Mari—Reina di Desierto den Pasado
Mari—Reina di Desierto den Pasado
“MI CABES tawata bira di euforia ora cu mi a yega mi camber e anochi ei despues cu ami cu mi compañeronan a caba di celebra ki afortuna nos tawata”, e arkeologo Frances André Parrot, a corda. Na januari 1934, na Tell Hariri, serca di e pueblito chikito Abu Kemal na oriya di Riu Eufrates na Siria, Parrot y su team a coba y saca un estatua cu tawatin e inscripcion: “Lamgi-Mari, Rei di Mari, sumo sacerdote di Enlil.” Nan a keda hopi emociona cu loke nan a descubri.
Porfin nan a haya e stad Mari! Ki importancia e descubrimento aki tin pa studiantenan di Bijbel?
Dicon e Stad Ta di Interes pa Nos?
Aunke textonan di antiguedad a papia di e existencia di Mari, su ubicacion exacto si a keda un misterio pa hopi tempo. Segun escribanan di Sumer, Mari tawata e sede di un dinastia cu podise na un tempo a domina henter Mesopotamia. Siendo cu Mari a ser construi na oriya di Eufrates, e tawata strategicamente situa na crusada di rutanan comercial cu a conecta Golfo Persico cu Asiria, Mesopotamia, Anatolia y e Costa Mediteraneo. Via e stad aki nan tawata transporta mercancianan—entre otro, palo, metal y piedra—cu tawata masha scars na Mesopotamia. Impuesto cu nan tawata cobra riba esakinan a haci Mari asina rico cu el a cuminsa eherce poder riba e region. Sinembargo, e dominio aki a yega na un fin ora cu Sargon di Akkad a conkista Siria.
Pa mas o menos 300 aña despues di Sargon su conkista, un serie di gobernado militar a goberna Mari. Bou di nan mando, e stad a bolbe adkiri un midi di prosperidad. Sinembargo, durante e tempo di su ultimo gobernante, Zimri-Lim, Mari a cuminsa perde su poder. Zimri-Lim a purba consolida su imperio mediante un serie di conkista militar, tratado y aliansa matrimonial. Pero rond di aña 1760 prome cu nos era, Rei Hammurabi di Babilonia a conkista y destrui e stad, poniendo un fin na loke Parrot a yama “un di e civilisacionnan mas avansa di e mundo di antiguedad.”
Ora e tropanan di Hammurabi a destrui Mari, nan a sirbi sin cu nan mes tawata sa como un enorme yudansa pa e arkeologo- y historiadonan moderno. Door di a tumba e murayanan traha di baksteen di klei, nan a dera cierto edificionan—na algun sitio bou di un capa di cinco meter—y asina a proteha nan di e efectonan destructor di tempo. Arkeologonan a coba y saca ruinanan di tempel- y palacionan hunto cu un gran cantidad di obheto y miles di inscripcion cu ta duna mas informacion tocante civilisacion di antiguedad.
Dicon e ruinanan di Mari ta di interes pa nos? Pensa riba e tempo cu patriarca Abraham tawata na bida. El a nace na aña 2018 prome cu nos era, 352 aña despues di e gran Dilubio. Su generacion tawata e di dies generacion for di Noe. Riba ordo di Dios, Abraham a bandona su stad natal Ur, y a bai Haran. Na aña 1943, tempo cu Abraham tawatin 75 aña di edad, el a bandona Haran pa bai e tera di Canan. Segun un arkeologo Italiano, Paolo Matthiae: “Abraham su biahe di Ur pa Herusalem [den Canan] a sosode durante e periodo di Mari.” Pesei, e descubrimento di Mari ta di balor pa nos ya cu e por yuda nos visualisa e mundo den cua Dios su fiel sirbido Abraham a biba. *—Genesis 11:10–12:4.
Kico e Ruinanan Ta Revela?
Religion a florece na Mari mescos cu tawata e caso otro caminda na Mesopotamia. Nan tawata pensa cu hende tawatin e obligacion di sirbi e diosnan. Semper e hendenan tawata busca manera pa haya sa e boluntad di e diosnan prome cu nan a tuma cualkier decision importante. Arkeologonan a haya restonan di seis tempel. Entre nan tawatin e Tempel di Leon (cu segun algun hende ta e tempel di Dagan, e Dagon cu Bijbel ta menciona) y e santuarionan di Ishtar, e diosa di fertilidad y tambe di e dios di solo Shamash. Den e tempelnan aki tawatin originalmente un estatua di e dios na ken e hendenan tawata haci nan ofrenda- y suplicanan. Debotonan tawata pone figuranan sonriente di nan mes haciendo oracion riba e bankinan den e santuario, pensando cu nan imagen lo a sigui cu e acto di adoracion. Parrot a remarca: “E estatua [di e deboto], mescos cu e bela den adoracion catolico awe, pero na un grado mas extenso tawata en realidad un substituto di e creyente.”
E descubrimento di mas espectacular den e ruinanan di Tell Hariri tawata e restonan di un inmenso compleho di palacio cu tawatin e nomber di su ultimo ocupante, Rei Zimri-Lim. E arkeologo Frances Louis-Hugues Vincent a yam’e “e hoya di arkitectura oriental di pasado.” El a abarca un espacio di mas cu 2,5 hectar y e tawatin rond di 300 camber y patio. Asta den tempo di antiguedad nan tawata considera e palacio aki un di e maraviyanan di mundo. “E tawata asina famoso”, segun Georges Roux den su buki Ancient Iraq (Irak di Antiguedad), “cu e Rei di Ugarit, situa na costa di Siria, no a basila pa manda su yiu homber bai 600 kilometer den interior cu e solo proposito di bishita ‘e cas di Zimri-Lim.’”
Bishitantenan tawata drenta e palacio fortifica via un solo entrada cu tawatin toren na cada banda, caba nan tawata yega un patio espacioso. Mari su ultimo Rei, Zimri-Lim tawata sinta riba su trono riba un plataforma halto. For di einan e tawata atende asuntonan militar, comercial y diplomatico, dicta sentencia y ricibi bishitante- y embahadornan. Tawatin camber disponibel pa huespetnan cu e Rei a entretene regularmente durante su banketenan extrabagante. Entre e platonan cu nan a sirbi tawatin carni di baca, carne, gazel, pisca y galiña sea horna, gegrill of herbi. Tur esaki nan tawata sirbi hunto cu sous pica di conoflok y un variedad di berdura y keshi. Pasaboca a consisti di fruta fresco, seco of konfijt y bolo traha den formanan elabora. Pa sacia sed di e huespetnan tawata sirbi cerbes of biña.
E palacio tawatin facilidadnan sanitario tambe. Nan a descubri bañonan cu tawatin tobo di terra-cotta y buraconan cu a sirbi como w.c. E vloer y e parti mas abou di e murayanan di e cuartonan aki tawata proteha cu un capa di breu. Nan tawata laga awa sushi sali via goot traha di baksteen, y tin pipanan di klei haci waterproof cu breu cu ta funciona ainda, despues di un 3.500 aña. Ora tres mohe di e harem di cas real a haya un malesa fatal, e instruccionnan tawata masha stricto. Mester a isola un mohe malo asina y ten’e den cuarentena. “Ni un hende no tin mag di bebe for di su copi, come na su mesa ni sinta riba su stul.”
Kico Nos Por Siña for di e Archivonan?
Parrot cu su team a descubri rond di 20.000 tabla skirbi na spijkerschrift di e idioma Acadio. E tablanan tawata carta- y documentonan administrativo y economico. Solamente un tercera parti di e archivonan aki a ser publica. Sinembargo, nan ta consisti di 28 volumen. Cuanto balor nan tin? Segun Jean-Claude Margueron, director di e Mision Arkeologico di Mari: “Prome cu a descubri e archivonan di Mari, nos no tawata sa casi nada di e historia, institucionnan y bida diario na Mesopotamia y Siria na principio di e segundo milenio. Debi na e tablanan aki hende por a skirbi capitulonan completo di historia.” Manera Parrot a remarca, e archivonan “ta revela similaridadnan sorprendente entre e pueblonan cu nan ta menciona y loke e Testament Bieu ta conta nos di e periodo di e Patriarcanan.”
E tablanan cu nan a haya na Mari a aclaria tambe cierto relatonan di Bijbel. Por ehempel, e tablanan ta indica cu tuma posicion di un enemigo su harem tawata “un echo fundamental di conducta real na e tempo ei.” E conseho cu e traido Ahitofel a duna Rei David su yiu homber Absalon pa tene relacion cu e concubinanan di su tata di ningun manera no tawata algo nobo.—2 Samuel 16:21, 22.
For di 1933 padilanti, arkeologonan a coba 41 biaha na Tell Hariri. Sinembargo te asina leu, nan a analisa solamente 8 hectar di e total di 110 hectar di Mari. Probablemente tin hopi cos fasinante mas pa descubri na Mari, e reina di desierto den pasado.
[Nota]
^ par. 8 Tin hopi chens tambe cu e Hudiunan a pasa na rand di e ruinanan di Mari ora cu nan tawata bai den exilio na Babilonia despues di e destruccion di Herusalem na aña 607 prome cu nos era.
[Mapa na pagina 10]
(Pa e texto den su formato completo , wak e publicacion)
Golfo Persico
Ur
MESOPOTAMIA
Eufrates
MARI
ASIRIA
Haran
ANATOLIA
CANAN
Herusalem
Lama Mediteraneo (Lama Grandi)
[Plachi na pagina 11]
Den e documento aki Rei Iahdun-Lim di Mari a broma di su obra di construccion
[Plachi na pagina 11]
Descubrimento di e estatua aki di Lamgi-Mari a pone cu nan por a identifica Mari cu siguridad
[Plachi na pagina 12]
Ebih-Il, e superintendente di Mari, haciendo oracion
[Plachi na pagina 12]
Plataforma den e palacio, caminda kisas e estatua di un diosa a para
[Plachi na pagina 12]
Ruinanan di Mari, cu ta mustra un construccion di baksteen di klei
[Plachi na pagina 12]
Un baño di palacio
[Plachi na pagina 13]
Piedra di victoria di Naram-Sin, conkistado di Mari
[Plachi na pagina 13]
Nan a haya rond di 20.000 tabla skirbi na spijkerschrift den e ruinanan di e palacio
[Reconocemento pa Potret na pagina 10]
© Mission archéologique française de Tell Hariri - Mari (Syrie)
[Reconocemento pa Potretnan na pagina 11]
Documento: Musée du Louvre, Paris; estatua: © Mission archéologique française de Tell Hariri - Mari (Syrie)
[Reconocemento pa Potretnan na pagina 12]
Estatua: Musée du Louvre, Paris; plataforma y baño: © Mission archéologique française de Tell Hariri - Mari (Syrie)
[Reconocemento pa Potretnan na pagina 13]
Piedra di victoria: Musée du Louvre, Paris; ruinanan di palacio: © Mission archéologique française de Tell Hariri - Mari (Syrie)