Siña Conoce Yehova Su Camindanan

“Laga mi conoce bo camindanan, pa mi conoce bo.”—EXODO 33:13.

1, 2. (a) Pakico Moises a reacciona manera el a haci ora el a mira un Egipcio maltrata un Hebreo? (b) Pa Yehova por a uza Moises den su sirbishi, kico Moises tawatin cu siña?

MOISES a lanta den cas di Farao y a haya un educacion den e sabiduria cu pa e noblenan di Egipto tawata di gran balor. Sinembargo, Moises a realisa cu e no tawata un Egipcio. Su mayornan tawata Hebreo. Tempo cu e tawatin 40 aña, el a sali bai inspecciona su rumannan, e yiunan di Israel. Ora el a mira un Egipcio maltrata un di e Hebreonan, Moises no a keda sin haci nada. El a dal e Egipcio mata. Moises a tuma parti pa e pueblo di Yehova y a pensa cu Dios tawata uzand’e pa libra su rumannan. (Echonan 7:21-25; Hebreonan 11:24, 25) Ora e incidente aki a bira conoci, cas real di Egipto a cuminsa mira Moises como un rebelde, y e tawatin cu hui pa scapa su bida. (Exodo 2:11-15) Pa Dios por a uza Moises, Moises tawatin cu siña conoce Yehova su camindanan miho. Moises tawata dispuesto pa siña?—Salmo 25:9.

² Pa e siguiente 40 añanan, Moises a biba como un exiliado y un wardado di carne. En bes di bira amarga pa motibo cu su rumannan Hebreo aparentemente no a apreci’e, Moises a somete su mes na loke Dios a permiti. Aunke a pasa hopi aña durante cua aparentemente e no a haya ni un reconocemento, Moises a laga Yehova form’e. Mas despues el a skirbi bou di influencia di e spirito santo di Dios, y no como expresion di su opinion personal: “Awor e homber Moises tawata masha humilde, mas cu tur homber cu tawatin riba superficie di tera.” (Numbernan 12:3) Yehova a uza Moises den maneranan sobresaliente. Si nos tambe ta humilde, Yehova lo bendiciona nos.—Sofonias 2:3.

Moises A Haya un Encargo

3, 4. (a) Ki encargo Yehova a duna Moises? (b) Ki yudansa Moises a haya?

³ Un dia un angel cu a representa Yehova a papia cu Moises banda di Sero Horeb riba e Peninsula di Sinai. El a bisa Moises: “Siguramente mi a mira e afliccion di mi pueblo cu ta na Egipto, y a tende nan sclamacion pa motibo di nan capatasnan, pasobra mi ta conciente di nan sufrimentonan. Pesei mi a baha bin pa libra nan for di man di e Egipcionan y pa saca nan for di e tera ei hiba na un tera bon y grandi, na un tera cu tin lechi y miel na abundancia.” (Exodo 3:2, 7, 8) En conexion cu esaki, Dios tawatin un trabou pa Moises. Pero un cos si, e tawatin cu cumpli cu ne manera Yehova a manda.

⁴ E angel di Yehova a continua: “Bin awor y lo mi manda bo serca Farao pa bo saca mi pueblo, e yiunan di Israel, for di Egipto.” Moises a duda un poco. E no a sinti su mes capas, y riba su mes, e no tawata tampoco. Sinembargo, Yehova a garantisa Moises: “Lo mi ta cu bo.” (Exodo 3:10-12) Yehova a duna Moises poder pa e haci milagernan cu lo a demostra cu en berdad ta Dios a mand’e. Aron, ruman di Moises, lo mester a compañ’e pa papia p’e. Yehova lo a siña nan kico nan mester a bisa y haci. (Exodo 4:1-17) Moises lo a cumpli fielmente cu e asignacion ei?

5. Pakico e actitud di Israel tawata un problema pa Moises?

⁵ Na prome instante e ancianonan di Israel a kere Moises y Aron. (Exodo 4:29-31) Sinembargo,  pronto, “e formannan di e yiunan di Israel” a culpa Moises y su ruman di a haci nan “un abominacion” dilanti Farao cu su sirbidonan. (Exodo 5:19-21; 6:9) Ora e Israelitanan a sali for di Egipto y a mira e garoshinan Egipcio bini nan tras, nan a haya miedo. Cu Lama Cora dilanti nan y garoshi di guera nan tras, e Israelitanan a sinti nan atrapa, y nan a culpa Moises pa esei. Con abo lo a reacciona? Aunke e Israelitanan no tawatin boto, riba instruccion di Yehova, Moises a manda e pueblo pa prepara nan cosnan pa nan bai. E ora ei Dios a pusha e awanan di Lama Cora y e fondo di lama a seca di manera cu Israel por a pasa.—Exodo 14:1-22.

Un Cuestion Mas Importante cu Liberacion

6. Kico Yehova a enfatisa ora el a duna Moises e encargo?

⁶ Ora Yehova a duna Moises e encargo, el a enfatisa e importancia di e nomber dibino. Respet pa e nomber ei y pa e Persona cu esaki ta representa tawata crucial. Ora Moises a puntra Yehova tocante su nomber, el a bisa Moises: “Lo mi resulta di ta loke lo mi resulta di ta.” Ademas, Moises mester a bisa e yiunan di Israel: “Yehova e Dios di boso antepasadonan, e Dios di Abraham, e Dios di Isaak y e Dios di Yacob, a manda mi serca boso.” Yehova a agrega: “Esaki ta mi nomber te na tempo indefini, y esaki ta e memoria di mi pa generacion tras di generacion.” (Exodo 3:13-15, NW) Te awe Yehova ta e nomber pa cua Dios ta conoci serca su sirbidonan rond mundo.—Isaias 12:4, 5; 43:10-12, NW.

7. Kico Dios a urgi Moises pa haci apesar di e arogancia di Farao?

⁷ Moises y Aron a presenta dilanti Farao y a entrega nan mensahe den nomber di Yehova. Pero cu un tono arogante, Farao a bisa: “Ken ta Yehova, pa mi obedece su bos pa manda Israel bai? Mi no conoce Yehova mes y, ademas, mi no ta manda Israel bai.” (Exodo 5:1, 2, NW) Farao tawatin yen di maña y el a demostra cu su curason ta duro. Asina mes Yehova a urgi Moises pa entreg’e e mensahenan bes tras bes. (Exodo 7:14-16, 20-23; 8:1, 2, 20) Moises por a mira cu esei a irita Farao. Un confrontacion mas lo por a duna bon resultado? Israel tawata ansioso pa haya liberacion. Farao a nenga redondamente. Kico abo lo a haci?

8. Kico tawata e beneficio di e manera cu Yehova a trata cu e situacion cu a envolve Farao, y ki efecto e susesonan ei mester tin riba nos?

⁸ Moises a entrega un mensahe mas, cu a bisa: “Esaki ta loke Yehova e Dios di e Hebreonan a bisa: ‘Manda mi pueblo bai pa nan por sirbi mi.’” Tambe Dios a bisa: “Ya mi por a alarga mi man pa mi herida bo y bo pueblo cu pest y pa elimina bo for di tera. Pero, en realidad, pa e motibo aki mi a mantene bo na existencia, pa mi mustra bo mi poder y pa mi nomber ser declara den henter e tera.” (Exodo 9:13-16, NW) Yehova su proposito tawata pa mediante e huicio contra Farao cu su curason duro, demostra su poder den un manera cu lo a duna un advertencia na tur persona cu ta desafi’e. Esaki ta conta tambe pa Satanas e Diabel, esun cu mas despues Hesucristo a yama “e prins di e mundo.” (Huan 14:30; Romanonan 9:17-24) Manera a ser profetisa, e nomber di Yehova a ser declara na tur parti di tera. Su gran pasenshi a permiti tanto e Israelitanan  como un inmenso multitud mixto cu a uni cu nan pa adora Dios scapa nan bida. (Exodo 9:20, 21; 12:37, 38) Desde e tempo ei, e declaracion di Yehova su nomber a beneficia miyones di hende mas cu a acepta adoracion berdadero.

El A Trata cu un Pueblo Dificil

9. Con Moises su mes pueblo a demostra falta di respet pa Yehova?

⁹ E Hebreonan tawata conoce e nomber di Dios. Moises a uza e nomber ei ora el a papia cu nan, pero no ta semper nan a mustra e debido respet pa Esun cu tawata carga e nomber ei. Kico a sosode un poco despues cu Yehova milagrosamente a libra e Israelitanan for di Egipto y nan no a haya bon awa di bebe mesora? Nan a murmura contra Moises. Despues nan a keha tocante e cuminda. Moises a spierta nan cu nan murmuramento no tawata djis contra dje y Aron sino contra Yehova. (Exodo 15:22-24; 16:2-12) Na Sero Sinai, Yehova a duna e Israelitanan e Lei, y esaki a bai acompaña pa manifestacionnan sobrenatural. Sinembargo, e pueblo desobediente a traha un bishe di oro pa adoracion y a declara cu nan tawata haciendo “un fiesta na SEÑOR.”—Exodo 32:1-9.

10. Pakico e peticion di Moises registra na Exodo 33:13 ta di interes special pa superintendentenan cristian awe?

¹⁰ Con Moises mester a trata cu un pueblo cu Yehova mes a describi como cabesura? Moises a suplica Yehova: “Si mi a haya gracia den bo bista, laga mi conoce bo camindanan, pa mi conoce bo, pa mi haya gracia den bo bista.” (Exodo 33:13) Superintendentenan cristian cu ta cuida Testigonan di Yehova di nos tempo tin un tou mucho mas humilde. Toch, nan tambe ta pidi den oracion: “Haci mi conoce bo camindanan, o SEÑOR; siña mi bo bereanan.” (Salmo 25:4) Conocemento di Yehova su camindanan ta capasita superintendentenan pa trata cu situacionnan den un manera cu ta na harmonia cu e Palabra di Dios y cu ta cuadra cu su personalidad.

Loke Yehova Ta Spera di Su Pueblo

11. Ki guia Yehova a duna Moises, y pakico nos ta interesa den nan?

¹¹ Loke Yehova a spera di su pueblo a ser revela verbalmente na Sero Sinai. Despues Moises a ricibi dos tabla cu e Dies Mandamentonan skirbi riba nan. Ora Moises a baha for di e sero, el a mira e Israelitanan ta adora e bishe y den su rabia el a dal e tablanan abou y a kibra nan. Yehova a bolbe skirbi e Dies Mandamentonan riba tablanan di piedra cu Moises a traha. (Exodo 32:19; 34:1) E mandamentonan aki no a cambia desde e dia cu nan a ser duna pa prome biaha. Moises mester a actua na harmonia cu nan. Tambe Dios a mustra Moises bon cla ki tipo di persona E ta, y esei a laga Moises mira con e mester a comporta su mes como representante di Yehova. Cristiannan no ta bou di e Lei di Moises, pero loke Yehova a bisa Moises ta contene hopi principio basico cu no a cambia y cu te awe ta conta pa tur hende cu ta adora Yehova. (Romanonan 6:14; 13:8-10) Laga nos considera un par di esakinan.

12. E echo cu Yehova ta exigi debocion exclusivo mester tawatin ki efecto riba Israel?

¹² Duna Yehova debocion exclusivo. E nacion di Israel tawata presente ora Yehova a declara cu e ta exigi debocion exclusivo. (Exodo 20:2-5) E Israelitanan a mira hopi evidencia cu Yehova ta e Dios berdadero. (Deuteronomio 4:33-35) Yehova a mustra nan bon cla cu sin importa kico otro nacionnan tawata haci, e si lo no a tolera ningun forma di idolatria ni spiritismo entre su pueblo. Nan debocion na dje no mester tawata djis un formalidad. Nan tur mester a stima Yehova cu henter nan curason, cu henter nan alma y cu tur nan forsa. (Deuteronomio 6:5, 6) Esei lo a encera nan abla, nan conducta—si, tur aspecto di nan bida. (Levitico 20:27; 24:15, 16; 26:1) Hesucristo tambe a mustra bon cla cu Yehova ta exigi debocion exclusivo.—Marco 12:28-30; Lucas 4:8.

13. Pakico Israel tawatin e deber di obedece Dios strictamente, y kico mester motiva nos pa obedec’e? (Eclesiastes 12:13)

 ¹³ Obedece Yehova su mandamentonan strictamente. Yehova mester a recorda e pueblo di Israel cu ora nan a drenta den un relacion di pacto cu ne, nan a hura di obedec’e strictamente. Nan tawata liber den hopi cos, pero den asuntonan riba cua Yehova a duna nan mandamento, nan tawatin cu obedec’e strictamente. Esei lo a duna evidencia di nan amor pa Dios y lo a beneficia tanto nan como nan yiunan pasobra tur loke Yehova a rekeri di nan tawata pa nan mes bon.—Exodo 19:5-8; Deuteronomio 5:27-33; 11:22, 23.

14. Con Dios a laga Israel mira e importancia di duna prioridad na actividadnan spiritual?

¹⁴ Duna prioridad na asuntonan spiritual. E nacion di Israel no mester a laga e echo cu nan tawatin cu percura pa nan necesidadnan fisico pone cu nan no a resta tempo ni energia pa dedica na actividadnan spiritual. E Israelitanan no mester a dedica nan bida solamente na e cosnan basico di tur dia. Yehova a aparta un periodo di tempo spesifico pa siman cu el a designa como sagrado, tempo cu nan mester a uza exclusivamente pa actividad relaciona cu adoracion di e Dios berdadero. (Exodo 35:1-3; Numbernan 15:32-36) Cada aña nan mester a aparta tempo extra pa cierto asamblea- of convocacionnan santo. (Levitico 23:4-44) Esakinan lo a duna nan oportunidad pa papia di e obranan poderoso di Yehova, pa ser recorda di su camindanan y pa gradicie pa tur su bondad. Segun cu e pueblo a expresa nan debocion na Yehova, nan lo a haya mas temor di Dios y amor p’e. Ademas, esei lo a yuda nan cana den su camindanan. (Deuteronomio 10:12, 13) E principionan sano cu e instruccionnan ei ta contene ta beneficia Yehova su sirbidonan awe.—Hebreonan 10:24, 25.

Siña Compronde y Aprecia Yehova Su Cualidadnan

15. (a) Pakico un bon comprondemento di Yehova su cualidadnan y aprecio pa nan tawata beneficioso pa Moises? (b) Ki preguntanan lo por yuda nos pensa profundamente riba cada un di Yehova su cualidadnan?

¹⁵ Algo cu lo a yuda Moises trata cu e pueblo ta cu el a compronde y aprecia Yehova su cualidadnan. Exodo 34:5-7 [NW] ta bisa cu Dios a pasa dilanti cara di Moises y a declara: “Yehova, Yehova, un Dios misericordioso y yen di gracia, cu ta tarda pa rabia y ta abundante den bondad amoroso y berdad, cu ta conserva bondad amoroso pa miles, y ta pordona eror y transgresion y pica, pero di ningun manera lo e duna despensacion di castigo, mandando castigo pa eror di tata riba yiu y riba nieto, riba e di tres generacion y riba e di cuater generacion.” Tuma tempo pa medita riba e palabranan ei. Puntra bo mes: ‘Kico cada un di e cualidadnan aki ta nifica? Con Yehova a demostr’e? Con superintendentenan cristian por manifesta e cualidad aki? Con e cualidad particular ei ta influencia loke cada un di nos ta haci?’ Considera djis un par di ehempel.

16. Con nos por haya un miho comprondemento di Dios su misericordia, y pakico ta importante pa haci esaki?

 ¹⁶ Yehova ta “un Dios misericordioso y yen di gracia.” Si bo tin e buki di referencia Perspicasia pa Compronde e Scritura, lesa kico e ta bisa bou di “Misericordia.” Of haci investigacion riba e tema cu yudansa di e Index di Publicacionnan Watch Tower of e programa di computer Watchtower Library riba CD-ROM. * Uza un concordancia pa haya textonan cu ta referi na misericordia. Lo bo mira cu ademas di suavisa castigo tin biaha, Yehova su misericordia ta inclui tierno compasion. E ta impulsa Dios pa tuma accion pa trece alivio pa su pueblo. Como evidencia di esaki, Dios a percura pa e Israelitanan tanto fisicamente como spiritualmente durante nan biahe door di e Tera Priminti. (Deuteronomio 1:30-33; 8:4) Den su misericordia, Yehova a pordona nan ora nan a faya. El a tene compasion cu su pueblo di antiguedad. Pues anto, su sirbidonan di e tempo actual tin mucho mas motibo ainda pa tene compasion cu otro.—Mateo 9:13; 18:21-35.

17. Con e echo cu nos ta compronde kico ta encera cu Yehova ta “yen di gracia” ta yuda nos promove adoracion berdadero?

¹⁷ Ademas di ta misericordioso, Yehova ta yen di gracia tambe. Con lo bo defini e expresion “yen di gracia”? Compara e definicion ei cu textonan cu ta bisa cu Yehova ta yen di gracia. Bijbel ta mustra cu e cualidad aki di parti di Yehova ta encera e interes amoroso cu e tin den e personanan menos privilegia di su pueblo. (Exodo 22:26, 27) Den cualkier pais, stranheronan y tambe otro hende ta haya nan cu cierto desbentaha. Ora Yehova a siña su pueblo pa ta imparcial y pa mustra bondad na hendenan asina, el a corda nan cu nan tambe tawata stranhero un tempo, na Egipto. (Deuteronomio 24:17-22) Kico di nos awe como e pueblo di Dios? Si nos tambe ta yen di gracia, esei lo uni nos mas cu otro y atrae otro hende na e adoracion di Yehova.—Echonan 10:34, 35; Revelacion 7:9, 10.

18. Kico nos ta siña for di e restriccionnan cu Yehova a impone riba Israel relaciona cu nan trato cu hende di otro nacion?

¹⁸ Sinembargo, interes bondadoso den hende di otro nacion no mester a remplasa Israel su amor pa Yehova y su normanan moral. Pues, e Israelitanan a siña pa no sigui e camindanan di e nacionnan biciña, pa no adopta nan custumbernan religioso y estilo di bida inmoral. (Exodo 34:11-16; Deuteronomio 7:1-4) Esei ta conta pa nos awe tambe. Nos mester ta un pueblo santo, mescos cu nos Dios, Yehova, ta santo.—1 Pedro 1:15, 16.

19. Con Dios su pueblo lo ser proteha ora nan ta compronde con Yehova ta mira malecho?

 ¹⁹ Pa haci sigur cu Moises a compronde Su camindanan, Yehova a duna di conoce cu aunke e no ta aproba pica, e ta slow pa rabia. E ta permiti tempo pa hende siña su rekisitonan y cumpli cu nan. Si un hende arepenti di su pica, Yehova ta pordon’e, pero e no ta libr’e si di e castigo mereci pa malecho serio. El a adverti Moises cu loke e Israelitanan a haci lo por tawatin influencia riba e futuro generacionnan, sea pa bon of malo. Ora e pueblo di Dios ta compronde y ta aprecia Yehova su camindanan, nan no ta bai culpa Dios pa situacionnan cu nan mes a causa ni conclui cu Dios ta mucho slow.

20. Kico por yuda nos trata di un manera apropiado cu nos rumannan den fe y cu esnan cu nos ta topa den nos ministerio? (Salmo 86:11)

²⁰ Si bo ta desea di profundisa bo mes conocemento di Yehova y di su camindanan, sigui haci investigacion y medita ora bo ta lesa Bijbel. Analisa cuidadosamente e varios aspectonan fasinante di Yehova su personalidad. Considera hunto cu oracion con bo por imita Dios y harmonisa bo bida mas plenamente cu su proposito. Esaki lo yuda bo evita trampa, tambe trata bo rumannan den fe na un manera apropiado y yuda otro hende siña conoce y stima nos Dios maraviyoso.

[Nota]

Kico Bo A Siña?

• Pakico humildad tawata importante pa Moises, y pakico e ta crucial pa nos?

• Kico bon a ser logra cada bes cu a confronta Farao cu e palabra di Dios?

• Menciona algun principio sobresaliente cu Moises a siña y cu ta conta pa nos tambe.

• Kico por yuda nos compronde Yehova su cualidadnan miho?

[Preguntanan di Estudio]

[Plachi na pagina 21]

Moises a entrega Yehova su palabra fielmente na Farao

[Plachi na pagina 23]

Yehova a revela su rekisitonan na Moises

[Plachi na pagina 24, 25]

Medita riba Yehova su cualidadnan