Disfrutando Plenamente di “e Bida Presente”!
Storia di Bida
Disfrutando Plenamente di “e Bida Presente”!
SEGUN E RELATO DI TED BUCKINGHAM
Mi tawatin seis aña ta traha tempo completo como un predicado di e bon nobo y seis luna casa ora cu diripiente mi a haya polio. Tawata aña 1950, y mi tawatin apenas 24 aña. Nuebe luna den hospital a duna mi basta tempo pa reflexiona riba mi bida. Cu e incapasidadnan nobo cu mi a haya, ta kico lo tin den futuro pa mi cu mi casa, Joyce?
NA AÑA 1938 mi tata, kende no tawata un persona religioso, a obtene un ehemplar di e buki Gobierno. * Probablemente ta e confusion y agitacion politico y posibilidad di guera a motiv’e pa acepta e buki. Te asina leu cu mi sa, nunca e no a les’e pero mi mama cu tawata hopi religioso si a les’e. El a reacciona mesora riba e mensahe di e buki. El a bandona Iglesia Anglicano, y apesar di oposicion di mi tata, el a bira un fiel Testigo di Yehova y a keda fiel te na su morto na aña 1990.
Mama a hiba mi na mi prome reunion cristian na un Salon di Reino den e stad Epsom, suit di London. E congregacion a reuni den un extienda, y nos a scucha un discurso graba di J. F. Rutherford, kende tawata supervisa e trabou di Testigonan di Yehova e tempo ei. E discurso aki a haci un impresion profundo riba mi.
E bombardeo pisa cu tawata tuma luga durante e atakenan aereo contra London tawata bira mas y mas peligroso. Pesei na 1940 mi tata a dicidi di muda nos famia na un luga mas safe, Maidenhead, un pueblo chikito un 45 kilometer west di London. Esaki a resulta probechoso, ya cu e 30 miembronan di e congregacion einan tawata un excelente fuente di animacion.
Fred Smith, un fiel cristian cu a batisa na 1917, a demostra interes personal den mi y a entrena mi pa bira un predicado mas efectivo. Te awe mi ta masha gradicido na dje pa su ehempel y yudansa amoroso.Den Sirbishi di Tempo Completo
Na 1941, na edad di 15 aña, mi a batisa den Riu Thames riba un dia friu den maart. Pa e tempo ei ya mi ruman homber mas grandi cu mi, Jim, a inscribi como predicado di tempo completo. Awe, e cu su casa, Madge, ta biba na Birmingham, despues cu nan a pasa mayor parti di nan bida den Yehova su sirbishi cumpliendo cu asignacionnan di sircuito y di districto rond Gran Bretania. Mi ruman mohe chikito, Robina, y su casa, Frank, tambe a keda sirbidonan fiel di Yehova.
Mi tawata tene buki na un fabrica di paña. Un dia e director a yama mi na su oficina pa ofrece mi e oportunidad di un carera prometedor como cumprado pa e empresa. Sinembargo, ya pa algun tempo mi tawatin pensa di sigui mi ruman homber su ehempel, pesei cortesmente mi a nenga e oferta di mi dunado di trabou y a splic’e dicon. Pa mi sorpresa, el a elogia mi calurosamente pasobra mi kier a sigui tal actividad cristian balioso. Pues, despues di un congreso di districto na Northampton na 1944, mi a bira un predicado di tempo completo.
Mi prome asignacion tawata Exeter, den e condado di Devon. E tempo ei e stad aki tawata recuperando pocopoco di e bombardeonan cu a tuma luga durante guera. Mi a bai biba den un apartamento caminda tawatin dos pionero ta biba caba, Frank cu Ruth Middleton, kendenan tawata masha bondadoso cu mi. Mi tawatin apenas 18 aña, cu masha tiki experencia den labamento di paña y cushinamento, pero e situacion a drecha segun cu mi a desaroya mi habilidadnan.
Mi compañero di predicacion tawata Victor Gurd di 50 aña di edad, un ruman Irlandes cu tawata predica for di decada di 1920. El a siña mi programa mi tempo na un manera probechoso, tambe pa desaroya un interes mas profundo den lesamento di Bijbel y pa aprecia e balor di diferente traduccion di Bijbel. Durante e añanan di formacion ei, Victor su ehempel firme tawata net loke mi tawatin mester.
E Reto di Neutralidad
E guera tawata yegando na un fin, pero toch autoridadnan a sigui purba recluta mucha homber pa servicio militar. Mi a presenta dilanti tribunal na 1943 na Maidenhead, caminda mi a splica mi caso bon cla pa mi haya despensacion como un minister di e Evangelio. Aunke nan a rechasa mi apelacion, mi a dicidi di muda pa Exeter pa cumpli cu mi asignacion di predica. Ta pesei ta na Exeter nan a manda yama mi pa presenta dilanti e corte local. Ora cu e magistrado a sentencia mi na seis luna di trabou pisa den prizon, el a bisa mi cu ta duel e cu e no por a duna mi un sentencia mas largo. Despues di a sirbi e seis lunanan ei, nan a manda mi bek prizon pa un cuater luna mas.
Como cu mi tawata e unico Testigo den prizon, e wardadonan di preso a yama mi Yehova. Tawata un poco incomodo pa mi pa reacciona riba e nomber ei ora cu nan tawata controla lista di presencia, pero mi mester a hacie. Ma di otro banda tawata un privilegio pa tende e nomber di Dios wordo anuncia tur dia! Esei a laga e otro presonan sa cu ta mi posicion neutral basa riba mi consenshi como un Testigo di Yehova a pone cu mi tawata entre nan. Mas despues, nan a manda Norman Castro na e mesun prizon, y tawatin un cambio di nomber. E ora ei nos a bira Moises cu Aron.
Nan a traslada mi di Exeter pa Bristol y por ultimo pa e prizon di Winchester. E
condicionnan no tawata semper agradabel, pero un cos cu a yuda ta un sentido di humor. Ami cu Norman a keda contento cu nos por a conmemora e Memorial hunto na Winchester. Francis Cooke, kende a bishita nos den prizon, a duna nos un bunita discurso di Memorial.Cambionan den e Añanan Despues di Guera
Na e congreso na Bristol na 1946, a sali e buki nobo pa studia Bijbel “Laga Dios Sea Haya Berdadero.” Einan mi a topa tambe un bunita mosa, Joyce Moore, kende tambe tawata traha pionero na Devon. Nos amistad a florece, y nos a casa cuater aña despues na Tiverton, caminda mi tawata biba for di 1947. Nos a forma nos hogar den un cuarto cu nos a huur pa 15 shilling (dos florin) pa siman. Nos tawatin un bida dushi!
Durante e prome aña di nos matrimonio, nos a muda bai suit na Brixham, un pueblo portuario masha placentero caminda nan a desaroya pa prome bes e sistema di pisca cu ta lastra un reda tras di un boto. Sinembargo, nos no tawatin mucho tempo einan ora cu mi a haya polio na caminda pa bai un congreso na London. Mi a bai den coma. Cu tempo mi a sali for di hospital, despues di nuebe luna, manera mi a menciona anteriormente. Mi man drechi y ambos pia a keda malamente afecta, y te ainda ta asina, y mi mester a uza un garoti pa cana. Mi casa stima tawata mi compañera alegre y semper presente, y un fuente di animacion, specialmente door cu el a logra sigui cu su sirbishi di tempo completo. Pero kico nos lo a bai haci awor? No a tarda hopi cu mi a haya sa cu Yehova su man nunca no ta cortico.
E siguiente aña nos a asisti na un asamblea na Wimbledon, London. Ya pa e tempo ei mi por a cana sin mi garoti. Einan nos a topa Pryce Hughes, kende tawata supervisa e trabou na Gran Bretania. Mesora el a cuminda mi cu e palabranan: “He! Nos kier boso den e trabou di sircuito!” Mi no por a haya un animacion mas grandi! Pero mi salu lo tawata suficiente bon? Ami cu Joyce tur dos tawata puntra nos mes esei, pero despues di un siman di entrenamento y pleno confiansa den Yehova, nos tawata riba caminda bek pa e parti suitwest di Inglatera, caminda mi a haya e asignacion pa sirbi como superintendente di sircuito. Pa e tempo ei mi tawatin apenas 25 aña, pero ainda mi ta corda cu gran aprecio e bondad y pasenshi di e Testigonan ei cu a yuda mi asina bon.
Di tur e diferente camponan di actividad teocratico, ami cu Joyce a ripara cu bishita e congregacionnan ta loke a trece nos mas serca di nos rumannan cristian. Nos no tawatin auto, pues nos a biaha sea cu trein of bus. Aunke ainda mi tawata siña adapta na e limitacionnan cu mi malesa a trece cu ne, nos a disfruta di nos privilegionan te cu 1957. Tawata un bida yen di satisfaccion, pero e aña ei un otro reto a presenta.
Rumbo pa Sirbishi di Misionero
Nos a ricibi un invitacion pa asisti na e di 30 klas di Galad, y esei tawata masha emocionante pa nos. Mi a siña trata bon cu mi paralisis, di manera cu ami cu Joyce gustosamente a acepta e yamada. Di experencia nos tawata sa cu Yehova semper ta percura e fortalesa si nos ta trata di haci su boluntad. E cinco lunanan di entrenamento intensivo na e Scol Biblico di Galad di Watchtower, situa den e bunita area di South Lansing (New York, Merca), a pasa masha lihe. E studiantenan tawata principalmente parehanan casa den e trabou biahero. Ora cu a puntra e klas ken lo kier a ofrece nan mes pa traha como misionero den estranheria, nos tawata entre esnan cu tawata cla pa ofrece nos mes. Unda nos lo a bai? Uganda, Oost Africa!
Siendo cu e trabou di Testigonan di Yehova tawata prohibi na Uganda e tempo ei, e rumannan a conseha mi pa establece mi mes den e pais y busca un empleo. Despues di un biahe largo cu trein y cu boto, nos a yega na Kampala, Uganda. E funcionarionan di imigracion no tawata contento di mira nos y nan a permiti nos keda un par di luna so. Anto despues nan a ordena nos sali for di e pais. Riba instruccion di e sede mundial, nos a biaha bai Nort Rodesia (awor Zambia). Tawata un gran goso di por a topa cuater di nos compañeronan di Scol di Galad, Frank cu Carrie Lewis y Hayes cu Harriet Hoskins. Djeinan, nos a ser asigna poco despues pa Sur Rodesia (awor Zimbabwe).
Nos a bai cu trein y nos a haya un bista inicial di e magnifico waterval Victoria Falls prome cu nos a yega na Bulawayo. Nos a keda pa un tempo serca famia McLuckie, kendenan tawata entre e prome Testigonan cu a establece nan mes einan. Durante e siguiente 16 añanan nos tawatin e privilegio di siña conoce nan bon.
Adaptando na Cambio
Despues di dos siman di entrenamento pa sera conoci cu e campo Africano, mi a ser nombra pa sirbi como superintendente di districto. Predica den e mondinan di Africa a nifica bai cu awa, cuminda, paña di cama, paña di bisti, un mashin di pasa pelicula y delco, un pantaya grandi y otro necesidadnan. Tur esaki nos a paketa den un truck suficiente solido pa transporta nos riba caminda malo.
Mi a traha cu e superintendentenan di sircuito Africano mientras cu Joyce felis di dje a yuda nan casa y yiunan cu tambe tawata compaña nan. Cana den sabana Africano por laga bo keda cansa, specialmente durante e parti cayente di dia. Pero no a tarda hopi cu mi a ripara cu den e clima aki, mi limitacionnan fisico tawata mas facil pa trata cu ne, y mi tawata gradicido pa esei.
E hendenan por lo general tawata pober. Hopi di nan tawata masha meti den tradicion y supersticion y a practica poligamia; sinembargo nan a demostra un respet profundo pa Bijbel. Den algun area, e rumannan tawata tene reunionnan di congregacion bou di palonan grandi cu a duna bon sombra, y parti anochi nos tawata haya lus di lampinan di azeta colga den palo. Semper nos a sinti un respet y admiracion profundo ora cu nos tawata studia e Palabra di Dios directamente bou di e shelo yen di streya, un parti asina magnifico di Dios su creacion.
Un otro experencia inolvidabel tawata ora nos a pasa peliculanan di Sosiedad Watch Tower riba e reservaatnan di Africa. Un congregacion kisas tawatin 30 Testigo, pero na e ocasionnan ei, nos tawata sa cu nos por a spera un asistencia di 1.000 hende of mas.
Den paisnan tropical, kebranto di salu por ta un problema de bes en cuando, pero na momentonan asina ta esencial pa keda optimista. Ami cu Joyce a siña deal hopi bon cu esei; ami a trata cu mi atakenan sporadico di malaria y Joyce cu enfermedad causa door di amoebe (parasit).
Despues nos a ser asigna na e oficina di sucursal na Salisbury (awor Harare), caminda mi tawatin e privilegio di traha hunto cu otro fiel sirbidonan di Yehova, entre nan Lester Davey y George cu Ruby Bradley. Gobierno a nombra mi como funcionario matrimonial, locual a haci posibel cu mi por a casa rumannan Africano, y asina fortalece e laso di matrimonio cristian den e congregacionnan. Un par di aña despues, mi a ricibi un otro privilegio. Mi mester a bishita tur congregacion den e pais cu no ta di abla Bantu. Pa mas cu un decada, ami cu Joyce a disfruta di siña conoce nos rumannan den e manera aki, y nos tawata alegra cu nan progreso spiritual. Durante e tempo ei nos a bishita tambe nos rumannan na Botswana y Mozambique.
Nos Ta Muda Atrobe
Despues di hopi aña felis den parti suit di Africa, nos a ser asigna na 1975 na Sierra Leone, West Africa. Nos a establece nos mes umbes na e oficina di sucursal pa disfruta di nos campo nobo di actividad, pero esaki no a dura hopi. Mi a bira malo y suak debi na un atake severo di malaria, y cu tempo mi mester a ricibi tratamento na London, caminda mi a ser conseha pa no bolbe bek na Africa. Esaki a haci nos tristo, pero e famia di Betel di London a ricibi nos calurosamente. E cantidad grandi di rumannan Africano cu tawatin den hopi di e congregacionnan di London tambe a laga nos sinti nos na cas. Segun cu mi salu a mehora, nos a adapta na un otro rutina, y e rumannan a pidi mi pa tuma e Departamento di Compra na mi encargo. Cu tur e expansion cu nos a mira den e añanan cu a sigui, esaki a resulta un trabou hopi interesante.
Na principio di decada di 1990, mi kerida Joyce a haya un malesa na e nervionan di musculo, y el a muri na 1994. El a demostra di tawata un esposa amoroso, leal y fiel, semper dispuesto pa adapta na e varios circunstancianan cu nos a confronta hunto. Pa mi por a trata cu un perdida manera e morto di Joyce, mi a descubri cu ta importante pa mantene un punto di bista spiritual cla y sigui wak padilanti. Un otro yudansa pa tene mi mente bon ocupa ta di haci oracion na Yehova pa yuda mi sigui pega na un bon programa teocratico, incluso e trabou di predica.—Proverbionan 3:5, 6.
Sirbi na Betel ta un privilegio y un excelente manera di biba. Tin asina tanto hoben pa traha cu ne y hopi goso pa comparti. Un bendicion ta e cantidad di bishitante cu nos ta haya aki na London. Tin biaha mi ta topa amigonan stima di mi asignacion na Africa, y esei ta trece grato recuerdo. Tur esaki ta yuda mi sigui gosa plenamente di “e bida presente” y contempla cu confiansa y speransa e bida “cu ta bin.”—1 Timoteo 4:8.
[Nota]
^ par. 5 Publica na 1928 door di Testigonan di Yehova, pero no ta ser imprimi mas.
[Plachi na pagina 25]
Hunto cu mi mama na 1946
[Plachi na pagina 26]
Hunto cu Joyce dia nos a casa, na 1950
[Plachi na pagina 26]
Na un congreso na Bristol na 1953
[Plachi na pagina 27]
Bishitando un grupo isola (ariba) y un congregacion (banda robes) na Sur Rodesia, awor Zimbabwe