un farizeo, educa “strictamente segun e lei di [nan] tatanan.” (Echonan 22:3) Gamaliel, maestro di Saulo, evidentemente tawatin un mente habri, pero e sumo sacerdote Caifas, cu ken Pablo tawata asocia, si tawata un fanatico. Caifas tawata un di e cabesantenan den e complot cu a hiba na e ehecucion di Hesucristo. (Mateo 26:3, 4, 63-66; Echonan 5:34-39) Despues di esei, Caifas a percura pa nan a suta e apostelnan di Hesus, y el a prohibi nan strictamente di sigui predica riba base di e nomber di Hesus. Caifas a presidi riba e Consilio durante e sesion carga cu emocion den cua nan a bai cu Esteban pa piedr’e. (Echonan 5:27, 28, 40; 7:1-60) Saulo a para mira e piedramento, y Caifas a autoris’e pa e sigui den su afan pa silencia e siguidonan di Hesus door di aresta nan na Damasco. (Echonan 8:1; 9:1, 2) Pues bou di influencia di Caifas, Saulo a pensa cu su conducta tawata un evidencia di celo pa Dios, pero en realidad e tawata falta berdadero fe. (Echonan 22:3-5) Como resultado, Saulo no a realisa cu Hesus tawata e berdadero Mesias. Pero ora Hesus resusita a papia milagrosamente cu ne riba caminda pa Damasco, el a bin mira con malo su comportacion tawata.—Echonan 9:3-6.
7. Kico a sosode cu Saulo despues di su encuentro cu Hesus riba caminda pa Damasco?
7 Un poco despues di esaki, e disipel Ananias a ser manda serca Saulo pa dun’e testimonio. Abo lo tawata ansioso pa haci e bishita ei? Ananias tawatin un poco miedo, pero el a papia na un manera suave cu Saulo. Despues di e encuentro milagroso cu Hesus riba caminda pa Damasco, e actitud di Saulo a cambia. (Echonan 9:10-22) El a bira conoci como apostel Pablo, un misionero cristian celoso.
Manso Pero cu Curashi
8. Con Hesus a refleha e actitud di su Tata pa cu hende cu a practica loke ta malo?
8 Hesus tawata un proclamado celoso di Reino cu tawata manso pero yen di curashi den su trato cu hende. (Mateo 11:29) El a refleha e spirito di su Tata celestial, kende ta urgi e malbadonan pa bira for di nan mal camindanan. (Isaias 55:6, 7) Den su trato cu pecadonan, Hesus a tuma nota ora tawatin evidencia di un mehoracion, y el a anima personanan asina. (Lucas 7:37-50; 19:2-10) En bes di husga hende a base di nan aparencia, Hesus a imita e bondad y gran pasenshi di su Tata cu e speransa cu esaki lo a hiba nan na arepentimento. (Romanonan 2:4) E boluntad di Yehova ta pa tur clase di hende repenti y wordo salba.—1 Timoteo 2:3, 4.
9. Kico nos por siña for di e manera cu Isaias 42:1-4 a cumpli den Hesus?
9 Cu palabranan profetico, Mateo, un di e escritornan di Evangelio, a describi con Yehova ta mira Hesucristo: “Ata mi sirbido cu mi a scohe, mi stima, den kende mi alma tin goso; lo mi pone mi spirito riba dje, y e lo proclama husticia na e paganonan. E lo no pleita, ni halsa bos; y ningun hende lo no tende su bos den e cayanan. Un richi gekrak e lo no kibra, y un mecha cu ta sende flou e lo no paga, te ora cu e hiba husticia na victoria. Y den su nomber e paganonan lo spera.” (Mateo 12:17-21; Isaias 42:1-4) Na harmonia cu e palabranan profetico ei, Hesus no a envolve su mes den debatenan yen di bochincha. Asta ora e tawata bou di presion, el a papia e berdad den un manera cu a atrae hende di curason honrado.—Huan 7:32, 40, 45, 46.
10, 11. (a) Aunke e farizeonan tawata entre Hesus su opositornan di mas expresivo, pakico toch el a duna testimonio na algun di nan? (b) Ki tipo di contesta Hesus a duna opositornan de bes en cuando, pero kico si e no a haci?
10 Durante Hesus su ministerio, el a papia cu hopi farizeo. Aunke algun di nan a trata na coh’e den trampa cu su palabranan, Hesus no a conclui cu nan tur tawatin mal motibo. Simon, un farizeo kende tawata un poco critico, aparentemente kier a conoce Hesus miho y pesei el a invit’e pa un comemento. Hesus a acepta e invitacion y a duna testimonio na tur esnan presente. (Lucas 7:36-50) Na un otro ocasion, un farizeo prominente cu yama Nicodemo a bini serca Hesus anochi. Hesus no a tira na su cara cu el a warda te ora tawata scur pa e bin. Na luga di esei, el a duna Nicodemo testimonio tocante e amor cu Dios a mustra door di manda su Yiu pa habri e caminda di salbacion pa hende cu eherce fe. Tambe Hesus a mustr’e bondadosamente riba e importancia di obedece e areglo di Dios. (Huan 3:1-21) Despues, ora otro farizeonan a menosprecia un informe faborabel tocante Hesus, Nicodemo a defende Hesus.—Huan 7:46-51.
11 Hesus no tawata ciego pa e hipocresia di e personanan cu a purba coh’e den trampa. E no a laga opositornan envolv’e den debatenan inutil. Sinembargo, ora tawata apropiado, el a contesta na un manera breve y energico door di menciona un principio pa medio di un ilustracion of un cita di e Scritura. (Mateo 12:38-42; 15:1-9; 16:1-4) Na otro ocasion, ora tawata bisto cu Hesus lo no a logra nada, el a djis keda keto.—Marco 15:2-5; Lucas 22:67-70.
12. Con Hesus por a yuda hende asta ora nan a grit’e?
12 Na algun ocasion, hende cu tawata bou di dominio di spirito impuro a grita Hesus. Ora esei a sosode, el a frena su mes y asta a uza e poder cu Dios a dun’e pa trece alivio. (Marco 1:23-28; 5:2-8, 15) Si un hende rabia cu nos y grita nos ora nos ta predica, nos tambe tin cu mantene nos mes frena of domina nos mes, y nos mester haci esfuerso pa trata un situacion asina cu tacto y bondad.—Colosensenan 4:6.
Den Famia
13. Pakico tin biaha hende ta opone un miembro di famia cu ta cuminsa studia Bijbel cu Testigonan di Yehova?
13 Hopi bes ta specialmente den famia siguidonan di Hesus tin cu mantene nan mes frena. Kisas e berdad di Bijbel a conmove un persona profundamente. Awor e ta anhela pa su famia reacciona den e mesun forma. Pero manera Hesus a bisa, kisas e miembronan di famia ta bai contra dje. (Mateo 10:32-37; Huan 15:20, 21) Tin varios motibo pa esaki. Por ehempel, aunke e siñansanan di Bijbel por yuda nos bira personanan honesto, responsabel y respetuoso, e Scritura ta siña tambe cu den tur situacion nos mayor responsabilidad ta cu nos Creador. (Eclesiastes 12:1, 13; Echonan 5:29) Un miembro di famia cu ta sinti cu el a perde un poco di su influencia debi na nos lealtad na Yehova, por sinti su mes ofendi. Ora nos ta trata cu un situacion asina, ta importante pa nos sigui e ehempel di Hesus di mantene nos mes frena!—1 Pedro 2:21-23; 3:1, 2.
14-16. Kico a produci cambio den algun persona cu un tempo tawata opone nan miembro di famia?
14 Hopi persona cu awe ta sirbi Yehova tawatin un casa of otro miembro di famia cu tawata contra di e cambionan cu nan tawata haci ora nan a cuminsa studia Bijbel. Kisas e opositornan a tende comentarionan negativo tocante Testigonan di Yehova, y talbes nan tawatin miedo di un influencia indeseabel den cas. Kico a pone nan cambia di actitud? Den hopi caso, bon ehempel a surti un bon efecto. Pa motibo cu e creyente consistentemente ta aplica conseho di Bijbel—door di asisti regularmente na reunionnan cristian y participa den e ministerio mientras cu e ta cumpli tambe cu su responsabilidadnan di famia y mantene su mes frena apesar di cualkier insulto—tin biaha e oposicion di famia ta suavisa.—1 Pedro 2:12.
15 Kisas pa motibo di prehuicio of orguyo tambe un opositor ta nenga di scucha cualkier splicacion di Bijbel. Esei ta loke a sosode cu un homber na Merca kende a bisa cu e tawata masha patriotico. Un biaha, ora su esposa tawata na un congreso, el a piki tur su pañanan y bai for di cas. Na un otro ocasion, el a sali bai cu un scopet y a menasa di mata su curpa. E tawata culpa e religion di su esposa pa cualkier comportacion irasonabel di su parti. Pero e esposa a trata na sigui aplica conseho di Bijbel. Binti aña despues cu e esposa a bira un Testigo di Yehova, e homber tambe a bira. Na Albania un mohe a rabia pasobra su yiu mohe tawata studia Bijbel cu Testigonan di Yehova y despues a batisa. Na 12 ocasion e mama a destrui Bijbel di su yiu mohe. Pero riba un dia el a habri un Bijbel nobo cu su yiu mohe a laga riba mesa. Pa casualidad el a habrie na Mateo 10:36, y e mama a realisa cu loke el a lesa a aplica na dje. Sinembargo, precupa cu e bienestar di su yiu mohe, e mama a compañ’e bai na e boto cu mester a hib’e hunto cu un grupo di Testigo na un congreso na Italia. Ora e mama a mira e amor, e abrasonan y alegria di e grupo y con contento nan tawata hari, su sintimentonan a cuminsa cambia. Poco tempo despues el a acepta un estudio di Bijbel. Awe, e ta haci esfuerso pa yuda otro hende cu te ainda ta oponiendo e berdad.
16 Den un otro caso, un homber cu tawata cana cu cuchiu, a lansa acusacionnan baho contra su casa, segun cu esaki tawata yegando un Salon di Reino. E esposa a responde suavemente: “Pakico bo no ta drenta Salon di Reino y wak pa bo mes?” E homber a drenta y cu tempo el a bira un anciano cristian.
17. Si e situacion bira tenso den un cas cristian, ki conseho biblico por yuda?
17 Asta si henter bo famia di cas ta cristian, por sosode cu e situacion di famia ta bira tenso. Pa motibo di nos imperfeccion asta palabranan duro por cai. Ta bon pa remarca cu e cristiannan na Efeso di antiguedad a haya e siguiente conseho: “Laga tur amargura, furia, rabia, griteria y calumnia wordo kita for di boso, hunto cu tur malicia.” (Efesionan 4:31) Aparentemente, e ambiente rondo di e cristiannan na Efeso, nan mes imperfeccion y den algun caso, nan bida anterior, tawatin un efecto riba nan. Kico por a yuda nan cambia? Nan tawatin cu “wordo renoba den e spirito di [nan] mente.” (Efesionan 4:23) Segun cu nan a studia e Palabra di Dios, medita riba con e mester a influencia nan bida, asocia cu otro cristiannan, y haci oracion sinsero, e fruta di spirito di Dios lo a bira mas y mas bisto den nan bida. Nan lo a siña bira “cariñoso cu otro, misericordioso, pordonando otro, mescos cu Dios den Cristo tambe a pordona [nan].” (Efesionan 4:32) Maske kico otro hende haci, nos tin cu domina nos mes, ser cariñoso, compasivo y pordona otro. En berdad, nos no mester “paga malo cu malo.” (Romanonan 12:17, 18) E cos corecto pa haci ta pa semper imita Dios y mustra amor genuino.—1 Huan 4:8.
Conseho pa Tur Cristian
18. Pakico e conseho na 2 Timoteo 2:24 tawata apropiado pa un anciano na Efeso di antiguedad, y con e conseho aki por beneficia tur cristian?
18 E conseho pa ‘mantene nos mes frena bou di maldad’ ta aplica na tur cristian. (2 Timoteo 2:24, NW) Pero e prome hende na ken el a ser dirigi tawata Timoteo, kende tawatin mester di dje ora el a sirbi como anciano na Efeso. Algun miembro di e congregacion tawata bastante expresivo ora di bisa nan opinionnan y tawata siña e rumannan cosnan robes. Pa motibo cu nan no a discerni plenamente e obhetivo di e Lei di Moises, nan no a compronde e importancia di fe, amor y un bon consenshi. Nan discusionnan tocante palabra, impulsa pa orguyo, a hiba na confrontacionnan serio, siendo cu e esencia mes di Cristo su siñansa y e importancia di ta deboto na Dios nan a pasa por halto. Pa Timoteo por a atende cu e situacion aki, e mester a para firme pa berdad di Bijbel. Pero esei no a kita si cu e mester a trata su rumannan cu suavidad. Mescos cu e ancianonan di nos tempo, e tawata sa cu e tou no tawata di dje y cu e mester a trata e rumannan un forma cu lo a promove amor y union cristian.—Efesionan 4:1-3; 1 Timoteo 1:3-11; 5:1, 2; 6:3-5.
19. Pakico ta importante pa nos tur “busca suavidad”?
19 Dios ta urgi su pueblo pa “busca suavidad.” (Sofonias 2:3, NW) E expresion Hebreo pa “suavidad” ta duna idea di un caracter cu ta yuda un persona wanta insulto cu pasenshi, sin disgusta y sin busca vengansa. Laga nos pidi Yehova sinseramente pa e yuda nos pa asina nos por mantene nos mes frena y represent’e na un manera apropiado, asta bou di circunstancianan dificil.
Kico Bo A Siña?
• Ki texto por yuda bo ora un hende insulta bo?
• Pakico Saulo a actua na un manera masha agresivo?
• Con e ehempel di Hesus ta yuda nos trata na un manera apropiado cu tur tipo di hende?
• Ki beneficionan nos por saca ora nos ta frena nos mes den nos manera di papia na cas?
[Preguntanan di Estudio]
[Plachi na pagina 26]
Apesar di Saulo su reputacion, Ananias a trat’e cu bondad
[Plachi na pagina 29]
Ora un cristian ta cumpli fielmente cu su responsabilidadnan, esei por suavisa oposicion di famia
[Plachi na pagina 30]
Cristiannan ta promove amor y union