Unda Mundo Ta Bai?

UN MUNDO UNI. E ta zona hopi bon. No ta esei tur hende kier? Si, hende tin hopi tempo ta papia di union. Bes tras bes, reunionnan di lidernan di mundo a consentra riba e tema ei. Na augustus 2000, mas cu 1.000 lider religioso a reuni na Nacionnan Uni (New York) pa e Cumbre Mundial di Pas di Milenio. Nan a papia riba solucionnan pa e conflictonan di mundo. Sinembargo, e conferencia mes no tawata pacifico y a refleha e controversianan cu ta existi den mundo. Un mufti (un hurista profesional cu ta interpreta lei moslem) di Herusalem a nenga di bini pasobra un rabi hudiu tawata presente. Otro participantenan a sinti nan ofendi pasobra Dalai Lama no a haya invitacion pa e prome dos dianan como cu e organisadonan a pensa cu esaki lo a molestia China.

Na october 2003, e nacionnan na rand di Oceano Pacifico a papia riba asuntonan di siguridad mundial durante e cumbre di Cooperacion Economico di Asia-Pacifico (APEC) cu nan a tene na Tailandia. E 21 nacionnan cu tawata presente a hura cu nan lo desmantela gruponan terorista y a bai di acuerdo pa aumenta siguridad mundial. Durante e conferencia, sinembargo, varios representante a protesta contra e comentarionan cu un  prome minister a duna. Aparentemente el a lansa un acusacion yen di odio contra e hudiunan.

Dicon No Tin Union?

Aunke hende ta papia hopi tocante forma un mundo uni, nos ta mira masha poco resultado concreto. Dicon un mundo uni ta sigui scapa for di man di humanidad den siglo 21 aunke hopi hende ta haci esfuerso sinsero?

E pregunta aki ta ser contesta parcialmente den e comentarionan di un di e prome ministernan cu a asisti na e conferencia di APEC. El a bisa: “Tin un cos cu yama orguyo nacional.” Si, sosiedad humano ta profundamente envolvi den nacionalismo. Tur nacion y grupo etnico ta ser motiva pa e deseo di autodeterminacion, esta, di por dicidi pa nan mes. Soberania nacional combina cu e spirito di competencia y golosidad a produci un situacion cu por explota un ora pa otro. Den hopi caso, ora interesnan nacional ta na conflicto cu interesnan mundial, interesnan nacional ta haya prioridad.

Un bon descripcion di nacionalismo ta e expresion cu e salmista a uza: “E pest cu ta destrui.” (Salmo 91:3) E tawata manera un plaga riba humanidad y a causa masha hopi sufrimento. Nacionalismo y loke e ta produci—odio contra otro pueblonan—ta existi pa siglonan caba. Awe, nacionalismo ta sigui causa division, y gobernantenan humano no por stop e.

Hopi autoridad ta admiti cu nacionalismo y interes propio ta e raiz di e problemanan di mundo. Por ehempel, ex Secretario General di Nacionnan Uni, U Thant a remarca: “Hopi di e problemanan cu nos ta confronta awe ta debi na actitudnan robes ... Entre nan tin e concepto di nacionalismo intolerante—‘Sea bon of malo, ta mi pais.’” Toch nacionnan awe, cu ta wak solamente nan propio interes, ta sclama pa mas y mas soberania. Esnan cu tin bentaha no kier perde ni un tiki di nan soberania. Por ehempel, International Herald Tribune a duna e siguiente comentario tocante Union Europeo (UE): “Rivalidad y desconfiansa ta keda e caracteristicanan basico di politica Europeo.  Ainda mayoria nacion cu ta miembro di UE ta haya cu ta inaceptabel cu un di nan pareunan ta haya mas influencia y ta hiba delantera.”

Bijbel, e Palabra di Dios, corectamente ta describi e resultado di tur gobernacion humano, bisando: “Hende a eherce autoridad riba un otro hende pa su daño.” (Eclesiastes 8:9) Door cu a dividi mundo den varios nacion separa, tanto grupo di hende como personanan individual a experencia cumplimento di e principio biblico aki: “Esun cu isola su mes ta busca su mes deseo; su furia ta lanta contra tur sabiduria sano.”—Proverbionan 18:1.

Nos Creador, cu sa kico ta miho pa nos, nunca tawatin e proposito pa hende establece nan propio gobierno y goberna nan mes. Door di haci esei, hende a ignora Dios su proposito y e echo cu tur cos ta pertenece na dje. Salmo 95:3-5 ta bisa: “SEÑOR [Yehova] ta un Dios grandi, y un Rei grandi ariba tur e diosnan, den kende su man e profundidadnan di tera ta; e cabesnan di e seronan tambe ta di dje. Lama ta di dje, pasobra ta e ta esun cu a trah’e; Su mannan a forma e tera seco.” Dios ta e Soberano legitimo cu tur hende mester considera como nan gobernante. Door di busca nan propio soberania, e nacionnan ta trahando contra su boluntad.—Salmo 2:2.

Kico Ta Necesario?

E unico manera pa uni mundo ta door di tin un solo autoridad mundial cu ta traha na interes di tur hende. Hopi hende cu ta precupa cu e situacion ta reconoce cu esaki ta necesario. Sinembargo, nan ta busca hopi biaha den e direccion robes. Por ehempel, hopi comentarista—incluso lidernan religioso—a urgi hende pa spera riba Nacionnan Uni pa logra un mundo uni. Pero sin importa con noble e ideanan di organisacionnan humano ta, hamas nan lo por soluciona humanidad su problemanan internacional. Mas bien, mayoria di e organisacionnan aki simplemente a bira un refleho di e desunion cu ta existi entre varios nacion.

Bijbel ta spierta nos pa no spera riba institucionnan humano pa trece solucion ora e ta bisa: “No confia den prinsnan, den yiu di hende, den kende no tin salbacion.” (Salmo 146:3) Esaki ta nifica cu no tin speransa pa logra un mundo uni? No. Tin un otro manera pa logra esei.

Hopi hende no sa cu ya caba Dios a establece un gobierno cu ta capas pa uni mundo. Bijbel ta bisa di Yehova Dios: “Ma pa loke ta ami, mi a establece mi rei riba Sion, mi sero santo. Pidi mi, y siguramente lo mi duna bo e nacionnan como bo herencia, y e finnan di tera como bo pocesion.” (Salmo 2:6, 8) Tuma nota cu e textonan ta bisa cu Yehova Dios ‘a establece su rei’, na ken e ta referi como “mi yiu” den versiculo 7. Esaki no ta ningun otro sino e Yiu spiritual principal di Dios, Hesucristo, kende Yehova a duna autoridad riba tur nacion.

Con un Mundo Uni Lo Ser Realisa

Mayoria hende no ta reconoce e gobernacion celestial aki cu Dios a establece. E nacionnan ta keda pega persistentemente na e derecho di soberania cu nan a duna nan mes. Sinembargo, Dios lo no tolera hende cu ta nenga di reconoce Su derecho di goberna como Soberano y e gobierno cu el a establece. Relaciona cu esnan cu ta nenga di acepta e areglo aki Salmo 2:9 ta bisa: “Lo bo [e Yiu, Hesucristo] kibra nan cu bara di hero, lo bo kibra nan na pida-pida manera cos traha di klei.” Sea cu e nacionnan ta realisa esei of no, nan ta riba un caminda cu lo hiba na un confrontacion cu Dios. E ultimo buki di Bijbel ta papia di “e reinan di henter mundo”, cu ta ser reuni “pa e guera di e gran dia di Dios Todopoderoso.” (Revelacion 16:14) Dios lo extermina e nacionnan y nan manera di actua cu ta causa desunion. Esaki lo habri caminda pa e gobierno di Dios cumpli cu su trabou sin ningun estorbo.

Como Soberano di Universo, Yehova Dios sabiamente lo eherce poder mediante su Yiu pa haci e cambionan necesario pa logra un  mundo uni. E gobierno di Dios lo trece berdadero union y lo bendiciona tur amante di husticia. Pakico bo no ta tuma un par di minuut pa lesa Salmo 72 den bo Bijbel? Einan bo ta haya un descripcion profetico di loke gobernacion bou di mando di e Yiu di Dios lo haci pa humanidad. Hende lo experencia un mundo berdaderamente uni, y tur nan problemanan—opresion, violencia, pobresa, etcetera—lo disparce.

Hopi hende den e mundo dividi djawe ta kere cu e speransa ei ta irealistico. Pero ta esei ta un eror. Dios su promesanan no a faya nunca y nan lo no faya nunca. (Isaias 55:10, 11) Abo lo kier mira e cambio aki? Bo por. De echo, ya caba tin un pueblo cu ta preparando pa e tempo ei. Nan ta bini di tur nacion, pero en bes di bringa, nan ta somete nan mes awor unidamente na e soberania di Dios. (Isaias 2:2-4) Ken nan ta? Nan ta conoci como Testigonan di Yehova. Pakico bo no ta acepta e invitacion pa bishita caminda nan ta reuni? Probablemente lo bo disfruta di asociacion refrescante cu hende cu por yuda bo somete na e soberania di Dios y disfruta di un union cu lo dura pa semper.

[Plachinan na pagina 7]

Hende for di tur nacion ta preparando pa biba den un mundo uni

[Reconocemento pa Potret na pagina 4]

Saeed Khan/AFP/Getty Images

[Reconocemento pa Potret na pagina 5]

Mohe cu ta yora: Igor Dutina/AFP/Getty Images; manifestantenan: Said Khatib/AFP/Getty Images; tankinan di guera: Joseph Barrak/AFP/Getty Images