Mayornan, Provee pa e Necesidadnan di Boso Famia

“Si un hende no provee pa su mes hendenan, ... el a nenga e fe.”—1 TIMOTEO 5:8.

1, 2. (a) Dicon ta un animacion pa mira famianan asisti na reunionnan cristian hunto? (b) Kico ta algun situacion dificil cu famianan ta confronta pa por yega reunion na tempo?

ORA bo wak rond den e congregacion cristian prome cu un reunion cuminsa, lo bo por mira muchanan limpi y bon bisti ta cai sinta na nan luga banda di nan mayornan. No ta un placer pa mira e amor cu ta bisto den famianan asina, amor tanto pa Yehova como pa otro? Pero ta facil pa lubida cuanto esfuerso un famia tin cu haci pa yega reunion na tempo.

² Den mayoria caso, mayornan ta hopi ocupa henter dia, y e anochinan cu tin reunion, e bida di famia ta bira mas druk ainda. Mester prepara cuminda, haci trabou di cas y caba cu huiswerk. Mayornan tin e trabou di mas pisa, pasobra nan tin cu haci sigur cu tur hende a come, cu nan paña ta limpi y cu nan ta cla na tempo. Claro cu ora tin mucha, cos inespera por sosode na e momentonan di mas inoportuno. Esun mayo ta scheur su carson den hungamento, esun mas chikito ta plama su cuminda, y ata awor nan ta cuminsa pleita cu otro pa co’i kens. (Proverbionan 22:15) Cu ki resultado? Maske e mayornan a plania tur cos cuidadosamente, toch cos no ta bai manera nan a plania. Sinembargo, casi semper e famia ta yega Salon di Reino basta rato prome cu reunion cuminsa. Ta un gran animacion pa mira nan na salon siman aden siman afo, aña den aña afo, segun cu e muchanan ta crece bira grandi y sirbi Yehova.

3. Con nos por sa cu Yehova ta duna gran balor na famia?

³ Pero apesar cu bo trabou como mayor tin biaha ta dificil, y asta agotador, bo por ta sigur cu Yehova ta duna gran balor na bo esfuersonan. Yehova ta e Originador di e areglo di famia. Pesei su Palabra ta bisa cu tur famia “debe nan nomber”—si, nan existencia—na Yehova. (Efesionan 3:14, 15, NW) Pues ora boso como mayor ta haci esfuerso pa cumpli na e manera corecto cu boso papel den e areglo di famia, boso ta honra e Señor Soberano di universo. (1 Corintionan 10:31) Esei no ta un gran privilegio? Pesei ta na su luga pa nos analisa e asignacion cu Yehova a duna mayornan. Den e articulo aki, nos lo considera un aspecto di e asignacion ei, esta esun di provee of percura pa e famia. Laga nos repasa tres manera den cua Dios ta spera pa mayornan provee pa nan famia.

Provee Materialmente

4. Den famia, ki areglonan Yehova a haci pa satisface necesidad di e yiunan?

⁴ Apostel Pablo a skirbi: “Ma si un hende no provee pa su mes hendenan, y specialmente  pa esnan di su cas, el a nenga e fe y ta piyo cu un incredulo.” (1 Timoteo 5:8) Akinan ora cu Pablo a menciona “un hende”, ta ken e tawatin na mente? Tawata e cabes di famia, normalmente e tata. Dios a duna e hende mohe tambe un papel digno como ayudante di su esposo. (Genesis 2:18) Hende mohe den tempo biblico hopi bes a yuda nan esposo provee pa e famia. (Proverbionan 31:13, 14, 16) Awendia famianan di un solo mayor ta birando mas y mas comun. Hopi mayor cristian soltero ta haciendo un trabou masha admirabel di percura pa nan famia. Claro cu lo ideal ta pa un famia tin ambos mayor, cu e tata hibando delantera.

5, 6. (a) Menciona algun dificultad cu esnan cu ta purba provee materialmente pa nan hendenan ta confronta. (b) Cua punto di bista pa cu trabou lo yuda mayornan cristian persevera?

⁵ Na 1 Timoteo 5:8, ki clase di percuracion Pablo tawatin na mente? E contexto ta duna e idea cu e tawata papia directamente tocante necesidad material di e famia. Den e mundo djawe, kisas tin hopi obstaculo cu un cabes di famia ta confronta pa e por obtene e cosnan material cu su famia tin mester. Dificultadnan economico ta comun rond mundo, y tambe hopi negoshi ta manda hende cas, tin un porsentahe halto di desempleo y un aumento continuo den costo di bida. Kico por yuda un mayor persevera apesar di situacionnan dificil asina?

⁶ Un mayor cu ta provee pa su famia mester corda cu e ta cumpliendo cu un asignacion di Yehova. Pablo su palabranan inspira ta mustra cu un hende cu por obedece e mandamento aki y toch ta nenga di hacie, ta mescos cu un persona cu “a nenga e fe.” Un cristian lo haci tur su esfuerso pa evita di ta den tal posicion dilanti di su Dios. Pero lamentablemente, hopi hende den e mundo djawe ta “sin amor.” (2 Timoteo 3:1, 3) De echo, tin masha hopi tata ta bula pipa pa nan responsabilidad y ta laga nan famia desampara. Esposonan cristian no tin e punto di bista sin heful y negligente ei den e asunto di provee pa nan mes hendenan. Distinto for di hopi di nan coleganan, mayornan cristian ta considera asta e trabou di mas humilde como un trabou digno y importante, un medio pa agrada Yehova Dios, ya cu e trabou ei ta haci posibel cu nan por percura pa nan sernan keri.

7. Dicon ta bon pa mayornan medita riba Hesus su ehempel?

⁷ Un cos cu tambe por yuda cabesnan di famia ta di medita riba Hesus su ehempel perfecto. No lubida cu Bijbel profeticamente ta referi na Hesus como nos “Tata Eterno.” (Isaias 9:6, 7) Siendo “e ultimo Adam”, Hesus de echo ta remplasa “e prome hende, Adam” como tata di tur cu eherce fe. (1 Corintionan 15:45) Distinto for di Adam, kende a resulta di ta un tata egoista cu a busca su propio interes, Hesus ta e tata ideal. Bijbel ta bisa di Hesus: “Na esaki nos conoce amor, cu el a entrega su bida pa nos.” (1 Huan 3:16) Si, Hesus boluntariamente a entrega su propio bida pa otro hende. Sinembargo, riba un base diario tambe el a pone e necesidadnan di otro hende prome cu esnan di su mes den asuntonan menos crucial. Mayornan, boso lo haci bon di imita e spirito di sacrificio propio ei.

8, 9. (a) Kico mayornan por siña for di e manera sin egoismo cu parha ta percura pa nan yiunan? (b) Con hopi mayor cristian ta demostra un spirito di sacrificio propio?

⁸ E palabranan cu Hesus a dirigi na Dios su pueblo rebelde por siña mayornan hopi cos tocante amor abnega: “Cuanto biaha mi no tawata kier a hunta bo yiunan, manera un galiña ta hunta su puyitonan bou di su halanan”! (Mateo 23:37) Aki Hesus a describi na un manera bibo con un galiña ta proteha su yiunan cu su halanan. Mayornan realmente por siña hopi for di e instinto di parha cu ta cla pa proteha su puyitonan, asta riscando su bida. Pero loke parhanan cu tin yiu ta haci riba un base diario tambe ta remarcabel pa mira. Nan ta bula bai bin nonstop en busca di cuminda. Asta ora nan ta morto cansa, nan ta sigui hinca cuminda den boca di nan  puyitonan, cu ta guli e cuminda y por lo general ta keda sclama pa mas. Hopi criatura di Yehova ta “sabi” di instinto den e manera cu nan ta atende necesidad di nan yiunan.—Proverbionan 30:24.

⁹ Den un manera similar, mayornan cristian rond mundo ta demostra un spirito admirabel di sacrificio propio. Boso ta prefera di perhudica boso mes cu permiti boso yiunan sufri cualkier daño. Ademas, tur dia boso ta haci sacrificio boluntariamente pa por percura pa boso yiunan. Hopi di boso ta lanta mainta tempran pa bai un trabou cu ta sea masha laf of cu ta causa hopi cansancio. Boso ta traha duro pa pone cuminda nutritivo riba mesa. Boso ta lucha pa haci sigur cu boso yiunan tin paña limpi, luga apropiado pa biba y un educacion adecuado. Anto boso ta sigui haci esei dia tras dia, aña tras aña. Tal sacrificio propio y perseverancia sigur sigur ta agrada Yehova! (Hebreonan 13:16) Pero alabes boso ta corda cu tin maneranan mas importante den cua boso mester provee pa boso famia.

Provee Spiritualmente

10, 11. Cua ta e necesidad humano di mas importante, y kico mayornan cristian tin cu haci prome pa por satisface e necesidad aki den nan yiunan?

¹⁰ Asta mas importante cu haci percuracion material ta pa haci percuracion spiritual. Hesus a bisa: “Hende lo no biba di pan so, ma di tur palabra cu ta sali for di boca di Dios.” (Mateo 4:4; 5:3, NW) Kico boso como mayor por haci pa provee spiritualmente pa boso famia?

¹¹ Kisas no tin ningun otro parti di e Scritura cu mas ta ser cita riba e topico aki cu Deuteronomio 6:5-7. Sea asina bon di habri bo Bijbel y lesa e versiculonan ei. Tuma nota cu Dios ta bisa mayornan cu na prome luga nan tin cu cultiva nan propio spiritualidad door di edifica amor pa Yehova y tuma su palabranan na pecho. Si, como mayor bo mester ta un studiante serio di e Palabra di Dios. Bo mester lesa Bijbel cu regularidad y medita riba dje di manera cu bo por desaroya un berdadero comprondemento y amor pa Yehova su caminda-, principio- y leinan. Esei lo yena bo curason cu berdadnan fasinante cu lo motiva bo pa sinti goso, respet profundo y amor pa Yehova. Lo bo tin un abundancia di cos bon pa comparti cu bo yiunan.—Lucas 6:45.

12. Con mayornan por imita Hesus su ehempel den e asunto di inculca berdadnan biblico den nan yiunan?

¹² Mayornan spiritualmente fuerte ta prepara pa aplica e conseho cu tin na Deuteronomio 6:7, esta, pa siña nan yiunan cu tur diligencia of “inculca” [NW] e palabranan di Yehova den nan ki ora cu nan haya un chens. “Inculca” ta nifica  siña y enfatisa door di ripiticion. Yehova sa bon cu nos tur—pero specialmente mucha—tin mester di ripiticion pa nos siña. Pues, Hesus a uza ripiticion den su sirbishi. Por ehempel, ora el a siña su disipelnan pa nan ta humilde en bes di orguyoso y competitivo, el a uza varios manera pa ripiti e principio ei. El a siña nan door di rasona, door di bin cu comparacion y asta door di demostra nan esei. (Mateo 18:1-4; 20:25-27; Huan 13:12-15) Pero remarcablemente, Hesus nunca a perde pasenshi cu nan. Asina tambe mayornan tin cu busca maneranan pa siña nan yiunan berdadnan basico, y ripiti Yehova su principionan cu pasenshi te ora cu e muchanan capta nan y aplica nan.

13, 14. Cua ta algun ocasion cu mayornan por inculca berdadnan biblico den nan yiunan, haciendo uzo di ki material?

¹³ Estudio di famia ta ocasionnan ideal pa duna tal siñansa. De echo, un estudio di Bijbel regular y edificante como famia ta un factor clave pa spiritualidad di e famia. Famianan cristian rond mundo tin goso den estudionan asina. Nan ta haci uzo di literatura cu Yehova su organisacion ta percura y ta adapta e estudio na e necesidadnan di e muchanan. E buki Siña for di e Gran Maestro a resulta un bendicion extraordinario den e aspecto aki, y tambe e buki Loke hovenan sa puntra—Contesta práctica. * Sinembargo, e estudio di famia no ta e unico ocasion pa siña yiunan.

¹⁴ Manera Deuteronomio 6:7 ta mustra, tin hopi ocasion cu boso como mayor por combersa tocante cosnan spiritual cu boso yiunan. Sea cu boso ta riba caminda hunto, ta haci trabou hunto of ta relax hunto, boso por haya chens pa provee pa boso yiunan su necesidad spiritual. Claro cu no ta nonstop boso tin cu duna boso yiunan un “sermon” tocante berdadnan biblico. Mas bien, purba mantene e combersacion di famia riba un nivel edificante y spiritual. Por ehempel, e revista Spierta! tin hopi articulo riba un gran variedad di topico. E tipo di articulonan ei por habri caminda pa boso combersa tocante Yehova su creacion animal, luganan di beyesa natural cu tin rond mundo y e maraviyoso variedad cu tin den cultura humano y estilo di bida. Tal combersacion por motiva hobennan pa bai lesa mas literatura cu e esclabo fiel y prudente ta percura.—Mateo 24:45-47.

15. Con mayornan por yuda nan yiunan mira e sirbishi cristian como un actividad interesante y recompensador?

¹⁵ Combersacionnan edificante cu bo yiunan lo yuda bo satisface un otro necesidad spiritual. Muchanan cristian tin cu siña comparti nan fe na un manera efectivo cu  otro hende. Segun cu boso ta papia tocante un of otro punto interesante cu tin den E Toren di Vigilancia of Spierta!, lo bo por busca chens di conecta e informacion cu sirbishi di veld. Por ehempel, lo bo por puntra: “Lo no ta great si mas hende tawata sa e punto aki tocante Yehova? Con bo ta kere cu nos lo por lanta un hende su interes den e topico aki?” Combersacionnan asina lo yuda hobennan desaroya mas smak pa comparti cu otro hende loke nan ta siña. Anto despues ora bo yiunan ta compaña bo den sirbishi, nan ta mira un ehempel bibo di pone tal combersacion na practica. Tambe esaki por siña nan cu sirbishi di veld ta un trabou interesante y dushi, cu e ta produci gran satisfaccion y goso.—Echonan 20:35.

16. Kico yiunan por siña door di scucha nan mayornan su oracion?

¹⁶ Mayornan ta provee tambe pa nan yiunan su necesidad spiritual ora nan ta haci oracion. Hesus a siña su disipelnan con pa haci oracion, y el a haci oracion cu nan na hopi ocasion. (Lucas 11:1-13) Djis pensa cuanto cos nan a siña door di haci oracion hunto cu e Yiu di Yehova! Asina tambe bo yiunan por siña hopi cos for di bo oracionnan. Por ehempel, nan por siña cu Yehova kier pa nos papia cu ne libremente di curason, y acudi na dje cu cualkier precupacion cu nos lo por tin. Si, nos oracionnan por yuda nos yiunan siña un berdad spiritual masha importante: Nan por tin un amistad cu nan Tata celestial.—1 Pedro 5:7.

Provee Emocionalmente

17, 18. (a) Con Bijbel ta revela e importancia di mustra amor na yiu? (b) Con tatanan mester imita Yehova den expresa amor na nan yiunan?

¹⁷ Claro cu yiunan tin tambe necesidad emocional cu ta rekeri atencion serio. E Palabra di Dios ta bisa mayornan con importante ta pa satisface e necesidad aki. Por ehempel, Bijbel ta anima mohenan hoben pa “stima nan yiunan.” (Tito 2:4) Esaki en berdad ta un manera sabi pa actua. Pasobra esei ta siña un mucha con pa stima y ta trece beneficionan pa resto di su bida. Di otro banda, ta un bobedad pa keda sin mustra amor na un yiu. Esei ta causa hopi dolor y ta indica cu nos no ta imita Yehova, kende ta demostra gran amor na nos apesar di nos imperfeccionnan.—Salmo 103:8-14.

¹⁸ Yehova asta ta tuma e iniciativa pa stima su yiunan riba tera. Manera 1 Huan 4:19 ta bisa, “el a stima nos prome.” Vooral aboso, tatanan, mester imita Yehova su ehempel y tuma e iniciativa pa forma un laso amoroso cu boso yiunan. Bijbel ta urgi tatanan pa no proboca of irita nan yiunan “pa nan no perde animo.” (Colosensenan 3:21) Un di e cosnan cu mas ta proboca yiunan ta e impresion cu un mayor no ta stima nan of balora nan. Ta bon pa tatanan cu no ta gusta expresa nan sintimento corda riba Yehova su ehempel. Yehova a papia asta for di shelo pa expresa su aprobacion y amor pa su Yiu. (Mateo 3:17; 17:5) Ki un gran animacion esei lo mester tawata pa Hesus! Asina tambe mayornan su expresionnan honesto di amor y aprobacion ta duna yiunan hopi forsa y curashi.

19. Dicon disiplina ta importante, y ki balansa mayornan cristian ta purba haya?

¹⁹ Claro cu e amor cu mayornan tin pa nan yiunan ta mas cu palabra so. Amor ta ser expresa principalmente cu accion. Provee materialmente y spiritualmente pa yiu por ta un  expresion di mayornan su amor, specialmente ora nan ta hacie den un manera cu ta laga yiunan compronde cu ta amor ta nan motivacion principal. Fuera di esei, disiplina tambe ta un expresion importante di mayornan su amor. De echo, “esnan cu SEÑOR ta stima, e ta disiplina.” (Hebreonan 12:6) Di otro banda, mayornan cu no ta duna disiplina ta demostra cu en realidad nan ta odia nan yiunan! (Proverbionan 13:24) Yehova semper ta mantene e balansa corecto y ta disiplina “manera mester ta”, esta, na e midi apropiado. (Yeremias 46:28) No ta semper facil pa mayornan imperfecto haya e balansa ei. Pero toch ta bale la pena pa boso haci tur esfuerso pa alcansa e balansa ei. Disiplina firme y amoroso ta yuda un yiu hiba un bida felis y productivo ora e bira grandi. (Proverbionan 22:6) Acaso esei no ta loke tur mayor cristian kier pa nan yiu?

20. Con mayornan por duna nan yiunan e miho oportunidad cu tin pa “scohe bida”?

²⁰ Ora cu boso como mayor ta haci e trabou importante cu Yehova a asigna na boso—esta, provee pa boso yiunan su necesidadnan material, spiritual y emocional—e recompensanan ta grandi. Boso ta duna boso yiunan e miho oportunidad cu tin pa “scohe bida” y pa despues sigui “biba.” (Deuteronomio 30:19) E yiunan cu scohe pa sirbi Yehova y keda riba e caminda pa bida segun cu nan ta madura ta duna nan mayornan tremendo goso. (Salmo 127:3-5) E goso ei lo dura pa semper! Pero con hobennan por alaba Yehova awor? E siguiente articulo lo trata e tema ei.

[Nota]

Con Lo Bo Contesta?

Kico mayornan por haci afin di provee pa nan yiunan

• materialmente?

• spiritualmente?

• emocionalmente?

[Preguntanan di Estudio]

[Plachi na pagina 18]

Hopi parha ta traha incansablemente pa provee pa nan yiunan

[Plachi na pagina 20]

Mayornan mester cultiva nan propio spiritualidad prome

[[Plachinan na pagina 20, 21]

Tin hopi ocasion cu mayornan por siña nan yiunan tocante e Creador

[Plachi na pagina 22]

E aprobacion di un mayor ta duna yiu forsa y curashi