Salba, No pa Medio di Obra So, Sino pa Medio di Bondad Inmereci
Salba, No pa Medio di Obra So, Sino pa Medio di Bondad Inmereci
“Boso a wordo salba door di fe . . . no como resultado di obranan, pa ni un hende no gaba.”—EFESIONAN 2:8, 9.
1. Den ki sentido cristiannan ta distinto for di hende en general pa loke ta logronan personal, y dicon?
AWENDIA hende ta masha orguyoso di nan logronan personal, y hopi bes nan ta cla pa broma tocante nan. Cristiannan ta distinto. Nan ta evita di duna demasiado enfasis na nan propio logronan, asta ora ta trata di logronan cu tin di aber cu adoracion berdadero. Aunke nan ta alegra cu loke Yehova su pueblo ta logra como grupo, nan ta mantene nan contribucion individual den background. Nan ta realisa cu den Yehova su sirbishi, motivacion corecto ta mas importante cu logronan personal. Ken cu al final haya e regalo di bida eterno lo a obten’e pa medio di fe y pa medio di Dios su bondad inmereci, no debi na logronan personal.—Lucas 17:10; Huan 3:16.
2, 3. Di kico Pablo a gaba, y dicon?
2 Apostel Pablo tawata bon conciente di e echo aki. Despues cu el a haci oracion tres biaha pa pidi alivio for di “un sumpiña den carni”, el a haya Yehova su contesta: “Mi gracia [of, “bondad inmereci”, NW] ta basta pa bo, pasobra mi poder ta wordo haci perfecto den debilidad.” Humildemente Pablo a acepta Yehova su decision, bisando: “Pesei, gustosamente lo mi prefera di gaba den mi debilidadnan, pa e poder di Cristo por biba den 2 Corintionan 12:7-9.
mi.” Pablo su actitud humilde ta un actitud cu nos lo kier imita.—3 Maske Pablo a sobresali den hacimento di obranan cristian, el a reconoce cu su logronan no tawata debi na ningun habilidad particular di dje mes. Cu modestia el a bisa: “Na ami, esun di mas menos entre tur e santonan, e gracia [of, “bondad inmereci”, NW] aki a wordo duna, pa predica na e paganonan e rikesa insondabel di Cristo.” (Efesionan 3:8) Pablo su palabranan ta mustra cu e no tawatin un actitud di broma ni tampoco e arogancia di pensa cu e ta mas santo cu otro hende. “Dios ta resisti e orguyosonan, ma ta duna gracia na e humildenan.” (Santiago 4:6; 1 Pedro 5:5) Nos ta sigui e ehempel di Pablo, y humildemente ta considera nos mes esun di mas menos entre nos rumannan?
“Considera e Otro Mas Importante”
4. Dicon tin biaha por ta dificil pa nos considera otro hende como mas importante cu nos?
4 Apostel Pablo a conseha cristiannan: “No haci nada cu un actitud di egoismo of orguyo, ma cu humildad laga cada un di boso considera e otro mas importante cu e mes.” (Filipensenan 2:3) Esaki lo por ta dificil, specialmente si nos ta den un puesto di responsabilidad. Podise e dificultad ta surgi pasobra nos a ser influencia te na cierto grado door di e spirito di competencia cu awe ta reina den mundo. Por ta cu na mucha nan a siña nos competi, sea cu nos rumannan na cas of cu nos compañeronan di klas na scol. Podise hende constantemente tawata urgi nos pa haci esfuerso pa alcansa e honor di ta e miho atleta of e miho alumno di scol. Claro cu ora nos ta haci nos best den cualkier actividad corecto esei ta algo digno di elogio. Sinembargo, cristiannan ta haci nan best no pa hala indebido atencion na nan mes, sino pa saca pleno beneficio di e actividad y kisas pa beneficia otro hende tambe. Pero lo por ta peligroso si semper nos ta busca manera pa hende elogia nos como esun miho. Con asina?
5. Si no domina e spirito di competencia, na kico e por hiba?
5 Si un persona no domina e spirito di competencia of di egoismo, esei por pon’e bira arogante y sin respet. Lo e por cuminsa envidia otro hende pa motibo di nan habilidad- y privilegionan. Proverbionan 28:22 ta bisa: “Un hende pichiri [“envidioso”, NW] ta pura pa bira rico, y e no sa cu pobresa lo bin riba dje.” Lo e por asta cuminsa haci esfuerso arogantemente pa alcansa puestonan cu e no tin derecho riba dje. Pa hustifica su accionnan, lo e por cuminsa murmura y critica otro hende, locual ta net e tendencianan cu cristiannan mester evita. (Santiago 3:14-16) En todo caso, e ta core e riesgo di desaroya un actitud di ami prome.
6. Con Bijbel ta spierta nos contra e spirito di competencia?
6 Pesei Bijbel ta urgi cristiannan: “Laga nos no bira egoista, instigando competencia un cu otro, envidiando otro.” (Galationan 5:26, NW) Apostel Huan a papia di un cierto compañero cristian cu evidentemente a bira victima di e tipo di actitud aki. Huan a bisa: “Mi a skirbi algo na e iglesia; ma Diotrefes, kende ta gusta di ta e prome den nan, no ta acepta loke nos bisa. Pa e motibo aki, si mi bin, lo mi hala atencion riba su echonan cu e ta haci, acusando nos inhustamente cu palabranan malicioso.” Ta ki un situacion lamentabel pa un cristian cai aden!—3 Huan 9, 10.
7. Kico un cristian lo kier evita den e ambiente competitivo cu tin na trabou awe?
7 Claro cu no ta realistico pa pensa cu un cristian por evita tur actividad competitivo. Por ehempel, un cristian su empleo kisas ta encera competencia economico cu otro personanan of cu negoshinan cu ta produci productonan similar of cu ta ofrece servicionan similar. Sinembargo, asta den casonan asina un cristian lo kier haci negoshi cu un spirito di respet, amor y consideracion. Lo e rechasa practicanan ilegal of no cristian y lo evita di bira un persona conoci principalmente pa su actitud competitivo, dispuesto pa trapa riba otro pa bai dilanti. Lo e no sinti cu ser number un—sea cual sea e actividad—ta e cos di mas importante den bida. Si esei ta cierto pa loke ta actividadnan no religioso, cuanto mas e mester ta asina den asuntonan di adoracion!
‘No na Comparacion cu e Otro Persona’
8, 9. (a) Dicon ancianonan cristian no tin nodi competi cu otro? (b) Dicon 1 Pedro 4:10 ta aplica na tur sirbido di Dios?
8 E siguiente palabranan inspira ta describi e actitud cu cristiannan mester tin den nan adoracion: “Laga cada un samina su mes obra, y e ora ei e lo tin motibo pa gaba solamente encuanto su mes, y no encuanto [of, “na comparacion cu”, NW] un otro.” (Galationan 6:4) Ancianonan den e congregacion, conciente di e echo cu nan no ta den competencia cu otro, ta coopera y traha estrechamente hunto como un cuerpo. Nan ta contento cu e contribucion cu cada un por haci na bienestar general di e congregacion. Pues nan ta evita competencia perhudicial y nan ta pone un bon ehempel di union pa e resto di e congregacion.
9 Debi na edad, experencia of habilidadnan natural, tin anciano cu kisas ta mas eficiente cu otro, of kisas nan tin mas perspicasia. Pesei mes, ancianonan tin responsabilidadnan distinto den Yehova su organisacion. En bes di haci comparacion, nan ta tene na mente e conseho: “Uza e don, na proporcion cu cada un a ricibie, pa sirbi otro como mayordomonan excelente di e bondad inmereci di Dios expresa den varios manera.” (1 Pedro 4:10, NW) En realidad, e texto aki ta aplica na tur sirbido di Yehova pasobra te na cierto grado nan tur a ricibi e don di conocemento exacto y tur ta disfruta di e privilegio di participa den e ministerio cristian.
10. Cua ta e unico manera pa nos sirbishi sagrado ta aceptabel pa Yehova?
1 Samuel 16:7; Proverbionan 24:12) Pues, ta bon pa nos puntra nos mes de bes en cuando: ‘Kico ta motiva mi pa haci obranan di fe, es decir, pa participa den Yehova su sirbishi?’—Salmo 24:3, 4; Mateo 5:8.
10 Nos sirbishi sagrado ta agrada Yehova solamente ora nos ta rindi esei motiva pa amor y debocion, no pasobra nos kier halsa nos mes riba otro hende. Ta pesei ta masha importante pa nos tin un punto di bista balansa di e actividad cu nos ta haci pa apoya adoracion berdadero. Aunke ningun hende por husga precis kico ta e motivacion di un otro persona, Yehova “ta wak curason.” (E Punto di Bista Corecto di Nos Obranan den Yehova Su Sirbishi
11. Ki preguntanan tocante nos actividad den sirbishi ta rasonabel pa nos considera?
11 Si ta motivacion ta lo mas importante pa gana Yehova su aprobacion, ta te na ki grado anto nos mester worry cu nos obranan den su sirbishi? Tanten cu nos ta haci nos sirbishi cu e motivacion corecto, ta realmente necesario pa tene registro di kico nos ta haci of cuanto nos ta haci den sirbishi? E preguntanan aki ta rasonabel, pasobra nos no kier pa cifra bira mas importante cu loke realmente nos ta haci den Yehova su sirbishi ni nos no kier laga un bon raport bira nos precupacion principal relaciona cu nos actividad cristian.
12, 13. (a) Menciona algun motibo pakico nos ta tene un registro di nos sirbishi di veld. (b) Ki motibonan nos tin pa sinti goso ora nos ta wak e raport mundial di nos actividad di predica?
12 Tuma nota di loke e buki Organisa pa Haci Yehova Su Boluntad ta bisa: “E prome siguidonan di Hesucristo tawata interesa den informenan di progreso den e trabou di predica. (Mar. 6:30) E buki biblico di Echonan ta conta nos cu tawatin rond di 120 persona presente ora spirito santo a drama riba e disipelnan na Pentecoste. Un poco despues e cantidad di disipel a crece bira 3.000 y despues 5.000. . . . (Echo. 1:15; 2:5-11, 41, 47; 4:4; 6:7) E informenan di e aumentonan aki lo mester tawata un tremendo animacion pa e disipelnan!” Pa e mesun motibo, Testigonan di Yehova djawe ta purba tene registronan exacto di loke nan ta logra mundialmente como cumplimento di e palabranan di Hesus: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14) E informenan ei ta duna un cuadro realistico di loke ta tuma luga mundialmente. Nan ta mustra unda tin mester di yudansa y ki tipo di literatura tin mester y tambe cuanto literatura mester pa por yuda e trabou di predica bai dilanti.
13 Pues, door di raporta nos actividad di predica nos por cumpli cu nos tarea di predica e bon nobo di Reino na un manera mas efectivo. Ademas, nos ta sinti nos curasha ora nos ta tende tocante e trabou cu nos rumannan ta haciendo den otro partinan di mundo, no ta berdad? Informe di crecemento y expansion rond mundo ta duna nos goso, ta motiva nos pa haci mas tanto y ta sigura nos cu nos tin Yehova su bendicion. Anto ta ki un gran satisfaccion pa sa cu nos raport personal ta inclui den e raport mundial ei! Nos raport individual ta tiki na comparacion cu e total mundial, pero Yehova no ta keda sin tuma nota di dje. (Marco 12:42, 43) No lubida, sin bo raport, e raport mundial lo no tawata completo.
14. Fuera di predica y siña otro hende, kico nos adoracion di Yehova ta encera?
14 Claro cu gran parti di loke cada Testigo ta haci pa cumpli cu su responsabilidad como un sirbido dedica di Yehova no ta aparece riba su raport. Por ehempel, e raport no ta inclui estudio personal di Bijbel riba un base regular, asistencia y participacion na reunionnan cristian, debernan den congregacion, yudansa na rumannan den fe ora tin necesidad, sosten financiero na e obra mundial di Reino, etcetera. Pues, aunke nos raport di sirbishi di veld ta importante, pasobra e ta yuda nos mantene nos celo den e predicacion y ta evita cu nos ta floha, nos tin cu mir’e den su perspectiva corecto. Nos no mester mir’e como un licencia of paspoort spiritual, esta, como si fuera ta esei ta determina si nos ta cualifica pa bida eterno.
“Celo den Hacimento di Bon Obra”
15. Aunke obra so no por salba nos, pakico nan ta necesario?
15 Pues, ta bisto cu maske obranan so no por salba nos, nan ta necesario. Ta pesei Bijbel ta yama cristiannan “un pueblo peculiar, cu celo den hacimento di bon obra” y pesei nan ta ser anima pa “considera con pa stimula otro pa stima y haci bon obra.” (Tito 2:14; Hebreonan 10:24) Mas al caso, un otro escritor biblico, Santiago, a bisa simplemente: “Mescos cu e curpa sin spirito ta morto, asina tambe fe sin obranan ta morto.”—Santiago 2:26.
16. Kico ta asta mas importante cu obranan, pero cu kico nos mester tene cuidou?
16 Pa importante cu e bon obranan por ta riba nan mes, loke ta motiva nos pa haci nan ta asta mas importante ainda. Pesei ta sabi pa tempo tempo nos analisa nos motivacionnan. Sinembargo, como cu ningun hende no por sa precis kico ta motiva otronan, nos tin cu tene cuidou cu husgamento di hende. Bijbel ta puntra nos: “Ken bo ta pa husga sirbido di otro hende?” Anto e contesta obvio ta: “Pa su mes shon e ta keda para of e ta cai.” (Romanonan ) Yehova, e Shon di tur hende, y su Hues nombra, Cristo Hesus, lo no husga nos a base di nos obranan so sino tambe a base di loke ta motiva nos, e oportunidadnan cu nos tin, nos amor y nos debocion. Ta Yehova y Cristo Hesus so por husga precis si nos a haci loke cristiannan ta ser conseha pa haci, segun e palabranan di apostel Pablo: “Haci tur bo esfuerso pa presenta bo mes aproba dilanti di Dios manera un trahado cu no tin motibo pa tin berguensa, cu ta parti e palabra di berdad na un manera corecto.”— 14:42 Timoteo 2:15; 2 Pedro 1:10; 3:14.
17. Pakico nos mester tene e palabranan di Santiago 3:17 na mente segun cu nos ta haci tur nos esfuerso?
17 Yehova ta rasonabel den loke e ta spera di nos. Segun Santiago 3:17, “e sabiduria di ariba” ta, entre otro cosnan, “rasonabel.” Lo no ta muestra di sabiduria y tambe di berdadero logro pa nos imita Yehova den esaki? Pues, nos no mester purba pone expectativanan irasonabel y inalcansabel pa nos mes ni pa nos rumannan.
18. Kico nos por anticipa ora nos tin un punto di bista balansa di nos obranan y di Yehova su bondad inmereci?
18 Tanten cu nos ta mantene un punto di bista balansa di nos obranan di fe y di Yehova su bondad inmereci, nos lo keda cu e goso cu ta un caracteristica cu ta distingui berdadero sirbidonan di Yehova. (Isaias 65:13, 14) Nos por alegra cu e bendicionnan cu Yehova ta drama riba su pueblo como grupo, sin importa cuanto kisas nos personalmente por haci. Nos lo sigui haci “oracion y suplica cu gradicimento” na Dios pa pidie yuda nos haci tur nos esfuerso. E ora ei, sin duda, “e pas di Dios, cu ta surpasa tur comprondemento, lo warda [nos] curason y [nos] mente den Cristo Hesus.” (Filipensenan 4:4-7) Si, nos por haya consuelo y animacion door di corda cu nos por ser salba, no pa medio di obra so, sino pa medio di Yehova su bondad inmereci!
Bo Por Splica Dicon Cristiannan
• no ta broma tocante logronan personal?
• ta evita di mustra un spirito di competencia?
• ta raporta nan actividad cristian den sirbishi di veld?
• ta evita di husga nan compañeronan cristian?
[Preguntanan di Estudio]
[Plachi na pagina 15]
‘Mi bondad inmereci ta basta pa bo’
[Plachinan na pagina 16, 17]
Ancianonan ta contento cu e contribucion cu cada un por haci na bienestar di e congregacion
[Plachinan na pagina 18, 19]
Sin bo raport, e raport mundial lo no ta completo