Un Mundo sin Pobresa Ta Serca

PLACHINAN di Paradijs, manera esun riba e portada di e revista aki, ta atrae hende cu ta biba den pobresa. E prome pareha humano, Adam cu Eva, a biba den un berdadero paradijs. E hardin di Eden tawata nan cas. (Genesis 2:7-23) Aunke e Paradijs ei a bai perdi, e creencia den un futuro paradijs—den un mundo nobo sin pobresa—no ta djis un soño. E tin un base solido, esta, e promesanan cu Bijbel ta contene.

Considera e promesa cu Hesucristo a haci e ultimo dia di su bida riba tera. Un di e malechornan cu a muri hunto cu Hesus a mustra fe den Dios su habilidad di resolve hende su problemanan. El a bisa: “Hesus, corda riba mi ora bo drenta den bo reino.” E palabranan aki ta mustra cu e malechor a kere cu Hesus lo a bai goberna como Rei y cu e mortonan lo a biba atrobe. Hesus a contest’e: ‘Di berdad mi ta bisa bo, lo bo ta cu mi den Paraiso.’—Lucas 23:42, 43.

Papiando di hende cu lo biba den Paradijs, Bijbel ta bisa: “Nan lo traha cas y biba den nan; tambe nan lo planta cunucunan di wendruif y come nan fruta.” (Isaias 65:21) Si, “cada un di nan lo sinta bou di su palo di wendruif y bou di su palo di figo, y ningun hende lo no spanta nan, pasobra e boca di e SEÑOR di ehersitonan a papia.”—Mikeas 4:4.

Pero dicon Dios ta permiti pobresa awe? Con Dios ta yuda hende hopi pober? Ki dia pobresa lo caba finalmente?

Dicon Dios Ta Permiti Pobresa?

E Paradijs cu Adam cu Eva tawata aden a bai perdi como resultado di e rebelion cu e angel malbado, Satanas e Diabel, a inicia. Uzando un colebra como bosero, Satanas a seduci Eva pa e kibra e lei di Dios cu a prohibi nan di come e fruta di un cierto palo. El a gaña Eva y a lag’e kere cu independencia for di Dios lo a dun’e un miho bida. Ora Eva a ofrece Adam e fruta prohibi, Adam tambe a come. Asina el a bira lomba pa Dios y complace su esposa.—Genesis 3:1-6; 1 Timoteo 2:14.

Corectamente, Yehova a saca e pareha rebelde for di Paradijs. Y for di e dia ei padilanti nan mester a lucha duro pa sobrevivi. Te na e dia djawe, Yehova ta permiti Satanas goberna riba humanidad pecaminoso, mustrando asina bon cla e resultadonan di desobediencia na Dios. Historia humano a duna prueba cu hende no por trece Paradijs riba tera. (Yeremias 10:23) Al contrario, independencia for di Dios a resulta den problemanan desastroso, incluso pobresa.—Eclesiastes 8:9.

 Sinembargo, hende pober no a keda sin yudansa den e mundo yen di problema aki. Den Bijbel, e Palabra inspira di Dios, tin guia sano pa nan.

“No Precupa”

Ora Hesus tawata papia cu un multitud di persona den cua tawatin hopi hende pober, el a bisa: “Mira e parhanan di shelo cu no ta sembra ni cosecha, ni ta warda den mangasina, y toch boso Tata celestial ta alimenta nan. Boso no tin mucho mas balor cu nan? ... No precupa boso mes anto, bisando: ‘Kico nos lo come?’ of ‘Kico nos lo bebe?’ of ‘Kico nos lo bisti?’ Pasobra tur e cosnan aki e paganonan ta busca; ma boso Tata celestial sa cu boso tin mester di tur e cosnan aki. Ma busca prome e reino di Dios y Su husticia, y tur e cosnan aki lo wordo añadi na boso.”—Mateo 6:26-33.

Un persona pober no tin nodi horta. (Proverbionan 6:30, 31) Si e pone Dios na prome luga den su bida, lo e percura p’e. Considera e caso di Tukiso, un homber na Lesoto, den e parti suit di Africa. Na 1998, tropanan stranhero a drenta Lesoto pa stop un lantamento cu tawatin contra gobierno. Debi na e guera ei, tawatin plundermento di negoshi, perdemento di trabou y un scarsedad severo di cuminda.

Tukiso tawata biba den e parti mas pober di e capital. Hopi di su biciñanan a plunder negoshinan pa nan por a sobrevivi. Ora cu Tukiso a regresa su habitacion di un camber, el a ripara cu Maseiso, e señora cu e tawata biba cu ne, tawatin hopi mercancia cu el a horta. Tukiso a bis’e: “Saca e cosnan ei for di aki den.” Y el a splic’e cu Dios su lei ta prohibi hortamento. Maseiso a obedece. E biciñanan a haci bofon di nan y nan si a tuma e mercancianan horta.

Tukiso a tuma e posicion aki pa motibo di loke el a siña den su estudio di Bijbel cu Testigonan di Yehova. El a muri di hamber pasobra el a obedece Dios su lei? No. Poco despues, e ancianonan di e congregacion di Testigonan di Yehova caminda Tukiso tawata asisti a tuma contacto cu ne y a trece poco cuminda p’e. De echo, Testigonan di Yehova di e pais biciña Sur Africa a manda mas cu dos ton di articulonan di primera necesidad pa nan rumannan cristian na Lesoto. Tukiso su obediencia na Dios y e yudansa amoroso di e congregacion a impresiona Maseiso. E tambe a cuminsa studia Bijbel. Cu tempo nan dos a casa pa raad y asina a cualifica pa batisa como Testigo di Yehova. Nan ta sigui sirbi Dios fielmente.

 Yehova Dios ta interesa den hende pober. (Wak e cuadro titula “Con Dios Ta Mira Hende Pober?”) Di un forma amoroso el a haci areglo pa hende pober manera Tukiso y Maseiso siña mas di dje. Y den su Palabra el a percura conseho practico pa bida di tur dia.

Un Areglo Excelente

Semper Testigonan di Yehova a haci esfuerso pa refleha e mesun interes cu Dios tin den hende pober. (Galationan 2:10) Hopi bes ora un desaster asota un pais y cristiannan berdadero ser afecta, ta haci areglo pa duna e yudansa necesario. Pero mas importante ainda, e Testigonan ta mustra interes den e necesidad spiritual di tur hende, incluso di hende pober. (Mateo 9:36-38) Durante e ultimo 60 añanan, miles di ministernan entrena a ofrece nan mes boluntariamente pa sirbi como misionero den paisnan stranhero. Por ehempel, ta un pareha misionero for di Finlandia cu a siña e idioma Sesoto a siña Tukiso y Maseiso pa nan bira disipel di Hesus. (Mateo 28:19, 20) Hopi bes e trabou ei di misionero ta encera sacrifica un bida confortabel den un pais rico y muda bai un pais pober.

Cristiannan berdadero no tin mag di horta pa nan sobrevivi. En bes di haci esei, nan tin fe den Yehova Dios su habilidad di percura pa nan. (Hebreonan 13:5, 6) Un manera cu Yehova ta percura pa su pueblo ta mediante su organisacion mundial di adorado cu ta percura pa otro.

Un otro manera cu Yehova ta yuda hende pober ta door di duna nan conseho practico relaciona cu bida diario. Por ehempel, Bijbel  ta manda: “Laga esun cu ta horta, no horta mas; ma mas bien, lag’e traha, haciendo cu su mes mannan loke ta bon, pa e por tin algo pa comparti cu esun cu ta den necesidad.” (Efesionan 4:28) Hopi hende desemplea a logra crea nan propio trabou, haciendo trabou pisa, por ehempel door di planta y cultiva un hofi di berdura. Tambe Bijbel ta yuda hende pober spar cen door di siña nan evita mal custumbernan, manera por ehempel mal uzo di alcohol.—Efesionan 5:18.

Un Mundo sin Pobresa—Ki Dia?

Bijbel ta indica cu nos ta bibando den “e ultimo dianan” di Satanas su gobernacion. (2 Timoteo 3:1) Pronto Yehova Dios lo manda Hesucristo pa husga humanidad. Kico lo sosode e tempo ei? Hesus a duna e contesta den un di su ilustracionnan. El a bisa: “Ora cu e Yiu di hende bin den su gloria, y tur e angelnan santo hunto cu ne, e lo sinta riba e trono di su gloria. Y tur e nacionnan lo wordo treci hunto su dilanti; y e lo separa nan un for di otro, manera wardado ta separa carne for di cabrito.”—Mateo 25:31-33.

E carnenan den e ilustracion aki ta hende cu ta somete nan mes na Hesus su reinado. Hesus a compara nan cu carne pasobra nan ta siguie como nan Wardador. (Huan 10:16) E personanan manera carne aki lo haya bida bou di e gobernacion perfecto di Hesus. Nan lo tin un bida felis den un mundo nobo sin pobresa. Hende cu cualidadnan manera di cabrito, cu ta rechasa e gobernacion di Hesus, lo ser destrui pa semper.—Mateo 25:46.

E Reino di Dios lo caba cu maldad. E ora ei lo no tin pobresa mas. En bes di esei, e tera lo ta habita cu hende cu ta stima y cuida otro. E amoroso hermandad internacional di Testigonan di Yehova ta un prueba cu e mundo nobo ei ta posibel, pasobra Hesus a bisa: “Na esaki tur hende lo sa cu boso ta mi disipel, si boso tin amor un pa otro.”—Huan 13:35.

[Cuadro/Plachinan na pagina 6, 7]

CON DIOS TA MIRA HENDE POBER?

Bijbel ta describi e Creador di humanidad como Esun cu “ta duna pan na esnan cu tin hamber.” (Salmo 146:7) Bijbel ta contene mas cu shen versiculo cu ta enfatisa Dios su interes den hende pober.

Por ehempel, ora Yehova a duna su Lei na e nacion di Israel di antiguedad, el a prohibi e cunukeronan Israelita di cosecha e randnan di nan cunucu completamente. Nan no tawatin mag di bai pa di dos biaha na un palo di oleifi of di wendruif pa recohe fruta cu a keda atras. E leinan aki tawata un areglo amoroso pa stranhero, huerfano, biuda y otro hende afligi.—Levitico 19:9, 10; Deuteronomio 24:19-21.

Ademas, Dios a duna e siguiente mandamento na e Israelitanan: “No flihi ningun biuda ni huerfano. Si di un of otro manera bo afligie, y e sclama na mi, lo mi tende su sclamacion sigur; y mi rabia lo sende, y lo mi mata boso cu spada; y boso esposanan lo bira biuda y boso yiunan lo keda sin tata.” (Exodo 22:22-24) Lamentablemente, hopi Israelita rico a ignora e palabranan aki. Mediante su profetanan, Yehova Dios a duna e Israelitanan varios spiertamento contra esaki y otro maldadnan. (Isaias 10:1, 2; Yeremias 5:28; Amos 4:1-3) Cu tempo Dios a pone cu e Asirionan y despues e Babilonionan a conkista e teritorio di Israel. Nan a mata hopi Israelita y hiba e sobrevivientenan como catibo den paisnan stranhero.

Dios su Yiu stima, Hesucristo, a refleha e interes amoroso cu su Tata tin den hende pober. Splicando e proposito di su ministerio, Hesus a bisa: “E spirito di SEÑOR ta riba mi, pasobra el a ungi mi pa predica evangelio na e pobernan.” (Lucas 4:18) Esaki no ta nifica cu ta hende pober so Hesus a yuda den su ministerio. Cu amor el a yuda hende rico tambe. Pero ora e tawata yuda nan, hopi bes el a expresa su interes pa hende pober. Por ehempel, el a duna un gobernante rico e conseho aki: “Bende tur bo propiedadnan, y partie pa hende pober, y lo bo tin tesoro den shelo; y bin, sigui mi.”—Lucas 14:1, 12-14; 18:18, 22; 19:1-10.

Yehova Dios y su Yiu ta masha interesa den hende pober. (Marco 12:41-44; Santiago 2:1-6) Mustrando cu e ta interesa den hende pober, Yehova ta tene na mente miyones di hende pober cu a muri. Tur e hendenan ei lo haya resureccion den un mundo nobo sin pobresa.—Echonan 24:15.

[Plachinan]

E hermandad internacional di Testigonan di Yehova ta un prueba cu e mundo nobo ta posibel

[Plachi na pagina 5]

Tukiso cu Maseiso hunto cu e misionero cu a studia Bijbel cu Tukiso

[Plachi na pagina 5]

Maseiso para na porta di su cas, hunto cu e misionero cu a studia Bijbel cu ne