No Cansa di Haci Loke Ta Excelente

“LAGA boso conducta ta excelente meimei di e paganonan”, apostel Pedro a conseha. (1 Pedro 2:12) E palabra Griego traduci como “excelente” ta referi na algo ‘bunita, noble y honorabel.’ Awendia ta parce cu ta masha irealistico pa spera un conducta noble of honorabel di hende en general. Sinembargo, e pueblo di Yehova awe por lo general a logra sigui Pedro su conseho. De echo, nan ta conoci rond mundo pa nan conducta excelente.

Esaki ta hopi remarcabel specialmente ora nos tuma na cuenta e problema- y tensionnan cu nos ta confronta durante e “temponan trabahoso” aki. (2 Timoteo 3:1) Diariamente nos ta haya nos cu prueba, y oposicion contra e estilo di bida cristian ta comun. Ademas, aunke algun prueba ta di corto duracion, otronan ta persisti pa hopi tempo y asta ta bira mas intenso. Sinembargo, apostel Pablo a spierta: “No laga nos cansa di haci bon [“loke ta excelente”, NW], pasobra na debido tempo nos lo cosecha, si nos no desmaya.” (Galationan 6:9) Pero con ta posibel pa haci—y sigui haci—loke ta excelente mientras cu nos ta confronta pruebanan doloroso y hostilidad insistente?

Yudansa pa Haci Loke Ta Excelente

Ser ‘noble, honorabel y excelente’ claramente tin di aber cu e persona di paden, e ta un cualidad di nos curason. Pues anto, mantene un conducta excelente apesar di prueba y dificultad, no ta un reaccion impulsivo, sino e resultado di sigui principionan di Bijbel y practica nan diariamente den tur aspecto di bida. Kico ta algun cos cu por yuda nos den esaki? Considera lo siguiente.

Cultiva e actitud mental di Cristo. Pa bo soporta loke por parce inhusto bo mester ta humilde. Un persona cu ta pensa cu e ta masha cos, probablemente lo no tolera maltrato. Sinembargo, Hesus “a humilia su mes door di bira obedecido te na morto.” (Filipensenan 2:5, 8) Door di imit’e, nos lo no ‘cansa ni perde animo’ den nos sirbishi sagrado. (Hebreonan 12:2, 3) Mustra obediencia humilde door di coopera boluntariamente cu e rumannan cu ta hiba delantera den bo congregacion. (Hebreonan 13:17) Siña considera otro hende como “mas importante” cu bo, poniendo nan interesnan prome cu esnan di bo.—Filipensenan 2:3, 4.

Corda cu Yehova stima bo. Nos mester ta combenci cu Yehova “ta esun cu ta recompensa esnan cu ta busc’e” cu empeño. (Hebreonan 11:6) E ta realmente interesa den nos y kier pa nos haya bida eterno. (1 Timoteo 2:4; 1 Pedro 5:7) Si nos keda corda cu nada no por caba cu Dios su amor pa nos, esaki lo yuda nos pa no cansa di haci loke ta excelente ora nos haya nos cu prueba.—Romanonan 8:38, 39.

Pone pleno confiansa den Yehova. Ta masha importante pa confia den Yehova, specialmente ora parce cu no tin un fin na nos pruebanan of ora nan ta pone nos bida na peliger. Nos mester tin pleno confiansa cu Yehova lo no permiti nos pasa den ningun prueba ‘cu nos no por soporta’, y cu semper lo e “provee  salida.” (1 Corintionan 10:13) Ora nos ta confia den Yehova nos por enfrenta asta menasa di morto cu curashi.—2 Corintionan 1:8, 9.

Persevera den oracion. Oracion di curason ta hopi importante. (Romanonan 12:12) Oracion sinsero ta un di e maneranan cu nos ta hala serca Yehova. (Santiago 4:8) Mediante experencia personal, nos ta siña cu “si nos pidi cualkier cos ..., e ta tende nos.” (1 Huan 5:14) Si Yehova ta permiti nos prueba sigui como un test di nos integridad, nos ta pidie yudansa den oracion pa nos wanta. (Lucas 22:41-43) Oracion ta siña nos cu nunca nos no ta nos so, y cu Yehova na nos banda, semper nos ta sali vencedo.—Romanonan 8:31, 37.

Obranan Excelente Ta ‘Resulta den Alabansa y Honor’

De bes en cuando, tur cristian ta “wordo afligi pa medio di varios prueba.” Sinembargo, nos no mester “cansa di haci bon.” Ora bo haya bo cu prueba, laga e echo cu bo sa cu bo fieldad finalmente lo “resulta den alabansa y gloria y honor”, duna bo e fortalesa pa wanta. (1 Pedro 1:6, 7) Saca pleno probecho di tur e provisionnan spiritual cu Yehova ta percura pa fortifica bo. Ora bo tin mester di atencion personal, bai serca e rumannan cu ta sirbi como wardado, maestro y consehero den e congregacion cristian. (Echonan 20:28) Asisti regularmente na tur e reunionnan di congregacion cu ta ‘stimula nos pa stima y haci bon obra.’ (Hebreonan 10:24) Un programa di lesa Bijbel tur dia y di estudio personal lo yuda bo keda alerta y spiritualmente fuerte. Loke lo yuda bo tambe ta participacion regular den e ministerio cristian.—Salmo 1:1-3; Mateo 24:14.

Mas bo sinti e amor y cuido di Yehova, mas lo bo desea pa demostra “celo den hacimento di bon obra.” (Tito 2:14) Corda, “esun cu persevera te na fin, esei lo ta salba.” (Mateo 24:13) Si, sea determina pa no ‘cansa di haci loke ta excelente’!

[Plachi na pagina 29]

Nos mester tin pleno confiansa cu Yehova lo no permiti nos pasa den ningun prueba ‘cu nos no por soporta’, y cu semper lo e “provee salida”

[Plachi na pagina 30]

Kedando ocupa den actividadnan teocratico por yuda nos prepara pa enfrenta prueba