E Dilema di Trabou

“Ban trabou, ban trabou! Ki un inmenso placer di sa cu ainda nos tin e miho cosnan di haci.”—Katherine Mansfield, escritora (1888-1923).

ABO tambe tin e punto di bista idealista ei di trabou manera esun expresa den e declaracion ariba? Con abo personalmente ta mira trabou? Bo ta haya podise cu trabou ta manera un tunnel largo y scur cu bo tin cu pasa aden prome cu bo yega fin di siman pa relaha? Of bo ta gusta bo trabou asina tanto cu casi bo ta adicto na dje?

Pa mayoria hende, e mayor parti di nan dia nan ta dedica na trabou. Nos trabou kisas ta determina unda nos ta biba y ki tipo di bida nos ta hiba. Pa hopi hende, for di ora nan ta adulto hoben te ora nan baha cu pension, trabou ta e actividad cu mas ta domina nan bida. Algun di nos ta saca gran satisfaccion personal for di nos labor. Otro hende ta midi e balor di trabou a base di e cantidad di placa of prestigio cu nan por haya for di dje, mientras cu tin hende ta mira trabou como simplemente un cos pa yena tempo of asta como un perdemento di tempo.

Tin hende cu ta traha pa biba y tin cu ta biba pa traha; otronan ta muri debi na e condicionnan cu nan tin cu traha aden. Por ehempel, segun un raport resien di Nacionnan Uni, trabou ta causa mas dolor y morto “cu guera of mal uzo di droga y alcohol hunto.” Comentando riba esaki, e corant The Guardian di London a informa: “Tur aña mas cu dos miyon hende ta muri di accidente of malesa liga cu trabou ... Stof, kimiconan, bochincha y radiacion [ta] causando cancer, malesa di curason y atake celebral.” Mucha chikito den e proceso laboral y trabou forsa ta apenas dos otro realidad teribel di condicionnan di trabou djawe.

Ademas, tin loke psicologo Steven Berglas a yama “agotamento catastrofico.” Segun su descripcion esaki ta e caso di e trahado diligente cu a alcansa e top di su carera pero cu awor ta sinti “un miedo cronico, angustia, desesperacion of depresion debi cu e ta kere cu e ta atrapa den un trabou—of cu su carera a coi un rumbo—for di cua e no por scapa ni saca satisfaccion psicologico.”

Trabou Duro Versus Adiccion na Trabou

Den un mundo caminda hopi hende ta traha duro pa hopi ora, ta bon pa distingui entre e trahado diligente y esun cu ta adicto na trabou. Hopi hende adicto na trabou ta mira nan luga di empleo como un refugio den e mundo peligroso y insigur aki; e trahado diligente ta mira trabou  como un obligacion cu ta esencial y cu tin biaha ta duna satisfaccion. E adicto na trabou ta permiti trabou pusha tur otro aspecto di bida un banda; e trahado diligente sa ki ora e tin cu paga e computer, kita su mente for di trabou y consentra riba otro cos, por ehempel, percura pa e ta presente pa celebra su aña casa. Exceso di trabou ta duna esun adicto un satisfaccion emocional y ta un estimulo p’e; e trahado diligente si no ta sintie asina.

Sosiedad moderno ta pone cu ta dificil pa distingui entre nan dos como cu e ta laga parce cu exceso di trabou ta algo deseabel. Modem, telefon cellular y pager ta pone cu ta dificil pa distingui ki ora un hende ta na trabou of ki ora el a stop di traha. Ora cu cualkier sitio por ta e luga di empleo y cualkier momento por ta ora pa traha, tin hende ta laga trabou caba cu nan.

Con algun hende ta reacciona riba un actitud asina insaludabel? Sociologonan a tuma nota cu hende cu ta traha di mas y cu tin demasiado stress tin e tendencia di mescla nan trabou cu asuntonan spiritual y combina nan bida religioso cu nan bida profesional. E corant San Francisco Examiner ta informa cu “e mesclamento di spiritualidad cu trabou a bira manera un fenomeno publico.”

Un informe resien a declara lo siguiente relaciona cu Silicon Valley (California, Merca) caminda tin un consentracion di industria di alta tecnologia: “Segun cu ehecutivonan ta conta e cantidad di luga di parkeer bashi cu tin na luganan di empleo debi na e retironan cu ta sigui cai, no tin suficiente luga di parkeer na sitionan di estudio di Bijbel di anochi.” Sea cual sea e importancia di esei, hopi hende rond mundo a descubri cu Bijbel tin un influencia positivo riba nan punto di bista di trabou, locual a resulta den un manera mas balansa di hiba nan bida.

Con Bijbel por yuda nos haya un punto di bista balansa di trabou? Tin principionan biblico cu por yuda nos enfrenta e retonan di empleo di bida moderno cu exito? E siguiente articulo lo considera e preguntanan aki.