Un Pueblo Honesto Ta Trece Alabansa pa Yehova
Informe di Proclamadonan di Reino
Un Pueblo Honesto Ta Trece Alabansa pa Yehova
ROND mundo Testigonan di Yehova—hoben y bieu—ta conoci pa nan honestidad. Considera algun ehempel for di tres continente.
Olusola di 17 aña ta biba na Nigeria, y un dia cu e tawata bai cas despues di scol el a haya un cartera benta abou. El a hib’e pa e cabes di scol, y esaki a conta e placa cu a suma 6.200 naira (mas o menos 80 florin). E cabes di scol a debolbe e cartera na e docente cu a perd’e. Como muestra di aprecio, e docente a duna Olusola 1.000 naira (mas o menos 12 florin) y a bis’e uza e cen pa paga scol. Ora otro alumnonan a tende loke a pasa, nan a haci bofon di Olusola. Algun siman despues, un alumno a raporta cu nan a horta su cen, y pesei a pidi e docentenan pa rista tur alumno. E docente di Olusola a bis’e: “Abo para einan. Mi sa cu como un Testigo di Yehova, bo no por horta.” Nan a haya dos di e mucha hombernan cu a haci bofon di Olusola cu e placa, y nan a haya straf pisa. Olusola a skirbi: “Mi ta hopi contento cu mi ta conoci como un Testigo di Yehova cu nunca lo horta, y esei ta duna gloria na Yehova.”
Un dia ora cu Marcelo, un nativo di Argentina, tawata saliendo for di cas, el a haya un maletin benta abou un par di meter for di su porta patras di cas. El a bai cu e maletin den cas, y e cu su casa a habrie cu masha cuidou. Pa nan sorpresa, den e maletin tawatin un suma grandi di placa cash, tarhetanan di credito y varios cheque firma, di cua uno tawata di un miyon peso. Riba un factura nan a haya un number di telefon. Nan a bel e doño y a haci areglo pa debolbe e maletin cu su contenido na e luga caminda Marcelo ta traha. Ora e doño di e maletin a yega, e tawata parce nervioso. E doño di trabou di Marcelo a bis’e pa keda trankil pasobra Marcelo ta un Testigo di Yehova. Como recompensa pasobra Marcelo a haya e maletin, e persona a dun’e 20 peso so (mas o menos 10 florin). Esaki a pone Marcelo su doño di trabou rabia masha hopi pasobra e tawata hopi impresiona cu Marcelo su honestidad. Esaki a duna Marcelo e chens di splic’e cu como un Testigo di Yehova, e kier ta honesto na tur momento.
E siguiente experencia ta bin for di Kirghizstan. Rinat, un mucha homber di seis aña, a haya un cartera cu tawata pertenece na un señora cu tawata biba eibanda mes. E cartera tawatin 1.100 som (mas o menos 45 florin). Ora cu Rinat a debolbe e cartera perdi na e señora, e señora a conta e placa y a bisa Rinat su mama cu falta 200 som. Rinat a bisa cu e no a coi e placa. E ora ei nan tur a sali bai busca e placa cu tawata falta y nan a hay’e serca di caminda Rinat a haya e cartera. E señora a keda babuca. El a gradici Rinat y su mama, prome pasobra nan a debolbe e placa perdi, y di dos pa e educacion cristian cu Rinat su mama ta dun’e.