Expansion Caminda Cristianismo di Prome Siglo A Florece

ITALIA, e peninsula cu forma di boots y cu ta extende te den Lama Mediteraneo, ta un luga caminda susesonan religioso y cultural a influencia historia di mundo. Su paisahe bunita y hopi varia, su famoso obranan di arte y su platonan sabroso ta atrae miyones di turista. Ademas, e ta un pais caminda educacion biblico ta prospera.

Kisas cristianismo berdadero na prome instante a yega Roma—capital di e poder mundial di e tempo ei—ora cu Hudiu- y proselitonan cu a bira cristian na Pentecoste di aña 33 di nos era a regresa nan cas for di Herusalem. Rond di aña 59, apostel Pablo a bishita Italia pa prome biaha. Na e stad portuario Puteoli, el a “haya algun ruman” den fe.—Echonan 2:5-11; 28:11-16.

E prome siglo no a ni termina ainda ora cu gruponan di apostata a cuminsa cai pocopoco for di cristianismo berdadero, net manera Hesus y e apostelnan a predeci. Sinembargo, prome cu fin di e sistema actual di cosnan, e berdadero disipelnan di Hesus a hiba delantera den predicacion di e bon nobo rond mundo, incluso na Italia.—Mateo 13:36-43; Echonan 20:29, 30; 2 Tesalonicensenan 2:3-8; 2 Pedro 2:1-3.

Un Comienso Decepcionante

Na aña 1891, Charles Taze Russell, kende tawata dirigi e obra mundial di predicacion di e Studiantenan di Bijbel (manera Testigonan di Yehova tawata conoci e tempo ei), a bishita algun stad Italiano pa prome biaha. E tawatin cu admiti cu e resultado di su ministerio einan no tawata masha prometedor: “Nos no a mira nada pa duna nos e speransa di un cosecha na Italia.” Na lente di 1910, Ruman Russell a bolbe bishita Italia y a duna un charla biblico den un gimnasio den centro di Roma. Kico tawata e resultado? El a raporta: “En general ... e reunion tawata hopi decepcionante.”

De echo, pa varios decada predicacion di e bon nobo na Italia no a duna mucho fruta, entre otro pa motibo cu e dictadura fasista a persigui Testigonan di Yehova. Durante e periodo ei no tawatin mas cu 150 Testigo di Yehova den e pais, y mayoria di nan a siña e berdadnan biblico for di famia of amigonan cu tawata biba den exterior.

Progreso Espectacular

Despues di Segundo Guera Mundial, a manda un cantidad di misionero Italia. Pero manera e corespondencia cu tin den archivonan di Estado ta mustra, personanan di alto rango den e herarkia di Vaticano a pidi gobierno pa deporta e misioneronan. Cu algun excepcion, e misioneronan a haya nan obliga ta bandona e pais.

Apesar di obstaculo, multitud di hende na Italia a cuminsa basha bai na “e sero” di Yehova su adoracion. (Isaias 2:2-4) E aumento den  e cantidad di Testigo tawata remarcabel. Na aña 2004 tawatin un maximo di 233.527 publicado di e bon nobo, 1 pa cada 248 habitante, y 433.242 hende a asisti na Conmemoracion di e morto di Cristo. Tawatin 3.049 congregacion di Testigonan di Yehova ta reuni den Salonnan di Reino comodo. Ultimamente, specialmente cierto gruponan di e poblacion a experencia bastante aumento.

Predicando den Hopi Idioma

Hopi imigrante for di Africa, Asia y Oost Europa ta bin Italia pa busca trabou of un miho bida of, den algun caso, pa scapa di situacionnan tragico. Con lo por yuda e miyones di hendenan aki den sentido spiritual?

Hopi Testigo di Yehova na Italia a acepta e reto di siña idiomanan dificil, manera Albanes, Amarico, Arabir, Bengali, Chines, Punyabi, Singala y Tagalog. Na 2001 a cuminsa tene cursonan di idioma pa siña e Testigonan dispuesto aki con pa duna testimonio den otro idioma. Durante e ultimo tres añanan, 3.711 Testigo a asisti na 79 curso cu a ser duna na 17 idioma. Esaki a haci posibel cu por a forma y fortalece 146 congregacion y 274 grupo na 25 idioma. Di e manera aki hopi hende sinsero a logra tende e bon nobo y a cuminsa studia Bijbel. Hopi bes e resultadonan ta extraordinario.

Un Testigo di Yehova a papia tocante Bijbel cu George, un homber di India cu ta papia Malayalam. Apesar cu George tawatin problema grandi cu trabou, gustosamente el a acepta un estudio di Bijbel. Un par di dia despues, George su amigo Gil, un homber di India cu ta papia Punyabi, a bai Salon di Reino, y nan a cuminsa un estudio di Bijbel cu ne. Gil a introduci David, tambe di India pero di idioma Telugu, na e Testigonan. Poco despues, David a cuminsa studia Bijbel. Tawatin dos otro homber di India, Sonny cu Shubash, cu tawata biba den e mesun cas cu David. Ambos a join e estudio di Bijbel.

Algun siman despues, e Testigonan a haya un yamada telefonico di Dalip, un homber cu ta papia Marati. E di: “Mi ta un amigo di George. Boso por siña mi e Bijbel?” Despues a bin Sumit, un homber cu ta papia Tamil. Por ultimo, un otro amigo di George a bel pidi un estudio di Bijbel. Anto George a bin Salon di Reino cu un otro yoncuman, Max. E tambe a pidi un estudio. Te cu awor, e rumannan ta conduci seis estudio di Bijbel, y tin areglo pa cuater mas. Nan ta tene e estudionan na Ingles, maske nan ta uza tambe publicacionnan na Hindi, Malayalam, Marati, Punyabi, Tamil, Telugu y Urdu.

E Sordonan Ta “Tende” e Bon Nobo

Tin mas cu 90.000 hende sordo na Italia. Meimei di decada di 1970, e Testigonan a cuminsa duna atencion na siña nan berdadnan biblico. Na principio, algun Testigo sordo a siña e Idioma di Seña Italiano na otro Testigonan cu tawata dispuesto pa yuda den e campo ei. Despues mas y mas hende sordo a cuminsa mustra interes den Bijbel. Awe, mas cu 1.400 persona cu ta uza Idioma di Seña Italiano ta asisti na reunionnan cristian. Tin 15 congregacion y 52 grupo cu ta tene reunion den Idioma di Seña Italiano.

Na principio, predicacion na hende sordo a depende principalmente di e iniciativa di Testigonan individual. Pero na 1978, e sucursal di Testigonan di Yehova na Italia a cuminsa organisa  congreso pa hende sordo. Na mei di e aña ei a anuncia cu na e proximo congreso internacional na Milan lo bai tin sesion pa hende sordo. Nan a tene e prome asamblea di sircuito pa hende sordo na e Salon di Asamblea na Milan na februari 1979.

For di e tempo ei padilanti e sucursal a presta bon atencion na e alimentacion spiritual di hende sordo door di anima un creciente cantidad di predicado di e bon nobo pa mehora nan habilidad den e idioma aki. Desde 1995, ta manda pioneronan special (predicadonan di tempo completo) na algun grupo pa entrena Testigonan sordo den sirbishi di veld y pa organisa reunionnan cristian. Tin tres Salon di Asamblea ekipa cu sistema di video supermoderno pa asina e sordonan por mira e programa miho. Ademas tin tambe videocassette di publicacionnan cristian pa percura alimento spiritual pa hende sordo.

Observadonan a ripara cu e Testigonan ta percura bon pa e necesidadnan spiritual di hende sordo. P@role & Segni, un revista publica door di e Sosiedad Italiano di Sordonan, a cita un carta cu un monseigneur catolico a manda: “Un persona sordo ta den un situacion dificil pasobra e tin mester di atencion constante. Por ehempel, e ta yega misa su so sin problema, pero e tin mester di e yudansa di un interprete pa por sigui tur loke ta ser lesa, declara of canta durante e sirbishi.” E revista a agrega cu e prelado “ta reconoce cu desafortunadamente, iglesia no ta prepara ainda pa trata cu e incapasidad ei, y ta trece dilanti cu hopi hende sordo ta haya miho cuido den e Salonnan di Reino di Testigonan di Yehova cu den e misa di parokia.”

Predicacion di e Bon Nobo na Presonan

Un hende por ta liber y toch den prizon? Si, pasobra e Palabra di Dios tin e poder pa ‘libra’  esnan cu acept’e y aplic’e den nan bida. E mensahe cu Hesus a proclama “na e presonan” tawata libertad for di pica y religion falso. (Huan 8:32; Lucas 4:16-19) Na Italia e Testigonan ta cosecha excelente resultado door di predica den prizon. Casi 400 Testigo di Yehova a haya autorisacion di Estado pa bishita presonan afin di duna nan yudansa spiritual. Testigonan di Yehova tawata e prome organisacion no catolico cu a pidi y haya e permit ei.

E mensahe di Bijbel por plama den maneranan cu nos no ta verwacht. Presonan ta papia cu otro preso tocante e trabou di educacion biblico di Testigonan di Yehova. Tin di e presonan aki na nan turno a pidi pa haya bishita di un Testigo. Of miembronan di famia cu a cuminsa studia Bijbel ta anima e presonan pa pidi pa e Testigonan bishita nan. Algun preso cu tin castigo di bida largo pa homicidio of otro crimennan grave a repenti y a cambia nan bida drasticamente. Esaki ta prepara nan pa haci un dedicacion na Yehova Dios y pa bautismo.

Den un cantidad di prizon, e Testigonan a haci areglo pa duna discursonan publico riba temanan biblico, pa conmemora e morto di Hesus y pa pasa videocassette di programanan biblico produci door di Testigonan di Yehova. Hopi bes cantidad grandi di preso ta asisti na e reunionnan aki.

Pa yuda e poblacion di prizon den maneranan practico, e Testigonan a distribui ampliamente revistanan cu ta trata cu temanan cu e presonan lo haya util. Un di e revistanan ei tawata e Spierta! di 8 di mei 2001, cu a trata e tema “Prizoneronan Por Ser Reforma?” E edicion di 8 di april 2003 tawatin e tema “Kico Bo Por Haci si Bo Famia Ta Uza Droga?” Nan a laga miles di revista cu presonan. Como resultado, nan ta conduciendo cientos di estudio di Bijbel. Algun wardado di preso tambe a mustra interes den e mensahe di Bijbel.

Despues di a obtene un permit special for di autoridadnan, un preso cu yama Costantino a batisa den un Salon di Reino na San Remo, cu 138 Testigo presente. Costantino, kende despues di su bautismo tawata hopi emociona, a bisa: “Mi a sinti cu mi a haya un baño di amor.” Un corant local a raporta e palabranan di e director di prizon: “Ta cu hopi placer . . . nos a duna e permit aki. Nos mester considera tur loke por promove e recuperacion social, personal y spiritual di un preso.” Costantino su casa y su yiu mohe tawata impresiona cu e manera cu conocemento exacto di Bijbel a influencia Costantino su bida. Nan a bisa: “Nos ta orguyoso di dje pa e cambionan cu el a haci. El a bira pacifico, y e ta mustrando mas y mas interes den nos. Nos a bolbe haya confiansa den dje y respet p’e.” Nan tambe a cuminsa studia Bijbel y asisti na reunionnan cristian.

Sergio, kende a ser condena pa ladronicia, atraco arma, traficacion di droga y homicidio, tin cu keda sera te na aña 2024. Despues di a studia e Scritura pa tres aña y a haci cambionan grandi den su bida, Sergio a dicidi di batisa. E tawata e di 15 preso den e prizon Porto Azzuro, riba e isla di Elba, cu a batisa como Testigo di Yehova. Cu varios otro preso presente, su bautismo a tuma luga den un pisina portatil cu nan a pone riba e cancha di deporte di e prizon.

 Leonardo, kende tin un castigo di prizon di 20 aña, a obtene permit special pa batisa den un Salon di Reino na Parma. Den un entrevista cu un corant local, Leonardo a declara cu e kier a “mustra bon cla cu el a dicidi di bira un Testigo di Yehova, no como un manera pa sali for di e scuridad di prizon, sino pa satisface un necesidad spiritual profundo.” Leonardo a bisa: “Mi bida tawata un bida di eror, pero mi a lag’e atras. Mi a cambia, pero no di anochi pa mainta. Lo mi tin cu sigui cana den e caminda corecto.”

Salvatore, kende a ser condena pa homicidio, ta den e prizon Spoleto, un prizon di maximo siguridad. Su bautismo cu a tuma luga paden di e prizon, a impresiona hopi hende. E director di e prizon ei a bisa: “Mester curasha e importancia social di un escohencia cu ta hiba na miho comportacion, tanto pa probecho di e comunidad di prizon como pa henter sosiedad.” Como resultado di e cambionan cu Salvatore a haci, su casa y su yiu mohe ta asisti awor na e reunionnan di Testigonan di Yehova. Un preso cu Salvatore a predica na dje a batisa como un sirbido dedica di Yehova.

Un parti di e expansion y aumento di cristianismo di prome siglo a tuma luga na Italia. (Echonan 2:10; Romanonan 1:7) Den e tempo aki di cosecha, crecemento spiritual y expansion ta sigui tuma luga den e mesun areanan cu Pablo y su compañeronan cristian a traha duro pa predica e bon nobo.—Echonan 23:11; 28:14-16.

[Mapa na pagina 13]

(Pa e texto den su formato completo , wak e publicacion)

ITALIA

Roma

[Plachinan na pagina 15]

Salon di Asamblea di Bitonto y un congregacion di Idioma di Seña Italiano na Roma

[Plachi na pagina 16]

Berdad biblico ta haci presonan “liber”

[Plachinan na pagina 17]

Crecemento spiritual ta sigui caminda cristianismo di prome siglo a florece