Alabando Yehova na Scol
Alabando Yehova na Scol
ROND mundo hobennan Testigo di Yehova ta haya maneranan pa alaba Dios na scol. Nan ta alaba Dios cu nan boca y nan conducta. Tuma nota di algun experencia cu ta ilustra nan entusiasmo hubenil.
Un hoben Testigo na Grecia a haya e tarea pa skirbi un opstel riba e tema di polucion di e atmosfera di tera. El a busca den e Index di Publicacionnan Watch Tower, y a haya informacion util den e revista Spierta! Na conclusion di su opstel el a duna merito na Spierta! como su fuente di informacion. Su maestra a bis’e cu su opstel tawata un di e mihonan cu el a yega di lesa. Mas despues e maestra a uza e informacion na un seminario y e tawatin bon resultado. Pesei e ruman mohe hoben aki a dicidi di ofrece e maestra mas edicion di Spierta!, incluso uno cu a presenta e serie di articulo “Con Nos Lo A Haci sin Maestro?” Despues e maestra a elogia e revista Spierta! den klas, y algun otro studiante a cuminsa pidi pa nan haya e revista. E ruman mohe mester a bin scol cu otro edicionnan di e revista pa nan por a lesa.
Na Benin, Africa, un teenager cristian a hay’e cu un tipo di presion fuera di lo usual. Manera ta e custumber einan, mayornan di varios studiante na su scol a reuni pa hunto nan paga maestronan priva pa duna e hobennan bijles den vaknan dificil y asina prepara nan pa examen. Sinembargo, e maestronan a scohe diasabra mainta pa nan duna bijles. E hobensita Testigo no a bai di acuerdo cu e ora y a bisa: “Diasabra mainta ta ora cu henter e congregacion ta sali hunto pa bai predica. Ta e parti di mas dushi di siman pa mi, y lo mi no perd’e pa nada di mundo!” Su tata, un Testigo y un mayor soltero, tambe tawata eens cu ne y a purba combence un grupo di mayor y maestro pa cambia e orario. Pero nan tur a nenga. E hobensita a dicidi di keda sin tuma e bijles. En bes di esei el a bai predica hunto cu su congregacion. Su compañeronan di klas a tent’e y a conseh’e pa stop di predica y pa e lubida riba su Dios tambe. Nan a kere cu sigur lo el a druip pa su examen. Sinembargo, na final di cuenta ta e grupo di studiante cu a haya bijles a druip, mientras cu nos ruman hobensita si a slag. No tin nodi bisa mes cu nan a stop di tent’e. Awor e studiantenan ta bis’e: “Bo tin cu sigui sirbi bo Dios.”
Un hobensita di 12 aña na Republica Checo mester a traha un spreekbeurt riba un buki. Su mama a conseh’e pa uza e buki E homber mas importante cu hamás a biba. El a cuminsa su spreekbeurt cu e pregunta: “Ken boso ta kere ta e homber mas importante cu a yega di biba?” El a describi Hesus, su bida riba tera y su siñansanan. Despues el a trata e capitulo cu tin e titulo: “Un Les den Dunamento di Pordon.” Su maestra a bisa emociona: “Esei ta e miho spreekbeurt cu mi a yega di tende di bo!” Y cu gratitud el a acepta un ehemplar di e buki. Algun compañero studiante tambe tawata kier un ehemplar. E siguiente dia, cu goso e mucha mohe a distribui 18 ehemplar.
E hobennan ei ta haya hopi goso den alaba Yehova na scol. Ta bon pa nos tur imita nan entusiasmo hubenil.