Pregunta di Lector

Dicon no a mata David cu Betsabe pasobra nan a comete adulterio, mientras cu nan yiu resien naci si a muri?

E Lei di Moises a bisa: “Si haya un homber ta drumi cu un mohe casa, e ora ei nan tur dos mester muri, tanto e homber cu a drumi cu e mohe como e mohe; asina bo mester kita e maldad for di Israel.” (Deuteronomio 22:22) Si Yehova Dios lo a permiti huesnan humano bou di e Lei trata e caso hudicial di e pica di David cu Betsabe, nan lo a laga ehecuta e pareha adultero. Siendo cu huesnan humano no por a mira kico tin den curason di hende, nan mester a dicta sentencia a base di e conducta di e malbadonan cu a keda proba pa echonan. Segun lei, e castigo pa adulterio tawata pena di morto. Huesnan Israelita no tawatin autorisacion pa pordona e pica ei.

Di otro banda, e Dios berdadero si por mira loke tin den nos curason y pordona pica si e mira cu tin un base pa haci esei. Door cu e caso aki a envolve David, cu kende El a sera un pacto pa un Reino, Yehova a scohe pa haci un excepcion door di trata e caso aki e mes. (2 Samuel 7:12-16) Como “e Hues di henter mundo”, e tawatin tur derecho di tuma e decision ei.—Genesis 18:25.

Kico Yehova a mira ora el a examina David su curason? E introduccion di Salmo 51 ta bisa cu e salmo aki ta revela David su sintimentonan “tempo cu profeta Natan a bin serca dje, despues cu e tawatin relacion cu Betsabe.” Salmo 51:1-4 ta bisa: “Tene misericordia di mi, o Dios, segun bo misericordia; segun e grandesa di bo compasion, kita mi transgresionnan. Laba mi kita tur mi inikidad, y purifica mi di mi pica. Pasobra mi ta reconoce mi transgresionnan, y mi pica ta semper mi dilanti. Contra abo, abo so, mi a peca y a haci loke ta malo den bo bista.” Yehova lo mester a considera e remordimento intenso cu David a sinti den su curason como un evidencia di berdadero repentimento y a dicidi cu tawatin un base pa mustra misericordia na e malechornan. Ademas, David mes tawata un persona misericordioso, y Yehova ta mustra misericordia na hende misericordioso. (1 Samuel 24:4-7; Mateo 5:7; Santiago 2:13) Pesei, ora David a reconoce su pica, Natan a bis’e: “SEÑOR tambe a kita bo pica; lo bo no muri.”—2 Samuel 12:13.

David cu Betsabe no a scapa di tur e consecuencianan di nan pica. Natan a bisa David: “Pasobra pa medio di e echo aki bo a duna ocasion na e enemigonan di SEÑOR pa blasfema, e yiu cu a nace pa bo lo muri sigur.” Nan yiu a bira malo y a muri apesar di e echo cu David a yuna y expresa tristesa shete dia largo.—2 Samuel 12:14-18.

Algun hende tin dificultad pa compronde dicon e yiu mester a muri, ya cu Deuteronomio 24:16 ta bisa: “Yiu hombernan no mester wordo mata pa motibo di nan tatanan.” Pero nos tin cu corda cu si ta huesnan humano lo a trata e caso, tanto e mayornan como e yiu cu no a nace ainda lo a perde nan bida. E morto di e yiu tambe lo por a yuda David compronde mas cla ainda con malcontento Yehova tawata cu su pica cu Betsabe. Nos por tin pleno confiansa cu Yehova a trata e asunto na un manera husto pasobra “su caminda ta perfecto.”—2 Samuel 22:31.

[Plachi na pagina 31]

David a manifesta berdadero arepentimento