Bo Ta Combersa cu Bo Sernan Keri?

“NOS habilidad di comunica cu nos sernan keri ta bayendo atras drasticamente”, segun e revista semanal Polaco, Polityka. Segun calculo, na Merca parehanan casa ta combersa solamente seis minuut pa dia cu otro riba cos constructivo. Algun experto ta pensa cu mitar di tur e casonan di separacion y diborcio ta resultado di e deterioro aki.

Kico di combersacion entre mayornan y yiunan? Segun e informe menciona ariba, den mayoria caso “e ta parce mas un interogacion cu e ta un combersacion: Con a bai na scol? Con ta cu bo amigonan?” E informe ta puntra: “Con nos yiunan lo siña forma lasonan den cua tin intercambio di emocion?”

Ya cu bon habilidad di comunica no ta bini di mes, con nos por mehora nos habilidad di combersa? E disipel cristian Santiago a duna nos un conseho importante: “Tur hende mester ta lihe pa tende, no lihe pa papia y no lihe pa rabia.” (Santiago 1:19) Si, pa nos por tin un combersacion edificante, nos tin cu scucha cu atencion y no sea impaciente door di interumpi un otro persona of core saca conclusion. Evita di critica, pasobra esaki por para un combersacion facilmente. Ademas, Hesus a uza pregunta cu tacto, no pa interoga hende, sino mas bien pa saca afo loke tawatin den curason di su oyentenan y pa fortalece e relacion entre nan.—Proverbionan 20:5; Mateo 16:13-17; 17:24-27.

Aplica e excelente principionan cu Bijbel ta contene y tuma iniciativa pa combersa y comunica cu bo sernan keri. Esaki por resulta den un relacion caluroso cu boso lo disfruta di dje pa hopi aña of asta pa semper.