Hobennan, Alaba Yehova!

“Alaba SEÑOR for di tera, ... tanto yoncuman como birgen.”—SALMO 148:7, 12.

1, 2. (a) Hopi hoben ta conciente di ki clase di restriccion? (b) Dicon hobennan no mester rabia pa e restriccionnan cu nan mayornan ta pone riba nan?

HOBENNAN hopi bes sa bon kico nan no tin mag di haci ainda. Hopi di nan por bisa bo mesora cuanto aña nan mester tin prome cu nan tin mag di crusa caya nan so of tin mag di keda lanta te cierto ora of tin mag di core auto. Tin biaha un hoben por sinti cu casi riba tur loke e pidi y ta ansioso pa ricibi e ta haya e mesun contesta: “Warda te ora bo bira mas grandi.”

² Hobennan, boso sa cu boso mayornan ta haya cu ta sabi pa pone tal restriccion, podise pa boso mes proteccion. Boso sa sigur tambe cu Yehova ta keda contento ora cu boso obedece boso mayornan. (Colosensenan 3:20) Pero cu tanto restriccion asina, boso sa sinti como si fuera boso no a echt cuminsa biba ainda? Acaso tur e cosnan importante di bida ta reserva pa te ora boso bira mas grandi?  Esaki sigur no ta berdad! Tin un trabou ta tumando luga awe cu ta hopi mas importante cu cualkier otro privilegio cu talbes boso ta wardando pa haya. Boso hobennan tin mag di participa den e trabou aki? Mas cu esei, e Dios Haltisimo mes ta invita boso pa participa den dje!

3. Yehova ta invita hobennan pa participa den ki privilegio, y ki preguntanan nos lo considera awor?

³ Di cua trabou nos ta papiando? Tuma nota di e palabranan di e texto central pa e articulo aki: “Alaba SEÑOR for di tera, . . . tanto yoncuman como birgen; anciano y mucha.” (Salmo 148:7, 12) Ata boso gran privilegio: Boso por alaba Yehova. Como un persona hoben, bo ta participa den e trabou ei cu entusiasmo? Hopi hoben tin e entusiasmo ei. Pa bo mira cu ta bale la pena pa sinti asina, laga nos considera tres pregunta. Prome, pakico bo mester alaba Yehova? Di dos, con bo por alab’e cu bon resultado? Di tres, ki ora ta bon pa cuminsa alaba Yehova?

Pakico Alaba Yehova?

4, 5. (a) Segun Salmo 148, nos ta den ki situacion maraviyoso? (b) Con creacion cu no por papia ni rasona toch ta alaba Yehova?

⁴ Un motibo importante pa alaba Yehova ta cu e ta e Creador. Salmo 148 ta yuda nos enfoca riba e berdad aki. Imagina esaki: Si bo cana yega serca un grupo grandi di persona cu hunto ta cantando un cancion bunita y conmovedor, con lo bo sinti bo? Kico si letra di e cancion ta palabranan cu bo sa cu nan ta berdad y cu nan ta expresa pensamentonan cu bo sa cu ta importante, alegre y animante? Lo bo no haya gana di siña e palabranan y cuminsa canta hunto cu nan? Mayoria di nos lo sinti asina. Wel, Salmo 148 ta mustra cu bo ta den un situacion casi mescos pero hopi mas maraviyoso. E salmo ei ta describi un multitud masha grandi mes, y nan tur hunto ta alabando Yehova. Pero segun cu bo ta lesa e salmo, kisas bo ta ripara algo straño. Kico esei ta?

⁵ Hopi di esnan cu Salmo 148 ta describi dunando alabansa, no por papia ni rasona. Por ehempel, nos ta lesa di solo, luna, streya, sneu, biento, sero y serito, tur ta alaba Yehova. Con e creacionnan aki sin bida por haci esei? (Versiculo 3, 8, 9) Wel, den e mesun manera cu e palonan, criaturanan di lama y bestianan ta hacie. (Versiculo 7, 9, 10) Bo a yega di mira un bunita bahada di solo of hisa bo cara na shelo pa mira un luna yen crusa e shelo tur na streya? Bo a yega di hari sin fin mirando bestia ta hunga of keda sumamente impresiona ora bo a mira un paisahe masha bunita mes? Na momentonan asina bo a “tende” e cantica di alabansa cu ta bin for di creacion. Tur loke Yehova a traha ta recorda nos cu e ta e Creador todopoderoso, cu no tin ningun otro persona den henter universo cu ta asina poderoso, asina sabi of asina amoroso.—Romanonan 1:20; Revelacion 4:11.

6, 7. (a) Menciona e criaturanan inteligente cu Salmo 148 ta describi alabando Yehova. (b) Dicon nos lo por sinti nos motiva pa alaba Yehova? Duna un ehempel.

⁶ Salmo 148 ta describi tambe cu creacion inteligente ta duna alabansa na Yehova. Den versiculo 2 nos ta haya Yehova su “ehersito” celestial, e angelnan, ta alaba Dios. Den versiculo 11 hende poderoso y cu influencia—manera rei y hues—ta haya e invitacion pa alaba Dios. Si e angelnan poderoso ta haya goso den alaba Yehova, un simpel hende lo tin rason pa bisa cu e ta mucho importante pa haci esei? Anto den versiculo 12 y 13 boso hobennan ta haya e invitacion pa boso tambe join e multitud y alaba Yehova. Boso ta sinti boso motiva pa haci esei?

⁷ Pensa riba e ehempel aki. Si bo tin un amigo of amiga intimo cu tin un talento asombroso—podise den deporte, arte of musica—lo bo no conta bo famia of otro amigonan tocante dje? Sigur cu si. Wel, ora nos siña tocante tur loke Yehova a haci, esei por tin mesun efecto riba nos. Por ehempel, Salmo  19:1 y 2 [NW] ta bisa cu e shelonan yen di streya ta “haci papiamento brota.” Den nos caso, ora nos pensa riba e cosnan asombroso cu Yehova a traha, nos no por keda sin papia cu otro hende tocante nos Dios.

8, 9. Pa ki motibo Yehova kier pa nos alab’e?

⁸ Un otro motibo importante pa alaba Yehova ta cu e kier pa nos haci esei. Dicon? Acaso e tin mester di hende su alabansa? No. Nos como hende tin biaha tin mester di elogio, pero Yehova ta hopi mas halto cu nos. (Isaias 55:8) E no ta duda den su mes of di su cualidadnan. (Isaias 45:5) Sinembargo, e kier pa nos alab’e y ta keda contento ora nos hacie. Dicon? Laga nos considera dos motibo. Na prome luga, e sa cu nos ta sinti cu nos mester alab’e. El a traha nos cu un necesidad spiritual, un necesidad di adora. (Mateo 5:3, NW) Yehova ta keda hopi contento ora e mira nos satisface e necesidad ei, mescos cu bo mayornan ta keda contento ora nan mira bo ta come cuminda cu nan sa cu ta bon pa bo.—Huan 4:34.

⁹ Na di dos luga, Yehova sa cu otro hende tin cu tende nos alab’e. Apostel Pablo a skirbi e palabranan aki na e yoncuman Timoteo: “Paga bon tino na bo mes y na bo siñansa; persevera den e cosnan aki; pasobra haciendo esaki lo bo sigura salbacion, tanto pa bo mes como pa esnan cu ta tende bo.” (1 Timoteo 4:16) Si, ora bo siña otro hende tocante Yehova Dios, y asina alab’e, nan tambe por bin conoce Yehova. E conocemento ei por hiba na nan salbacion eterno!—Huan 17:3.

10. Dicon nos ta sinti nos obliga pa alaba nos Dios?

¹⁰ Tin un motibo mas pa alaba Yehova. Corda e ehempel di bo amigo of amiga cu un talento remarcabel. Si bo tende otro hende papia cos cu no ta berdad tocante dje, calumni’e of daña su bon nomber, lo bo no ta mas dicidido pa papia bon di dje? Wel, rond mundo hende ta calumnia Yehova. (Huan 8:44; Revelacion 12:9) Pues esnan cu ta stim’e ta sinti nan mes obliga pa papia e berdad tocante dje, y rectifica e mal informacion. Abo tambe lo kier expresa bo amor y aprecio pa Yehova y mustra cu bo kier pa e ta bo Gobernante en bes di su enemigo principal, Satanas? Bo por haci tur esei door di alaba Yehova. E ora ei, e siguiente pregunta ta: Con bo por alab’e?

Con Algun Hoben A Alaba Yehova

11. Ki ehempelnan biblico ta mustra cu hobennan por alaba Yehova cu masha bon resultado?

¹¹ Bijbel ta mustra cu hobennan hopi biaha ta alaba Yehova cu masha bon resultado. Por ehempel, tawatin un mucha mohe Israelita cu e Sirionan a coi preso. Cu curashi el a duna testimonio na su shon tocante Yehova su profeta Eliseo. Su palabranan a hiba na un milager, cu a resulta den un gran testimonio. (2 Reinan 5:1-17) Como mucha, Hesus tambe a duna testimonio cu curashi. Di tur e susesonan di su hubentud cu lo por a wordo skirbi den e Scritura, Yehova a scohe un so. Tawata e ocasion ora cu Hesus na edad di 12 aña cu curashi tawata haci pregunta na e lidernan religioso den e tempel na Herusalem y a laga nan  babuca debi na su comprondemento di e camindanan di Yehova.—Lucas 2:46-49.

12, 13. (a) Kico Hesus a haci den e tempel poco prome cu su morto, y cu ki efecto riba e hendenan presente? (b) Kico Hesus a pensa di e alabansa cu e muchanan a expresa?

¹² Como homber grandi, Hesus a motiva muchanan pa alaba Yehova. Por ehempel, djis un par di dia prome cu Hesus su morto, e tawata na e tempel na Herusalem. Bijbel ta bisa cu el a haci “cosnan maraviyoso” einan. El a saca afo tur hende cu tawata haci e luga sagrado ei un cueba di ladron. Tambe el a cura hende ciego y lam. Tur hende presente, specialmente e lidernan religioso, lo mester a sinti nan conmovi pa alaba Yehova y su Yiu, e Mesias. Pero lamentablemente, hopi hende den e tempo ei no a expresa ningun alabansa. Nan tawata sa cu ta Dios a manda Hesus, pero nan tawatin miedo di e lidernan religioso. Sinembargo, un grupo di hende si a papia cu curashi. Bo sa ta ken? Bijbel ta bisa: “Ora cu e sacerdotenan principal y escribanan a mira e cosnan maraviyoso cu [Hesus] tawata haci, y e muchanan cu tawata grita den tempel, bisando: ‘Hosana [Salba, nos ta roga] na e Yiu di David’, nan a tuma esaki na malo. Y nan a bisa [Hesus]: ‘Bo ta tende kico esakinan ta bisa?’”—Mateo 21:15, 16; Huan 12:42.

¹³ E sacerdotenan ei tawata kier pa Hesus stop e muchanan di alab’e. Pero el a hacie? No, al contrario. Hesus a contesta e sacerdotenan: “Si; boso no a lesa nunca: ‘For di boca di mucha chikito y di yiunan na pecho bo a prepara alabansa’?” Tawata bisto cu Hesus y su Tata a keda contento cu e alabansa di e muchanan. E muchanan ei a haci loke tur e adultonan presente lo mester a haci. Den nan mente hubenil, tur cos lo mester a parce masha cla. Nan a mira e homber aki haci cosnan maraviyoso, papia cu curashi y fe, y mustra amor intenso pa Dios y pa su pueblo. E tawata loke el a bisa cu e ta—e ‘Yiu priminti di David’, e Mesias. Bendiciona pa nan fe, e muchanan asta tawatin e privilegio di cumpli cu profecia.—Salmo 8:2.

14. Con e donnan cu hobennan tin ta prepara nan pa alaba Dios?

¹⁴ Kico nos por siña for di e ehempelnan ei? Cu hobennan por ta bon alabado di Yehova. Hopi bes nan tin e don di mira e berdad masha cla y simpel, y di expresa nan fe cu sinseridad y entusiasmo. Tambe nan tin e don menciona na Proverbionan 20:29: “Gloria di hende jong ta nan forsa.” Si, boso hobennan ta bendiciona cu forsa y energia, dos bentaha grandi pa alaba Yehova. Con precis boso por uza e donnan ei na un manera efectivo?

Con Bo Por Alaba Yehova?

15. Ki motivacion ta necesario pa alaba Yehova na un manera efectivo?

¹⁵ Alabansa efectivo ta sali di curason. Bo no por alaba Yehova na un manera efectivo si bo ta hacie djis pasobra otro hende kier pa bo hacie. Corda cu e mandamento di mas grandi cu tur ta esaki: “Stima SEÑOR bo Dios cu henter bo curason, y cu henter bo alma, y cu henter bo mente.” (Mateo 22:37) Abo a siña conoce Yehova personalmente via di bo propio  estudio di su Palabra? E bon resultado di un estudio asina ta un sintimento di amor pa Yehova. E manera natural pa expresa e amor ei ta door di alab’e. Unabes cu bo motivacion ta bon cla y fuerte, bo ta cla pa alaba Yehova cu entusiasmo.

16, 17. Ki papel nos comportacion ta hunga den alaba Yehova? Duna un ehempel.

¹⁶ Pero asta prome cu bo cuminsa pensa kico lo bo bisa, pensa con lo bo actua. Si e mucha mohe Israelita di tempo di Eliseo tawatin custumber di ta vrijpostig, sin respet of deshonesto, bo ta kere cu su doñonan Sirio lo a scucha loke el a bisa tocante Yehova su profeta? Probablemente cu no. Asina tambe, tin mas chens cu hende ta scucha bo si nan ta mira cu bo ta respetuoso, honesto y di bon comportacion. (Romanonan 2:21) Pensa riba e siguiente ehempel.

¹⁷ Un mucha di 11 aña na Portugal tawata haya hopi presion na scol pa celebra dianan di fiesta cu tawata bai contra di su consenshi biblicamente entrena. Cu respet el a splica su juffrouw dicon e ta nenga di participa, pero e juffrouw a haci bofon di dje. Segun cu tempo tawata pasa, e juffrouw a purba bes tras bes di brongos’e y tawata haci bofon di su religion. Sinembargo, e hobensita a keda mustra respet. Añanan despues, e ruman hoben aki tawata sirbi como pionero regular, un predicado di tempo completo. Na un congreso, e tawata para mira e hendenan cu a bai batisa y el a reconoce un di nan. Tawata su juffrouw! Despues cu nan a brasa otro cu awa na wowo, e juffrouw a cont’e cu nunca el a lubida e comportacion respetuoso di su alumna. Un Testigo di Yehova a bishit’e, y el a conta e Testigo tocante e comportacion di su exalumna. Como resultado, el a cuminsa studia Bijbel y a acepta e berdad di Bijbel. Si, nos comportacion por ta un manera poderoso pa alaba Yehova!

18. Kico un persona hoben lo por haci si e ta duda pa cuminsa un combersacion tocante Bijbel y Yehova Dios?

¹⁸ Bo ta haya cu tin biaha na scol ta dificil pa cuminsa un combersacion tocante bo creencianan? No ta bo so ta sinti asina. Sinembargo, tin algo cu bo por haci cu muy probablemente lo pone otro muchanan puntra bo tocante bo creencianan. Por ehempel, dicon bo no ta bai scol cu publicacionnan basa riba Bijbel (si caminda bo ta biba tin mag y ta legal pa hacie) y lesa nan durante pauze of durante otro oranan cu ta permiti pa haci esei? Bo compañeronan di scol lo por puntra bo ta kico bo ta lesa. Door di contesta nan y bisa nan kico abo ta haya ta interesante di e articulo of buki cu bo ta lesando, lo bo por tin un bon combersacion mas lihe cu bo ta kere. Corda haci pregunta pa bo haya sa kico bo compañeronan di scol ta kere. Scucha nan cu respet, y comparti cu nan loke bo a siña for di Bijbel. Manera e experencianan na pagina 29 ta mustra, tin hopi hoben cu ta alaba Dios na scol. Esaki ta duna nan gran goso y ta yuda hopi hende siña conoce Yehova.

19. Con hobennan por bira mas efectivo den e predicacion di cas pa cas?

¹⁹ E predicacion di cas pa cas ta un manera masha efectivo pa alaba Yehova. Si ainda bo no ta participa den dje, pakico no pone esei como meta? Si bo ta participa den dje caba, tin mas metanan cu bo por pone pa bo mes?  Por ehempel, en bes di djis bisa basicamente e mesun cos na tur cas, busca maneranan cu bo por mehora door di pidi sugerencia serca bo mayornan y otro cristiannan cu experencia. Siña con pa uza Bijbel mas tanto, haci rebishitanan efectivo y cuminsa un estudio di Bijbel. (1 Timoteo 4:15) Mas bo alaba Yehova den e maneranan ei, mas efectivo lo bo bira, y mas lo bo disfruta di bo sirbishi.

Ki Ora Bo Tin Cu Cuminsa Alaba Yehova?

20. Dicon hobennan no mester sinti cu nan ta mucho jong pa alaba Yehova?

²⁰ Di e tres preguntanan den e articulo aki, e contesta riba e ultimo aki ta esun di mas simpel. Tuma nota di Bijbel su contesta directo: “Corda, awor, riba bo Magnifico Creador den e dianan di bo hubentud.” (Eclesiastes 12:1, NW) Si, e tempo pa cuminsa alaba Yehova ta awor. Ta masha facil pa bisa: “Mi ta mucho jong pa alaba Yehova. Mi no tin experencia. Miho mi warda te ora mi ta mas grandi.” Lo bo no ta e prome persona cu ta sinti asina. E hoben Yeremias por ehempel, a bisa Yehova: “Ai, Señor DIOS! Mira, mi no sa con pa papia, pasobra mi ta un mucha.” Yehova a sigur’e cu e no tin nodi tene miedo. (Yeremias 1:6, 7) Asina tambe, nos no tin nada di tene miedo di dje ora nos ta alaba Yehova. No tin ningun daño cu nos lo por ricibi cu Yehova no por drecha completamente.—Salmo 118:6.

21, 22. Dicon hobennan cu ta alaba Yehova ta ser compara cu serena, y dicon e comparacion aki ta un animacion?

²¹ Pesei nos ta urgi tur hoben: No duda pa alaba Yehova! Awor cu boso ta jong ta e miho tempo pa cuminsa participa den e trabou di mas importante cu ta ser haci riba tera awe. Ora boso hacie, boso ta bira parti di algo maraviyoso—parti di e famia universal cu ta alabando Yehova. Yehova ta keda hopi contento cu boso tambe ta forma parti di e famia aki. Tuma nota di e palabranan inspira aki cu e salmista a dirigi na Yehova: “Bo pueblo lo pone su mes disponibel den e dia di bo poder; den e splendor di santidad, for di e matris di marduga, bo hobennan ta pa bo manera serena.”—Salmo 110:3.

²² Serena cu ta briya den e lus di mainta ta un bista masha bunita, no ta berdad? E gotanan di serena ta refrescante, briyante y incontabel. Wel, ta asina Yehova ta mira boso hobennan cu ta alab’e fielmente den e tempo trabahoso aki. Ta bisto anto cu boso decision pa alaba Yehova ta haci su curason contento. (Proverbionan 27:11) Pues anto, boso hobennan, alaba Yehova!

Con Lo Bo Contesta?

• Cua ta algun motibo importante pa alaba Yehova?

• Cua ehempelnan biblico ta mustra cu hobennan por alaba Yehova cu masha bon resultado?

• Con hobennan por alaba Yehova awe?

• Ki ora hobennan mester cuminsa alaba Yehova, y dicon?

[Preguntanan di Estudio]

[Plachinan na pagina 25]

Si un amiga di bo tin un talento sobresaliente, lo bo no conta otro hende esaki?

[Plachi na pagina 27]

Bo compañeronan di scol kisas ta interesa den bo creencianan

[Plachi na pagina 28]

Si bo kier mehora bo sirbishi, pidi sugerencia serca un Testigo cu tin mas experencia